1, 2. (a) Hadia niwaʼö Yesu me iʼandrö khönia Fetero enaʼö ihakhösi tödö waʼaurinia? (Faigi gambara ba wamobörö wamahaʼö.) (b) Hana wa simane daʼö wehede Yesu?

TOKEA ndra nifahaʼö Yesu! Lawalinga ifangawuli Yesu gamatöröwa ba Gizaraʼeli, hizaʼi iwaʼö khöra Yesu wa lö ara tö tefakao ia ba mate. Imane sinenge sotöi Fetero, ”He Soʼaya, hakhösi tödö ndraʼugö. Böi alua khöu zimane daʼö.” Itema Yesu, ”Ae furigu Satana! Fangalagu ndraʼugö börö me lö öfatou-tou tödöu gera-era Lowalangi, ha fangera-ngera niha.”​—Mataiʼo 16:21-23; Halöwö Zinenge 1:6.

² Me iwaʼö daʼö Yesu, ihaogö ifatunö wa faböʼö lala wangera-ngera Yehowa ba lala wangera-ngera gulidanö nifatörö Zatana. (1 Yohane 5:19) Iwaʼö Fetero khö Yesu enaʼö tana khönia niʼera-erania simane lala wangera-ngera niha sato iadaʼa. Hizaʼi iʼila Yesu wa omasi Yehowa na ifaʼanö waʼaurinia ba wamakao hegöi faʼamate si lö ara tö itaögö. Fanema li nibeʼe Yesu andrö zangoromaʼö wa itemaʼö lala wangera-ngera Yehowa ba sindruhu-ndruhu itimbagö lala wangera-ngera gulidanö.

3. Hana abua wanemaʼö lala wangera-ngera Yehowa moroi ba wanimbagö lala wangera-ngera gulidanö?

 ³ Hewisa göi ita? Hadia simane lala wangera-ngera Yehowa lala wangera-ngerada mazui simane lala wangera-ngera niha ba gulidanö? Yaʼita niha Keriso, taforege ba wangomusoiʼö tödö Lowalangi. Hizaʼi, hewisa lala wangera-ngerada? Hadia taforege enaʼö lala wamaigida hadia ia tefaudu ba lala wangera-ngera Yehowa? Moguna so wangodödögö. Hizaʼi, aoha sibai wangokhögö lala wangera-ngera niha iadaʼa, börö me eheha gulidanö zi so ba zi fasuida. (Efeso 2:2) Niha ba gulidanö, sasesenia ha yaʼira samösa niʼera-erara, ba tola manö adöni dödöda ba wangokhögö fangera-ngerara. Sindruhu sa, abua wangokhögö lala wangera-ngera Yehowa moroi ba wangokhögö lala wangera-ngera niha ba gulidanö daʼa.

4. (a) Hadia zalua na tatehegö idönisi wangera-ngerada ulidanö daʼa? (b) Hadia nitutunöda ba wamahaʼö daʼa?

⁴ Na tatehegö idönisi lala wangera-ngerada ulidanö daʼa, tola manö taʼalui dana khöda ba taʼetuʼö samösa hadia zatulö ba si sala. (Mareko 7:21, 22) Börö daʼö moguna sibai enaʼö tafahaʼö ita ba ”gera-era Lowalangi” tenga ”fangera-ngera niha”. Famahaʼö daʼa zanolo yaʼita ba wamalua daʼö. Taʼila göi dania hadia gunania na tafaigi hadia ia simane famaigi Yehowa. Tafahaʼö göi ita hadia mbörö wa lö tobali daha-taha daʼö ba hasambalö so gunania khöda. Taʼila göi hewisa enaʼö lö ifatörö mazui idönisi wangera-ngerada ulidanö daʼa. Ba wamahaʼö aefa daʼa, tafahaʼö ita hewisa lala wangera-ngera Yehowa ba ngawalö hadia ia ba hewisa woloʼöda daʼö.

