1. Hana wa moguna khöda wondrara dödö?

FEFU ita moguna khöda wondrara dödö. Ba waʼaurida, tola manö oya waʼaombö-aombö dödö, faʼafatö dödö hegöi faʼataʼu-taʼu. Tola manö tefakao ita börö wökhö, faʼalawa ndröfi, mazui me no mate niha niʼomasiʼöda. So ösa moroi ba gotaluada nifakao niha böʼö. Baero daʼö, monönö-nönö manö göi waʼalösökhi niha ba zi fasuida. ’Baŵa si lö sökhi’ zangoromaʼö wa ba ”ngaluo safuria” auri ita ba ero maʼökhö ahatö ita ba gulidanö si bohou. (2 Timoteo 3:1) Hizaʼi, tola manö no ara tabalo-baloi waʼalua nifabuʼu Yehowa ba itugu monönö-nönö manö wamakao nitaögöda. Na simanö, hezo tola tasöndra wondrara dödö?

2, 3. (a) Hadia niʼilada sanandrösa khö Habakuki? (b) Hadia mbörö wa taʼosisiʼö mbuku Habakuki?

² Datafaigi mbuku Habakuki ba wangalui fanema li moroi ba zinofu andrö. Hewaʼae lö oya nitutunö Zura Niʼamoniʼö khöda sanandrösa ba waʼauri Habakuki, hizaʼi tola möi famarou dödöda mbuku nisurania. Eluaha döi  Habakuki yaʼia daʼö ”Talagu Faʼomasi”. Daʼa zangoromaʼö lala Yehowa ba wondrara tödöda, na ibeʼe khöda dalagu faʼomasi eluahania iʼohe ita ba dalagunia. Tola göi daʼö geluahania hewisa wamosumange yaʼia si no amaedola wololoheda Yehowa. Fahuhuo Habakuki khö Lowalangi ba so ösa nisofu-sofunia. Ibeʼe gehehania Yehowa khö Habakuki ba wanura huhuora börö me iʼila wa tola oya gunania khöda daʼö.​—Habakuki 2:2.

³ Fefu wahuhuosa ba gotalua Yehowa faoma samaʼeleʼö sarasa tödö sotöi Habakuki, tesura ba Zura Niʼamoniʼö. Hizaʼi, buku andre ”nisura me föna” ba Daromali Lowalangi, ”zameʼe khöda fondrara dödö enaʼö anau gölöda irege so khöda wanötöna.” (Roma 15:4) Hewisa enaʼö tobali fanolo khöda zamösana mbuku Habakuki andre? Tobali fanolo khöda daʼö enaʼö taʼila hadia geluaha wamaduhusi tödö Yehowa. Nifaʼeleʼö Habakuki zameʼe khöda faʼaro dödö wa tola tasöndra waʼahono wangera-ngera gofu hadia ia gabula dödö mazui fanandraigö nitaögöda.

4. Hana wa abu sibai dödö Habakuki?

⁴ Baso Habakuki 1:2, 3. Auri Habakuki ba ginötö si basaki. Niha ba zi fasuinia lö sökhi ba afaito, ba abu sibai dödönia börö daʼö. Gofu hezo ifakhölö ia, iʼila waʼalösökhi hegöi falöʼatulö nifalua ndraono Gizaraʼeli khö nawöra zamösana. Manofu Habakuki, ’Hawaʼara aheta waʼalösökhi andre? Hana ara sibai ilulu daʼö Yehowa?’ Lö hadöi si tola ifalua. Börö daʼö, iʼandrö enaʼö so nifalua Yehowa. Tola manö ibörötaigö so ba wangera-ngerania wa lö iʼameʼegö tödö nono mbanuania Yehowa mazui lö hadöi nifaluania. Hadia no irai so khöu dödö simane daʼö?

