1. Hadia nifaduhusi tödö Marata si tola alua khö dalifusönia matua? (Faigi gambara ba wamobörö wamaha’ö.)

ABU sibai dödö zi fahuwu hegöi nifaha’ö Yesu sotöi Marata. No mate dalifusönia matua sotöi Lazaro. Hadia zi möi fondrara dödönia? Ifabu’u khönia Yesu, ”Maoso dania dalifusöu andrö.” Tatu manö, lö i’anemai’ö taya fefu gabula dödönia ba wehede da’ö. Hiza’i, faduhu dödö Marata ba zi no ifabu’u Yesu ba imane, ”U’ila sa, maoso ia dania, ba wemaoso andrö na luo safuria.” (Yohane 11:20-24) Faduhu dödönia wa so wanusugi ba zi so miföna. Hiza’i, ifalua dandra sahöli-höli dödö Yesu. I’anemai’ö isusugi Lazaro ba ngaluo da’ö.

2. Hana wa omasi’ö ö’okhögö wa’afaduhu dödö simane Marata?

² Lö hadöi dani ni’okhögöda irege tatötöna wa isusugi niha ni’omasi’öda Yesu hegöi Amania iada’a. Hiza’i, hadia ö’okhögö wa’afaduhu dödö simane Marata wa hasambalö tesusugi niha ni’omasi’ömö ba zi so miföna? Te no iröi ndra’ugö fo’omomö, satuamö, kakemö, nenemö mazui onomö ni’omasi’ömö. Öbalo-baloi ginötö ba wanalagui  ya’ira, fahuhuo hegöi fao ba wa’iki khöra. Simane Marata, omuso dödömö börö me so dani ni’okhögömö ba wanguma’ö, ’U’ila wa hasambalö ifuli auri niha ni’omasi’ögu.’ Hewa’ae simanö, ya’ita niha Keriso moguna ta’angeraigö hadia manö dani si tola mamaduhu’ö tödöda ba da’ö.

3, 4. Hadia manö zawena ifalua Yesu, ba hewisa wa tola möi fangaro’ö dödö Marata da’a?

³ Toröi Marata lö aröu moroi ba Yeruzalema. Andrö, te lö ni’ilania me isusugi nono matua khö lakha mbanua Yesu sahatö ba mbanua Na’i ba Galilaia. Hiza’i, tola manö no irongo da’ö. Aefa da’ö, te no irai göi irongo wa no isusugi nono Ya’iro Yesu. Fefu niha si so ba nomo nono da’ö ’la’ila wa no mate ia’. Hiza’i, igogohe dangania Yesu ba imane, ”He onogu, faoso!” Ba i’anemai’ö maoso ia. (Luka 7:11-17; 8:41, 42, 49-55) I’ila Marata hegöi talifusönia alawe sotöi Maria wa tola ifadöhö niha sofökhö Yesu. Andrö wa faduhu dödöra na so Yesu ba da’ö lö mate Lazaro. Hiza’i, iada’a no mate ia. Hadia nitötöna Marata? Imane wanguma’ö wa hasambalö ifuli auri Lazaro ”na luo safuria” ya’ia da’ö ba zi so miföna. Hana wa tola faduhu sibai dödönia? Ba hana wa tola faduhu dödömö wa hasambalö so wanusugi ba zi so miföna, irege tola falukha ndra’ugö ba niha ni’omasi’ömö?

⁴ So dani si sökhi ni’okhögöda si tola mamaduhu’ö tödöda wa so wanusugi. Datatutunö ösa moroi ba gotaluania. Tola manö ösöndra wamaha’ö si sökhi ba Daromali Lowalangi si lö irai ö’angeraigö ba zilalö. Hiza’i, da’a zondrou’ö famatimö wa hasambalö ifuli falukha’ö ba niha ni’omasi’ömö.

5. Hana wa faduhu dödö Marata wa hasambalö tesusugi Lazaro?

⁵ Nehegö hadia niwa’ö Marata. Lö imane, ’Utötöna ena’ö tesusugi dalifusögu.’ Hiza’i imane, ”U’ila sa, maoso ia dania.” Hana wa faduhu sibai dödö Marata? Börö me no ifaha’ö ia ba wanusugi si no irai alua ba götö föna. Tola manö no irongo da’ö me so ia ba nomo hegöi ba sinagoga i’otarai me ide-ide ia. Iada’a, datatutunö tölu wanusugi si no tesura ba Zura Ni’amoni’ö.

