OMUSO dödöda na laʼosinangegö ita niha böʼö. Tola möi fondrara dödö daʼa ba ginötö laʼameʼegö tödö ita niha böʼö. Tatu taʼandrö sibai saohagölö ba ginötö so niha soʼameʼegö tödö yaʼita. Hizaʼi, hewisa wamahaʼöda yaʼita sanandrösa ba waʼasökhi dödö?

Niha si sökhi tödö sindruhu-ndruhu laʼameʼegö tödö niha böʼö, ba iforomaʼö daʼö moroi ba wehede hegöi amuata. Tenga ha sökhi lagunia hizaʼi sindruhu-ndruhu iʼosinangegö niha böʼö börö me iʼomasiʼö ira ba iʼila hadia nirasoira. Sabölö moguna yaʼia daʼö, faʼasökhi dödö andre no sambua bua-bua geheha. (Galatia 5:22, 23) Omasi Yehowa na taforomaʼö waʼasökhi dödö. Andrö datafahaʼö ita sanandrösa khö Yehowa hegöi Yesu ba wangoromaʼö faʼasökhi dödö ba hewisa lalada woloʼö duma-duma nibeʼera.

Iforomaʼö Yehowa waʼasökhi dödö ba niha fefu, mendrua manö ”ba niha si lö sökhi hegöi ba niha si lö mangila mangandrö saohagölö”. (Luka 6:35) Duma-dumania, ”Ibeʼe haga luo ba niha si sökhi hegöi ba niha si lö sökhi, ba ibeʼe deu ba niha satulö hegöi ba niha si lö atulö.” (Mataiʼo 5:45) Lö faduhu dödö niha wa Yehowa andrö Somböi, hizaʼi tola nasa larasoi waʼasökhi dödö Yehowa ba laʼokhögö waʼohahau dödö ba waʼaurira.

Iforomaʼö göi Yehowa waʼasökhi dödö sebua khö Gadamo ba Khawa. Me no aekhu ira ba horö ”ba lafatagu lae-lae uʼira”. Hizaʼi, iʼila Yehowa na aheta ira ba Kabu Edena, moguna khöra nukha si sökhi si tobali balu-balura börö me no niʼelifi danö andrö ba no afönu ”doi ba duʼu zilua”. Börö daʼö, si fao faʼasökhi dödö ifazökhi khöra Yehowa ’mbaru guli gutu ndruʼu’.​—1 Moze 3:7, 17, 18, 21.

Hewaʼae sökhi dödö Yehowa ”ba niha si sökhi hegöi ba niha si lö sökhi,” abölö sökhi nasa dödönia ba niha samosumange yaʼia. Duma-dumania, ba ginötö tobali samaʼeleʼö Zakharia, aombö dödö zi samösa malaʼika börö me no laböhöli iraono Gizaraʼeli ba wamazökhi osali Yehowa ba Yeruzalema. Ifondrondrongo niwaʼö malaʼika andrö Yehowa ba itema linia ”ihaogö wehedenia khönia, fondrara dödö”. (Zakharia 1:12, 13) Ifalua göi zimane daʼö Yehowa khö zamaʼeleʼö sotöi Elia. Itaria irasoi Elia wa lö awö-awö ba faʼafawuka wangera-ngera irege iʼandrö khö Yehowa ba wangetuʼö nosonia. Aboto ba dödö Yehowa nirasoi Gelia, andrö wa ifatenge malaʼikania ba wangabölöʼö Elia. Ifaduhuʼö Yehowa khö Gelia wa tenga ha yaʼi-yaʼia. Faʼasökhi dödö Yehowa zangabölöʼö Elia irege anau gölönia ba wamalua halöwönia. (1 Razo 19:1-18) Hizaʼi moloʼö yaʼugö, haniha zi no moloʼö duma-duma si sökhi moroi ba waʼasökhi dödö Yehowa sebua ba gotalua zamosumange yaʼia maʼafefu?

Me so Yesu ba gulidanö, laʼila niha wa si sökhi tödö ia. Lö irai ifalua zi lö sökhi ba niha. Lö ifaso niha ba wamalua somasi dödönia. Iʼameʼegö tödö niha böʼö ba imane khöra, ”Miʼaine  khögu dozi serege tödö awö zonoro sabua, ba ufolombase ami. . . . Sökhi kalo mbagi andre.” (Mataiʼo 11:28-30) Börö me si sökhi tödö Yesu, ato zoloʼö yaʼia gofu hezo möi ia. Börö me ahakhö dödönia ira, ibeʼe göra Yesu, ifadöhö, ba ”oya ifahaʼö” ira sanandrösa khö Namania.​—Mareko 6:34; Mataiʼo 14:14; 15:32-38.