5. Hadia wamahaʼö si tola tahalö moroi ba mbuku Habakuki? (Faigi gambara ba wamobörö wamahaʼö.)

⁵ Me ibeʼe wanofu daʼö Habakuki, hadia daʼö geluahania wa no iböhöli wamaduhusi tödö Yehowa hegöi nifabuʼunia? Tenga! Iʼandrö Habakuki enaʼö itolo ia Yehowa ba ngawalö waʼaombö-aombö dödö hegöi abula dödö nitaögönia, zangoromaʼö wa tenga saetu fanötöna ia, hizaʼi lö tebulö ifaduhusi tödö Yehowa. Tatu abu sibai dödönia ba lö iʼila hadia zinangea ifalua. Lö aboto ba dödönia hadia mbörö wa lö hadöi nasa nifalua Yehowa ba hadia mbörö wa itehegö monönö wamakao nitaögönia. Hizaʼi, iʼandrö Yehowa khö Habakuki ba wanura abula dödönia andre ba wangombakha khöda famahaʼö sabölö moguna. Böi ataʼu ita ba wangombakha khö Yehowa waʼaombö-aombö dödö hegöi abula dödöda. Tatu manö, ikaoni ita enaʼö mangandrö ba tahaogö tatutunö khönia hadia nirasoida. (Zinunö 50:15; 62:9) Imane khöda Gamaedola 3:5, ”Döna-döna khö Yehowa, moroi siʼaikö ba dödöu, ba böi abeʼe dödöu ba waʼonekheu.” Ifalua Habakuki wehede daʼa ba waʼaurinia.

6. Hana wa moguna sibai wangandrö?

 ⁶ Faduhu dödö Habakuki khö Yehowa, si tobali Awö hegöi Amania ba omasi ihatöʼö ia khönia. Tenga ha salua khönia manö niʼabusi tödö Habakuki ba itandraigö ba wangasiwaisi samösa daʼö. Hizaʼi, ilau mangandrö sanandrösa ba nirasoinia hegöi faʼaombö-aombö dödönia. Duma-duma si sökhi khöda daʼa. Yehowa, Samondrongo fangandrö, iʼandrö khöda enaʼö taforomaʼö wa tafaduhusi tödö ia yaʼia daʼö na mangandrö ita khönia ba taʼombakhaʼö khönia waʼaombö-aombö dödöda. (Zinunö 65:3) Ba ginötö tafalua daʼö, taʼila dania hewisa Yehowa ba wameʼe fanema li ba wangandröda. Tarasoi wa italagui ita ba ginötö ibeʼe khöda wondrara dödö hegöi fanuturu lala. (Zinunö 73:23, 24) Itolo ita enaʼö aboto ba dödöda hewisa wamaiginia salua khöda, gofu hadia ia wamakao nitaögöda. Na mangandrö ita khö Yehowa, daʼö sambua lala sangoromaʼö wa tafaduhusi tödö ia.

7. Hadia nifalua Yehowa me ifatunö khönia Habakuki waʼaombö-aombö dödönia?

⁷ Baso Habakuki 1:5-7. Me no aefa ifatunö waʼaombö dödönia Habakuki khö Yehowa, tola manö manofu-nofu dödönia hadia nifalua Yehowa. Ama sebua faʼomasi Yehowa, tatu aboto ba dödönia hadia nirasoi Habakuki. Iʼila wa tefakao sibai Habakuki ba moguna mutolo ia. Daʼö mbörö wa lö itegu Habakuki Yehowa, hizaʼi ifatunö hadia zi lö ara tö ifalua ba niha Yahudi si faröi. Tola manö Habakuki niha si oföna nifarongogö Yehowa sanandrösa ba wanguhuku si lö ara tö alua.

