1-2. (a) Ba zi hauga soi, hadia gowasa sasese lafalua niha? (Faigi kotak ” Hadia Ndröfi Waʼowua-wua Dödö Andrö?”) (b) Hadia niwaʼö Yesu ba Luka 4:16-18?

BA ZI hauga soi, na no ikhamö 50 fakhe mamatörö zi samösa razo mazui ratu, si toʼölönia hasambalö laʼowasaini daʼö faoma owasa sebua. Tola lafalua gowasa daʼö, maʼö-maʼökhö faʼara, samigu, mazui töra moroi ba daʼö. Hizaʼi ba gafuriatania na no awai gowasa andrö, lö saʼae latörö tödöra daʼö niha.

² Iraono Gizaraʼeli me föna, lafalua göi gowasa ba ndröfi si-50 ba lafalua daʼö ba zi döfi faʼara. Lafotöi gowasa daʼö, döfi Faʼowua-wua Dödö. Döfi Waʼowua-wua Dödö yaʼia daʼö döfi wangefa ba ndraono Gizaraʼeli. Hana wa moguna tafahaʼö ita sanandrösa ba gowasa daʼö? Börö me daʼa zamasugi ba dödöda sanandrösa ba gamakhoita nibeʼe Yehowa enaʼö tarasoi wangefa. Ba wamahaʼö daʼa, tatutunö sanandrösa ba gamakhoita daʼö, yaʼia daʼö döfi Waʼowua-wua Dödö ba niha Keriso, sabölö sökhi moroi ba ndröfi Waʼowua-wua Dödö ba ndraono Gizaraʼeli me föna. Fangefa nitemada so ia sagötö faʼara ba no göi tarasoi daʼö iadaʼa. Yesu samösa, no irai itutunö sanandrösa ba wangefa daʼa.​—Baso Luka 4:16-18.

3. Moloʼö 3 Moze 25:8-12, hadia mbua nirasoi ndraono Gizaraʼeli me so ndröfi Waʼowua-wua Dödö?

³ Hadia geluaha wehede Yesu me iwaʼö wa hasambalö teʼefaʼö niha si göna famakao? Tola itugu aboto ba dödöda geluaha niwaʼönia andrö, na tatutunö sanandrösa ba ndröfi Waʼowua-wua Dödö si no itatugöi Lowalangi ba nono mbanuania me föna. Imane Yehowa ba ndraono Gizaraʼeli, ”Ba miʼamoniʼö ndröfi si lima wulu andrö, mifarongogö ba daʼö waʼaefa, faʼaefa niha fefu ba danö. Döfi Waʼowua-wua Dödö miwaʼö, ba dozi ami, ba mangawuli khömi gokhötami, ba mangawuli ba niwara zamösana.” (Baso 3 Moze 25:8-12.) Ba wamahaʼö migu silalö,  no tatutunö sanandrösa ba mbua nitema ndraono Gizaraʼeli ba luo Sabato. Iadaʼa, hadia mbua nitemara ba ndröfi Waʼowua-wua Dödö? Duma-dumania, te so samösa ndraono Gizaraʼeli soʼömö, ba moguna ifamawa danönia ba wamuʼa ömönia andrö. Ba ndröfi Waʼowua-wua Dödö, lafangawuli khönia danö si no ifamawa. Andrö ’mangawuli khönia gokhötania’, ba tola ibeʼe khö nononia daʼö ba zi samuza inötö. Mazui duma-duma tanö böʼö, te so samösa ndra matua Gizaraʼeli sebua foʼömö ba tola manö ifamawa ia samösa mazui ononia tobali sawuyu, enaʼö abuʼa gömönia andrö. Ba ndröfi Waʼowua-wua Dödö, niha si tobali sawuyu moguna mangawuli ia ba nösi nomonia. Andrö wa lö hadöi ndraono Gizaraʼeli si tobali sawuyu sandrohu faʼaurinia. Sindruhu sa, amakhoita daʼa zangoromaʼö wa iʼomasiʼö sibai nono mbanuania Yehowa.

4-5. Hana wa moguna tafahaʼö ita sanandrösa ba ndröfi Waʼowua-wua Dödö ba götö föna?

⁴ Hadia mbua tanö böʼö niʼasogö ndröfi Waʼowua-wua Dödö? Imane Yehowa, ”Ba löʼö sa si numana ba khömi dania; ifahowuʼö sibai saʼae ndraʼugö dania Yehowa, ba danö andrö, nibeʼe Lowalangiu, Yehowa, khöu, tana khöu ba tana ba madoumö dania, enaʼö öʼokhögö.” (5 Moz. 15:4) Faehu sibai zalua andrö ba gulidanö iadaʼa. Na tafaigi, niha si kayo itugu kayo ba niha si numana itugu numana.