5. Hana wa so ösa niha si lö omasi na ladönisi ira niha böʼö?

⁵ So ösa niha lö omasi ira na niha böʼö zodönisi lala wangera-ngerara. Lamane, ”Khögu samösa wangera-ngeragu.” Eluahania, yaʼira samösa zotatugöi angetula hegöi nifaluara. Lö omasi ira na niha böʼö zamatörö yaʼira mazui lafaso ira tobali simane niha böʼö. * (Faigi nisura ba gahe zura.)

6. (a) Hadia wangefa nibeʼe Yehowa khöda? (b) Hadia daʼö geluahania wa no taʼokhögö wangefa si lö ola-ola?

⁶ Na tatemaʼö lala wangera-ngera Yehowa, tola nasa taʼokhögö mbua wangera-ngera samösa. Imane 2 Korindro 3:17, ”Hezo so geheha Yehowa ba daʼö so wangefa.” Ibeʼe khöda wangefa Yehowa enaʼö tobali ita niha somasi ita, tola tafili hadia zomasi ita hegöi sadöni dödöda. Simane daʼa wamazökhi Yehowa yaʼita. Hizaʼi, tenga daʼa geluahania wa no taʼokhögö wangefa si lö ola-ola. (Baso 1 Fetero 2:16.) Na omasi ita taʼila hadia zatulö mazui si sala, omasi Yehowa enaʼö taʼogunaʼö Daromalinia si tobali fanuturu lala. Hadia tobali daha-taha daʼö mazui so gunania?

7, 8. Hadia tobali taha-taha khöda na tafaigi hadia ia moloʼö somasi Yehowa? Beʼe duma-duma.

⁷ Tola taʼamaedolagö ia simane daʼa. Latandraigö ira satua ba wamahaʼö  iraonora ba ngawalö zi sökhi. Lafahaʼö ira enaʼö böi falimo, laforege wohalöwö, ba laʼameʼegö tödö niha böʼö. Hizaʼi, tenga daʼö geluahania wa tobali taha-taha daʼö. Lafaʼanö ndraonora enaʼö mofozu waʼaurira. Na no ebua-bua ndraonora ba laröi nomo, yaʼira samösa zotatugöi hadia nifilira. Na lafaudugö waʼaurira moloʼö si no lafahaʼö ira satuara, no lahalö gangetula si sökhi ba teʼaröuʼö ira ba ngawalö gabula dödö, faʼaombö-aombö dödö, hegöi faniasa.

⁸ Simane satua si sökhi, omasi göi Yehowa enaʼö laʼokhögö waʼauri si sökhi iraononia. (Yesaya 48:17, 18) Börö daʼö, ifahaʼö göi ita sanandrösa ba goi-goi si tobali dane-dane ba gamuata hegöi sinangea tafalua ba niha böʼö. Iʼandrö khöda Yehowa enaʼö tafahaʼö ita ba wamaigi hadia ia simane wamaiginia ba enaʼö tafaudugö waʼaurida ba ngawalö zi sökhi. Hizaʼi, tenga daʼö geluahania wa tobali taha-taha daʼö. Tola monönö waʼatua-tuada ba tobali fanolo khöda ba wangai angetula si sökhi. (Zinunö 92:6; Gamaedola 2:1-5; Yesaya 55:9) Tola tafili hadia zomasi ita, si tola mameʼe khöda faʼomuso dödö. (Zinunö 1:2,3) Oya gunania khöda na taʼokhögö lala wangera-ngera Yehowa!

9, 10. Hadia zangoromaʼö wa abölö tohude lala wangera-ngera Yehowa moroi ba lala wangera-ngera gulidanö?

