1-2. Hadia dötönafö sahöli-höli dödö niʼokhögö nono mbanua Yehowa?

TOHUDE sibai nifotöi fanötöna. Si toʼölönia, manötöna niha enaʼö owua-wua dödöra ba wongambatö ba lö fökhö-fökhö ndraonora. So göi zanötöna enaʼö döhö moroi ba wökhö sabölö-bölö. Te göi daʼö nitötönada yaʼita niha Keriso. Hizaʼi, so göi nidöna-dönada sabölö tohude moroi ba daʼö. Tatötöna enaʼö tola taʼokhögö waʼauri si lö aetu ba zi so miföna, ba ifuli falukha ita ba niha niʼomasiʼöda si no mate.

² Imane sinenge sotöi Faulo, ”So göi wanötönagu khö Lowalangi . . . wa so wanusugi niha si no mate, he satulö he si lö atulö.” (Hal. 24:15) Ba Zura Niʼamoniʼö, tenga Faulo zi oföna sibai manutunö sanandrösa ba wanusugi. No göi irai itutunö zimane daʼö Yobi. Faduhu dödönia wa lö iʼolifugö ia Lowalangi, ba hasambalö isusugi dania ia ba zi so miföna.​—Yob. 14:7-10, 12-15.

3. Hadia mbua si tola tatema na tabaso 1 Korindro faza 15?

³ ”Fanusugi niha si no mate”, no ’famahaʼö si oföna’ nifaduhusi tödö niha Keriso. (Heb. 6:1, 2) No tesura wehede Waulo sanandrösa ba wanusugi ba 1 Korindro faza 15. Tatu möi fangabölöʼö niha Keriso me abad siföföna nisurania andrö. Tola göi möi fangabölöʼöda wehede nisura ba faza andrö, irege itugu mamati ita ba dötönafö fanusugi si no ara tafaduhusi tödö.

4. Hana wa tola faduhu dödöda wa hasambalö so wanusugi ba niha niʼomasiʼöda si no mate?

⁴ Fanusugi Yesu zangaroʼö tödöda wa so dötönafö fanusugi ba niha niʼomasiʼöda si no mate. Fanusugi Yesu, no tefarahu ba ”duria somuso dödö” nifaʼema Waulo khö ndra niha Keriso si so ba Gorindro. (1 Kor. 15:1, 2) Sindruhunia, no  iwaʼö Faulo wa zaya-zaya gölö wamati zi samösa niha na lö faduhu dödönia wa no tesusugi Yesu. (1 Kor. 15:17) Börö daʼö, famatida ba wanusugi Yesu zi tobali dane-dane wanötönada sanandrösa ba wanusugi.

5-6. Hana wa tohude sibai khöda zindruhu si tölu ngawalö nisura ba 1 Korindro 15:3, 4?

⁵ Me itutunö Faulo sanandrösa ba wanusugi, itötöi zindruhu si tölu ngawalö andre: (1) ”Mate Keriso börö horöda”. (2) ”No lakoʼo ia”. (3) ʼTesusugi ia ba ngaluo si tölu simane nisura ba Mbuku Niʼamoniʼö’.​—Baso 1 Korindro 15:3, 4.

⁶ Hana wa tohude sibai khöda zindruhu si tölu ngawalö andre? Me ifaʼeleʼö Yesaya sanandrösa khö Mesia, iwaʼö wa hasambalö ”tetibo ia moroi ba danö niha sauri”, ba ”ba ngai zebua horö labeʼe lewatönia”. Baero daʼö, ifaʼeleʼö göi Yesaya wa hasambalö ”iluʼi horö sato andrö” Mesia. Ifalua daʼö Yesu me ibeʼe nosonia tobali höli. (Yes. 53:8, 9, 12; Mat. 20:28; Rom. 5:8) Andrö, börö me no mate Yesu, lakoʼo, ba tesusugi ia, tola taʼokhögö dötönafö wa hasambalö teʼefaʼö ita moroi ba horö hegöi faʼamate, ba ifuli falukha ita ba niha niʼomasiʼöda si no mate.

7-8. Hana wa tola faduhu dödö ndra niha Keriso wa sindruhu no tesusugi Yesu?

⁷ Simane si no tatutunö, moʼamakhaita sibai wanötönada ba wanusugi niha si no mate ba wanusugi Yesu. Börö daʼö, moguna tafaduhusi tödö soroi ba dödö wa no tesusugi Yesu. Hana wa tola faduhu dödöda wa no isusugi Yesu andrö Yehowa?