⁵ Yaʼita niha Keriso, tenga barö Goroisa Moze so ita. Andrö wa lö taʼoʼö goroisa soʼamakhaita ba ndröfi Waʼowua-wua Dödö me götö föna. Duma-dumania, sanandrösa ba wangefaʼö sawuyu, ba wamuaʼa foʼömö, hegöi wamuli tanö ondröita. (Rom. 7:4; 10:4; Ef. 2:15) Hizaʼi, moguna tafahaʼö ita sanandrösa ba ndröfi Waʼowua-wua Dödö me götö föna. Hadia mbörö? Börö me amakhoita nifazökhi Yehowa ba ndraono Gizaraʼeli andrö zamasugi ba dödöda sanandrösa ba wangefa nitemada yaʼita niha Keriso.

6. Hadia lala wangosawuyu sinangea muʼefaʼö ba niha?

⁶ Fefu ita, moguna khöda wangefa börö me no so ita barö wangosawuyu si lö sökhi, yaʼia daʼö fangosawuyu horö. Börö horöda wa tataögö ngawalö wökhö, faʼatua,  hegöi faʼamate. Ato niha sorasoi sanandrösa ba daʼa ba ginötö lafaigi ira ba zörömi mazui möi ira khö doto börö wökhö nitaögöra. Tarasoi göi waʼide-ide dödö ba ginötö tafalua zala. Imane sinenge sotöi Faulo, ”So horö zangosawuyu yaʼo. Tefakao sibai ndraʼodo andre! Haniha zi tola mangefaʼö yaʼo moroi ba mboto horö?”​—Rom. 7:23, 24.

7. Hadia nifaʼeleʼö Yesaya sanandrösa ba wangefa?

⁷ Taʼandrö sibai saohagölö börö me no ifazökhi Lowalangi gamakhoita enaʼö tola teʼorifi ita, mazui teʼefaʼö moroi ba horö. Fangefa daʼa tola tatema ia moroi khö Yesu. Töra 700 fakhe fatua lö möi Yesu ba gulidanö, ifaʼeleʼö Yesaya sanandrösa ba wangefa daʼa, sabölö ebua moroi ba wangefaʼö nirasoi ndraono Gizaraʼeli ba ndröfi Waʼowua-wua Dödö. Isura, ”No ahono khögu geheha zoʼaya andrö, Eheha Yehowa, me no ibayoini ndraʼo Yehowa, ba wamaʼema turia somuso dödö ba zebua famakao; no ifatenge ndraʼodo, ba wodalu-daluni si no arasa tödö, ba ba wangombakha fangefa ba nikuru.” (Yes. 61:1) Haniha nifaʼeleʼö Yesaya?

8. Haniha nifaʼeleʼö Yesaya me isura wamaʼeleʼö sanandrösa ba wangefa?

⁸ Famaʼeleʼö si tohude sanandrösa ba wangefa andrö, awena alua ia me ibörögö halöwönia Yesu ba gulidanö. Me möi Yesu ba nahia waʼowulo si so ba mbanuania ba Nazareta, ibaso wehede nisura Yesaya föna niha Yahudi si no owulo. Imane Yesu sanandrösa khönia samösa, ”So khögu geheha Yehowa, börö me yaʼia zamataro yaʼo ba wanuriaigö turia somuso dödö ba niha si numana. Ifatenge ndraʼo ba wangombakha wa teʼefaʼö niha niʼosawuyu, niha sauʼa ifuli laʼila niha, ba teʼefaʼö niha nifakao, hegöi ba wanuriaigö inötö wamahowuʼö Yehowa yaʼira.” (Luk. 4:16-19) Hewisa waʼalua wamaʼeleʼö daʼö ba waʼauri Yesu?

9. Hadia wangefa nitötöna niha moroi khö Yesu?

⁹ Niha sauri ba götö Yesu, ibörögö larasoi mbua sanandrösa ba wangefa nifaʼeleʼö Yesaya nibaso Yesu. Tola faduhu dödöda sanandrösa ba daʼö börö me Yesu samösa zangumaʼö, ”Maʼökhö andre, no alua ayati sawena mirongo.” (Luk. 4:21) Me larongo daʼö, ato niha sanötöna khö Yesu, enaʼö yaʼia zangefaʼö yaʼira moroi ba wamatörö Roma. Tola manö so ba wangera-ngerara simane si so ba wangera-ngera nifahaʼö Yesu si darua sangumaʼö, ”matötöna wa niha daʼö zangefaʼö iraono Gizaraʼeli”. (Luk. 24:13, 21) Aboto ba dödöda wa lö iʼoʼou ndra nifahaʼönia Yesu ba wolawa famatörö Roma safönu faʼalösökhi. Hizaʼi, ifarou dödö ndra soloʼö khönia  enaʼö ’labeʼe khö Kaisaro tana khö Kaisaro’. (Mat. 22:21) Andrö, hewisa Yesu ba wangefaʼö niha me götö daʼö?

