1-2. Hadia wamahaʼö si tola tahalö moroi ba duma-duma salua khö Angelito?

HADIA Samaduhuʼö Yehowa zatuamö? Na yaʼia, moguna itörö tödömö wa lö iʼanemaiʼö tobali si fahuwu khö Yehowa ndraʼugö, ha börö me no tobali si fahuwu khö Yehowa zatuamö. Hewaʼae na samosumange Yehowa zatuania mazui tenga, moguna iforege zi samösa niha enaʼö tobali ia si fahuwu khö Yehowa.

² Angeragö duma-duma si no irai alua khö dalifusöda sotöi Angelito. Fefu nösi nomonia no tobali Samaduhuʼö Yehowa. Hewaʼae simanö, me awuyu-wuyu ia, irasoi wa lö ahatö sibai ia khö Lowalangi. Imane, ”Ufosumange Yehowa ha börö me fao ndraʼo ba nösi nomogu.” Hizaʼi, ihalö gangetula Angelito enaʼö asese ibaso ba iʼangerönusi Zura Niʼamoniʼö. Iadaʼa, itugu asese mangandrö ia khö Yehowa. Hadia mbuania? Imane Angelito, ”Enaʼö tola ahatö khö Namada Yehowa, moguna uforege wangokhögö faʼaboto ba dödö sanandrösa khönia. Lö hadöi lala tanö böʼö baero daʼö.” Me no taʼila duma-duma salua khö Angelito, tola manö tamane tödöda, ’Hadia gamaehutania aboto ba dödöda Yehowa faoma sindruhu-ndruhu aboto ba dödöda ia? Ba hadia zinangea tafalua enaʼö sindruhu-ndruhu aboto ba dödöda Yehowa?’

3. Hadia gamaehutania aboto ba dödöda Yehowa faoma sindruhu-ndruhu aboto ba dödöda ia?

³ Tola manö tawaʼö wa no taʼokhögö waʼaboto ba dödö sanandrösa khö Yehowa, börö me taʼila döinia, taʼila ösa nifalua  mazui niwaʼönia. Hizaʼi, enaʼö sindruhu-ndruhu aboto ba dödöda Yehowa, so nasa danö böʼö zinangea tafalua. Moguna taʼogunaʼö ginötö ba wamahaʼö yaʼita sanandrösa khö Yehowa hegöi amuatania sahöli-höli dödö. Daʼa zanolo yaʼita enaʼö taʼila hadia omuso dödö Yehowa ba niʼera-erada hegöi nifaluada. Me no taʼila hadia niʼandrö Yehowa khöda, moguna tafalua ia.

4. Hadia mbuania khöda na tafahaʼö ita moroi ba duma-duma si so ba Zura Niʼamoniʼö?

⁴ Börö me omasi ita tafosumange Yehowa, tola manö so niha sangoʼaya yaʼita. Ba me ibörögö fao ita ba nono mbanua Yehowa, itugu latandrawaisi ita. Hizaʼi, na faduhu dödöda khö Yehowa, lö irai iröi ita. Faʼafaduhu dödö andrö zi tobali dane-dane wahuwusada khönia, si lö tebulö sagötö faʼara. Hadia sindruhu-ndruhu tola ahatö ita khö Yehowa simane daʼö? Tola! Itutunö Sura Niʼamoniʼö wa niha si lö moʼahonoa tola tobali si fahuwu khö Lowalangi. Duma-dumania, yaʼia daʼö Moze hegöi Razo Dawido. Tatutunö dania duma-dumara, ba tabeʼe wanema li moroi ba zi dombua wanofu daʼa: Hewisa wa tola aboto ba dödöra Yehowa? Ba hadia wamahaʼö si tola tahalö moroi ba duma-dumara?