6. Hadia dandra sahöli-holi dödö si no ifaha’ö ia Marata?

⁶ Fanusugi si oföna, alua ia ba ginötö ibe’e wa’abölönia Lowalangi khö zama’ele’ö sotöi Elia ba wamalua tandra sahöli-höli dödö. Ba Gizara’eli tanö yöu, ba mbanua Zarefa si so ba Fenisia, so samösa lakha mbanua si tosasa sangoroma’ö fa’oböwö khö zama’ele’ö andrö. Buania, ifalua khönia dandra sahöli-höli dödö Yehowa. Lö irai ahori darigu hegöi fanikha si so ba nomonia irege tola auri ia hegöi ononia. (1 Razo 17:8-16) Ba gafuriata, mofökhö nononia ba mate. Hiza’i, itolo ia Elia. Igogohe danga nono matua andrö Elia ba mangandrö ia khö Yehowa imane, ”Lowalangigu, be’e mangawuli noso nono matua andre.” Ba alua da’ö! Ifondrondrongo wangandrönia Lowalangi ba ifuli auri nono da’ö. Da’a wanusugi si oföna nisura ba Zura  Ni’amoni’ö. (Baso 1 Razo 17:17-24.) Tatu no ifaha’ö ia Marata ba zalua sahöli-höli dödö andrö.

7, 8. (a) Hewisa wame’e Gelisa fondrara dödö khö zi samösa ina sabu tödö börö wa’amate? (b) Hadia niforoma’ö dandra sahöli-höli dödö nifalua Gelisa sanandrösa khö Yehowa?

⁷ Fanusugi si mendrua nisura ba Zura Ni’amoni’ö ifalua sama’ele’ö sotöi Gelisa. Ba mbanua Zunema, so samösa ndra alawe iraono Gizara’eli si lö ono. Börö me iforoma’ö wa’oböwö khö Gelisa, ifahowu’ö ia Yehowa hegöi fo’omonia si no alawa döfi, ibe’e khöra samösa nono matua. Hauga fakhe aefa da’ö, mate nono matua andrö. Afatö sibai dödö ninania. Da’ö mbörö wa möi ia ifalukhaisi Gelisa ba Hili Garemeli, fa’aröunia 30 kilometer. Ifatenge genoninia Elisa sotöi Gehazi ba wangorifi nono matua andrö ba mbanua Zunema, fatua lö möi ira ba da’ö. Hiza’i, tebai ifuli i’orifi ia Gehazi. Aefa da’ö, ofeta ninania sabu tödö hegöi Elisa ba nomo andrö.​—2 Razo 4:8-31.

⁸ Möi Gelisa ba naha nono matua si no mate andrö ba ilau mangandrö. Ifondrondrongo wangandrönia Yehowa ba alua dandra sahöli-höli dödö, ifuli auri nono matua andrö. Me i’ila inania wa no ifuli auri nono da’ö, omuso sibai dödönia! (Baso 2 Razo 4:32-37.) Tola manö, itörö tödönia ngawua wehede wangandrö Hana. Tebai mo’ono Hana irege ba gafuriata ibe’e khönia nono matua Yehowa sotöi Samueli. Aefa da’ö, isuno Yehowa Hana börö me ya’ia zolohe ba Lewatö ba ya’ia göi zanusugi. (1 Zamueli 2:6) Me i’orifi nono matua si so ba mbanua Zunema andrö, iforoma’ö Lowalangi wa so khönia wa’abölö ba wanusugi niha si no mate.

9. Tutunö wanusugi si tölu nisura ba Zura Ni’amoni’ö.

⁹ Tandra sahöli-höli dödö tanö bö’ö alua ia me no aefa mate Gelisa. No tobali ia sama’ele’ö ba zi töra 50 fakhe fa’ara, ba aefa da’ö ”mofökhö Gelisa, fökhö ba wa’amate”. Me no numalö ginötö, atö tölania zi toröi. Ba zi samuza inötö, so ndraono Gizara’eli si möi mogo’o zi samösa ira matua. Hiza’i, ba zi lö ladöna-döna la’ila so nudu si tohare. I’anemai’ö lalau moloi ba lafazibo zi mate andrö ba lewatö Gelisa. Imane Sura Ni’amoni’ö, ”Ba me fabaya ba mboto Gelisa mboto zi mate andrö, ba ifuli auri, muzizio.” (2 Razo 13:14, 20, 21) Fefu zalua andre zangaro’ö dödö Marata wa so kuaso Lowalangi ba wa’amate. Da’a göi zangaro’ö tödömö wa ebua sibai ba lö hadöi nola-ola wa’abölö Lowalangi.