10. Hadia wangefa nibeʼe Yesu khöda?

¹⁰ Me möi Yesu Ono Lowalangi ba gulidanö, möi ia ba wangefaʼö niha moroi ba zi dombua ngawalö. Si oföna, iʼefaʼö ita moroi ba wamahaʼö faya nifahaʼö ndra sondröniaʼö ba agama. Ato niha Yahudi me götö daʼö nifaso ba woloʼö hadia zi toʼölö lafalua niha hegöi famahaʼö sofaya. (Mat. 5:31-37; 15:1-11) Ira sondröniaʼö ba agama andrö, no hulö niha sauʼa. Lawaʼö wa latolo niha ba wamosumange Lowalangi, hizaʼi yaʼira samösa tenga soroi ba dödöra ba wamosumange yaʼia. Lö aboto ba dödöra Lowalangi ba lafalua horö sebua, börö me latimbagö Mesia hegöi famahaʼönia. (Yoh. 9:1, 14-16, 35-41) Me ifahaʼö zindruhu ba ibeʼe duma-duma si sökhi, no iforomaʼö Yesu wa niha sangokhögö fangide-ngideʼö tola teʼefaʼö moroi ba wamahaʼö sofaya.​—Mrk. 1:22; 2:23–3:5.

11. Hadia wangefa si dua nibeʼe Yesu khöda?

¹¹ Si dua, iʼefaʼö ita Yesu moroi ba wangosawuyu horö. Hewisa lalania? Ibeʼe nosonia tobali höli. Börö höli nibeʼe Yesu, andrö wa tola iʼefaʼö Yehowa horö niha sangoromaʼö famati hegöi sangosinangegö höli nibeʼe Yesu andrö. (Heb. 10:12-18) Imane Yesu, ”Na iʼefaʼö ami Ono, sindruhu-ndruhu no teʼefaʼö ami.” (Yoh. 8:36) Fangefa daʼö tatu manö abölö ebua ia moroi ba wangefa nirasoi ndraono Gizaraʼeli ba ndröfi Waʼowua-wua Dödö! Duma-dumania, samösa sawuyu niʼefaʼö ba ndröfi Waʼowua-wua Dödö, tola manö samuza inötö ifuli zui tobali ia sawuyu, ba gafuriatania mate ia. Hizaʼi, fangefa nibeʼe Yesu so ia sagötö faʼara.

12. Haniha niha si oföna sanema mbua moroi ba wangefa niʼombakhaʼö Yesu?

¹² Me Fendrakose 33 M, ituyu Yehowa ndra sinenge hegöi ira matua ba ira alawe si lö faröi faoma eheha niʼamoniʼö. Tobali ira ononia irege ba zi so miföna tola tesusugi ira ba zorugo ba fao ira khö Yesu ba wamatörö. (Rom. 8:2, 15-17) Yaʼira andrö, niha si oföna zanema mbua moroi ba wangefa niʼombakhaʼö Yesu, ba nahia waʼowulo ba Nazareta. Lö iʼosawuyu ira saʼae famahaʼö sofaya moroi khö ndra sondröniaʼö ba agama Yahudi, hegöi si toʼölö mufalua si lö tefaudu ba Daromali Lowalangi. Baero daʼö, moroi ba höli nibeʼe Yesu, ifaduhuʼö Yehowa wa no teʼefaʼö ira moroi ba horö sangaʼasogö faʼamate. Börö zimanö, ndröfi Waʼowua-wua Dödö ba niha Keriso si no tebörögö me Fendrakose 33 M, ba ginötö ituyu ndra nifahaʼönia Yesu wefao khönia ba zorugo, lö tebulö alua ia irugi gangohorita Wamatörö  Yesu ba zi Saribu Fakhe. Hadia manö ngawalö zi sökhi salua iadaʼa irugi gangohorita Wamatörö Yesu ba zi Saribu Fakhe?

13-14. Baero niha Keriso nibayoini, haniha nasa zanema bua moroi ba wangefa nibeʼe Yesu?