⁹ So mbörö tanö böʼö wa omasi ita enaʼö simane lala wangera-ngera Yehowa wangera-ngerada, börö me abölö tohude lala wangera-ngerania moroi ba gulidanö daʼa. Ibeʼe ulidanö andre mene-mene sanandrösa ba gamuata, hewisa enaʼö owua-wua dödö nösi nomo, ba hewisa enaʼö mofozu ba halöwö, hegöi tanö böʼönia soʼamakhaita ba waʼauri. Hizaʼi, faehu sibai mene-mene daʼa ba lala wangera-ngera Yehowa. Duma-dumania, ulidanö daʼa asese ifarou niha enaʼö ha somasi-masi ira nigohira, ba enaʼö latemaʼö gamuata fohorö. Itaria göi lafarou dödö zongambatö wa abölö ohahau dödöra na fabali mazui fasambua ha börö gabula dödö side-ide. Faehu mene-mene daʼa moroi ba nifahaʼö Zura Niʼamoniʼö. Hizaʼi hadia abölö moguna mene-mene gulidanö andre iadaʼa moroi ba mene-mene Zura Niʼamoniʼö?

¹⁰ Imane Yesu, ”Oroma waʼatua-tua niha moroi ba ngawalö zatulö nifaluania.” (Mataiʼo 11:19) Hewaʼae oya waʼatedou teknologi nibeʼe gulidanö daʼa, hizaʼi tebai iʼasiwai gabula dödö sebua si tola mangaröuʼö yaʼita ba waʼomuso dödö, simane fasuwöta, fatiusa ba soi, hegöi faʼalösökhi. Mendrua manö nasa me no fatema ba gulidanö andre gamuata fohorö. Hizaʼi ato niha sangumaʼö wa tekiko wongambatöra börö wökhö, hegöi lua-lua si lö sökhi  nifalua niha böʼö. Hewisa sanandrösa ba mene-mene Yehowa? Niha Keriso sanemaʼö mene-mene Yehowa tola owua-wua dödö nösi nomora, lö asese göna ira fökhö, ba tola laʼokhögö gamakhaita si sökhi khö ndra talifusöda ba zi sagörö ulidanö. (Yesaya 2:4; Halöwö Zinenge 10:34, 35; 1 Korindro 6:9-11) Daʼa zangoromaʼö wa abölö tohude lala wangera-ngera Yehowa moroi ba lala wangera-ngera gulidanö.

11. Haniha zamatörö lala wangera-ngera Moze ba hadia mbuania?

¹¹ Samosumange Yehowa si lö faröi ba götö föna, laʼila wa abölö tohude lala wangera-ngera Yehowa. Duma-dumania, no lafahaʼö Moze ”sanandrösa ba waʼatua-tua niha Miserai”, hizaʼi iʼila wa moroi khö Yehowa waʼatua-tua sindruhu. (Halöwö Zinenge 7:22; Zinunö 90:12) Börö daʼö iʼandrö khö Yehowa ”bokai khögu dödöu”. (2 Moze 33:13) Börö me itehegö Moze khö Yehowa ba wamatörö lala wangera-ngerania, iʼogunaʼö ia Yehowa moloʼö lala sahöli-höli dödö ba wangoʼozui ohitö dödönia ba ibeʼe döi sebua khö Moze yaʼia daʼö ira matua sebua famati.​—Heberaiʼo 11:24-27.

12. Hadia zi tobali dane-dane khö Waulo ba wangai angetula?

¹² Atua-tua zinenge sotöi Faulo, no möi ia sekola, ba si löʼö-löʼönia tola fahuhuo ia ba zi dombua ngawalö li. (Halöwö Zinenge 5:34; 21:37, 39; 22:2, 3) Hizaʼi, itimbagö waʼatua-tua gulidanö ba ihalö gangetula si teʼodane-dane ba Daromali Lowalangi. (Baso Halöwö Zinenge 17:2; 1 Korindro 2:6, 7, 13.) Buania, mofozu sibai ia ba halöwö fanuriaigö ba idöna-döna mbuala si lö irai taya sagötö faʼara.​—2 Timoteo 4:8.

