1. Hewisa wamaigi niha sato sanandrösa ba halöwö?

BA NAHIA si toröi yaʼugö, hewisa wamaigi niha sanandrösa ba halöwö? Iadaʼa ato niha sangohorigö inötöra hegöi faʼabölöra ba wohalöwö. Niha samorege ba wohalöwö, asese lö inötöra wolombase, lö oya laʼogunaʼö ginötö ba nösi nomora, mazui ba wombönökhi soguna khöra ba wamati. (Zango. 2:23) Tanö böʼönia, so ösa niha si lö omasi mohalöwö ba laʼalu-alui lala enaʼö lö mohalöwö ira.​—Gamd. 26:13, 14.

2-3. Hadia duma-duma nibeʼe Yehowa hegöi Yesu sanandrösa ba wohalöwö?

² Lö tefaudu lala wangera-ngera gulidanö andre sanandrösa ba wohalöwö, faehu daʼö ba lala wamaigi Yehowa hegöi Yesu. Faduhu dödöda wa omasi sibai Yehowa mohalöwö. Imane Yesu, ”Lö aetu mohalöwö Namagu irugi maʼökhö, ba simanö göi ndraʼo.” (Yoh. 5:17) Angeragö fefu halöwö nifalua Lowalangi me iwöwöi malaʼika sato sibai, döfi hegöi planet. Taʼila göi, hawaʼoya ngawalö zi sökhi famaigi si no ifazökhi Lowalangi ba gulidanö. Andrö wa isura daʼö sanura zinunö imane, ”Ha lö oya ngawalö halö-halöwöu, yaʼugö Yehowa; faʼatua-tuamö wamalua yaʼia fefu, no anönö danö niwöwöimö andrö.”​—Zin. 104:24.

³ Iʼoʼö Yesu duma-duma Namania. No famaedo Lowalangi ia, ba fao ia ’ba wamazökhi mbanua si yawa’. Tobali ’tuka’ ia khö Yehowa. (Gamd. 8:27-31) Lö ara aefa daʼö, me so Yesu ba gulidanö ifalua halöwö sahöli-höli dödö. Ba wamaiginia, hulö gönia halöwönia andrö, ba halöwö daʼö göi zangoromaʼö wa Lowalangi zamatenge yaʼia.​—Yoh. 4:34; 5:36; 14:10.

4. Hadia wamahaʼö si tola tahalö moroi khö Yehowa hegöi Yesu sanandrösa ba wolombase?

⁴ Börö me iforege sibai Yehowa hegöi Yesu ba wohalöwö, hadia daʼa zangoromaʼö wa lö moguna khöda wolombase? Lö fefu simane daʼö. Lö irai marase Yehowa, andrö wa lö moguna  khönia wolombase. Imane Sura Niʼamoniʼö me no aefa ifazökhi Yehowa mbanua si yawa awö danö, ”ba molombase ia, ihasugö ia”. (2 Moz. 31:17) Hizaʼi, daʼa zangoromaʼö wa ibatogö halöwönia Yehowa ba isöndra waʼowua-wua dödö ba halöwö nifazökhinia. Hewaʼae iforege Yesu wohalöwö me so ia ba gulidanö, hizaʼi so nasa ginötönia wolombase ba fao ia wemanga khö ndra si fahuwu khönia.​—Mat. 14:13; Luk. 7:34.

5. Hadia gabula dödö nirasoi nono mbanua Lowalangi?

⁵ Ifarou dödö nono mbanua Lowalangi Sura Niʼamoniʼö enaʼö so khöra waʼaterou dödö ba wohalöwö. Moguna owölö-ölö ira ba böi areu. (Gamd. 15:19) Tola manö mohalöwö ndraʼugö ba wombönökhi soguna ba nösi nomou. Ba fefu zi no tobali nifahaʼö Keriso, laʼokhögö noro dödö ba wanuriaigö turia somuso dödö. Hewaʼae simanö, moguna göi tobönö ginötömö wolombase. Hadia itaria öforege ba wamaudugö inötömö ba wamalua halöwö sero maʼökhö, ba wanuriaigö hegöi folombase? Hewisa enaʼö tola taʼila hawaʼoya ginötö niʼogunaʼöda ba wohalöwö hegöi folombase?

6. Hewisa nisura ba Mareko 6:30-34, ba wangoromaʼö wa iʼokhögö Yesu lala wangera-ngera si tefaudu sanandrösa ba halöwö hegöi folombase?