5. Hadia gangetula nihalö Moze?

⁵ Ifili Moze ba wamosumange Lowalangi. Me arakhagö 40 fakhe ndröfi Moze, ifili ba wefao ba nono mbanua Lowalangi, yaʼia daʼö iraono Gizaraʼeli. Lö omasi Moze lafotöi ia ”ono nono Waraʼo alawe”. (Heb. 11:24) Iheta dadaomania si tohude andrö. Iʼila Moze wa hasambalö mofönu Waraʼo, börö me faʼawö ia ba ndraono Gizaraʼeli, si tobali sawuyu ba danö Miserai. Ba götö daʼö, laʼolowalangigö Waraʼo ira niha Miserai, ba ebua sibai kuasonia. Andrö, nifalua Moze zangoromaʼö wa sindruhu-ndruhu mamati ia ba faduhu dödönia khö Yehowa. Faʼafaduhu dödö andrö zi tobali dane-dane wahuwusa Moze khö Yehowa sandrohu faʼaurinia.​—Gamd. 3:5.

6. Hadia wamahaʼö si tola tahalö moroi ba duma-duma Moze?

⁶ Hadia wamahaʼönia khöda? Simane Moze, moguna tahalö gangetula daʼa: Hadia tafili ba wamosumange Lowalangi ba fao ba nono mbanuania? Enaʼö tola tafosumange Lowalangi, tola manö oya zinangea tatehegö ba waʼaurida. Tola manö göi tataögö wanandraigö moroi ba niha si lö mangokhögö faʼaboto ba dödö sanandrösa khö Lowalangi. Hizaʼi na faduhu dödöda khö Namada si so ba zorugo, hasambalö itolo ita!

7-8. Hadia manö wamahaʼö nihalö Moze?

⁷ Ifahaʼö ia Moze sanandrösa ba gamuata Yehowa ba ifalua gohitö dödö Yehowa. Me iʼandrö khö Moze enaʼö iʼohe baero ndraono Gizaraʼeli moroi ba Miserai, ambö khönia faʼafaduhu dödö ba hauga kali ifatunö khö Yehowa wa lö sagu khönia. Fanema li nibeʼe Yehowa zangoromaʼö faʼahakhö dödönia khö Moze. Aboto ba dödönia nirasoi Moze ba ibeʼe wanolo. (2 Moz. 4:10-16) Buania, tola sagu khö Moze ba wamaʼema turia wanguhuku sabölö-bölö nibeʼe Yehowa khö Waraʼo. Aefa daʼö, iʼila Moze waʼabölö sahöli-höli dödö moroi khö Yehowa me ilumöʼö ndraono Gizaraʼeli, hizaʼi ihori Waraʼo hegöi ira saradadunia ba Nasi Soyo.​—2 Moz. 14:26-31; Zin. 136:15.

⁸ Me no teʼefaʼö ndraono Gizaraʼeli moroi ba danö Miserai, lalau mukökö-kökö. Hizaʼi, iʼila Moze wa iforomaʼö Yehowa waʼebolo dödö sahöli-höli dödö ba nono mbanua si no iʼefaʼö moroi ba wangosawuyu andrö. (Zin. 78:40-43) Iʼila göi Moze wa iforomaʼö Yehowa wangide-ngideʼö sahöli-höli dödö,  me omasi ia ibulöʼö gangetulania me no aefa iʼandrö khönia Moze.​—2 Moz. 32:9-14.

9. Moloʼö Heberaiʼo 11:27, hewisa waʼahatö Moze khö Yehowa?

⁹ Me no aefa iʼohe baero ndraono Gizaraʼeli moroi ba danö Miserai, itugu aro wahuwusa Moze khö Yehowa. Ba hulö na no iʼila Namania andrö. (Baso Heberaiʼo 11:27.) Itutunö Sura Niʼamoniʼö wa ahatö sibai Moze khö Yehowa. Imane Sura Niʼamoniʼö, ”Fahuhuo Yehowa khö Moze, si faudu wawa ira, simane na fahuhuo zi fahuwu.”​—2 Moz. 33:11.

