Ba duma-duma si no tesura ba 5 Moze 22:25-27, sindruhu-ndruhu wa fasala ndra matua daʼö börö me ihoröni nono alawe andrö. Börö daʼö, oroisa andrö tenga ba wangoromaʼö hadia fasala ndra matua daʼö mazui löʼö. Hizaʼi, oroisa andrö zamaduhuʼö wa lö fasala nono alawe daʼö. Nehegö ngawua wehedenia.

Ba ayati si no tatutunö no mege, ifatunö wa so samösa ndra matua samalua horö bakha ba ”mbanua” khö nono alawe si no famatua. Börö me no famatua, amaedola no mangowalu nono alawe daʼö. Andrö wa no samalua horö ndra matua daʼö. Hewisa göi nono alawe daʼö? ”Lö niʼekhugönia niha, bakha ba mbanua.” Na no iʼekhugö niha, hasambalö larongo niha böʼö ba latolo ia. Hizaʼi, börö me lö muʼekhugönia niha, lafotöi ia göi samalua horö. Yaʼira si darua andrö no fasala.​—5 Moz. 22:23, 24.

So zalua tanö böʼö, ”Ba na ba danö falukha ndra matua andrö khö nono alawe andrö, si no muʼonihagö, ba na ilangögö manö, na ihoröni, ba ha ira matua, si horöni yaʼia, zi mate. Ba ono alawe andrö, böi lababaya; lö sa nifazökhinia horö börö wamunu; ba zimanö, ba no timba na itema ibunu nawönia niha. Me no ba danö falukha ia khönia, ba ma no muʼao nono alawe andrö, si no mufohu, ba ma lö si möi manolo yaʼia.”​—5 Moze. 22:25-27.

Ba zalua andrö tola lahalö gangetula ira sanguhuku wa ”no muʼao nono alawe andrö, si no mufohu, ba ma lö si möi manolo yaʼia”. Andrö wa lö mufaluania horö. Hizaʼi, no samalua horö ndra matua daʼö me no ”ilangögö manö, na ihoröni” nono alawe andrö si no famatua.

Börö daʼö, hewaʼae na ohitö dödö si oföna moroi ba huku andrö yaʼia ba wamaduhuʼö wa lö fasala nono alawe daʼö, ifatunö göi wa fasala ndra matua daʼö börö me no ihoröni ba ifalua horö. Faduhu dödöda wa hasambalö ”lahaogö laʼosisiʼö” zalua andrö ira sanguhuku, tefaudu moroi ba wanuturu lala nibeʼe Yehowa ba zi hauga kali.​—5 Moz. 13:14; 17:4; 2 Moz. 20:14.