⁸ Ato niha si falukha khö Yesu me no aefa tesusugi ia. (1 Kor. 15:5-7) Duma-dumania, iwaʼö Faulo wa no falukha Wetero (Kefa) khö Yesu me no aefa tesusugi ia. So göi ösa nifahaʼönia tanö böʼö samaduhuʼö wa sindruhu no alua daʼö. (Luk. 24:33, 34) Baero daʼö, iwaʼö göi Faulo wa no falukha ndra sinenge khö Yesu me no aefa tesusugi ia. Aefa daʼö, ”isamuzaigö wamalukhaisi ira talifusö si töra 500 niha”. Te salua ba Galilaia daʼa, simane nisura ba Mataiʼo 28:16-20. Ba gafuriata, ”ifalukhaisi Yakobo”. Tola manö, Yakobo nitutunö ba daʼa yaʼia daʼö akhi tiri Yesu si lö faduhu tödö ba wamobörö wa yaʼia andrö Mesia. (Yoh. 7:5) Me no iʼila wa no tesusugi Yesu, awena mamati Yakobo khönia. Sadöni dödöda, me isura zurania Faulo ba niha Gorindro te me döfi 55 M, ato niha sangila faʼatesusugi Yesu si lö nasa si mate. Börö daʼö, na so niha saombö tödö sanandrösa ba wanusugi Yesu, tola lasofu daʼö ba niha si no mangila faʼaluania.

9. Moloʼö Halöwö Zinenge 9:3-5, hadia zalua khö Waulo si tobali tandra wa sindruhu-ndruhu no tesusugi Yesu?

⁹ Ba gafuriata, ifalukhaisi göi Waulo Yesu. (1 Kor. 15:8) Me itörö Faulo (Saulo) lala si numalö ba Ndramaseko, irongo li Yesu si no tesusugi, ba iʼila lakhömi Yesu ba zorugo. (Baso Halöwö Zinenge 9:3-5.) Salua khö Waulo andre göi zi tobali tandra wa sindruhu-ndruhu no tesusugi Yesu.​—Hal. 26:12-15.

10. Hadia nifalua Waulo börö me faduhu dödönia wa no tesusugi Yesu?

¹⁰ No sadöni dödöda nitutunö Waulo andre börö me solohi niha Keriso ia ba zilalö. Hizaʼi, me no faduhu dödönia wa no tesusugi Yesu, lö aetu iforege Faulo ba wamaduhuʼö sindruhu andrö ba niha tanö böʼö. Hewaʼae na laböbözi ia, labeʼe ba gurunga, ba tosake göfa nitörönia, lö iböhöli ba wanuriaigö sindruhu wa no mate Yesu ba ifuli tesusugi. (1 Kor. 15:9-11; 2 Kor. 11:23-27) Börö me faduhu sibai dödö Waulo  wa no tesusugi Yesu, lö ataʼu ia na teʼala nosonia ba wanuriaigö daʼö. Fefu dandra moroi khö ndra niha Keriso me abad siföföna andre zangaroʼö tödöda wa sindruhu-ndruhu no tesusugi Yesu. Daʼa göi zangaʼasogö khöda faʼafaduhu dödö wa hasambalö alua göi wanusugi ba zi so miföna.

11. Hana wa so ösa niha Keriso si so ba mbanua Gorindro sangokhögö lala wangera-ngera si fasala sanandrösa ba wanusugi?

¹¹ So ösa niha Keriso si so ba mbanua Gorindro ba Yunani, sangokhögö lala wangera-ngera si fasala sanandrösa ba wanusugi. Lawaʼö wa ”lö tesusugi niha si no mate”. Hana wa simane daʼö lala wangera-ngerara? (1 Kor. 15:12) Ira filsuf mbanua Atena si so ba Yunani, laʼoʼaya lala wamahaʼö sangumaʼö wa no tesusugi Yesu. Tola manö no tedönisi lala wangera-ngera niha Gorindro ba nifaduhusi tödö ndra filsuf andrö. (Hal. 17:18, 31, 32) So göi ösa zangumaʼö wa ha amaedola waʼalua wanusugi. Te lawaʼö tödöra wa no amaedola zi no mate fefu niha samalua horö. Hizaʼi, na no tobali ira niha Keriso, no ifuli tesusugi ira börö me no teʼefaʼö horöra. Gofu hadia mbörö wa lö faduhu dödöra wa no tesusugi Yesu, zaya-zaya gölö wamati niʼokhögöra. Na lö isusugi Yesu Lowalangi, lö tola abuʼa mböli höli, ba tebai teʼefaʼö horöda. Börö daʼö, si lö tatu wanötöna niha si lö faduhu tödö ba wanusugi.​—1 Kor. 15:13-19; Heb. 9:12, 14.

