Tenga. Lö hadöi ayati Zura Niʼamoniʼö mazui buku sejarah sangoromaʼö daʼö.

Ba ngawalö wamoʼeluaha Zura Niʼamoniʼö, tola tumbu ba dödö niha sombaso ayati daʼa wa ba götö Waulo, so niha nibayagö idanö salahi niha si no mate. Duma-dumania, so wamoʼeluaha sangumaʼö, ”Na löʼö manö tesusugi zi mate, ba hana wa lafabayagöʼö ira idanö, salahira?”​—Terjemahan Baru (Terbitan LAI).

Hizaʼi, hadia tefaudu wamoʼeluaha simane daʼö? Nehegö hadia niwaʼö niha sagatua-tua ba Zura Niʼamoniʼö si darua andre. Iwaʼö Dr. Gregory Lockwood sohalöwö ba bidang teologi wa ”irugi iadaʼa, lö hadöi tandra nisöndra ba catatan sejarah mazui ba Zura Niʼamoniʼö” sangoromaʼö wa no irai mufalua wamayagö idanö ”salahi niha si no mate”. Isura göi zimane daʼö Profesor Gordon D. Fee. Imane, ”Ba catatan sejarah mazui ba Zura Niʼamoniʼö, lö irai mututunö wamayagö idanö simane daʼö. Lö irai mututunö daʼö ba Gamabuʼula Li si Bohou; lö hadöi tandra wa no irai mufalua wamayagö idanö simane daʼö ba götö föna, he ba gotalua niha Keriso hegöi ba gereja-gereja nifasindro lö ara me no aefa mate ndra sinenge.”

Iwaʼö Sura Niʼamoniʼö wa moguna möi ndra soloʼö khö Yesu ba ’wombaliʼö nifahaʼönia fefu niha moroi ba ngawalö soi, labayagö ira idanö, ba lafahaʼö ira ba woloʼö fefu niwaʼö Yesu’. (Mat. 28:19, 20) Börö daʼö, fatua lö tebayagö idanö zi samösa niha ba tobali ia nifahaʼö Yesu, moguna ifahaʼö ia sakali sanandrösa khö Yehowa hegöi Ononia, mamati ia, ba iʼoʼö niwaʼöra. Tatu manö, tebai ifalua fefu daʼö niha si no mate. Tebai göi lasalahini ia ira niha Keriso sauri ba wamalua fefu daʼö.​—Zango. 9:5, 10; Yoh. 4:1; 1 Kor. 1:14-16.

Börö daʼö, hadia zindruhunia geluaha wehede Waulo andre?

Me isura Faulo mbuku 1 Korindro, so ösa niha ba mbanua andrö sangumaʼö tödöra wa lö fanusugi ba niha si no mate. (1 Kor. 15:12) Börö daʼö, iforomaʼö Faulo wa fasala lala wangera-ngerara andrö. Iwaʼö wa ero maʼökhö ’itörö lumö waʼamate’. Hizaʼi, faduhu dödönia wa na mate ia, ifuli tesusugi ba auri ia ba zorugo simane Yesu.​—1 Kor. 15:30-32, 42-44.

Moguna aboto ba dödö niha Keriso si no tebayoini si so ba Gorindro wa hasambalö göi göna ira fanandraigö ero maʼökhö ba latörö waʼamate, fatua lö tesusugi ira ba zorugo. Hana wa simane daʼö? Börö me no ’tebayagö ira idanö ba khö Keriso Yesu’, eluahania ’tebayagö göi ira idanö ba waʼamatenia’. (Rom. 6:3) Me tebayagö ira idanö simane daʼö, latörö lala waʼauri safönu fanandraigö sofeta ba waʼamate, ba aefa daʼö tesusugi ira ba wangokhögö faʼauri ba zorugo.

Töra dua fakhe me no aefa tebayagö idanö Yesu, imane khö ndra sinengenia si darua, ”Tebayagö ami idanö simane nitörögu.” (Mrk. 10:38, 39) Tenga famayagö ba nidanö nitutunö Yesu ba daʼa. Manandrösa wehedenia andre ba ’wamayagö idanö ba waʼamate’. Eluahania, hasambalö itörö waʼamate börö me lö faröi ia khö Lowalangi. Daʼö göi zalua khö ndra niha Keriso si no tebayoini. Isura Faulo wa hasambalö ’tefakao ira awö Keriso’ enaʼö ’tefolakhömi göi ira awönia’. (Rom. 8:16, 17; 2 Kor. 4:17) Börö daʼö, moguna göi mate ira sakali fatua lö tesusugi ira ba wangokhögö faʼauri ba zorugo.

Hadia rahu-rahunia? Abölö tefaudu na simane daʼa wamoʼeluaha wehede Waulo si so ba 1 Korindro 15:29 andrö: ”Na lö tesusugi niha si no mate, hewisa niha nibayagö idanö si tobali niha si mate? Hadia gunania wa tebayagö ira idanö simane daʼö?”