8. Hana wa tenga simane nitötöna Habakuki wanema li nibeʼe Yehowa?

⁸ Ifatunö Yehowa khö Habakuki hadia zi lö ara tö ifalua. Ihuku niha Yehuda si lö sökhi ba safaito. Me iwaʼö wa alua daʼa ”ba götömi andrö”, iforomaʼö Yehowa alua wanguhuku daʼa ba götö Habakuki mazui ba götö niha Gizaraʼeli si so ba zi fasuinia. Fanema li nibeʼe Yehowa tenga simane nidöna-döna Habakuki. Abölö-bölö sibai waʼalösökhi niha Galedaia mazui niha Mbabilona. Töra waʼalösökhira moroi ba niha Gizaraʼeli si no mangila goi-goi Yehowa. Na simanö, hadia mbörö wa iʼogunaʼö soi si lö sökhi andre Yehowa ba wanguhuku ono mbanuania? Tola manö monönö wamakao nitaögö niha Yehuda. * (Faigi nisura ba gahe zura.) Hewisa dödöu na duma-dumania Habakuki ndraʼugö?

9. Hadia wanofu tanö böʼö nibeʼe Habakuki?

⁹ Baso Habakuki 1:12-14, 17. Hewaʼae aboto ba dödö Habakuki wa niha Mbabilona niʼogunaʼö Yehowa ba wanguhuku niha si so ba zi fasuinia, hizaʼi lö sökhi-sökhi dödönia. Hewaʼae simanö, lö mamalö iforomaʼö wangide-ngideʼö ba ihalö gangetula wa lö iböhöli wamaduhusi tödö Yehowa. Iwaʼö wa lö mamalö tobali ”gowe” khönia Yehowa. (5 Moze 32:4; Yesaya 26:4) Lö mamalö aro dödö Habakuki khö Lowalangi sebua faʼomasi ba si sökhi tödö. Börö daʼö, lö ataʼu ia wameʼe fanofu khö Yehowa, simane: Hadia mbörö wa itehegö manö Yehowa waʼalösökhi niha Yehuda ba itugu tefakao nono mbanuania? Hana wa lö ifalua zatulö Yehowa?  Hana wa lö ’hede-hede’ Lowalangi si Lö Ambö Faʼabölö ba itehegö alua waʼalösökhi misa? Hewaʼae simanö, Yehowa andrö ”Niʼamoniʼö” ba ’si so hörö satulö, fatebai ifaigi-faigi zi lö sökhi’.

10. Hana wa itaria tarasoi simane nirasoi Habakuki?

¹⁰ Itaria tarasoi simane nirasoi Habakuki. Moguna tafondrondrongo Yehowa. Tafaduhusi tödö ia, tabaso ba tafahaʼö ita ba Daromalinia, sangaroʼö fanötönada. Tarongo göi sanandrösa ba nifabuʼunia ba ginötö tafondrondrongo hadia nifahaʼö organisasi khöda. Hizaʼi, tola manö manofu ita simane daʼa, ’Hawaʼara aheta gabula dödöda?’ Tafahaʼö ita ba zalua khö Habakuki aefa daʼa.

11. Hadia gangetula nihalö Habakuki?

¹¹ Baso Habakuki 2:1. Fahuhuosa Habakuki khö Yehowa zameʼe khönia faʼahono wangera-ngera. Daʼö mbörö wa ihalö gangetula ba wombaloi nifalua Yehowa. Ifuli ifatunö gangetulania Habakuki me imane, ”Si lö hede-hede ndraʼo, irugi mbaŵa wamakao.” (Habakuki 3:16) Niha tanö böʼö si lö faröi khö Lowalangi si fao faʼebolo dödö labalo-baloi nifalua Yehowa. Tefarou dödöda ba duma-dumara börö me tola göi tafalua zimane daʼö.​—Mikha 7:7; Yakobo 5:7, 8.

12. Hadia wamahaʼö nihalöda khö Habakuki?

¹² Hadia wamahaʼö nihalöda moroi ba gangetula Habakuki? Si oföna, böi taböhöli wangandrö khö Yehowa gofu hadia gabula dödö salua khöda. Si dua, tafondrondrongo hadia niwaʼö Yehowa khöda yaʼia daʼö Taromalinia hegöi organisasinia. Si tölu, moguna ebolo dödöda ba wombaloi nifalua Yehowa ba faduhu dödöda wa iheta waʼafökhö nitaögöda ba ginötö si no itatugöi. Na taʼoʼö Habakuki, tola taʼokhögö waʼahono wangera-ngera ba tola anau gölöda. Fanötönada zanolo yaʼita ba wangokhögö faʼebolo dödö ba faʼowua-wua dödö gofu hadia gabula dödö nitaögöda. Faduhu dödöda wa hasambalö so nifalua Namada si so ba zorugo.​—Roma 12:12.