Aboto ba dödö Yesu nirasoi niha böʼö ba sökhi gamuatania khöra si fao foʼameʼegö tödö. Hewaʼae abua, itolo fefu niha sangondrasi yaʼia si fao faʼasökhi dödö. (Luka 9:10, 11) Angeragö samösa ndra alawe sendro talu. Omasi ia lafadöhö andrö wa igogohe gahe mbaru Yesu. Hizaʼi, moloʼö Oroisa Moze tebai ifalua daʼö börö me raʼiö ia. (3 Moze 15:25-28) Hadia nifalua Yesu? Lö ebua linia si fao fönu. Aboto ba dödönia waʼataʼu ndra alawe andrö. Ahakhö dödönia börö me no 12 fakhe ba wökhö ndra alawe andrö. Ba imane, ”He onogu, no ifadöhö ndraʼugö famatimö. Ofanö, yaʼohahau dödöu. No döhö wökhö samakao yaʼugö.” (Mareko 5:25-34) Sökhi sibai dödö Yesu!

Ba wamahaʼö si no tatutunö, no tafahaʼö ita wa tola tatolo niha böʼö na so khöda waʼasökhi dödö. Ihaogö itutunö Yesu wa moguna waʼasökhi dödö me ifaʼema gamaedola sanandrösa ba niha Zamaria si sökhi tödö. Me so samösa ndra matua niha Yahudi nirabu, laböbözi ba laröi ia ba zinga lala arakhagö mate, so samösa ndra matua niha Zamaria sanörö lala daʼö ba ahakhö dödönia ba niha Yahudi andrö, hewaʼae na sindruhunia lö fahasara dödö ba niha Zamaria hegöi niha Yahudi. Hizaʼi faʼasökhi dödö zamarou yaʼia ba wanolo ndra matua niha Yahudi. Ihaogö ba wosasai zokho ndra matua niha Yahudi andrö, ba iʼohe ba nomo niʼokosi, ibeʼe gefe ba niha sondrorogö si so ba nomo daʼö ba iwaʼö hasambalö ibuʼa fefu niʼogunaʼö ba wondrorogö yaʼia.​—Luka 10:29-37.

Faʼasökhi dödö zanolo yaʼita ba woʼangeragö niha böʼö, daʼa göi zanolo yaʼita ba wangabölöʼö yaʼira moroi ba gamuata hegöi fehededa. Imane Sura Niʼamoniʼö, ”Faʼabu dödö niha, ba ihöndrögö tou dödö; ba fondrara dödö daromali nihaogö.” (Gamaedola 12:25) Ba ginötö ifarou ita faʼasökhi dödö andrö ba wamalua si sökhi moroi ba wehede si tola mangabölöʼö niha böʼö, tola larasoi waʼomuso dödö. * (Faigi nisura ba gahe zura.) Moroi ba wehededa safönu faʼasökhi dödö zangoromaʼö wa taʼameʼegö tödö niha böʼö. Daʼö göi zi tola manolo yaʼira ba wanaögö abula dödö salua khöra.​—Gamaedola 16:24.

Fefu ita tola taforomaʼö waʼasökhi dödö börö me si fakhili-khili khö Lowalangi ita. (1 Moze 1:27) Duma-dumania, so samösa gumandru zaradadu niha Romawi sotöi Yulio sangonorogö tödö ba wolohe Faulo ba Roma, ”Sökhi sibai gamuata Yulio khö Waulo. Itehegö khö Waulo wamalukhaisi ira awönia” si so ba mbanua Zidona. (Halöwö Zinenge 27:3) Me tosake göfa nitörö Waulo hegöi niha si fao khönia, ”sökhi sibai” gamuata niha si so ba hulo Malata andrö irege lafewuaʼö galitö khöra börö me okafu sibai. (Halöwö Zinenge 28:1, 2) Lafalua zi sökhi ira niha daʼö. Hizaʼi ba wangomusoiʼö dödö Yehowa moguna lö iböhöli ba wangoromaʼö faʼasökhi dödö si samösa niha tenga ha sakali.

Omasi Yehowa na faʼasökhi dödö andrö tobali bua-buada hegöi lagu waʼaurida. Börö daʼö iʼandrö khöda Yehowa enaʼö ’tafalua’ waʼasökhi dödö. (Kolose 3:12) Hizaʼi, lö aoha khöda ba wangoromaʼö faʼasökhi dödö ero inötö. Hana? Te börö me so khöda waʼaila, lö khöda faʼahono dödö, mazui ha yaʼita niʼera-erada. Tola manö abua khöda ba wangoromaʼö faʼasökhi dödö ba niha si no mangafökhöiʼö tödöda. Hizaʼi, na taʼandrö wanolo moroi ba geheha niʼamoniʼö ba taʼoʼö Yehowa, tola itolo ita tobali niha sangokhögö faʼasökhi dödö sindruhu.​—1 Korindro 2:12.

