WAÖ-WAÖ WA’AURI
Uröi Fefu Hadia Ia ba Wolo’ö Keriso
Me 16 fakhe ndröfigu, imane khögu bapagu, ”Na möi’ö manuriaigö, tebai mangawuli’ö ba nomo. Na mangawuli’ö, hasambalö ufatö gahemö.” Da’ö mbörö wa uröi nomoma. Da’ö zi oföna sibai uröi fefu hadia ia ba wolo’ö Yesu, Sokhö ya’ita.
HANA wa mofönu sibai bapagu? Da’ututunö. Tumbu ndra’o me 29 mbaŵa si Fitu 1929, ba ebua ndra’o ba mbanua side-ide si so ba provinsi Bulacan, Filipina. Lö oya gefema ba no öna-öna wa’aurima. Me ide-idedo, möi zaradadu Jepang ba wosuwö Filipina ba ibörögö alua wasuwöta. Hiza’i, börö me fandrö-ndröu mbanuama, lö ikhamö ndra’aga fasuwöta. Lö hadöi radioma, TV mazui koran. Ha ba niha marongo-rongo duria wasuwöta andrö.
So dafitu dalifusögu. Me walu fakhe ndröfigu, toröi ndra’o khö kakegu hegöi nenegu. Hewa’ae Katolik ndra’aga, omasi kakegu fahuo-huo sanandrösa ba agama, ba itema mbuku ba wamati nibe’e ndra awönia. Itörö tödögu wa no irai iforoma’ö khögu Zura Ni’amoni’ö hegöi mbuku side-ide Protection, Safety, ba Uncovered ba li Tagalog. * (Faigi nisura ba gahe zura) Omasido ubaso Zura Ni’amoni’ö, mendrua manö Injil si öfa ngawua. Buania, omasido u’o’ö duma-duma Yesu.—Yohane 10:27.
UFAHA’ÖDO BA WOLO’Ö KERISO
Laröi Filipina ira saradadu Jepang me 1945. Te ba ginötö da’ö, ifuli lawa’ö khögu ira satuagu ena’ö mangawulido ba nomo. Ifarou ndra’odo kakegu ena’ö mangawulido, ba ulau mangawuli.
Me baŵa si Felendrua 1945, manuriaigö ndra Samaduhu’ö Yehowa si otarai mbanua Angat ba mbanuama. Möi samösa Zamaduhu’ö si no alawa döfi ba nomoma ba itutunö hadia niwa’ö Zura Ni’amoni’ö sanandrösa ba ”götö safuria”. (2 Timoteo 3:1-5) Ikaoni ndra’aga ba wangondrasi famaha’ö Zura Ni’amoni’ö nifalua ba mbanua sahatö ba mbanuama. Möi ndra’odo, hewa’ae na lö möi ndra satuagu. Te so mato 20 niha zangondrasi, ba so ösa zame’e fanofu sanandrösa ba Zura Ni’amoni’ö.
Lö aboto sibai ba dödögu hadia nitutunöra, da’ö mbörö wa ulau mofanö. Hiza’i, me ibörögö la’anunöisi zinunö Mbanua Lowalangi, lö a’ozu mofanödo börö me omasido sibai zinunö da’ö. Me no aefa manunö ba mangandrö, lakaoni ndra’aga
ba wangondrasi gangowuloa ba Angat ba ngaluo Migu.Mufalua gangowuloa ba nomo Cruz. So ösa ba gotaluama zanörö tanö walu kilometer ena’ö ofeta ba da’ö. Te so mato 50 niha si no owulo. Adöni dödögu börö me so ndraono side-ide si tola mame’e fanema li ba wanofu sabua sanandrösa ba Zura Ni’amoni’ö. Me no u’ondrasi gangowuloa ba zi hauga kali, ikaoni ndra’odo talifusöda Damian Santos ba wemörö ba nomonia. Ya’ia andre perintis si no alawa döfi ba si no irai tobali walikota mböröta. Mahorigö ginötöma sara wongi ba wanutunö Sura Ni’amoni’ö.
