NO TÖRA 80 fakhe ndröfi Diana ba oya gabula dödö nitaögönia barö zi hauga fakhe andre. No mate woʼomonia ira matua si no irai toröi ba panti jompo börö wökhö Alzheimer. No mate göi darua nononia matua ba göna göi ia kanker payudara. Hizaʼi ba ginötö möi ia ba gangowuloa mazui manuriaigö, laʼila ira talifusöda wa lö tebulö so khö Diana waʼomuso dödö.

Mangai halöwö John tobali satua samasui ba zi töra 43 fakhe. Iʼomasiʼö sibai halöwö nibeʼe khönia andre ba no tobali föfö waʼaurinia daʼö. Hizaʼi, lö iʼila itohugö wangai halöwö daʼö börö me so zi fahatö khönia sofökhö ba moguna irorogö. Ato ndra talifusöda si falukha khö John ba kebaktian, laʼila wa lö si tebulö waʼauri John. Lö aetu so khönia waʼomuso dödö.

Hana wa lö aetu so waʼomuso dödö khö Diana hegöi John? Hewisa zi samösa niha tola lö aetu so khönia waʼomuso dödö hewaʼae oya gabula dödö nitaögönia ba iböhöli wamalua halöwö somasi ia? Ibeʼe wanema li Sura Niʼamoniʼö, ”Ba omuso dödö zatulö tödö andrö, ba khö Yehowa.” (Zinunö 64:11) Enaʼö itugu aboto ba dödöda ayati daʼa, moguna taʼila hadia zi tola hegöi si tebai mangaʼasogö khöda faʼomuso dödö si lö mamalö-malö.

Oya zi tola mangaʼasogö khöda faʼomuso dödö. Duma-dumania, sambua fongambatö sawena mangowalu lasöndra waʼomuso dödö. Omuso göi dödö niha sawena moʼono mazui sanöndra halöwö si bohou ba organisasi Yehowa. Tola iʼasogö waʼomuso dödö fefu daʼa börö me no howu-howu moroi khö Yehowa ia. Yaʼia zamobörö fongambatö, enaʼö tola so ngaʼötöda, ba ibeʼe khöda halöwö ba organisasinia.​—1 Moze 2:18, 22; Zinunö 127:3; 1 Timoteo 3:1.

Hizaʼi, tola manö ha sabata waʼomuso dödö niʼasogönia. Tola iröi ita ngambatöda mazui mate ia. (Hezekieli 24:18; Hosea 3:1) Tola manö lö moloʼö ndraono ba zatua hegöi khö Lowalangi irege laʼefasi ira ba gangowuloa. Duma-dumania, faröi ndraono Zamueli khö Yehowa ba oya gabula dödö nitaögö Dawido  börö me no mohorö ia khö Mbaseba. (1 Zamueli 8:1-3; 2 Zamueli 12:11) Na alua khöda zimane daʼö tola manö afatö dödöda.

Itaria, tebai tatohugö wangai halöwö khö Yehowa börö wökhö mazui tarorogö nösi nomoda sofökhö. Mazui so zi tebulö ba organisasi. Ato ndra talifusöda si no tebato ba halöwöra lawaʼö wa itörö-törö manö tödöra waʼomuso dödö nirasoira ba zilalö.

Andrö, faʼomuso dödö niʼasogönia tenga sagötö faʼara. Börö daʼö, hadia tola tarasoi waʼomuso dödö si lö mamalö-malö hewaʼae tataögö gabula dödö? Tatu manö tola, simane Samueli, Dawido hegöi samosumange Lowalangi tanö böʼö tola larasoi waʼomuso dödö hewaʼae oya gabula dödö salua khöra.

Iʼila Yesu hadia waʼomuso dödö sindruhu andrö. Fatua lö möi ia ba gulidanö, itutunö Sura Niʼamoniʼö wa ’faʼomuso dödö ia khö [Yehowa] ero maʼökhö’. (Gamaedola 8:30) Hizaʼi me so ia ba gulidanö, itaögö gabula dödö sabua ba waʼaurinia. Hewaʼae simanö, omuso dödö Yesu börö me ifalua gohitö dödö Namania. (Yohane 4:34) Ba gafuriata waʼaurinia, itaögö Yesu waʼamate safökhö. Hizaʼi imane Sura Niʼamoniʼö, ”Börö waʼomuso dödö si no so fönania, itaögö waʼafökhö ba döla geu famakao.” (Heberaiʼo 12:2) Datafahaʼö ita sanandrösa ba waʼomuso dödö sindruhu moroi ba zi dombua ngawalö nitutunö Yesu.

Ba zi samuza inötö, me no awai manuriaigö ndra nifahaʼönia si 70 möi ira lafalukhaisi Yesu. Omuso dödöra me oya zi tola lafalua, ba tola lafofanö malaʼika si lö sökhi. Hizaʼi imane khöra Yesu, ”Böi omuso dödömi me no laʼoʼö limi ira malaʼika si lö sökhi andrö, hizaʼi miʼomusoiʼö dödömi börö me no tesura döimi ba zorugo.” (Luka 10:1-9, 17, 20) Sindruhu sa, na taʼomusoiʼö dödö Yehowa abölö sökhi daʼö moroi ba waʼomuso dödö nirasoida na so halöwö nibeʼe khöda.

