1. Hadia noro dödö nibeʼe Yehowa khö ndra satua?

ME IWÖWÖI wongambatö siföföna Yehowa, ibeʼe khöra waʼomasi ba wangokhögö iraono. Andrö wa imane Sura Niʼamoniʼö wa no ”okhöta nibeʼe Yehowa ndraono”. (Zin. 127:3.) Hadia geluahania? Duma-dumania, iʼandrö khöu si fahuwu khömö ba wangiröʼö kefenia sebua. Hewisa dödömö na laʼandrö khöu wamalua daʼö? Tatu manö omuso dödömö börö me faduhu dödönia khömö. Hizaʼi tola manö göi aombö dödömö alai na tebai örorogö harato daʼö. Yehowa si fahuwu khöda sabölö sökhi, ibeʼe göi noro dödö khö ndra satua, ba abölö ebua mböli daʼö moroi ba gefe. Ibeʼe khöra noro dödö enaʼö lahaogö ba wondrorogö iraono ba larasoi waʼowua-wua dödö.

2. Hadia manö wanofu-nofu nitutunöda?

² Haniha zi tola mangai angetula ba niha si no mongambatö ba wangokhögö iraono ba hawaʼara tola laʼokhögö ndraono? Ba, hadia zi tola lafalua ira satua enaʼö so waʼowua-wua dödö ba ndraonora? So ösa goi-goi ba Daromali Lowalangi si tola manolo niha Keriso si no mongambatö ba wangai angetula si fao faʼatua-tua?

3. (a) Haniha zangai angetula ba niha si no mongambatö ba wangokhögö iraono? (b) Hadia manö goi-goi Zura Niʼamoniʼö sinangea latörö tödöra ira si fahuwu hegöi ösi nomo niha si no mongambatö?

³ Ba zi hauga kebudayaan, latötöna ba niha sawena mongambatö enaʼö alio laʼokhögö ndraono. Tola manö lafaso ira ösi nomora hegöi niha böʼö ba woloʼö si toʼölö mufalua andrö. Imane samösa dalifusöda moroi ba Asia sotöi Jethro, ”Ba gangowuloa, so ösa niha si no mangokhögö iraono, lafaso wongambatö tanö böʼö enaʼö laʼaliokö göi ba wangokhögö iraono.” Imane talifusöda tanö böʼö moroi ba Asia sotöi Jeffry,  ”So zangumaʼö ba niha si lö iraono, na lö hadöi ndraonomi, lö hadöi sondrorogö yaʼami dania na no atua”. Hizaʼi, ero sambua fongambatö moguna lahalö gangetula samösa hadia laʼokhögö ndraono mazui löʼö. Angetula hegöi noro dödöra samösa daʼö. (Gal. 6:5.) Sindruhu sa wa omasi zi fahuwu hegöi ösi nomo na so waʼowua-wua dödö ba niha sawena mongambatö. Hizaʼi, moguna aboto ba dödöda wa ha niha si no mongambatö zi tola mangai angetula hadia laʼokhögö ndraono mazui löʼö.​—1 Tes. 4:11.

4-5. Hadia zi dombua ngawalö zinangea lafatunöisi si sambua fongambatö sedöna mangokhögö iraono, ba hawaʼara ginötö si sökhi ba wamatunö daʼö? Tutunö.

⁴ Fongambatö zangai angetula ba wangokhögö iraono, moguna lafatunöisi zi dombua wanofu andre: Si oföna, hawaʼara laʼokhögö ndraono? Si dua, hawaʼato dania ndraonora? Hawaʼara ginötö si sökhi ba wamatunö daʼö? Ba hana wa moguna sibai zi dombua ngawalö andrö?

⁵ Oya wongambatö zamatunöisi sanandrösa ba daʼö, fatua lö mangowalu ira. Hadia mbörö? Enaʼö hasara dödöra sanandrösa ba daʼö. Moguna göi laʼangeragö hadia no tefaʼanö ira ba wangokhögö noro dödö daʼö. So ösa wongambatö zangai angetula ba wangokhögö iraono, si löʼö-löʼönia döfi mazui dua fakhe, börö na no tobali satua oya ginötö hegöi faʼabölö nibeʼera ba ndraonora. Andrö wa lö aösö lahalö gangetula ba wangokhögö iraono, enaʼö so ginötöra wefao-fao tobali si sambua fongambatö ba tola itugu ahatö ira khö nawöra.​—Ef. 5:33.