13. Haniha zangonorogö tödö ba wamaudugö fangera-ngerada moloʼö famaigi Yehowa?

¹³ Sindruhu-ndruhu oroma wa abölö tohude lala wangera-ngera Yehowa moroi ba lala wangera-ngera gulidanö. Na taʼoʼö goi-goi Lowalangi, hasambalö owua-wua dödöda ba mofozu waʼaurida. Hizaʼi, lö ifaso ita Yehowa enaʼö simane fangera-ngerania wangera-ngerada. Tenga ’sawuyu si lö faröi ba satua-tua’ zamatörö fangera-ngerada ba tenga göi ira satua sokubaloi. (Mataiʼo 24:45; 2 Korindro 1:24) Yaʼita zamösana zangonorogö tödö ba wamaudugö fengera-ngerada moloʼö famaigi Yehowa. Hewisa wamaluada daʼö?

14, 15. (a) Hadia zinangea taʼangerönusi enaʼö simane fangera-ngera Yehowa wangera-ngerada? (b) Hana wa lö tatehegö tafaʼanö ba högöda lala wangera-ngera gulidanö? Beʼe Duma-duma.

¹⁴ Imane Roma 12:2, ”Böi mifaomagö ami ba niha gulidanö ba götö daʼa. Hizaʼi, mibulöʼö lala wangera-ngerami, enaʼö miʼila mitimba tödömi zomasi Lowalangi, soʼahonoa ba sangomusoiʼö tödönia.” Moroi ba ayati daʼa, ifahaʼö ita wa gofu haniha zamatörö fangera-ngerada fatua lö tafahaʼö ita ba zindruhu, tola tabulöʼö lala wangera-ngerada ba tafaudugö ia ba zomasi Lowalangi. Hewaʼae tedönisi lala wangera-ngerada börö faktor genetik hegöi si no irai alua ba waʼaurida, hizaʼi lö mamalö tebulö wangera-ngerada. Ba tola tebulö daʼö moloʼö niʼangeragöda sanandrösa ba nifilida. Na taʼangerönusi lala wangera-ngera  Yehowa, tola tafaduhuʼö daʼö khöda samösa wa lö mamalö atulö lala wangera-ngerania. Ba omasi tafaigi hadia ia simane famaiginia.

¹⁵ Enaʼö simane fangera-ngera Yehowa wangera-ngerada, moguna enaʼö ’böi tafaomagö ita ba niha gulidanö ba götö daʼa’. Eluahania, taböhöli wamaigi, wombaso, hegöi wamondrondrongo ngawalö hadia ia zi lö tefaudu ba lala wangera-ngera Lowalangi. Enaʼö tola taʼila wa moguna sibai daʼa, angeragö duma-duma sanandrösa ba gö. Na so samösa niha si lö omasi mofökhö, tatu ihalö gangetula wa lö iʼa gö si tobali börö wökhö. Hizaʼi, lö eluaha fefu wangodödögö nifaluania na asese iʼa gö si möi börö wökhö! Simanö göi, tola lö eluaha wangodödögö nifaluada sanandrösa ba lala wangera-ngera Yehowa na tafaʼanö göi ba högöda wangera-ngera gulidanö.

16. Hezo moguna talumöʼö waʼaurida?

¹⁶ Hadia tola tatimbagö fefu wangera-ngera gulidanö? Löʼö, tola tedönisi dödöda ba lala wangera-ngera gulidanö börö me ba gulidanö andre nasa so ita. (1 Korindro 5:9, 10) Ba ginötö möi ita manuriaigö, tarongo wangera-ngera niha si fasala hegöi faʼafaduhu dödö si fasala. Hizaʼi ba ginötö tebai tatimbagö lala wangera-ngera si sala, böi taʼera-era manö mazui tatemaʼö wangera-ngera daʼö. Simane Yesu, moguna taʼanemaiʼö tatimbagö wangera-ngera Zatana somasi ia taʼokhögö. Tola göi talumöʼö ita samösa na tatimbagö mbua gera-era si lö moguna ba gulidanö andre.​—Baso Gamaedola 4:23.