Me föna, tola i’anemai’ö tebayagö idanö zi samösa niha na no i’ila dane-dane wamaha’ö ba Zura Ni’amoni’ö. Me no hauga kali möido ba gangowuloa, lasofu khögu hegöi ba niha bö’ö ira talifusöda ira matua, ”Hadia omasi ami tebayagö idanö?” Ba umane, ”Omasi.” U’ila wa omasido tobali ”enoni Zo’aya, Keriso”. (Kolose 3:24) Me 15 mbaŵa si Dua 1946, so darua ndra’aga nibayagö idanö ba nungo nidanö sahatö ba da’ö.
Aboto ba dödögu wa moguna asese möi manuriaigö niha Keriso si no tebayagö idanö simane nifalua Yesu. Imane khögu bapagu wa awuyu-wuyu sibai nasa ndra’o we’amöi manuriaigö ba lö i’anemai’ö tobalido penginjil ha me no tebayagödo idanö. Ufatunö khönia wa omasi Lowalangi na taturiaigö duria somuso dödö sanandrösa ba Mbanua Lowalangi. (Matai’o 24:14) Ufatunö göi khönia wa hasambalö ufalua hadia zi no ufabu’u khö Lowalangi. Ba ginötö da’ö ifeta’udo bapagu simane si no ututunö ba wamobörö. I’alui lala ena’ö ubato manuriaigö. Da’ö zi oföna sibai uröi mazui utehegö fefu hadia ia ba wamosumange Yehowa.
Lakaoni ndra’o ira ösi nomo Cruz ena’ö toröido khöra ba Angat. Lafarou ndra’odo hegöi onora alawe siakhi sotöi Nora, ena’ö malau merintis. Mabörögö merintis me 1 mbaŵa si Felezara 1947. Ulau merintis ba Angat, hiza’i merintis Nora ba mbanua bö’ö.
UFULI ZUI URÖI FEFU HADIA IA
Me no merintis ndra’o dua fakhe, samösa dalifusöda moroi ba Mbetieli, Earl Stewart, ifa’ema huhuo ba niha si töra 500 fa’ato ba zi sambua nahia sato niha ba Angat. Ifa’ema huhuo ba li Inggris, ba aefa da’ö ufatunö nösi huhuonia ba li Tagalog. Da’a huhuo si oföna moroi ba huhuo soya tanö bö’ö nifo’eluahagu ba zi no hauga fakhe. Hana wa tola ufalua da’ö? Hewa’ae ha fitu fakhe fa’ara möido ba zekola, asese fahuhuo ndra gurugu ba li Inggris. Aefa da’ö, börö me lö oya publikasida si te’odane-dane ba Zura Ni’amoni’ö ba li Tagalog, andrö wa oya ufaha’ödo ba publikasi ba li Inggris. Da’ö zanolo ya’o irege aboto ba dödögu li Inggris ba tola ufo’eluaha huhuo sebua.
Ifatunö talifusöda Stewart ba mbanua niha Keriso si so ba mbanua da’ö, wa la’ondrasi kebaktian nifalua ba New York, AS ira utusan injil. Da’ö kebaktian Pertambahan Teokratis me 1950. Andrö wa omasi gödo ndraha na so samösa mazui darua ndra perintis sanolo ba Mbetieli. Ba lakaoni ndra’odo. Ufuli zui uröi fefu hadia manö zi no irai u’okhögö börö me mohalöwödo ba Mbetieli.
Urugi Mbetieli me 19 mbaŵa si Önö 1950. So Mbetieli ba nomo sebua si no atua ba fa’ebolo danönia sara hektar ba no ifasui eu sebua. Te so felendrua niha ndra talifusöda ira matua si lö sangowalu sohalöwö ba da’ö. Ero si hulö wongi, ulau mohalöwö ba naha nawu. Aefa da’ö, te bözi siwa ulau manarika ba laundry. Ufuli ufalua zimane da’ö ba zi talu luo. Hewa’ae na no mangawuli ndra utusan injil moroi ba kebaktian internasional, lö mamalö toröi ndra’o ba Mbetieli. Ufalua gofu hadia ia niwa’ö ndra talifusöda khögu. Ubukusi majalah nifa’ohe’ö, u’urusi na so ni’andrö niha ba tobalido sanema’ö tome.