10. Hewisa wanolo Wetero dalifusöda ira alawe niha Keriso si no mate?

¹⁰ Isura göi Mbuku Ni’amoni’ö Yunani Niha Keriso sanandrösa ba wanusugi nifalua niha samosumange Lowalangi si lö faröi. No tatutunö wanusugi  nifalua Yesu ba mbanua sahatö ba Na’i hegöi ba nomo Ya’iro. Aefa da’ö, sinenge sotöi Fetero isusugi göi Doreka nifotöi Tabita. Möi Wetero ba mbate’e si so Tabita. Aefa da’ö ilau mangandrö ba imane, ”Faoso, Tabita!” I’anemai’ö ifuli auri ia, ”ba i’oroma’ö” Fetero ba niha Keriso tanö bö’ö wa no ifuli auri Tabita. Ba zalua andre, ato niha ba mbanua da’ö ”zamati khö Zo’aya”. Ira nifaha’ö si bohou andre laturiaigö duria si sökhi sanandrösa khö Yesu hegöi fa’abölö Yehowa ba wanusugi niha si no mate.​—Halöwö Zinenge 9:36-42.

11. Molo’ö Luka, hadia zalua khö zi samösa ono matua, ba hadia mbuania zalua andrö ba niha bö’ö?

¹¹ So wanusugi tanö bö’ö si no la’ila niha sato. Samuza inötö, owulo Waulo ba mbate’e tanö yawa ba Deroa, iada’a so ia tanö ba gaekhula nasi mbanua Turki. Fahuhuo Waulo irugi talu mbongi. So samösa nono matua samondrondrongo sotöi Oitikho ba no modadao ia ba zandrela. Hiza’i, manuköu ia ba aekhu ia si tou. Te Luka zi oföna mamareso ya’ia. Börö me doto ia, i’ila wa tenga ha lita hegöi mesokho, hiza’i no mate! Aefa da’ö, möi tou Waulo. Italagui Oitikho ba tokea fefu niha me imane, ”No auri ia.” Tandra sahöli-höli dödö andre so mbuania ba niha sangila ya’ia. La’ila wa no mate nono matua da’ö, hiza’i ifuli tesusugi. Buania, ’terara sibai dödöra’.​—Halöwö Zinenge 20:7-12.

12, 13. Ba wanusugi si no tatutunö, hadia wanofu-nofu si tola tumbu ba dödöda?

¹² Ba zi hauga ngawua wanusugi si no tatutunö, tatu manö tola ö’okhögö wa’afaduhu dödö simane Marata. Tola faduhu dödöda wa Lowalangida, same’e fa’auri, tola ifuli i’orifi niha si no mate. Sadöni dödöda, ero alua wanusugi hasambalö so zamosumange Lowalangi  si lö faröi simane Elia, Yesu mazui Fetero. Alua göi ia ba ginötö ifalua dandra sahöli-höli dödö Yehowa ba nono mbanuania. Hiza’i, hewisa niha si no mate ba ginötö lö hadöi dandra sahöli-höli dödö simane da’ö? Hadia tola manötöna niha si lö faröi wa hasambalö isusugi niha si no mate Lowalangi ba zi so miföna? Hadia tola faduhu dödöra simane Marata me iwa’ö, ”U’ila sa, maoso ia dania, ba wemaoso andrö na luo safuria”? Hana wa faduhu dödönia wa so wanusugi ba zi so miföna ba hana wa tola faduhu göi dödömö?

¹³ Ono mbanua Lowalangi si lö faröi ba götö föna nitutunö ba Daromali Lowalangi, la’ila wa so wanusugi ba zi so miföna. Datatutunö duma-dumania.

14. Hadia wamaha’ö si tola tahalö sanandrösa ba wanusugi moroi ba waö-waö salua khö Gaberahamo?

¹⁴ Angeraigö hadia ni’andrö Yehowa khö Gaberahamo sanandrösa khö Giza’aki, ono si no ara itötöna. Imane Yehowa, ”Halö nonou andrö si ha sambua, somasi ndra’ugö, Iza’aki andrö, ba ae ba danö Moriya, ba be’e sumange nitunu ia.” (1 Moze 22:2) Molo’ö ya’ugö, hewisa dödö Gaberahamo me irongo fareta da’ö? No ifabu’u Yehowa wa moroi ba nga’ötö Gaberahamo tefahowu’ö fefu soi. (1 Moze 13:14-16; 18:18; Roma 4:17, 18) Iwa’ö göi Yehowa wa te’asogö howu-howu andrö moroi ba ”ma’uwu Giza’aki”. (1 Moze 21:12) Hiza’i, hewisa wa tola alua da’ö na ibe’e nononia andrö Aberahamo tobali sumange? Itutunö Faulo wa faduhu dödö Gaberahamo wa tola isusugi Giza’aki Lowalangi. (Baso Heberai’o 11:17-19.) Hiza’i, lö itutunö Sura Ni’amoni’ö wa so ba wangera-ngera Gaberahamo wa i’anemai’ö tesusugi Giza’aki te ba zi hauga za, hari mazui ba zi hauga migu aefa da’ö. Lö i’ila Aberahamo hawa’ara tesusugi nononia andrö. Hiza’i, faduhu dödönia wa hasambalö ifuli isusugi Giza’aki Yehowa.