10. Hadia zinangea tafalua enaʼö sindruhu-ndruhu aboto ba dödöda Lowalangi?

¹⁰ Hadia wamahaʼönia khöda? Enaʼö sindruhu-ndruhu aboto ba dödöda Lowalangi, moguna tafahaʼö ita ba gamuatania. Lö ibönö na ha daʼö manö. Moguna göi tafalua gohitö dödönia. Iadaʼa, ohitö dödö Lowalangi enaʼö ”teʼorifi fefu niha ba lasöndra waʼaboto ba dödö si tefaudu sanandrösa ba zindruhu”. (1 Tim. 2:3, 4) Börö daʼö, sambua lala ba wamalua ohitö dödö Lowalangi yaʼia daʼö moguna tafahaʼö niha böʼö sanandrösa khö Yehowa.

11. Ba ginötö tafahaʼö niha sanandrösa khö Yehowa, hewisa enaʼö itugu aboto ba dödöda Lowalangi?

¹¹ Sasesenia, tola itugu aboto ba dödöda Yehowa, na tafahaʼö niha böʼö sanandrösa khönia. Duma-dumania, me iʼoʼou ita Yehowa falukha ba niha sangomasiʼö sindruhu, tola taʼila samösa wa ebua sibai waʼahakhö dödö Yehowa. (Yoh. 6:44; Hal. 13:48) Me mofozu niha nifahaʼöda ba Zura Niʼamoniʼö ba wamöhöli amuatara si lö baga, ba ibörögö labohouni gamuatara, tola taʼila wa mohalöwö waʼabölö Daromali Lowalangi. (Kol. 3:9, 10) Ba taʼila göi waʼebolo dödö Lowalangi me itehegö nasa ginötö ba niha sato ba wamahaʼö yaʼira sanandrösa khönia enaʼö teʼorifi.​—Rom. 10:13-15.

12. Ba 2 Moze 33:13, hadia niʼandrö Moze, ba hadia mbörö?

¹² Iʼameʼegö tödö Moze wahuwusania khö Yehowa. Iʼogunaʼö Moze Yehowa ba wamalua ngawalö dandra sahöli-höli dödö, andrö wa no sindruhu-ndruhu aboto ba dödönia Yehowa. Hewaʼae simanö, si fao fangide-ngideʼö iʼandrö Moze khö Yehowa enaʼö itugu tedou nasa waʼaboto ba dödönia sanandrösa khö Yehowa. (Baso 2 Moze 33:13.) Ba ginötö daʼö, no töra 80 fakhe ndröfi Moze. Hizaʼi, iʼila wa moguna nasa ifahaʼö ia moroi khö Namania si so ba zorugo.

13. Hadia sambua lala ba wangoromaʼö wa taʼameʼegö tödö wahuwusada khö Lowalangi?

¹³ Hadia wamahaʼönia khöda? Hewaʼae no ara tobali ita samosumange Yehowa, moguna lö tebulö taʼameʼegö tödö wahuwusada khönia. Hewisa wangoromaʼöda wa taʼameʼegö tödö wahuwusada khö Lowalangi? Sambua lalania yaʼia daʼö fangandrö.

14. Na omasi ita sindruhu-ndruhu aboto ba dödöda Lowalangi, hana wa moguna taʼaseseʼö mangandrö?

¹⁴ Na omasi ita fahuwu ba zi samösa niha, moguna asese fahuhuo ita khönia. Andrö, na omasiʼö itugu ahatö khö Lowalangi, moguna asese mangandrö ndraʼugö khönia. Böi aombö dödömö ba wamatunö khönia hadia niʼera-eramö hegöi nirasoimö. (Ef. 6:18) Imane Krista si toröi ba Turki, ”Ero na ututunö nösi dödögu ba wangandrö ba uʼila wanolo moroi khö Yehowa, itugu uʼomasiʼö ia ba faduhu dödögu khönia. Me uʼila lala wanemaʼönia fangandrögu, daʼa zanolo yaʼo ba wangiʼila wa Yehowa andrö Amagu ba Awögu.”

15. Hewisa Yehowa wamaigi Razo Dawido?

¹⁵ Me tumbu Dawido, samosumange Yehowa zatuania hegöi niha ba zi fasui yaʼia.  Hizaʼi, tenga ha si fao-fao manö Dawido ba nösi nomonia. Iforege enaʼö tobali ia si fahuwu si sökhi khö Yehowa, ba iʼomasiʼö sibai ia Yehowa. Iwaʼö Yehowa wa Dawido andrö niha ’sangomusoiʼö tödönia’. (Hal. 13:22) Hewisa wa tola tobali si fahuwu khö Yehowa Dawido?