URÖI FILIPINA WE’AMÖI BA SEKOLAH GILEAD
Me 1952, ya’o hegöi si daönö ndra talifusöda ira matua moroi ba Filipina, lakaoni ndra’aga ba wefao ba Sekolah Gilead kelas si-20. Omuso sibai dödögu! Me so ndra’aga ba Amerika Serikat, ma’ila ba oya marasoi ngawalö zi bohou. No aröu faehu wa’auri ba da’ö moroi ba wa’auri ba mbanuagu.
Fao khö ndra awögu Sekolah Gilead
Duma-dumania, moguna mafaha’öga ba wangoguna’ö fakake elektronik hegöi fakake si lö irai ma’ila ba zilalö. No aröu faehu göi cuaca ba da’ö. No irai ba zi hulö wongi me awena maosodo, oi afusi fefu zi so baero. Da’ö zi oföna sibai u’ila salju. Sökhi sibai da’ö. Hiza’i, i’anemai’ö urasoi nangi sokafu sibai!
Owua-wua sibai dödögu ba wamaha’ö nitemagu ba Gilead, ba lö fatimba khögu fefu wamohouni nibe’e ba da’ö. Atua-tua sibai ndra talifusö si tobali samaha’ö ba laforoma’ö khöma hewisa wamalua famaha’ö hegöi ba wamalua riset. Sekolah da’a sindruhu-ndruhu möi fangaro wahuwusagu khö Yehowa.
Me no aefa wisuda, tebe’e halöwögu tobali perintis istimewa ba zi lö arara ba Bronx, New York. Andrö, me baŵa si Fitu 1953 tola u’ondrasi Kebaktian Ono Mbanua Gulidanö si Bohou nifalua ba Bronx. Me no aefa kebaktian, lafuli lafataro ndra’o ba Filipina.
URÖI WA’ASANA BA MBANUA SEBUA
Lafataro ndra’o ira talifusöda si so ba Mbetieli tobali satua samasui. Itugu oya ginötö ni’okhögögu ba wolo’ö Yesu, si möi ba mbanua sebua hegöi ba mbanua side-ide saröu ba wanolo ono mbanua 1 Fetero 2:21) Banua nihalöwögöigögu ya’ia da’ö tanö sebolo ba Luzon tengah, hulo sabölö ebua ba Filipina. No tefarahu ba da’ö provinsi Bulacan, Nueva Ecija, Tarlac, hegöi Zambales. Ba we’amöi ba zi hauga mbanua side-ide, moguna utörö Hili si so ba Sierra Madre sokara. Lö hadöi bus hegöi kereta api si möi ba mbanua da’ö. Andrö, moguna manofudo ba zolohe truk hadia tola faodo khöra ba modadaodo tanö furi. Si to’ölönia, latehegö khögu ba wefao. Hiza’i, sindruhu-ndruhu lö ohahau dödögu ba da’ö.
Yehowa. (Oya mbanua niha Keriso side-ide hegöi si bohou ba da’ö. Andrö wa la’andrö sibai saohagölö ira talifusöda me utolo ira ba wotatugöi gangowuloa hegöi ena’ö itugu sökhi wamalua halöwö fanuriaigö.
Ba gafuriata, uhalöwögöigö göi zi sagörö mbanua Bicol. Ba mbanua da’ö, oya ngawawa ba nahia saröu. Ba da’ö, manuriaigö ndra perintis istimewa ba mbanua si lö irai muturiaigö. Ba zi sambua omo, naha we’amöi ba WC ha tanö si no mutögi si no mube’e dua rozi geu si tobali naha gahe. Me moziziodo ba geu andrö, izumaigö atoru geu ba faodo ba wa’aekhu si tou. Oya ginötö ni’oguna’ögu ba wanasai mbotogu ba aefa da’ö ulau manga!
Me tefataro ndra’o ba mbanua da’ö, ibörötaigö u’angeraigö Nora, si fao khögu ba wamörögö merintis. Iada’a, no tobali perintis istimewa ia ba Dumaguete City, ba möido ufalukhaisi ia. Aefa da’ö, ibörötaigö mafa’ohe’ö zura khö nawöma, ba me 1956, mangowalu ndra’aga. Ba zi samigu me no aefa mangowaluga, ma’oguna’ö ginötö ba we’amöi ba zi sambua mbanua niha Keriso si so ba Hulo Rapu-Rapu. Masösö hili ba aröu sibai matörö tanö. Hiza’i, omuso dödöma me tola fao ndra’aga hegöi me tola matolo ndra talifusöda ba da’ö.
