HADIA niha sasese mangandrö saohagölö ndraʼugö? Fefu ita moguna taʼangeragö wanofu daʼa. Ifaʼeleʼö Sura Niʼamoniʼö hadia zalua ba götöda iadaʼa, ato niha ”si lö mangila mangandrö saohagölö”. (2 Tim. 3:2) Tola manö no irai falukha ndraʼugö ba niha sangumaʼö tödönia wa no sinangea itema ngawalö hadia ia moroi ba niha böʼö. Niha simane daʼö iwaʼö tödönia wa lö moguna iʼandrö saohagölö ba ngawalö hadia ia zi no itema. Tatu manö lö ohahau dödömö na ahatö ndraʼugö khönia.

Hizaʼi, lafarou dödö nono mbanua Yehowa enaʼö ’lö mamalö-malö laʼandrö saohagölö’. Moguna ’taʼandrö saohagölö ba ngawalö hadia ia’. (Kol. 3:15; 1 Tes. 5:18) Sindruhunia, na asese taʼandrö saohagölö, so ösa mbua nirasoida. Hadia manö daʼö?

Dane-dane si oföna wa moguna asese taʼandrö saohagölö, yaʼia daʼö börö me daʼa sambua lala wa tola laʼameʼegö tödö ita niha böʼö. Angeragö atö: Na so nifalua niha böʼö khömö, daʼö zangoromaʼö wa iʼameʼegö tödö ndraʼugö ba irasoi wa no sinangea ndraʼugö ba wanema yaʼia. Na aboto ba dödömö daʼö ba öʼandrö saohagölö, örasoi wa laʼameʼegö tödö ndraʼugö niha böʼö. Daʼö nirasoi Ruti me iforomaʼö khönia Boasi waʼoböwö. Tatu manö iʼandrö saohagölö Ruti moroi ba waʼahakhö dödö niforomaʼö Boasi, ba irasoi wa laʼameʼegö tödö ia.​—Rut. 2:10-13.

Si oföna sibai taʼandrö saohagölö yaʼia daʼö khö Lowalangi. Tatu manö asese örasoi wa no oya howu-howu si no iʼamualagö Lowalangi, he sanandrösa ba wamati hegöi soguna ba mboto. (5 Moz. 8:17, 18; Hal. 14:17) Angerönusi howu-howu nibeʼe Lowalangi khömö, hegöi ba niha niʼomasiʼömö. Böi ha asala itörö tödömö fefu daʼö. Na öʼangerönusi waʼoböwö niforomaʼö Lowalangi, itugu öʼomasiʼö ia ba faduhu dödömö wa sindruhu-ndruhu iʼomasiʼö ba iʼameʼegö tödö ndraʼugö.​—1 Yoh. 4:9.

Baero woʼangeragö faʼoböwö niforomaʼö Lowalangi hegöi ba woʼangerönusi howu-howunia, faʼema wangandrö saohagölö khö Yehowa börö waʼasökhi dödönia. (Zin. 100:4, 5) Moloʼö penelitian, ”tola iʼasogö waʼomuso dödö ba niha na lafaʼema wangandrö saohagölö”.

Dane-dane tanö böʼö, tola aro wahuwusada na taʼandrö saohagölö. Fefu niha moguna larasoi wa laʼameʼegö tödö ira. (Rom. 16:3, 4) Aefa daʼö, niha sasese mangandrö saohagölö si toʼölönia omasi ira ba wanolo niha böʼö. Larasoi waʼahakhö dödö moroi ba niha böʼö ba tedönisi göi dödöra ba wosulöni faʼahakhö dödö niforomaʼö khöra. Na latolo niha böʼö, larasoi göi waʼomuso dödö. Imane Yesu, ”Ohahau dödö ba wameʼe moroi ba wanema.”​—Hal. 20:35.

Imane Robert Emmons moroi ba Universitas ba Kalifornia, samalua penelitian sanandrösa ba wangandrö saohagölö, ”Enaʼö tola taʼandrö saohagölö, moguna taʼokhögö waʼaboto ba dödö wa moguna khöda wanolo moroi ba niha böʼö. Itaria tabeʼe, ba itaria göi tatema.” Atulö sa, enaʼö anau gölöda ba tarasoi waʼowua-wua dödö, moguna taʼodaligö niha böʼö ba ngawalö hadia ia. Duma-dumania, tola manö latolo ita ba wameʼe soguna khöda mazui ba wamadöhö fökhöda. (1 Kor.  12:21) Niha sasese mangandrö saohagölö, tatu iʼameʼegö tödö hadia nifalua niha böʼö khönia. Börö daʼö, hadia asese öʼandrö saohagölö na so niha samalua khömö hadia ia?