6. Börö me no so ita ba ngaluo safuria, hadia ösa gangetula nihalö niha si no mongambatö?

⁶ Tanö böʼönia, so ösa wongambatö niha Keriso sangai angetula ba woloʼö duma-duma ndraono Noakhi si datölu hegöi foʼomora. Si datölu fongambatö andrö lö laʼanemaiʼö laʼokhögö ndraono me no aefa mangowalu ira. (1 Moz. 6:18; 9:18, 19; 10:1; 2 Fet. 2:5) Ifagölösi Yesu götöda iadaʼa simane ba ”götö Noakhi”. Ba no taʼila samösa wa no so ita ba ”mbaŵa si lö sökhi ba ngaluo safuria”. (Mat. 24:37; 2 Tim. 3:1) Andrö wa so ösa wongambatö zangai angetula wa lö aösö ua laʼokhögö ndraono, enaʼö oya laʼogunaʼö ginötöra ba wamosumange Yehowa.

7. Hewisa goi-goi ba Luka 14:28, 29 hegöi ba Gamaedola 21:5 möi fanolo niha Keriso si no mongambatö?

⁷ Niha Keriso si no mongambatö, fatua lö lahalö gangetula ba wangokhögö iraono, moguna ’laʼerai ua hadia ibönö gefera’. (Baso Luka 14:28, 29.) Satua si no  mangokhögö iraono, aboto ba dödönia wa tenga ha kefe niʼogunaʼöra, hizaʼi laʼogunaʼö göi ginötö hegöi faʼabölö ba wangebuaʼö iraono. Andrö wa ero sambua fongambötö moguna laʼangeragö wanofu daʼa: ’Hadia moguna mohalöwö ndraʼaga si darua dania ba wombönökhi soguna ba nösi nomoma? Hadia fao dödöma ba wombönökhi ”soguna khöma” ero maʼökhö? Na faoma mohalöwö ndraʼaga, haniha zondrorogö iraonoma? Hadia lala wangera-ngera hegöi amuata somasiga iʼoʼö onoma?’ Na lahaogö ba wamatunöisi wanofu-nofu daʼa ira niha Keriso si no mongambatö, no lafalua mene-mene niwaʼö ba Gamaedola 21:5.​—Baso.

8. Hadia manö gabula dödö nitaögö niha Keriso si no mongambatö, ba hewisa woʼomo ira matua si so faʼomasi ba wameʼe fanolo?

⁸ Oya ginötö hegöi faʼabölö niʼogunaʼö ndra satua ba ndraonora. Hadia mbörö? Börö me moguna ba zi samösa iraono ba worasoi faʼomasi moroi khö ndra satuania, ba no sinangea itema daʼö. Hizaʼi, na so zi sambua fongambatö zangai angetula ba wangokhögö iraono si farege otalua ndröfi, tola manö abua khöra ba wangoromaʼö faʼomasi ba ndraonora zamösana. So ösa wongambatö sangokhögö iraono side-ide sangumaʼö wa larasoi waʼerege dödö. Tola manö irasoi waʼafawuka wangera-ngera si samösa ina hegöi faʼamarase, irege lö asese saʼae ifalua wamahaʼö, fangandrö hegöi fanuriaigö. Tola manö göi abua khönia ba wangosambuaʼö fangera-ngerania ba gangowuloa, irege lö oya wamahaʼö nitemania ba gangowuloa. Tatu manö, foʼomo ira matua si so faʼomasi, ifalua ndrege zi tola ifalua ba wanolo foʼomonia ira alawe ba wangoromaʼö faʼomasi ba ndraonora, he ba nomo mazui ba gangowuloa. Duma-dumania, foʼomo ira matua tola itolo woʼomonia ira alawe ba wombabaya halöwö ba nomo. Iforege göi ba wamalua Famahaʼö Yomo ba Nomo enaʼö sindruhu-ndruhu latema mbua ösi nomonia moroi ba wamahaʼö daʼö. Ba samösa ama niha Keriso moguna asese fao ia ba nösi nomonia ba wanuriaigö.