16. Hadia wamahaʼö nihalö Dawido sanandrösa khö Yehowa me iʼangerönusi niwöwöi Yehowa?

¹⁶ Ifahaʼö ia Dawido sanandrösa khö Yehowa moroi ba niwöwöinia. Me awuyu-wuyu Dawido, ihorigö ginötönia ba wondrorogö mbiri-biri namania ba mbenua. Tola manö ba ginötö daʼö ibörögö iʼangerönusi niwöwöi Yehowa. Duma-dumania, me ifaigi yawa dalu mbanua ba zi bongi, tenga ha döfi soya sibai niʼilania hizaʼi iʼila göi hawaʼatua-tua zamazökhi yaʼia. Terou dödö Dawido ba wanura, ”Idunö-dunö lakhömi Lowalangi andrö banua si yawa; ba iʼombakhaʼö nifazökhi dangania sebolo andrö.” (Zin. 19:1, 2) Aefa daʼö, me iʼangerönusi Dawido wa no sahöli-höli dödö wamazökhi Lowalangi niha gulidanö, aboto ba dödönia waʼatua-tua sibai Lowalangi. (Zin. 139:14) Ba ginötö iʼangerönusi fefu niwöwöi Lowalangi, irasoi wa no ide-ide sibai ia moroi khö Yehowa.​—Zin. 139:6.

17. Hadia wamahaʼö si tola tahalö na taʼangerönusi niwöwöi?

¹⁷ Hadia wamahaʼönia khöda? Forege ba wangomasiʼö ngawalö niwöwöi. Beʼe ginötömö ba wamaigi hegöi ba woʼangerönusi gulidanö si sökhi niwöwöi Yehowa. Ba waʼaurida sero maʼökhö, tola tafaigi niwöwöi simane sinanö, urifö hegöi niha. Angerönusi hadia wamahaʼö si tola öhalö sanandrösa khö Yehowa moroi ba niwöwöinia andrö. Na öfalua daʼö, itugu aboto ba dödömö Namada sebua faʼomasi ero maʼökhö. (Rom. 1:20) Ba ero maʼökhö, tola örasoi wa itugu monönö waʼomasimö khö Yehowa.

18. Simane nisura ba Zinunö 18, hadia nifaduhusi tödö Dawido?

¹⁸ Aboto ba dödö Dawido wa itolo ia Yehowa. Duma-dumania, me ilumöʼö mbiri-biri namania moroi ba zingo hegöi berua. Aboto ba dödönia wa börö wanolo moroi khö Yehowa andrö wa tola ibunu gurifö si dua ngaʼeu andrö. Me ikalaisi samösa saradadu sebua niha yaʼia daʼö Goliato, iʼila Dawido wa fao khönia Yehowa. (1 Zam. 17:37) Ba me mofozu moloi ia moroi khö Razo Zaulo safökhö tödö khönia, iwaʼö wa Yehowa zolumöʼö yaʼia. (Zin. 18, superskripsi, Terjemahan Dunia Baru) Na so wayawasa khö Dawido, tola manö tumbu ba wangera-ngerania wa fefu nifaluania andrö börö waʼabölönia samösa. Hizaʼi, börö me so wangide-ngideʼö khö Dawido, tola iʼila danga Yehowa ba waʼaurinia.​—Zin. 138:7.