12. Simane nisura ba 1 Fetero 3:18, 22, hadia gamaehuta wanusugi Yesu ba wanusugi si no irai alua ba zilalö?

¹² Si no irai alua khö Waulo andrö zangaroʼö faʼafaduhu dödönia wa ”no tesusugi Keriso”. Abölö tohude wanusugi Keriso moroi ba wanusugi si no irai alua ba zilalö, börö me ifuli mate ndra niha si no irai tesusugi andrö. Iwaʼö Faulo wa Yesu ”ziaʼa nisusugi moroi ba gotalua niha si no mörö ba waʼamate”. Eluahania, Yesu zi oföna tesusugi ba mboto eheha, ba yaʼia zi oföna möi ba zorugo.​—1 Kor. 15:20; Hal. 26:23; baso 1 Fetero 3:18, 22.

13. Hewisa wangoromaʼö Waulo gamaehuta Gadamo khö Keriso?

¹³ Hana wa tola tesusugi niha si zuta faʼato börö waʼamate zi samösa niha? No ihaogö itutunö Faulo wanema linia. Ifaehusi lua-lua nirasoida börö horö Gadamo ba mbua si tola tatema börö me no itehegö nosonia Keriso. Imane Faulo, ”Börö zi samösa niha wa so waʼamate.” Me ifalua horö Adamo, iʼasogö waʼamate ba waʼaurinia samösa hegöi ba ngaʼötönia. Irugi iadaʼa, lö aetu tarasoi lua-lua si lö sökhi börö me lö moloʼö Gadamo. Hizaʼi, börö me no mate Yesu ba isusugi ia Lowalangi, tola taʼokhögö dötönafö si sökhi ba zi so miföna. ”Börö zi samösa niha”, yaʼia daʼö Yesu, wa ”tola tesusugi zi no mate”. Itutunö Faulo, ”Börö Gadamo wa mate fefu niha, ba börö Keriso wa tesusugi.”​—1 Kor. 15:21, 22.

14. Hadia tesusugi dania Gadamo? Tutunö.

¹⁴ Me iwaʼö Faulo wa ”börö Gadamo wa mate fefu niha”, manandrösa daʼö ba niha gulidanö maʼafefu. Fefu ita, no taʼokhögö horö ondröita hegöi falömoʼahonoa moroi khö Gadamo, irege hasambalö mate ita. (Rom. 5:12) Lö tefarahu Gadamo ba gotalua niha nisusugi. Lö manandrösa khö Gadamo höli nibeʼe Keriso börö me yaʼia andrö niha soʼahonoa sangai angetula ba wanawö oroisa Lowalangi. Fanguhuku nifalua ”Nono niha” khö Gadamo yaʼia daʼö faʼamate irugi zi lö aetu, simane salua ba niha si no amaedola ”nambi” ba zi so miföna.​—Mat. 25:31-33, 46; Heb. 5:9.

15. Haʼökhö manandrösa ngawua wehede ”fefu niha” me itutunö Faulo sanandrösa ba niha nisusugi?

 ¹⁵ Iwaʼö göi Faulo wa ”börö Keriso wa tesusugi” fefu niha. (1 Kor. 15:22) Ifaʼoheʼö zurania Faulo ba niha Keriso si so ba Gorindro, sangokhögö tötönafö faʼauri ba zorugo. Ira niha Keriso andrö, ”no laʼamoniʼö ba si ha sambua ba khö Keriso Yesu nikaoni tobali niha niʼamoniʼö”. Itutunö göi Faulo sanandrösa ba ”niha si no mörö ba waʼamate si ha sambua ba khö Keriso”. (1 Kor. 1:2; 15:18; 2 Kor. 5:17) Ba zurania tanö böʼö, isura Faulo wa na so niha si no ’teʼosambuaʼö khö Yesu me latörö waʼamate simane yaʼia, hasambalö teʼosambuaʼö ira ba khönia na tesusugi ira simane yaʼia’. (Rom. 6:3-5) Tesusugi Yesu ba mboto eheha ba möi ia ba zorugo. Börö daʼö, hasambalö göi latörö zimane daʼö ira niha keriso si no tebayoini, ”si ha sambua ba khö Keriso”.