9-10. Hadia zinangea lafalua ira satua ba wanolo iraonora?

⁹ Hewisa ndra satua ba wamahaʼö iraonora ba wangomasiʼö Yehowa? Hewisa ira ba wolumöʼö iraonora moroi ba gulidanö safönu faʼalösökhi daʼa? Nehegö hadia manö zi tola lafalua ira satua.

¹⁰ Angandrö enaʼö ötema wanolo moroi khö Yehowa. Manoa hegöi foʼomonia, yaʼira andre satua Simesono sameʼe duma-duma si sökhi. Me iʼila Manoa hegöi foʼomonia wa lö ara tö laʼokhögö samösa nono matua, iʼandrö khö Yehowa enaʼö ibeʼe khöra wanturu lala ba wangebuaʼö onora.

11. Hewisa zatua ba woloʼö duma-duma Manoa nitutunö ba Zanguhuku 13:8?

 ¹¹ Nihad hegöi Alma, moroi ba Bosnia hegöi Herzegovina, lafahaʼö ira moroi ba duma-duma Manoa. Lamane, ”Simane Manoa, maʼandrö khö Yehowa ba wamahaʼö yaʼaga hewisa lala enaʼö tobali satua si sökhi. Ba iʼogunaʼö ngawalö lala Yehowa ba wanema fangandröma. Duma-dumania, moroi ba Zura Niʼamoniʼö, publikasi, angowuloa hegöi ba kebaktian.”​—Baso Zanguhuku 13:8.

12. Hadia duma-duma nibeʼe Yosefo hegöi Maria ba ndraonora?

¹² Beʼe duma-duma si sökhi ba ndraonomö. Ba ginötö öfahaʼö ndraonomö, moguna sibai khöra wehede nifaʼemamö. Hizaʼi, duma-duma niforomaʼömö sindruhu-ndruhu molua-lua daʼö ba ndraonomö. Faduhu dödöda wa Yosefo hegöi Maria no labeʼe duma-duma si sökhi khö Yesu hegöi ba ndraonora tanö böʼö. Iforege Yosefo ba wohalöwö ba wombönökhi soguna ba nösi nomonia. Aefa daʼö, ibeʼö göi wamarou dödö ba nösi nomonia enaʼö laʼameʼegö tödö halöwö ba wamati. (5 Moz. 4:9, 10) Moloʼö Oroisa, sindruhunia lö lafaso sibai Yosefo ba wolohe ösi nomonia ba Yeruzalema ba wamalua Owasa Fasa ’ero röfi’. Hizaʼi, lö tebulö ifalua daʼö. (Luk. 2:41, 42) Tola manö so ösa zatua ira matua ba götö Yosefo sangumaʼö tödöra wa abua wamalua daʼö, fangohori inötö, ba itugu oya muʼogunaʼö gefe. Hizaʼi, tenga simane daʼö Yosefo. Iʼameʼege tödö halöwö ba wamati ba ifahaʼö ndraononia ba wangokhögö amuata si sökhi. Aboto göi ba dödö Maria sanandrösa ba Zura Niʼamoniʼö. Moroi ba wehede hegöi nifaluania tatu manö ifahaʼö ndraononia ba wangomasiʼö Taromali Lowalangi.

13. Hewisa zi sambua fongambatö niha Keriso ba woloʼö duma-duma Yosefo hegöi Maria?

¹³ Nihad hegöi Alma, nitutunö no mege, omasi laʼoʼö duma-duma Yosefo hegöi Maria. Hewisa wa möi fanolora daʼö ba wamahaö iraonora ba wangomasiʼö hegöi ba wamosumange Lowalangi? Lamane, ”Moroi ba lala waʼaurima, maforomaʼö khö ndraonoma wa moguna sibai wamaudugö faʼauri ba goi-goi Yehowa.” Lamane nasa, ”Na omasi ita tobali niha samati ndraonoda, moguna tobali ita ua niha samati.”