 Hewisa enaʼö tola tadouʼö waʼasökhi dödöda? Sofu khöu samösa: ’Hadia sindruhu-ndruhu ufondrondrongo niha böʼö ba uʼameʼegö tödö zalua khöra? Hadia urasoi na moguna wanolo ba niha böʼö? Hamega zafuria uforomaʼö waʼasökhi dödö ba niha böʼö si tenga ösi nomogu hegöi awögu?’ Tatugöi gohitö dödömö, duma-dumania moguna öforege enaʼö aboto ba dödöu niha ba zi fasuimö mendrua manö dalifusöda si sara lala ba wamati. Na öfalua daʼö, tola öʼila hadia gabula dödö salua khöra ba hadia zoguna khöra. Aefa daʼö, falua ba niha zomasi lafalua khöu. (Mataiʼo 7:12) Afuriatania, andrö wanolo moroi khö Yehowa, ba hasambalö ifahowuʼö wamorege nifaluamö enaʼö öʼokhögö waʼasökhi dödö.​—Luka 11:13.

Faʼasökhi dödö no amuata si tobali fanolo khö zinenge sotöi Faulo irege tobali ia sangai halöwö si sökhi. (2 Korindro 6:3-6) Laʼomasiʼö ia niha böʼö börö me iwaʼö ba ifalua zi sökhi. Tola larasoi niha böʼö wa iʼameʼegö tödö ira Faulo. (Halöwö Zinenge 28:30, 31) Na taforomaʼö waʼasökhi dödö tola manö tedönisi dödö niha böʼö ba wamomaha yaʼira ba zindruhu. Ba ginötö taforomaʼö waʼasökhi dödö ba niha böʼö hegöi ba niha si no mangafökhöiʼö tödöda, tola larasoi ba tobali fanolora daʼö irege lafaböʼöni gamuatara. (Roma 12:20) Te so ginötönia dania omasi ira lafahaʼö ira ba Zura Niʼamoniʼö.

Ba gulidanö Faradaiso, fefu niha laforomaʼö waʼasökhi dödö ba niha böʼö. Laforomaʼö waʼasökhi dödö ba niha si no tesusugi, te awena larasoi daʼö. Daʼa zanolo yaʼira ba wangokhögö faʼamohiʼa dödö ba wangoromaʼö faʼasökhi dödö ba niha böʼö. Sindruhunia, niha si lö sökhi hegöi niha si lö manolo awönia niha, tebai auri ira barö Wamatörö Lowalangi. Ha niha si sökhi tödö ba sebolo tödö dania zauri sagötö faʼara ba Waradaiso. (Zinunö 37:9-11) Lö ametaʼuö ba gulidanö ba so waʼahono dödö! Hizaʼi, fatua lö alua daʼö tola nasa tasöndra mbua na taforomaʼö waʼasökhi dödö. Hewisa wa tola?

Imane Sura Niʼamoniʼö, ”Ba niha sebua tödö, ba khönia zi sökhi nisöndrania.” (Gamaedola 11:17) Omasi niha fariawö ba niha si sökhi tödö ba lafalua göi zi sökhi ba niha samalua si sökhi. Imane Yesu, ”Börö me suʼa-suʼa niʼanuʼaʼömi ba laʼanuʼaʼö göi khömi dania.” (Luka 6:38) Daʼö mbörö wa aoha ba niha si sökhi tödö ba wanöndra si fahuwu si sökhi ba irorogö wahuwusania ba niha böʼö.

Iwaʼö Faulo ba niha Keriso si so ba Efeso enaʼö ”faoma mihakhösi tödö nawömi, miʼefaʼö zala nawömi soroi ba dödö”. (Efeso 4:32) Me laforomaʼö niha Keriso waʼasökhi dödö hegöi faʼahakhö dödö ba niha böʼö, itugu teʼosambuaʼö mbanua niha Keriso. Lö omasi ita tobali niha sangalu-ngalui sala ndra talifusöda mazui tawaʼö wehede safökhö hewaʼae ha bude-bude daʼö. Omasi ita tawaʼö wehede si möi famarou dödö. (Gamaedola 12:18) Buania, omuso dödö mbanua niha Keriso ba wamosumange Yehowa.

Simane si no tatutunö, faʼasökhi dödö yaʼia daʼö amuata niforomaʼö faoma fehede hegöi amuatada. Ba ginötö taforomaʼö waʼasökhi dödö, no taʼoʼö Yehowa, Lowalangi sahakhö tödö ba soböwö. (Efeso 5:1) Daʼa zangaroʼö banua niha Keriso ba sanolo niha böʼö enaʼö lafosumange Yehowa. Börö daʼö, datafalua gofu hadia ia zi tola tafalua enaʼö laʼila niha böʼö wa Samaduhuʼö Yehowa andrö niha si sökhi tödö!