Hadia no ahori öbaso fefu edisi Manuriaigö ba ndröfi daʼa? Na noa, tandraigö beʼe wanema li ba wanofu-nofu andre:

Hewisa zinangeania laguda khö ndra niha Keriso si no tebayoini?

Taʼosinangegö wamatira, hizaʼi lö talafo taʼameʼegö tödö mazui tasuno-suno sibai ira. (Yud. 16) Lö tasofu-sofu sibai sanandrösa ba dötönafö niʼokhögöra.​—w20.01, ngaʼörö 29.

Hadia zangoromaʼö wa iʼameʼegö tödö ndraʼugö Yehowa?

Ifatunö Sura Niʼamoniʼö wa iʼila ndraʼugö Yehowa fatua lö si tumbuʼö. Ifondrondrongo wangandrömö. Aboto göi ba dödönia nösi dödömö hegöi niʼera-eramö, ba tola molua-lua khönia nifaluamö. (1 Nga. 28:9; Gamd. 27:11) Yaʼia samösa zondröni yaʼugö khönia.​—w20.02, ngaʼörö 12.

Hawaʼara zinangeania talau fahuhuo, ba hawaʼara talau zi lö hede-hede?

Omasi sibai ita ba wanutunö sanandrösa khö Yehowa. Fahuhuo ita na so niha samalua amuata si tola molua-lua ba horö sebua. Labeʼe mene-mene ira satua sokubaloi na inötö moguna. Lö tasofu-sofu mazui tatutunö hewisa wamalua halöwö ba wamati ba soi si lö manehegö halöwöda. Lö tafatunö zi tebai muʼombakhaʼö ba niha böʼö.​—w20.03, ngaʼörö 20-21.

Hadia manö gamaehuta damo nitutunö ba Yoeli faza 2 ba damo nitutunö ba Wamaʼeleʼö faza 9?

Itutunö Yoeli 2:20–3:2 wa ifofanö ngawawa damo andrö Yehowa ba ifabuʼu wa hasambalö isalahini fefu nifakikora. Aefa daʼö, ifaduwa gehehania niʼamoniʼö Lowalangi. Alua ösa wamaʼeleʼö daʼa me tohare zaradadu Mbabilona ba wanuwö iraono Gizaraʼeli, ba alua danö böʼönia ngaotu fakhe aefa daʼö. Ba Wamaʼeleʼö 9:1-11, muʼamaedolagö niha si no tebayoini simane tamo. Laturiaigö wa hasambalö ihuku gulidanö si lö sökhi andre Lowalangi, irege tefakao niha sangoʼawögö ulidanö.​—w20.04, ngaʼörö 3-6.

Haniha zi tobali razo tanö yöu iadaʼa?

Rusia hegöi soi sotuhini yaʼia. Lasuwö nono mbanua Lowalangi. Lö latehegö wamalua halöwö fanuriaigö ba fatiu dödöra khö ndra Samaduhuʼö Yehowa. Fahindri razo tanö yöu khö razo tanö raya.​—w20.05, ngaʼörö 12-13.

Hadia ha bua-bua nitutunö ba Galatia 5:22, 23 zi tefarahu ba ’mbua-bua geheha’?

Löʼö. Tola göi itolo ita eheha niʼamoniʼö ba wondrouʼö bua-bua si sökhi tanö böʼö, simane faʼatulö. (Ef. 5:8, 9)—w20.06, ngaʼörö 17.

Hadia deʼala si tola alua börö wehede, koda, mazui video nifasamö ba media sosial?

Moroi ba wehede, koda, mazui video nifasamö ba media sosial, tola manö oroma wa niha sasiliyawa ndraʼugö, tenga niha sangokhögö fangide-ngideʼö.​—w20.07, ngaʼörö 6-7.

Hadia wamahaʼö si tola lahalö ira niha Keriso moroi ba niha sonekhe fagai?

Mohalöwö ira ba nahia hegöi inötö si tefaudu ba wanöndra iʼa soya. Aboto ba dödöra hewisa lala ba wangogunaʼö gama-gama si tefaudu. Lö khöra faʼataʼu hewaʼae na mohalöwö ira ba ginötö si basaki. Tola göi tafalua zimane daʼö na möi ita manuriaigö.​—w20.09, ngaʼörö 5.

Hadia manö zinangea tafalua ba wanolo niha nifahaʼöda ba Zura Niʼamoniʼö enaʼö itugu iʼomasiʼö Yehowa?

Tola tafarou ira ba wombaso Sura Niʼamoniʼö ero maʼökhö hegöi ba woʼangerönusi si no labaso ba Zura Niʼamoniʼö. Tafahaʼö göi ira wangandrö.​—w20.11, ngaʼörö 4.

Haʼökhö manandrösa ngawua wehede ”fefu niha” si ’tesusugi börö Keriso’?​—1 Kor. 15:22.

Lö iwaʼö sinenge sotöi Faulo wa hasambalö tesusugi fefu niha. Manandrösa wehedenia andre ba niha Keriso si no tebayoini, ”si no laʼamoniʼö ba si ha sambua ba khö Keriso Yesu”. (1 Kor. 1:2; 15:18)​—w20.12, ngaʼörö 6.

Hadia nifalua niha Keriso si no tebayoini na no tesusugi dania ira ba zorugo?​—1 Kor. 15:51-53.

Fao ira khö Keriso ba wokubaloi ngawalö soi faoma siʼo siʼöli. (Fam. 2:26, 27)​—w20.12, ngaʼörö 13.