14. Hana wa moguna laʼila ira satua haniha manö nawö ndraonora fariawö?

¹⁴ Tolo ndraonömö ba wamili fariawösa si sökhi. Moguna laʼila ira satua haniha manö nawö ndraonora fariawö ba hadia manö nifalua ndraonora. Eluahania, moguna laʼila ira satua haniha manö zi fahuhuo khöra ba HP hegöi ba media sosial. Awöra fariawö, tola ibulöʼö lala wangera-ngera hegöi amuata nono daʼö.​—1 Kor. 15:33.

15. Hadia wamahaʼö si tola lahalö ira satua moroi ba duma-duma dalifusöda Jessie?

¹⁵ Na ambö aboto ba dödö ndra satua wangogunaʼö komputer, HP mazui tablet, hadia zi tola lafalua? Imane samösa ama moroi ba Filipina sotöi Jessie, ”Ambö aboto ba dödöma sanandrösa ba teknologi. Hizaʼi, lö tebulö mafahaʼö ndraonoma sanandrösa ba deʼala salua ba wangogunaʼö perangkat elektronik.” Hewaʼae na lö aboto sibai ba dödö Jessie lala wangogunaʼö perangkat elektronik, hizaʼi, lö iwaʼö wa tebai laʼogunaʼö daʼö. Ifatunö göi, ”Ufarou dödöra enaʼö laʼogunaʼö perangkat elektronik ba wamahaʼö yaʼira ba li si bohou, ba wohenaigö waö-waö ba gangowuloa, hegöi fombaso Sura Niʼamoniʼö ero maʼökhö.” Ba bagian ”Anak Muda” ba jw.org^®, so mene-mene si sökhi sanandrösa ba wamaʼoheʼö pesan hegöi ba wameʼe koda ba Internet. Na so nonomö, hadia no öbaso ba ötutunö khöra mene-mene daʼö? Ba situs web niʼokhögöda so göi video Hadia No Sandru Ndraʼugö ba Fakake Elektronik? hegöi Ogunaʼö Jejaring Sosial si fao Faʼatua-tua. * Hadia no irai ötutunö hegöi fao ami ba  wamaigi video andrö? Moguna sibai artikel hegöi video daʼö ba wamahaʼö iraonomö hewisa lala wangogunaʼö perangkat elektronik si fao faʼatua-tua.​—Gamd. 13:20.

16. Hadia manö nifalua ndra satua ba hadia mbuania?

¹⁶ Ato ndra satua sotehegö khö ndraonora enaʼö tola fariawö ira ba niha sameʼe duma-duma ba wamosumange Lowalangi. Duma-dumania, sambua fongambatö moroi ba Pantai Gading sotöi Dani hegöi Bella. Asese lakaoni zatua samasui enaʼö toröi ba nomora. Imane Dani, ”Sökhi sibai lua-luania khö nonoma. Ibörötaigö merintis ia ba iadaʼa tebeʼe khönia halöwö tobali satua samasui sosalahini.” Hadia tola ötolo ndraonomö ba worasoi fariawösa si sökhi simane daʼö?

17-18. Hawaʼara zinangeania ibörötaigö lafahaʼö ndraonora ira satua?

¹⁷ Fahaʼö ndraonomö iʼotarai me ono sawuyu. Na iʼotarai ba waʼide-ide lafahaʼö ndraonora ira satua, itugu sökhi lua-luania. (Gamd. 22:6) Duma-dumania Timoteo, me no ebua-bua ia ifalua wofanö wefao khö zinenge sotöi Faulo. Inania sotöi Oinike hegöi nenenia Loise zamahaʼö yaʼia ”iʼotarai me ono sawuyu”.​—2 Tim. 1:5; 3:15.