¹³ Iadaʼa zuta niha sangokhögö fangide-ngideʼö si otarai ngawalö soi, no tefarahu ira ba ngawawa ”mbiri-mbiri tanö böʼö”. (Yoh. 10:16) Lö ifili ira Yehowa wefao khö Yesu mamatörö ba zorugo. Hizaʼi, itutunö Sura Niʼamoniʼö wa laʼokhögö dötönafö faʼauri sagötö faʼara ba gulidanö. Hadia daʼa nitötönamö?

¹⁴ Sindruhunia, no ötema iadaʼa howu-howu simane nirasoi niha samatörö ba zorugo. Duma-dumania, börö me mamati ndraʼugö ba höli nibeʼe Yesu, tola öʼandrö khö Yehowa ba wangefaʼö horömö. Buania, tola ohahau dödömö börö me öʼokhögö dödö side-ide si lö sinegu föna Yehowa. (Ef. 1:7; Fam. 7:14, 15) Aefa daʼö, ötema göi howu-howu börö me teʼefaʼö ndraʼugö moroi ba wamahaʼö faya. Imane Yesu, ”Ba aboto ba dödömi zindruhu, ba sindruhu andrö zangefaʼö yaʼami.” (Yoh. 8:32) Tatu omuso sibai dödöda ba wanema fangefa simane daʼö!

15. Hadia wangefa hegöi howu-howu nitemada ba zi so miföna?

¹⁵ Tola faduhu dödöda wa ba zi so miföna hasambalö so wangefa sabölö ebua. Lö ara tö, ihori Yesu agama sofaya hegöi famatörö niha si lö sökhi. Hizaʼi, ilumöʼö Lowalangi  ”ngawawa zato sibai” samosumange yaʼia. Oya howu-howu nitemara ba gulidanö faradaiso. (Fam. 7:9, 14) Ato niha nisusugi ba niʼefaʼö moroi ba horö si no iröi Adamo.​—Hal. 24:15.

16. Hadia nasa wangefa sahöli-höli dödö nitemada dania?

¹⁶ Sagötö Wamatörö si Saribu Fakhe, Yesu hegöi si fao khönia mamatörö, falulu fohalöwö ira ba wanolo niha gulidanö enaʼö laʼokhögö mboto soʼahonoa ba moʼahonoa göi wamatira. Inötö wamohouni hegöi fangefa andrö dania, fagölö ia ba ndröfi Waʼowua-wua Dödö ba ndraono Gizaraʼeli me föna. Buania, fefu niha si lö faröi ba wamosumange Yehowa hasambalö moʼahonoa ba teʼefaʼö ira moroi ba horö.

17. Moloʼö Yesaya 65:21-23, hadia zalua ba niha gulidanö ba zi so miföna? (Faigi gambara ba guli majalah.)

¹⁷ Famaʼeleʼö salua ba gulidanö ba zi so miföna, tola taʼila daʼö ba Yesaya 65:21-23. (Baso.) So zangumaʼö wa ba gulidanö faradaiso, lö saʼae moguna mohalöwö niha ba ha sodao-dao manö ira dania. Hizaʼi, itutunö Sura Niʼamoniʼö wa so dania nifalua niha ba daʼö ba ohahau dödöra ba gombayasö dangara samösa. Ba gangohorita Wamatörö ba zi Saribu Fakhe, faduhu dödöda wa ”fefu niwöwöinia teʼefaʼö moroi ba wangosawuyu horö ba faʼamate, ba latema wangefa solakhömi simane nitema ndraono Lowalangi”.​—Rom. 8:21.

18. Hana wa faduhu dödöda wa taʼokhögö Waʼowua-wua Dödö ba zi so miföna?

¹⁸ Mböröta, ibeʼe Yehowa gamakhoita ba ndraono Gizaraʼeli enaʼö laʼokhögö ginötö wohalöwö hegöi folombase. Ba Wamatörö si Saribu Fakhe, tarasoi göi zimane daʼö. Taʼokhögö göi dania ginötö ba wamalua halöwö ba wamati. Enaʼö so khöda Waʼowua-wua Dödö iadaʼa, moguna sibai khöda ba wamosumange Lowalangi. Simane daʼö göi dania ba gulidanö si bohou khö Lowalangi. Fefu ita, owua-wua dödöda auri ba Wamatörö Yesu ba zi Saribu Fakhe. Hadia mbörö? Börö me ohahau dödöda ba halöwö nifaluada ba oya ginötöda ba wamosumange Yehowa.