IFULI LAKAONI WOHALÖWÖ BA MBETIELI
Me no aefa mafalua halöwö famasui ba zi öfa fakhe fa’ara, lafuli lakaoniga ba gödo ndraha. Ibörögö mohalöwöga me baŵa si Sara 1960. Ba zi hauga fakhe me mohalöwöga ba Mbetieli, oya wamaha’ö nihalögu moroi khö ndra talifusöda sangokhögö noro dödö sebua ba organisasi Yehowa. Omuso göi dödö Nora ba ngawalö halöwönia ba Mbetieli.
Mama’ema huhuo sebua ba kebaktian nifo’eluaha ba li Cebuano
No sambua howu-howu me u’ila wa itugu tedou wa’ato niha samosumange Yehowa ba Filipina. Awuyu-wuyu nasa ndra’odo me awena möido ba Mbetieli ba lö nasa sangowaludo. Me luo da’ö, so mato 10.000 ndra sanuriaigö. Iada’a, töra 200.000 ndra sanuriaigö ba Filipina, ba so ngaotu ndra talifusöda sohalöwö ba Mbetieli ba wanuhini halöwö fanuriaigö.
Itugu numalö ginötö, moguna khöma Mbetieli sabölö ebua. Börö da’ö, la’andrö khöma ira Boto Solohe ba wangalui tanö si tobali nahia wangehaogö gödo ndraha sabölö ebua. Ya’o hegöi pengawas percetakan, möi ndra’aga ba nomo-omo si so ba zi fasui Mbetieli ba masofu hadia so zomasi mamawa tanöra. Hiza’i, lö somasi mamawa. So samösa zanguma’ö khöma, ”Lö mamawa niha Cina. Hiza’i, la’öli na’i naso.”
Mamo’eluaha huhuo dalifusöda Albert Schroeder
Hiza’i, ba zi sambua ngaluo, so zalua si lö madöna-döna. So samösa zi faola omo si findra ba Amerika Serikat. Andrö wa isofu khöma hadia omasiga ma’öli danönia. Aefa da’ö, so zi faola omo tanö bö’ö somasi mamawa tanönia ba ifarou göi zi faola omo tanö bö’ö ba wamawa tanöra. Ba ma’öli danö niha sanguma’ö khöma, ”Lö mamawa niha Cina.” Ba zi lö arara, tölu kali abölö ebolo danö ni’okhögö gödo ndraha. Faduhu dödögu wa no ohitö dödö Yehowa da’a.
Me 1950, ya’o zabölö awuyu-wuyu sohalöwö ba Mbetieli. Iada’a, ya’o hegöi fo’omogu zabölö atua. Lö irai maniasa ndra’odo me no u’o’ö Yesu gofu hezo ituturu lalagu. Hewa’ae lafofanödo ira satuagu ba nomo, ibe’e khögu Yehowa nösi nomo sabölö ebua sangomasi’ö ya’ia. Sindruhu-ndruhu faduhu dödögu wa hasambalö ibe’e fefu zoguna khöda Yehowa, gofu hadia halöwöda. Ya’o hegöi Nora, ma’andrö sibai saohagölö khö Yehowa ba ngawalö wa’asökhi dödönia. Mafarou göi dödö niha bö’ö ena’ö latandraigö Yehowa.—Maleakhi 3:10.
Ba mböröta, no irai ikaoni samösa zanema pajak Yesu sotöi Matai’o Lewi ena’ö tobali solo’ö ya’ia. Hadia nifalua Matai’o? ”Ba iröi fefu, hadia ia, maoso ia, i’o’ö.” (Luka 5:27, 28) U’okhögö göi ginötö ba wondröi fefu hadia ia ba wolo’ö Yesu, ba ufarou niha bö’ö ba wamalua simane da’ö ena’ö tola larasoi howu-howu sebua.
Mangai halöwö ba Filipina si fao fa’owua-wua dödö
^ par. 6 Nifazökhi ndra Samaduhu’ö Yehowa, hiza’i lö lafazökhi sa’ae iada’a.