13. Hewisa Yehowa wameʼe fondrara dödö khö Habakuki?

¹³ Baso Habakuki 2:3. Faduhu dödöda wa hasambalö omasi Yehowa gangetula Habakuki ba wombaloi nifaluania. Aboto ba dödö Lowalangi si Lö Ambö Faʼabölö hadia wamakao nitaögö Habakuki. Börö daʼö ibeʼe wondrara dödö khö zamaʼeleʼö andrö si fao faʼomasi ifaduhuʼö khönia wa hasambalö ibeʼe wanema li moroi ba wanofu-nofunia. Lö ara tö, teʼefaʼö Habakuki moroi ba ngawalö waʼaombö-aombö dödönia. Hulö imane Yehowa khö Habakuki, ”Moguna so khöu waʼebolo dödö ba faduhusi tödö ndraʼo. Hasambalö ufondrondrongo wangandrömö, hewaʼae hulö ara nasa daʼö.” Ifasugi Yehowa ba dödö Habakuki wa no itatugöi hawaʼara ifalua zi no ifabuʼu, daʼö mbörö wa ifarou dödö Habakuki enaʼö lö mamalö ibaloi. Ba gafuriata, lö afatö dödö zamaʼeleʼö andrö.

14. Hadia gangetula nihalöda na göna ita famakao?

 ¹⁴ Moguna göi tabaloi nifalua Yehowa ba tahaogö tafondrondrongo hadia niwaʼönia khöda. Tafaduhusi tödö ia ba taʼokhögö waʼahono wangera-ngera gofu hadia ia gabula dödö nitaögöda. Ifarou ita Yesu enaʼö böi taʼosambuaʼö dödöda ba ”ngaluo hegöi inötönia” börö me lö nifatunö Lowalangi khöda sanandrösa ba daʼö. (Halöwö Zinenge 1:7) Moguna faduhu dödöda wa hasambalö iʼila Yehowa ginötö si tefaudu ba wamalua nifaluania. Börö daʼö, böi awuwu ita hizaʼi moguna so khöda wangide-ngideʼö ba faʼebolo dödö hegöi famati khö Lowalangi. Gasa-gasa wombaloida daʼö, taʼogunaʼö ginötöda si fao faʼatua-tua ba tafalua wondrege zi sökhi moloʼö faʼabölöda ba wamosumange Yehowa.​—Mareko 13:35-37; Galatia 6:9.

15, 16. (a) Hadia mbuʼusa li si so ba mbuku Habakuki? (b) Hadia wamahaʼönia khöda moroi ba mbuʼusa li daʼa?

¹⁵ Ifabuʼu Yehowa, ”Ba satulö tödö, ba wamatinia auri ia” ba ”anönö sa dania danö faʼaboto ba dödö lakhömi Yehowa”. (Habakuki 2:4, 14) Ifabuʼu Yehowa wa ibeʼe waʼauri si lö aetu ba niha sebolo tödö hegöi si faduhu tödö khönia.

¹⁶ Moguna sibai mbuʼusa li si so ba Habakuki 2:4, irege tölu kali isura daʼö sinenge sotöi Faulo ba zurania! (Roma 1:17; Galatia 3:11; Heberaiʼo 10:38) Gofu  hadia ia wamakao nitaögöda, faduhu dödöda wa hasambalö alua nifabuʼu Yehowa na tafaduhusi tödö ia. Omasi Yehowa enaʼö taʼosambuaʼö dödöda ba wanötöna ba zi so miföna.