15. Hadia dötönafö ni’okhögö Yobi?

 ¹⁵ Ira matua si lö faröi sotöi Yobi, i’ila wa so wanusugi ba zi so miföna. Aboto ba dödönia wa na la’obö geu, tola ifuli moliwiö ba tobali eu si bohou. Hiza’i, tenga simane da’ö zalua ba niha. (Yobi 14:7-12; 19:25-27) Na mate niha, tebai ifuli i’orifi ia samösa. (2 Zamueli 12:23; Zinunö 89:49) Hiza’i, tenga da’ö geluahania wa tebai isusugi niha si no mate Lowalangi. Sindruhunia, faduhu dödö Yobi wa hasambalö itörö tödö Yehowa ia. (Baso Yobi 14:13-15.) Lö i’ila Yobi hawa’ara alua da’ö ba zi so miföna. Hiza’i, faduhu dödö Yobi wa tola ba hasambalö itörö tödö ba isusugi ia Somböi fa’auri.

16. Hadia wamarou dödö nibe’e mala’ika khö Danieli?

¹⁶ Angeraigö ndra matua si lö faröi tanö bö’ö, Danieli. Lö faröi ia khö Yehowa sandrohu fa’aurinia, ba ituhini ia Yehowa. Ba zi sambua inötö, so samösa mala’ika sanguma’ö khö Danieli ”omasiö” ba iwa’ö khönia ”ya’ohahau dödöu” ba ”abe’e’ö ndra’ugö”.​—Danieli 9:22, 23; 10:11, 18, 19.

17, 18. Hadia nifabu’u Yehowa khö Danieli?

¹⁷ Me arakhagö 100 fakhe ndröfi Danieli ba me arakhagö mate ia, te i’angeraigö hadia zalua na no mate ia. Hadia itötöna Danieli ena’ö ifuli auri ia? Tatu manö! Ba gafuriata mbuku Danieli, tola tabaso hadia nifabu’u Lowalangi khönia, ”Ya’ugö, ba ae’e, amaedola öfaondragö gamozua; solombase ndra’ugö ua.” (Danieli 12:13) I’ila Danieli wa niha si no mate hulö zolombase ba ”lö fa’onekhe ba lö fa’aboto ba dödö ba lö fa’atua-tua” ba nahia nisawania, ba Lewatö. (Zangombakha 9:10) Hiza’i, tenga amozua da’ö khö Danieli. Ibe’e khönia Yehowa mbu’usa li si sökhi ba zi so miföna.

¹⁸ Imane khönia mala’ika Yehowa, ”Maoso’ö dania, ba wanema tana khöu andrö, ba gamozua götö danö andre.” Lö i’ila Danieli hawa’ara alua da’ö. I’ila wa mate ba molombase ia. Hiza’i, me irongo mbu’usa li da’a, ”Maoso’ö dania, ba wanema tana khöu”, aboto ba dödönia wa tesusugi ia ba zi so miföna. Alua da’ö ara me no aefa mate ia, ya’ia da’ö ”ba gamozua götö danö andre”.

19, 20. (a) Hadia gamakhaita wa’afaduhu dödö Marata faoma fefu zi no tatutunö? (b) Hadia nitutunöda ba wamaha’ö aefa da’a?

¹⁹ No ta’ila wa so dani si sökhi ni’okhögö Marata irege faduhu dödönia wa tesusugi dalifusönia si lö faröi sotöi Lazaro ”ba wemaoso andrö na luo safuria”. Bu’usa li Yehowa khö Danieli hegöi famati saro ni’okhögö Marata ba wanusugi ba zi so miföna, sindruhunia möi fanga’aro wa’afaduhu dödöda iada’a wa hasambalö so wanusugi.

²⁰ No tafaha’ö ita sanandrösa ba wanusugi salua ba götö föna. Da’a zamaduhu’ö wa tola ifuli auri niha si no mate. No tafaha’ö göi ita wa so zamosumange Lowalangi si lö faröi si faduhu tödö wa so wanusugi ba zi so miföna. Hiza’i, hadia so dandra sanga’aro’ö tödöda wa alua wanusugi ara me no aefa tefabu’u ia? Da’a zanolo ya’ita ena’ö itugu aro wanötönada wa so wanusugi ba zi so miföna. Hiza’i, hawa’ara alua da’ö? Tatutunö ia ba wamaha’ö aefa da’a.