⁶ Moguna taʼokhögö lala wangera-ngera si tefaudu sanandrösa ba halöwö. Terou dödö Razo Zelomo ba wanura, ”Fefu hadia ia, ba so ginötö . . . hadia ia fefu nilau.” Iwaʼö wa so ginötö ba wananö, fangotomosi, fege-ege, faʼiki, folaya ba tanö böʼönia. (Zango. 3:1-8) Atulö sa, wa so dombua ngawalö zabölö tohude ba waʼauri, yaʼia daʼö fohalöwö hegöi folombase. Iʼokhögö Yesu lala wangera-ngera si tefaudu sanandrösa ba halöwö hegöi folombase. Samuza inötö, me mangawuli ndra nifahaʼönia ba wanuriaigö, oya sibai halöwö nifaluara, ”irege lö saʼae inötöra wemanga”. Imane Yesu, ”Aine, möita ba nahia si lö niha-niha ba molombase ita sabata.” (Baso Mareko 6:30-34.) Hewaʼae oya sibai halöwö nifalua Yesu hegöi ira nifahaʼönia ba ambö inötöra wolombase, hizaʼi aboto ba dödö Yesu wa moguna sibai khöra daʼö.

7. Na no tafahaʼö ita sanandrösa ba luo Sabato, hana wa tola möi fanoloda daʼö?

⁷ Itaria, moguna khöda wolombase moroi ba halöwö nifaluada sero maʼökhö. Tola taʼila daʼö ba gamakhoita si tohude nibeʼe Lowalangi ba nono mbanuania me götö föna, yaʼia daʼö luo Sabato ero migu. Atulö sa wa tenga barö Goroisa Moze so ita. Hizaʼi, tola tafahaʼö ita sanandrösa ba luo Sabato. Daʼa zanolo yaʼita ba wangokhögö lala wangera-ngera si tefaudu sanandrösa ba halöwö hegöi folombase.

8. Moloʼö 2 Moze 31:12-15, hadia ngaluo Sabato andrö?

⁸ Itutunö Taromali Lowalangi, me no aefa ifalua halöwönia Lowalangi irugi önö ”ngaluo”, ibatogö halöwönia ba wamazökhi ngawalö zi so ba gulidanö. (1 Moz. 2:2) Hizaʼi, omasi sibai Yehowa mohalöwö, ba ’lö aetu mohalöwö ia’ ba wamalua halöwö tanö böʼö. (Yoh. 5:17) Me no aefa ifazökhi ngawalö hadia ia, molombase Yehowa ba ngaluo si fitu. Daʼö dane-dane niʼogunaʼönia me itatugöi ngaluo Sabato ba ndraono Gizaraʼeli. Iwaʼö Lowalangi wa ngaluo Sabato andrö, no tobali tandra ba gotaluania ba ndraono Gizaraʼeli. Luo si fitu mazui ngaluo Sabato no ”luo niʼamoniʼö khö Yehowa, löʼö manö mohalöwö ba daʼö”. (Baso 2 Moze 31:12-15.) Moguna gamakhoita daʼa ba niha fefu, tefarahu ba daʼö khö ndraono, khö ndra sawuyu, hegöi ba gurifö nifaliarora. (2 Moz. 20:10) Börö  gamakhoita daʼa, tola itugu teʼosambuaʼö dödöra ba wamalua halöwö ba wamati.

9. Hewisa ndra sondröniaʼö ba agama ba götö Yesu ba wangokhögö lala wangera-ngera si lö tefaudu sanandrösa ba ngaluo Sabato?

⁹ Sindruhunia, moguna ngaluo Sabato andrö ba nono mbanua Lowalangi. Hizaʼi, ira sondröniaʼö ba agama me götö Yesu, lafazökhi ngawalö gamakhoita si lö tefaudu sanandrösa ba ngaluo Sabato. Duma-dumania, tebai lateteu gandru mazui lafadöhö niha sofökhö. (Mrk. 2:23-27; 3:2-5) Ifatunö Yesu khö ndra soloʼö khönia wa tenga daʼö nitötöna Lowalangi.

