Me no aefa öbaso fefu edisi Manuriaigö 2019, hadia tola öbeʼe wanema li moroi ba wanofu-nofu daʼa?

Hadia geluaha mbuʼusa li Lowalangi andre: ”Fefu wangöna, nibago ba wamakiko yaʼugö, ba si lö boto?” (Yes. 54:17)

Faduhu dödöda wa hasambalö ilumöʼö ita Lowalangi moroi ba ”wönu zamalangögö”. (Yes. 25:4, 5) Tebai lafakao ita ira ududa andrö sagötö faʼara.​—w19.01, ngaʼörö 6-7.

Hewisa waʼatulö Lowalangi oroma moroi ba lala wamaiginia niha Ganaʼana hegöi iraono Gizaraʼeli si lö moloʼö?

Ihuku Lowalangi niha samalua amuata fohorö mazui samalua si lö sökhi ba ndra alawe hegöi ba ndraono. Hizaʼi, ifahowuʼö niha si lö faröi khönia ba samalua satulö ba niha böʼö—w19.02, ngaʼörö. 22-23.

Hadia nifaluada na mangandrö niha si tenga si sara lala wamati khöda?

Moguna tahonogö ita ba tafosumange ia, hizaʼi böi fao ita ba wangumaʼö ”yaduhu” mazui fao ita ba wogogohe tangara sagötö mufaʼema wangandrö. Tola talau mangandrö samösa bakha ba dödö.​—w19.03, ngaʼörö 31.

Hawaʼebua horö niha samalua pelecehan ba ndraono?

Niha samalua pelecehan ba ndraono no ifalua horö ba niha si göna pelecehan, ba mbanua niha Keriso, khö ndra samatörö hegöi khö Lowalangi. Na moloʼö huku ba zi sambua soi, wa moguna lafatunö khö ndra samatörö niha samalua pelecehan ba ndraono, moguna laʼoʼö daʼö ira satua sokubaloi.​—w19.05, ngaʼörö 9-10.

Hewisa wamazökhimö mazui ba wombulöʼömö lala wangera-ngeramö?

Sö ösa zinangea mufalua: Angandrö khö Yehowa. Falua woʼangerönusi enaʼö aboto ba dödömö hadia zoʼamböta ndraʼugö. Fili wariawösa si sökhi.​—w19.06, ngaʼörö 11.

Hewisa wamaʼanöda yaʼita iadaʼa ba wanaögö folohi?

Moguna taʼaroʼö gamakhaitada khö Yehowa. Yafaduhu dödömö wa iʼomasiʼö ndraʼugö Yehowa ba lö irai iröi ndraʼugö. Baso Zura Niʼamoniʼö ero maʼökhö ba böi tebulö ba wangandrö. Yafaduhu dödömö wa hasambalö alua howu-howu Wamatörö Lowalangi. Tanö ba dödömö ayati somasi ndraʼugö hegöi sinunö si so ba mbuku zinunöda hegöi ba situs webda.​—w19.07, ngaʼörö 2-4.

Hadia nifaluada ba wanolo ösi nomoda?

Moguna aboto ba dödömö hadia nirasoira, beʼe duma-duma si sökhi, okhögö waʼebolo dödö hegöi faʼasökhi dödö.​—w19.08, ngaʼörö 15-17.

Hewisa enaʼö tola tasöndra wangokafu dödö ba mbuʼusa li nibeʼe Yesu ba Mataiʼo 11:28?

Taʼokhögö ndra sondröniaʼö sabölö sökhi, si fahuwu si sökhi, hegöi halöwö si sökhi.​—w19.09, ngaʼörö 23.

Hewisa Yehowa ba wameʼe khöda faʼedöna ba faʼabölö ba wamalua somasi ia? (Fil. 2:13)

Na tabaso ba taʼangerönusi Daromali Lowalangi, tola iʼoʼou dödöda Lowalangi ba ibeʼe khöda waʼedöna ba wamalua ohitö dödönia ba ibeʼe khöda waʼabölö ba wamalua yaʼia. Ibeʼe khöda geheha niʼamoniʼö enaʼö tedou waʼatua-tuada.​—w19.10, ngaʼörö 21.

Hadia manö zinangea tafalua fatua lö tahalö gangetula sebua?

So lima ngawalö: Forege wangalui fanuturu lala. Angandrö enaʼö so khöu waʼatua-tua. Fareso hadia mbörö wa öhalö gangetula daʼö. Haogö tatugöi gohitö dödömö. Okhögö wangera-ngera si sökhi.​—w19.11, ngaʼörö 27-29.

Hadia ibörögö so wamahaʼö sanandrösa ba noso si tebai mate me fahuhuo Zatana khö Khawa?

Löʼö. Lö irai iwaʼö Satana khö Khawa wa ha botonia zi mate. Hizaʼi iwaʼö khö Khawa wa maʼifu lö mate ia. Baero daʼö, me alua Molö Sabölö-bölö, tehori fefu wamahaʼö faya. Tola manö awena so wamahaʼö sanandrösa ba noso si tebai mate fatua lö ifakuyu Lowalangi li niʼogunaʼö niha samazökhi malige Mbabeli irege tefazawili ira ba gulidanö misa.​—w19.12, ngaʼörö 15.