Löʼö. Me idönisi dödö Khawa Satana ba wemanga mbua geu si lö itehegö Lowalangi, lö iwaʼö wa mate mboto Khawa hizaʼi auri nosonia ba nahia tanö böʼö. Iʼogunaʼö gulö Satana ba wangumaʼö khö Khawa wa na iʼa mbua geu daʼö ’maʼifu sa lö mate ira’. Börö daʼö, hulö na iwaʼö Satana wa hasambalö auri Khawa ba gulidanö sagötö faʼara, ba iʼokhögö lala waʼauri sabölö sökhi na tenga barö wamatörö Lowalangi so ira.​—1 Moz. 2:17; 3:3-5.

Na famahaʼö faya sanandrösa ba mboto si tebai mate tenga iʼotarai ba Kabu Edena, hizaʼi hamega ibörögö so wamahaʼö faya simane daʼö? Lö taʼila sibai. Aboto ba dödöda, me alua Molö Sabölö-bölö ba götö Noakhi, ha yaʼia zauri awö nösi nomonia börö me yaʼira andrö samosumange Yehowa. Andrö, me alua Molö Sabölö-bölö, tehori fefu wamahaʼö faya.

Tola manö awena ibörögö so wamahaʼö sanandrösa ba noso si tebai mate me no aefa alua Molö Sabölö-bölö. Me ifakuyu Lowalangi li niʼogunaʼö niha ba Mbabeli irege ’tefazawili ira ba gulidanö maʼasagörö’, tola manö laʼohe misa wamahaʼö sanandrösa ba noso si tebai mate. (1 Moz. 11:8, 9) Gofu hamega so wamahaʼö faya andrö, tola faduhu dödöda wa moroi khö Gafökha walimosa daʼö ba omuso dödönia me no tefazaewe misa walimosa andrö, börö me yaʼia ”ama zofaya”.​—Yoh. 8:44.