10. Hadia wamahaʼö si tola tahalö moroi ba Mataiʼo 12:9-12 sanandrösa ba lala wamaigi Yesu luo Sabato?

¹⁰ Yesu hegöi ira nifahaʼönia, yaʼira andrö niha Yahudi, ba lafalua luo Sabato börö me laʼoʼö Goroisa Moze. * Hizaʼi moroi ba wehede hegöi nifalua Yesu, iforomaʼö wa moguna sibai tefaudu ba wamalua luo Sabato. Lö itegu na so niha samalua si sökhi hegöi sanolo niha böʼö ba luo Sabato. Imane Yesu, ”Tola tafalua zi sökhi na luo Sabato.” (Baso Mataiʼo 12:9-12.) Moloʼö Yesu, tenga sanawö amakhoita sanandrösa ba luo Sabato daʼö. Fefu nifalua Yesu zangoromaʼö wa aboto ba dödönia hadia sibai gohitö dödö Lowalangi wa iʼandrö ba nono mbanuania ba wamalua ngaluo Sabato. Me luo daʼö, molombase nono mbanua Lowalangi moroi ba halöwöra sero maʼökhö, enaʼö itugu teʼosambuaʼö dödöra ba wamosumange Yehowa. Tatu teʼebuaʼö Yesu ba nösi  nomo sangogunaʼö luo Sabato ba wamosumange Lowalangi. Itutunö Sura Niʼamoniʼö me so Yesu ba mbanua waʼatumbunia ba Nazareta, ”simane si toʼölö ifalua ba luo Sabato, möi ia ba nahia waʼowulo. Me mosindro ia ba wombaso”.​—Luk. 4:15-19.

11. Haniha zi tobali duma-duma khö Yesu sanandrösa ba wohalöwö?

¹¹ Börö me Yosefo zangebuaʼö Yesu, ifahaʼö Yesu ba nekhe-nekhe danga tobali tuka geu. Tatu göi ifatunö khö Yesu hewisa lala Yehowa wamaigi halöwö. (Mat. 13:55, 56) Ba tola manö göi iʼila Yesu hewisa namania andrö ba wamalua halöwö sero maʼökhö ba wombönökhi soguna ba nösi nomonia. Ba gafuriata, imane Yesu khö ndra nifahaʼönia, ”Sinangea na itema luonia sohalöwö.” (Luk. 10:7) Andrö wa aboto ba dödö Yesu wa moguna sibai mohalöwö.

12. Hadia manö ayati sangoromaʼö wa aboto ba dödö Waulo hawaʼamoguna wohalöwö?

¹² Aboto göi ba dödö zinenge sotöi Faulo wa moguna sibai wohalöwö. Halöwö Waulo siföföna yaʼia daʼö ba wanuriaigö turia sanandrösa khö Yesu hegöi famahaʼönia. Hizaʼi, enaʼö tebönökhi zoguna khönia, mohalöwö ia tobali samazökhi tendra. Aboto ba dödö niha Tesalonika wa ’iʼodödögö Faulo wohalöwö ba iforege bongi maʼökhö’ enaʼö ’lö tobali noro dödö’ niha böʼö ia. (2 Tes. 3:8; Hal. 20:34, 35) Me so Waulo ba Gorindro, toröi ia ba nomo Akila hegöi Firisikila ba falulu fohalöwö ira ”börö me fagölö nekhe-nekhe dangara yaʼia daʼö mamazökhi tendra”. Me iwaʼö Faulo wa iforege sibai mohalöwö ”bongi maʼökhö”, tenga daʼö geluahania wa lö ibato halöwönia tobali samazökhi tendra. Molombase göi ia, duma-dumania me luo Sabato. Ba iʼogunaʼö ngaluo daʼö weʼamöi manuriaigö ba niha Yahudi si lö mohalöwö ba luo Sabato.​—Hal. 13:14-16, 42-44; 16:13; 18:1-4.

13. Hadia wamahaʼö si tola tahalö moroi ba duma-duma Waulo?

¹³ Ibeʼe duma-duma si sökhi Faulo. Hewaʼae na mohalöwö ia ba wangalui soguna khönia, lö tebulö ’ituriaigö duria somuso dödö moroi khö Lowalangi’. (Rom. 15:16; 2 Kor. 11:23) Ibeʼe göi mene-mene ba niha böʼö ba wamalua halöwö simane nifaluania. Akila ba Firisikila, yaʼira andrö ’awö Waulo wohalöwö ba khö Keriso Yesu’. (Rom. 12:11; 16:3) Ifatunö göi Faulo ba niha Gorindro wa moguna ’owölö-ölö ira ba wangai halöwö Lowalangi’. (1 Kor. 15:58; 2 Kor. 9:8) Ibeʼe Yehowa wanuturu lala khö Waulo ba wanura, ”Niha si lö mohalöwö, böi yamanga.”​—2 Tes. 3:10.