17. Hewisa wotimbagöda bua gera-era si lö moguna sanandrösa ba wangera-ngera gulidanö?

¹⁷ Duma-dumania, moguna taʼangenanöi wamili awöda. Ifangelama ita Sura Niʼamoniʼö, wa tola ibörötaigö taʼoʼö lala wangera-ngera niha si lö mamosumange Yehowa na fahuwu ita khöra. (Gamaedola 13:20; 1 Korindro 15:12, 32, 33) Moguna tahaogö tafili hadia acara TV nifaigida. Na tatimbagö acara TV sangoromaʼö teori evolusi, faʼalösökhi  mazui amuata wohorö, no taʼaröuʼö ita moroi ba ngawalö hadia ia zolangui fangera-ngerada si tola ’molawa faʼaboto ba dödö khö Lowalangi.’​—2 Korindro 10:5.

18, 19. (a) Hana wa moguna taʼangelamaisi lala wangera-ngera gulidanö nifaʼemania ba ngawalö lala? (b) Hadia wanofu sinangea tasofu khöda ba hadia mbörö?

¹⁸ Moguna taʼila ba tatimbagö gera-era gulidanö ba ginötö labeʼe khöda daʼö, hewaʼae laʼogunaʼö lala sambö taʼila. Duma-dumania, so ösa berita sanutunö lala ba wotuhini opini politik. So ösa film hegöi buku sangoromaʼö ”Yaʼo zi oföna” ba ”ösi nomo zi oföna” moloʼö fangera-ngerara ba laʼalui lala enaʼö hulö tefaudu daʼö, adöni dödö ba tola manö atulö. Hizaʼi fangera-ngera simane daʼö, no latimbagö Zura Niʼamoniʼö. Iwaʼö Sura Niʼamoniʼö wa tola sindruhu-ndruhu so khöda waʼomuso dödö na taʼomasiʼö Yehowa töra moroi ba hadia ia. (Mataiʼo 22:36-39) Simanö göi, so ösa hikaya ba ndraono hewaʼae oya zi tola mutemaʼö, hizaʼi arara manö tola idönisi ndraono ba wamalua amuata si lö baga.

¹⁹ Tenga daʼa geluahania wa fasala na tafaigi TV. Hizaʼi, moguna tasofu khöda samösa: ’Hadia uforomaʼö wa utimbagö wangera-ngera gulidanö ba ginötö so wondrönisi dödö niforomaʼö ba daʼö? Hadia ulumöʼö ndraonogu hegöi yaʼo samösa moroi ba ngawalö hadia ia nifaʼema ba TV mazui ba nibasora? Hadia utolo ndraonogu ba wangokhögö fangera-ngera Yehowa ba ngawalö hadia ia, he nirongo mazui niʼila hörö?’ Na taʼila wa so gamaehuta wangera-ngera Lowalangi moroi ba wangera-ngera gulidanö, tola tatimbagö enaʼö böi tafaomagö ita ba niha gulidanö ba götö daʼa.

20. Hewisa wotatugöida haniha zamatörö fangera-ngerada?

²⁰ Moguna tatörö tödöda wa ha darua zi tola tobali umbu hadia ia. Samösa Yehowa, ba tanö böʼönia yaʼia daʼö Satana hegöi ulidanönia. Haniha zamatörö fangera-ngeramö? Fanema linia yaʼia daʼö, haniha zasese öfondrondrongo. Na tatemaʼö lala wangera-ngera gulidanö, daʼö zamatörö fangera-ngerada ba tobali ita niha si so fangera-ngera hegöi samalua amuata fakhögusa. Börö daʼö, moguna sibai enaʼö taʼangenanöi hadia nifaigida, nibasoda, nifondrondrongoda, hegöi niʼera-erada.

21. Hadia nitutunöda ba wamahaʼö aefa daʼa?

²¹ Ba wamahaʼö daʼa no tafahaʼö ita, enaʼö tola taʼokhögö lala wangera-ngera Yehowa moguna tatimbagö lala wangera-ngera gulidanö. Moguna göi taʼangerönusi wangera-ngera Lowalangi ba taʼalui lala enaʼö simane daʼö göi wangera-ngerada. Ba wamahaʼö aefa daʼa, tatutunö hewisa wamalua daʼö.