Ba ginötö tanö böʼö, me fahuhuo Yesu ba niha sato, so samösa ndra alawe niha Yahudi sadöni tödö ba lala wamahaʼö Yesu irege iwaʼö ira alawe andrö wa tatu owua-wua dödö nina Yesu börö me atua-tua ia. Hizaʼi imane Yesu, ”Löʼö, nifahowuʼö yaʼia daʼö, samondrongo ba samalua taromali Lowalangi.” (Luka 11:27, 28)  Tatu owua-wua dödöda na so nifalua ndraonoda si tola mangomusoiʼö tödöda. Hizaʼi tola tasöndra waʼomuso dödö sindruhu na moloʼö ita khö Yehowa ba taʼokhögö gamakhaita si sökhi khönia.

Omuso sibai dödöda na taʼila wa omasi Yehowa ba nifaluada. Na aboto ba dödöda daʼö, lö aetu tarasoi waʼomuso dödö na tataögö gabula dödö hewaʼae abua ba wanaögö yaʼia. Na lö faröi ita ba ginötö tataögö gabula dödö itugu monönö waʼomuso dödöda. (Roma 5:3-5) Baero daʼö, ibeʼe göi Yehowa geheha niʼamoniʼö ba niha samati khönia. So sambua mbua geheha niʼamoniʼö yaʼia daʼö faʼomuso dödö. (Galatia 5:22) Iadaʼa, aboto ba dödöda hadia geluaha wehede si so ba Zinunö 64:11 me imane, ”Ba omuso dödö zatulö tödö andrö, ba khö Yehowa.”

Tola göi taʼila hadia mbörö wa lö aetu so waʼomuso dödö khö Diana hegöi John hewaʼae oya gabula dödö nitaögöra. Imane Diana, ”Ubaliʼö Yehowa folumöʼögu simane iraono side-ide khö namania.” Imane nasa, ”Urasoi wa ibeʼe khögu waʼabölö enaʼö lö uböhöli wanuriaigö si fao faʼomuso dödö.” Hadia zanolo John irege so khönia waʼomuso dödö ba owölö-ölö ia ba halöwö ba wamati hewaʼae iröi halöwönia? Imane, ”Me döfi 1998, lafatenge ndraʼo tobali samahaʼö ba Sekolah Pelatihan Pelayanan. Iʼotarai daʼö, itugu owölö-ölö ndraʼo ba wamahaʼö samösa.” Itutunö göi wa yaʼia hegöi foʼomonia ira alawe itugu aoha khöra ba wamaudugö lala waʼaurira börö me latemaʼö gofu hadia ia halöwö nibeʼe Yehowa khöra. Imane, ”Lö irai maniasa ndraʼaga.”

Ato zi no morasoi wa sindruhu niwaʼö Zinunö 64:11. Duma-dumania, so sambua fongambatö si no mangai halöwö ba Mbetieli si so ba Amerika Serikat 30 fakhe faʼara. Ba gafuriata, lafatenge ira tobali perintis istimewa. Lamane wangumaʼö, ”Hasambalö lö khöda faʼomuso dödö na taya khöda niʼomasiʼöda.” Hizaʼi lamane göi, ”Lö gunania khöda na lö aetu-aetu afatö dödöda.” Me no larugi nahiara wohalöwö si bohou, iʼanemaiʼö fao ira manuriaigö ba gangowuloa daʼö. Lamane nasa, ”So ösa zinangea maʼohe ba wangandrö khö Yehowa. Me maʼila wa tefondrondrongo wangandröma itugu teʼabölöʼö ndraʼaga ba marasoi waʼomuso dödö. Lö ara me no ofetaga ba gangowuloa daʼa, so ösa ndra talifusöda si tobali perintis ba howu-howu tanö böʼö yaʼia daʼö so darua nifahaʼöma ba Zura Niʼamoniʼö sangoromaʼö faʼatedou ba wamati.”

Sindruhu sa, wa lö asese so khöda waʼomuso dödö. Itaria tarasoi waʼafatö dödö. Hizaʼi, ibeʼe khöda wondrara dödö Yehowa ba Zinunö 64:11. Hewaʼae tarasoi wa ide-ide dödö, tola ”omuso dödö zatulö tödö andrö, ba khö Yehowa” na lö faröi ita khönia ba ginötö tarasoi waʼabu dödö. Taʼokhögö dötönafö wa hasambalö alua zi no ifabuʼu Yehowa sanandrösa ba ”mbanua si yawa si bohou ba tanö si bohou”. Ba ginötö daʼö, moʼahonoa fefu niha ba ’owua-wua dödö ba maʼiki-iki niwöwöinia andrö si lö mamalö-malö’ börö me Yehowa zamalua fefu hadia ia.​—Yesaya 65:17, 18.

Khalaigö hadia manö zi tola tarasoi. Moʼahonoa mbotoda ba aoha sibai dölada wemaoso ero si hulö wongi. Lö saʼae tarasoi wangabu dödö si no irai alua khöda ba zilalö. Ifaduhuʼö khöda Yehowa wa ”löʼö saʼae itörö tödö zi föföna andrö, löʼö saʼae iʼangeragö niha”. Falukha ita dania ba niha niʼomasiʼöda. Fagölö nirasoida ba nirasoi zatua nono alawe si 12 fakhe nisusugi Yesu. Itutunö Sura Niʼamoniʼö wa ”ahöli-höli dödö zatuania irege tebai lataha waʼomuso dödöra”. (Mareko 5:42) Ba zi so miföna, afönu gulidanö andre niha satulö tödö ba ”omuso dödö zatulö tödö andrö, ba khö Yehowa” sagötö faʼara.