¹⁸ Fongambatö tanö böʼö moroi ba Pantai Gading sotöi Jean-Claude hegöi Peace, mofozu ira ba wanolo iraonora ba wangomasiʼö hegöi ba wamosumange Yehowa. Hana wa tola mofozu ira? Börö me laʼoʼö duma-duma Oinike hegöi Loise. Lamane, ”Ibörötaigö matanögö ba dödö ndraonoma Daromali Lowalangi iʼotarai me ono sawuyu, lö ara me no aefa tumbu ira.”​—5 Moz. 6:6, 7.

19. Hadia geluahania ötanögö Daromali Lowalangi ba dödö ndraonomö?

¹⁹ Hadia geluahania ”ötanö” Daromali Yehowa ba dödö ndraonomö? Eluahania, moguna ”lö tebulö wamahaʼö yaʼira ba fasugi ba dödöra Daromali Lowalangi”. Enaʼö tola lafalua daʼö, moguna asese fao zatua khö ndraonora. Itaria, tola manö aföli ndra satua ba wameʼe famahaʼö khö ndraonora börö me labeʼe wamahaʼö si fagölö ba zi hauga kali. Hizaʼi, tola laʼogunaʼö ginötö daʼö ira satua ba wanolo iraonora enaʼö aboto ba dödöra Daromali Lowalangi hegöi lala wamalua yaʼia.

20. Tutunö hewisa Zinunö 127:4, tola mufalua ia ba wangebuaʼö iraono.

²⁰ Moguna aboto ba dödömö ero samösa iraono. Ba Zinunö 127 ifagölösi ndraono  andrö simane ono wana. (Baso Zinunö 127:4.) Ono wana, si toʼölönia tefazökhi moroi ba gama-gama si faböʼö-böʼö ba faböʼö göi waʼebuania. Simane daʼö göi, faböʼö-böʼö ero samösa iraono. Andrö wa moguna khö ndra satua ba wotatugöi hewisa lalara ba wamahaʼö iraonora ero samösa-mösa. Ba götöda andre, so sambua wongambatö ba Israel si no mofozu ba wangebuaʼö iraonora si darua ba wamosumange Yehowa, lafatunö khöda hadia zanolo yaʼira ba wamalua daʼö: ”Mafaböʼöni wamahaʼö ba Zura Niʼamoniʼö ero samösa iraono.” Tatu manö, ero samösa högö yomo ba nomo yaʼia zangai angetula hadia lafalua wamahaʼö Zura Niʼamoniö si faböʼö-böʼö simane daʼö mazui moguna lafalua ia.

21. Hadia wanolo nibeʼe Yehowa khö ndra satua?

²¹ Itaria abua khö ndra satua ba wamahaʼö iraonora. Hizaʼi, iraono no buala moroi khö Yehowa, andrö wa lö tebulö ia ba wameʼe fanolo khö ndra satua. Omasi ia ba wamondrongo fangandröra. Ba ibeʼe wanema li moroi ba Zura Niʼamoniʼö, publikasi, duma-duma hegöi mene-mene moroi khö ndra satua tanö böʼö ba mbanua niha Keriso.

22. Hadia manö ösa zi tohude si tola labeʼe ira satua?

²² So zangumaʼö wa fangebuaʼö iraono andrö halöwö ba zi 20 fakhe. Hizaʼi sindruhunia, lö irai tebulö ira tobali satua. Tola labeʼe ngawalö zi tohude simane faʼomasi, inötö hegöi famahaʼö moroi ba Zura Niʼamoniʼö. Ero samösa iraono, no faböʼö-böʼö lalara wanemaʼö famahaʼö andrö. Hizaʼi, ato ndra talifusö niʼebuaʼö ndra satua sangomasiʼö Yehowa. Simane nirasoi dalifusöda Joanna Mae moroi ba Asia. Imane, ”Na ifuli itörö tödögu wamahaʼö nitemagu moroi khö ndra satuagu, uʼandrö sibai saohagölö börö me no labeʼe khögu mene-mene ba lafahaʼö ndraʼo ba wangomasiʼö Yehowa. Tenga ha labeʼe khögu waʼauri, hizaʼi lafatunö khögu hewisa waʼauri sindruhu.” (Gamd. 23:24, 25) Zuta ndra talifusöda si fao tödö ba wehede daʼö.