19. Hadia wamahaʼö si tola tahalö moroi ba duma-duma Dawido?

¹⁹ Hadia wamahaʼönia khöda? Tenga ha taʼandrö wanolo moroi khö Yehowa hizaʼi moguna göi khöda wamorege. Moguna taforege ba wangiʼila hawaʼara ba hewisa Yehowa ba wameʼe khöda fanolo. Na so khöda wangide-ngideʼö, tola tamane tödöda wa tebai tafalua fefu daʼö na ha faʼabölöda samösa. Aboto göi ba dödöda wa itolo ita Yehowa ba wamalua si lö ikhamö faʼabölöda. Ero na tarasoi wanolo moroi khö Yehowa, tola itugu aro wahuwusada khönia. Samösa dalifusöda moroi ba mbanua Fiji sotöi Isaac, si no mamosumange Yehowa ba zi hauga fakhe, irasoi wa atulö fefu daʼö. Imane, ”Na ifuli itörö tödögu fefu zi no irai utörö, tola uʼila hewisa wanolo Yehowa ndraʼo iʼotarai me ufahaʼö ndraʼo ba Zura Niʼamoniʼö irugi iadaʼa. Urasoi wa itugu ahatö ndraʼo khö Yehowa.”

20. Hadia wamahaʼö si tola tahalö moroi ba wahuwusa Dawido khö Lowalangi?

²⁰ Iʼoʼö Dawido gamuata Yehowa. Ifazökhi  ita Yehowa si fakhili-khili khönia irege tola taʼoʼö gamuatania. (1 Moz. 1:26) Tola itugu aoha khöda ba woloʼö amuata Yehowa, na taforege ba wangokhögö faʼaboto ba dödö sanandrösa khönia. Sindruhu-ndruhu aboto ba dödö Dawido sanandrösa khö Yehowa, andrö wa tola iʼoʼö waʼahakhö dödö Yehowa ba ginötö fahuhuo ba niha böʼö. Daʼö mbörö wa ahakhö göi dödö Yehowa khö Dawido. Me ifalua zala föna Yehowa yaʼia daʼö me ihoröni Mbaseba ba itatugöi enaʼö labunu woʼomo Mbaseba, omasi Yehowa ba wangefaʼö zala nifalua Dawido. (2 Zam. 11:1-4, 15) Börö me fahuwu sibai Dawido khö Yehowa, tobali ia samösa razo niʼomasiʼö nono mbanuania ba Gizaraʼeli. Aefa daʼö, iʼogunaʼö ia Yehowa tobali duma-duma ba razo Gizaraʼeli tanö böʼö.​—1 Raz. 15:11; 2 Raz. 14:1-3.

21. Moloʼö Efeso 4:24 ba 5:1, hadia mbuania khöda na taforege ba ’woloʼö Lowalangi’?

²¹ Hadia wamahaʼönia khöda? Moguna ’taʼoʼö Lowalangi’. Na taʼoʼö gamuata Lowalangi, hasambalö tasöndra mbua si sökhi. Itugu aboto göi ba dödöda ia. Aefa daʼö, taforomaʼö wa yaʼita andrö iraononia.​—Baso Efeso 4:24; 5:1.

22-23. Hadia howu-howu nitemada na tafalua hadia zi no tafahaʼö yaʼita sanandrösa khö Yehowa?

²² Simane si no tatutunö ba wamahaʼö daʼa, iforomaʼö khöda gamuatania Yehowa moroi ba niwöwöinia hegöi Taromalinia, Sura Niʼamoniʼö. Ba mbuku daʼö oya sibai duma-duma nono mbanua Lowalangi si tola taʼoʼö, simane Moze hegöi Dawido. No ifalua halöwönia Yehowa. Andrö wa moguna göi tafalua halöwöda, enaʼö itugu oya tafahaʼö ita sanandrösa khönia.

²³ Lö irai taböhöli ba wamahaʼö yaʼita sanandrösa khö Yehowa. (Zango. 3:11) Sabölö moguna tenga hawaʼoya waʼatua-tua niʼokhögöda sanandrösa khö Yehowa, hizaʼi hewisa wangogunaʼöda faʼatua-tua daʼö. Na tafalua hadia zi no tafahaʼö yaʼita ba taforege ba woloʼö Namada sebua faʼomasi, lö tebulö ahatö ia khöda. (Yak. 4:8) Moroi ba Daromalinia, ibeʼe khöda Yehowa waʼafaduhu dödö wa lö irai iröi niha samorege ba wangokhögö faʼaboto ba dödö sanandrösa khönia.