17. Hadia nifabuʼu Yehowa khöda na tafaduhusi tödö ia?

¹⁷ Famahaʼö si sökhi khöda fefu nösi mbuku Habakuki börö me auri ita ba götö safuria. Ifabuʼu waʼauri si lö aetu Yehowa ba niha satulö tödö ba samaduhusi tödö yaʼia. Börö daʼö, böi mamalö taʼaroʼö waʼafaduhu dödöda khö Lowalangi gofu hadia gabula dödö hegöi faʼaombö-aombö dödö nitaögöda. Fehede Yehowa khö Habakuki zameʼe khöda faʼaro dödö wa hasambalö ituhini ba iʼorifi ita. Si fao faʼasökhi dödö iʼandrö khöda enaʼö tafaduhusi tödö ia ba tabaloi si fao faʼebolo dödö waʼatohare Wamatörönia ba gulidanö. Ba ginötönia, afönu gulidanö faʼowua-wua dödö hegöi faʼahono dödö ba niha samosumange Yehowa.​—Mataiʼo 5:5; Heberaiʼo 10:36-39.

18. Hewisa lua-lua wehede Yehowa andrö khö Habakuki?

¹⁸ Baso Habakuki 3:16-19. Fehede Yehowa andrö, ebua sibai lua-luania khö Habakuki. Iʼangerönusi Habakuki ngawalö zahöli-höli dödö nifalua Yehowa ba nono mbanuania ba zilalö. Iadaʼa itugu aro waʼafaduhu dödönia khö Yehowa. Sindruhu-ndruhu faduhu dödönia wa lö aratö so nifalua Yehowa! Möi famarou dödö zamaʼeleʼö andrö daʼa, hewaʼae iʼila wa oya nasa gabula dödö nitaögönia gasa-gasa daʼö. Lö iradö-radö ia Habakuki ba waʼaombö-aombö dödö hizaʼi sindruhu-ndruhu mamati ia wa hasambalö iʼorifi ia Yehowa. Fehede nisura ba ayati 18 tola manö sambua moroi ba gotalua wehede si sökhi si tola tafaduhusi tödö si tesöndra ba Zura Niʼamoniʼö. So ösa niha sagatua-tua si faduhu tödö wa eluaha wehede daʼö, ”Manaokado börö waʼomuso dödö khö Zoʼaya; ufasui-sui börö waʼowua-wua dödö khö Lowalangi.” Sindruhu-ndruhu famahaʼö sabölö moguna daʼa khöda! Tenga ha buʼusa li sahöli-höli dödö nibeʼe Yehowa khöda ba zi so miföna hizaʼi ifaduhuʼö göi khöda wa hasambalö ifalua hadia zi no ifabuʼu.

19. Hana wa tola tobali fondrara dödö khöda Yehowa, simane salua khö Habakuki?

¹⁹ Famahaʼö sabölö moguna ba mbuku Habakuki yaʼia daʼö enaʼö tafaduhusi tödö Yehowa. (Habakuki 2:4) Enaʼö lö mamalö tafaduhusi tödö Yehowa, moguna taʼaroʼö gamakhaitada khönia. So göi zinangea tafalua. (1) Böi mamalö mangandrö ita khö Yehowa, tafatunö khönia fefu waʼaombö-aombö dödöda hegöi abula dödöda. (2) Tahaogö tafondrondrongo hadia niwaʼö Yehowa khöda ba Daromalinia ba taʼoʼö wanuturu lala nibeʼenia khöda ba organisasinia. (3) Moguna mamati ita ba taforomaʼö waʼebolo dödö ba wombaloi Yehowa ba wamalua nifabuʼunia. Daʼa nifalua Habakuki. Hewaʼae abu sibai dödönia me awena ibörötaigö fahuhuo khö Yehowa, hizaʼi ba gafuriata tefarou dödönia ba owua-wua dödönia! Na taʼoʼö Habakuki, tola göi terara dödöda börö me italagui ita Yehowa, Amada si so ba zorugo. Hadia wondrara dödö sabölö ebua ba gulidanö si lö sökhi andre?