16. Hana wa ifotöi Faulo khö Yesu ’siaʼa nisusugi’?

¹⁶ Isura Faulo wa Keriso ”ziaʼa nisusugi moroi ba gotalua niha si no mörö ba waʼamate”. Sindruhu sa, so niha tanö böʼö si no irai tesusugi, duma-dumania Lazaro. Hizaʼi, tesusugi ira enaʼö auri ba gulidanö. Yesu zi oföna tesusugi ba mboto eheha, ba sanema faʼauri si lö aetu ba zorugo. Baero daʼö, me ifotöi khö Yesu ’siaʼa nisusugi’, iforomaʼö Faulo wa so nasa niha tanö böʼö nisusugi ba zorugo. Ira sinenge hegöi niha tanö böʼö ”si ha sambua ba khö Keriso”, hasambalö tesusugi ira ba zorugo simane Yesu.

17. Hawaʼara tesusugi ba zorugo ndra niha ”si ha sambua ba khö Keriso”?

¹⁷ Me isura zurania Faulo khö ndra niha Keriso si so ba Gorindro, lö nasa mususugi ba zorugo ndra niha ”si ha sambua ba khö Keriso”. Tobali, ifatunö Faulo hawaʼara alua daʼö. Imane, ”Dozi nisusugi dania ba oi niföfögö: Keriso ziföföna, aefa daʼö sagötö feʼasonia tesusugi niha si no tobali okhöta Keriso.” (1 Kor. 15:23; 1 Tes. 4:15, 16) Iadaʼa, no so ita ba götö weʼaso Keriso. Ira sinenge hegöi ira niha Keriso si no tebayoini si no mate me föna, moguna labaloi götö weʼaso Keriso andre enaʼö tola laʼokhögö waʼauri ba zorugo ba ’teʼosambuaʼö ira ba khö Yesu na tesusugi ira simane yaʼia’.

18. (a) Hana wa tola tawaʼö wa so nasa wanusugi tanö böʼö baero wanusugi ba zorugo? (b) Moloʼö 1 Korindro 15:24-26, hadia dania zalua ba zorugo?

¹⁸ Hadia zalua khö ndra niha Keriso si lö faröi si lö mangokhögö tötönafö faʼauri ba  zorugo? Laʼokhögö göi dötönafö fanusugi. Iwaʼö Sura Niʼamoniʼö wa Faulo hegöi ira niha tanö böʼö si möi ba zorugo ”zi oföna tesusugi moroi ba gotalua niha si no mate”. (Fil. 3:11) Daʼa zangoromaʼö wa so wanusugi tanö böʼö salua aefa daʼö. Fanusugi simane daʼa nidöna-döna Yobi. (Yob. 14:15) Ba ginötö idudugö dania Yesu fefu wamatörö, kuaso, hegöi faʼabölö, no fao khönia ba zorugo ndra niha ”si no tobali okhöta Keriso”. Hasambalö göi muheta ’nudu safuria’ andrö, yaʼia daʼö faʼamate. Fefu niha nisusugi ba zorugo, lö saʼae latörö waʼamate. Hizaʼi, hadia zalua ba niha si lö mangokhögö tötönafö faʼauri ba zorugo?​—Baso 1 Korindro 15:24-26.

19. Hadia zi tola latötöna ira niha sangokhögö tötönafö faʼauri ba gulidanö?

¹⁹ Hadia zi tola latötöna ira niha sangokhögö tötönafö faʼauri ba gulidanö? Nehegö wehede Waulo andre: ”So göi wanötönagu . . . wa so wanusugi niha si no mate, he satulö he si lö atulö.” (Hal. 24:15) Tebai tefaʼamöi ba zorugo niha si lö atulö. Börö daʼö, tatu manandrösa wehede Waulo andre ba wanusugi salua ba gulidanö.

20. Me no aefa tatutunö artikel daʼa, hewisa wa tola teʼaroʼö wamatimö?

²⁰ Hasambalö alua wanusugi! Ba zi so miföna, laʼokhögö waʼauri si lö aetu ira niha nisusugi ba gulidanö. Tola öfaduhusi tödö daʼö. Tatu möi fondrara dödömö dötönafö andre, na itörö-törö tödömö niha niʼomasiʼömö si no mate. Tesusugi dania ira na no ”mamatörö [ndra niha si no tebayoini] tobali razo awö Yesu ba zi 1.000 fakhe waʼara”. (Fam. 20:6) Na mate ndraʼugö fatua lö tebörögö Wamatörö si Saribu Fakhe, tola faduhu dödömö wa hasambalö tesusugi ndraʼugö. Hasambalö wa ’lö afatö dödömö ba wanötöna andre’. (Rom. 5:5) Fanötöna andrö zangabölöʼö yaʼugö irege anau gölömö ba wamosumange Yehowa si fao faʼomuso dödö. Hizaʼi, so wamahaʼö tanö böʼö si tola tahalö ba 1 Korindro faza 15. Mututunö daʼö ba artikel aefa daʼa.