14. Hadia geluaha wehede Yesu ba Yohane 14:12?

¹⁴ Halöwö si tohude sinangea tafalua ba ngaluo safuria, yaʼia daʼö manuriaigö hegöi ba wombaliʼö nifahaʼö. Ifaʼeleʼö göi Yesu wa abölö ebua nasa halöwö nifalua ndra soloʼö khönia moroi ba halöwö nifaluania. (Baso Yohane 14:12.) Tenga daʼö geluahania wa tafalua ngawalö dandra sahöli-höli dödö simane nifalua Yesu. Hizaʼi, ira soloʼö khö Yesu manuriaigö ira ba lafahaʼö niha ba ngawalö nahia, ba niha sato, ba oya ginötö laʼogunaʼö.

15. Hadia manö wanofu-nofu sinangea öʼangeragö, ba hadia mbörö?

¹⁵ Na mohalöwö ndraʼugö ba wangalui soguna khömö, angeragö wanofu-nofu daʼa: ’Ba nahia wohalöwögu, hadia laʼila wa yaʼodo andre niha sowölö-ölö? Hadia uhaogö wamalua halöwögu ba uʼawaisi daʼö ba ginötö si no mutatugöi?’ Na fanema li nibeʼemö yaʼia, tola manö yaʼugö andrö samösa sohalöwö nifaduhusi tödö gafalomö. Ba tola göi adöni dödö niha si so ba nahia wohalöwömö sanandrösa ba duria somuso dödö. Ba wamalua halöwö fanuriaigö hegöi famahaʼö, angeragö wanofu-nofu daʼa: ’Hadia laʼila wa yaʼodo andre samösa sanuriaigö sowölö-ölö? Hadia sökhi wamaʼanögu yaʼo ba wanuriaigö? Na so niha sadöni tödö, hadia uʼanemaiʼö ufuli ufalukhaisi? Hadia no utatugöi ginötögu ba  wamalua lala wanuriaigö si faböʼö-böʼö?’ Na fanema li nibeʼemö noa, hasambalö owua-wua dödömö ba halöwö fanuriaigö.

16. Hewisa wamaigi Yesu hegöi ira nifahaʼönia sanandrösa ba wolombase, ba hewisa lala wamaigi niha sato iadaʼa?

¹⁶ Aboto ba dödö Yesu hegöi ira nifahaʼönia wa itaria moguna khöra wolombase. Hizaʼi, ato niha ba götö Yesu hegöi ba götöda iadaʼa, sangokhögö lala wangera-ngera si fagölö simane ndra matua si kayo si so ba gamaedola Yesu. Imane ira matua daʼö ba khönia samösa, ”Tola ölau modao-dao saʼae, manga, mamadu, ba omusoiʼö dödöu.” (Luk. 12:19; 2 Tim. 3:4) Iwaʼö tödönia wa sabölö tohude ba waʼauri yaʼia daʼö folombase hegöi ba wangomusoiʼö tödö. Hizaʼi, tenga simane daʼö Yesu hegöi ira nifahaʼönia.

17. Ba ginötö lö mohalöwö ita, hewisa ita ba wangogunaʼö inötöda?

¹⁷ Iadaʼa, moguna taforege ba woloʼö Yesu. Ba ginötö lö mohalöwö ita, taʼogunaʼö ginötö daʼö tenga ha ba wolombase, hizaʼi taʼogunaʼö ia ba wanuriaigö hegöi feʼamöi ba gangowuloa. Ba wamaigida, feʼamöi manuriaigö hegöi ba gangowuloa, moguna sibai ia ba waʼaurida. Andrö wa moguna sibai taforege enaʼö lö tebulö tafalua ngawalö halöwö khö Yehowa. (Heb. 10:24, 25) Hewaʼae na ba ginötö talau manörö-nörö, hasambalö taʼondrasi gangowuloa ba taforege ba wangalui inötö ba wamalua halöwö fanuriaigö.​—2 Tim. 4:2.

18. Hadia zomasi Razoda Yesu Keriso enaʼö tafalua?

¹⁸ Taʼandrö sibai saohagölö börö me taʼokhögö Razo simane Yesu Keriso. Lö itötöna khöda ba wamalua si lö ikhamö faʼabölöda. (Heb. 4:15) Itolo göi ita enaʼö taʼokhögö wangera-ngera si tefaudu sanandrösa ba halöwö hegöi folombase. Omasi göi Yesu na tebönökhi ginötöda wolombase. Ba omasi göi ia na mohalöwö ita ba wangalui soguna khöda ba fao ita ba wombaliʼö nifahaʼö, daʼa halöwö solohe faʼomuso dödö. Ba wamahaʼö aefa daʼa, tafahaʼö ita hadia nifalua Yesu ba wangefaʼö yaʼita moroi ba wangosawuyu si lö sökhi.