Dane-dane tanö böʼönia nasa yaʼia daʼö, fangandrö saohagölö zangosambuaʼö fangera-ngerada ba zi sökhi tenga ba zi lö sökhi. Tola tawaʼö, wa fangera-ngerada andre simane saringa. Tola taʼosambuaʼö wangera-ngerada ba zi sökhi ba tatimbagö zi lö sökhi. Eluahania, abölö taʼosambuaʼö wangera-ngerada ba zi sökhi moroi ba zi lö sökhi. Na itugu taʼandrö saohagölö, itugu oya zi sökhi niʼilada, ba tola itugu taforomaʼö nasa wangandrö saohagölö. Na lö tebulö taʼangerönusi ngawalö hadia ia niʼandröda saohagölö, itugu aoha khöda ba wamalua mene-mene nisura Waulo andre, ”Böi mamalö-malö waʼomuso dödömi ba khö Zoʼaya.”​—Fil. 4:4.

Na lö tebulö taforomaʼö wangandrö saohagölö, daʼa zanolo yaʼita enaʼö lö taʼangeragö zi lö sökhi. Ba ginötö taʼandrö saohagölö, si toʼölönia lö khöda faʼafökhö dödö, faʼabu dödö mazui fönu. Si toʼölönia, niha sangandrö saohagölö, lö iʼomasiʼö gefe mazui harato. Ahono dödönia ba zi no so ba lö talafo iʼomasiʼö ngawalö hadia ia.​—Fil. 4:12.

Yaʼita niha Keriso, aboto ba dödöda wa omasi Zatana na so khöda waʼide-ide dödö hegöi faʼabu dödö, börö me tataögö gabula dödö ba ngaluo safuria andre. Omuso sibai dödö Zatana na taʼokhögö wangera-ngera si lö sökhi hegöi fokökö-kökö. Tola abua khöda ba wamalua halöwö tobali sanuriaigö si sökhi, na so khöda gamuata simane daʼö. Sindruhunia, fangandrö saohagölö moʼamakhaita ia ba mbua geheha, simane faʼomuso dödö hegöi famati ba mbuʼusa li nibeʼe Lowalangi.​—Gal. 5:22, 23.

Börö me ono mbanua Yehowa ndraʼugö, tola manö fao dödömö ba artikel nitutunö andre wa moguna taʼaseseʼö wangandrö saohagölö. Aboto göi ba dödöda wa lö aoha khöda ba wangokhögö fangera-ngera si sökhi. Hizaʼi, böi so khöda waʼide-ide dödö. Yafaduhu dödömö, wa tola öʼokhögö ba ödouʼö gamuata si sökhi andrö. Hewisa lalania? Ero maʼökhö, beʼe ginötömö ba woʼangeragö ngawalö zi tola öʼandrö saohagölö. Na asese öfalua daʼö, itugu ara tola tefaʼanö ndraʼugö tobali niha sasese mangandrö saohagölö. Abölö owua-wua dödömö moroi ba niha sangosambuaʼö fangera-ngerania ba gabula dödö nitaögönia. Angeragö hadia manö ngawalö zi sökhi nifalua Lowalangi hegöi niha böʼö, sameʼe khömö faʼabölö hegöi faʼomuso dödö. Tola göi ösura daʼö ba zi sambua buku. Ero maʼökhö sura dombua mazui tölu ngawalö zi tola öʼandrö saohagölö ba zi maʼökhö daʼö.

Moloʼö penelitian, na asese taʼandrö saohagölö ba niha böʼö, tola tebohouni lala wangera-ngerada, irege taʼokhögö wangera-ngera si sökhi ba waʼaurida. Niha sangila mangandrö saohagölö yaʼia daʼö niha somuso tödö. Börö daʼö, angeragö fefu howu-howu si no ötema, okhögö waʼomuso dödö ba ngawalö nirasoimö, böi tebulö andrö saohagölö! Böi baliʼö ngawalö zi sökhi nirasoimö ha si toʼölö manö. Hizaʼi, ’andrö saohagölö khö Yehowa, me no si sökhi tödö ia’. Andrö, ’dataʼandrö saohagölö ba ngawalö hadia ia’.​—1 Nga. 16:34; 1 Tes. 5:18.