1, 2. Na itugu tedou ita ba wamati, hadia nifahaʼöda yaʼita? Beʼe duma.

KHALAIGÖ so samösa niha sameʼe buala khö ndraono side-ide. Lamane khönia ira satuania, ”Waʼö saohagölö.” Ba ifalua daʼö börö me laʼandrö khönia wamalua yaʼia. Hizaʼi me no itugu ebua-bua nono daʼö, ibörötaigö aboto ba dödönia hadia zi so ba wangera-ngera ndra satuania wa moguna sibai wangandrö saohagölö na so hadia ia nibeʼe niha khönia. Ba gafuriata, daʼö zamarou yaʼia ba wangandrö saohagölö börö me no lafahaʼö ia wamalua daʼö.

² Simane daʼö göi ita. Me awena sibai tafahaʼö ita ba zindruhu, tafahaʼö ita wa moguna sibai woloʼö si no ifakhoi. Hizaʼi na itugu tedou ita ba wamati, itugu tafahaʼö ita sanandrösa ba lala wangera-ngerania simane si lö omasi ia hegöi somasi ia ba hewisa wamaiginia hadia ia. Ba ginötö tatehegö idönisi ita lala wangera-ngera Yehowa ba wangai angetula samösa hegöi nifaluada, daʼö geluahania wa no taʼokhögö wangera-ngerania.

3. Hana wa abua khöda wangokhögö fangera-ngera Yehowa?

³ Hewaʼae omuso dödöda ba ginötö tafahaʼö ita sanandrösa ba lala wangera-ngera Yehowa, hizaʼi itaria abua khöda ba wangokhögö fangera-ngerania, börö me lö  moʼahonoa ita. Duma-dumania, aboto ba dödöda hewisa wamaigi Yehowa gamuata si lö sinegu, fangomasiʼö harato, halöwö fanuriaigö, fangogunaʼö do ba zi lö tefaudu hegöi tanö böʼönia. Hizaʼi, ambö aboto ba dödöda hana wa simane daʼö wamaiginia. Andrö, hewisa lalada ba wamahaʼö yaʼita enaʼö itugu tafaudugö lala wangera-ngerada khö Yehowa? Ba hewisa wa tola möi fanoloda daʼa ba ginötö tahalö gangetula si sökhi iadaʼa hegöi ba zi so miföna?

4. Hadia geluahania wa moguna tabulöʼö lala wangera-ngerada?

⁴ Baso Roma 12:2. Ba ayati daʼa, itutunö sinenge sotöi Faulo wa moguna tafahaʼö ita ba wangokhögö lala wangera-ngera Yehowa. Iwaʼö wa ”böi mifaomagö ami ba niha gulidanö ba götö daʼa.” Simane si no tafahaʼö ita ba wamahaʼö si oföna, daʼa geluahania wa moguna tatimbagö lala wangera-ngera hegöi foʼamuata gulidanö daʼa. Hizaʼi iwaʼö göi Faulo wa moguna tabuluʼö lala wangera-ngerada. Eluahania, moguna tafahaʼö ita ba Daromali Lowalangi, moguna aboto ba dödöda wangera-ngerania, taʼangerönusi, ba taforege wangokhögö fangera-ngera Lowalangi.

5. Hadia gamaehutara wombaso ba famahaʼö?

⁵ Famahaʼö tenga faʼalio-alio ba wombaso mazui ba wangalui sinöndra moroi ba wanofu-nofu. Ba ginötö tafahaʼö ita, moguna taʼangeragö hadia wamahaʼö si tola tahalö sanandrösa khö Yehowa, haniha ia ba hewisa wangera-ngerania. Moguna göi aboto ba dödöda hadia mbörö wa ifatunö khöda Yehowa hadia zinangea tafalua ba hadia zinangea tatimbagö. Moguna taʼangeragö hadia zinangea tabulöʼö ba waʼaurida hegöi ba wangera-ngerada. Tatu manö tebai tasamuzaigö woʼangerönusi fefu hadia ia zi tobali famahaʼönia khöda ba ginötö tafahaʼö ita. Hizaʼi, abölö sökhi na oya taʼogunaʼö ginötö ba woʼangerönusi hadia nifahaʼöda yaʼita ero inötö.​—Zinunö 119:97; 1 Timoteo 4:15.

6. Hadia zalua ba ginötö taʼangerönusi Daromali Lowalangi?

⁶ Itaria alua zahöli-höli dödö na asese taʼangerönusi Daromali Lowalangi. ’Tafaduhuʼö ba khöda samösa’ wa lala wangera-ngera Yehowa andrö moʼahonoa. Ibörötaigö aboto ba dödöda lala wamaiginia hadia ia irege fao dödöda ba lala wangera-ngerania andrö. Tobali, moguna taʼokhögö wangera-ngerania ba ibörötaigö taʼoʼö daʼö. Arara manö tola taʼokhögö lala wangera-ngera Yehowa.

7, 8. (a) Hewisa wamaigi Yehowa harato? (Faigi gambara ba wamobörö wamahaʼö.) (b) Na simane famaigi Yehowa wamaigida harato, hadia zabölö moguna ba waʼaurida?

⁷ Moroi ba nifaluada tola oroma niʼera-erada. (Mareko 7:21-23; Yakobo 2:17) Datafaigi mato hauga ngawua duma-duma sanutunö daʼa. Si oföna, sanandrösa ba waö-waö waʼatumbu Yesu, sangoromaʼö fangera-ngera Yehowa sanandrösa ba harato. Ifili Yosefo hegöi Maria Lowalangi ba wangebuaʼö Ononia hewaʼae lö ebua gefera. (3 Moze 12:8; Luka 2:24) Me tumbu  Yesu, ’ifagaya Maria yawa ba luha börö me lö hadöi nahiara wemörö.’ (Luka 2:7) Sindruhunia, na omasi Yehowa, tola manö ifatumbuʼu Yesu andrö ba nahia sabölö sökhi. Hizaʼi, omasi ia na teʼebuaʼö Yesu ba zi sambua ösi nomo sangofönaiʼö famosumange Lowalangi. Daʼa zabölö moguna khö Yehowa.

⁸ Moroi ba waö-waö waʼatumbu Yesu tafahaʼö ita hewisa wamaigi Yehowa harato. So ösa zatua, omasi ira na laʼokhögö ngawalö zabölö sökhi iraonora hewaʼae na möi famakiko wahuwusa ndraonora daʼö khö Yehowa. Hizaʼi, sabölö moguna khö Yehowa yaʼia daʼö fahuwusada khönia. Hadia ötemaʼö lala wamaigi Yehowa hadia ia? Hadia oroma daʼö ba nifaluamö?​—Baso Heberaiʼo 13:5.

9, 10. Hewisa wangoromaʼöda wa simane famaigi Yehowa wamaigida niha si tobali börö wangala ba niha böʼö?

⁹ Duma-duma tanö böʼö, hewisa wamaigi Yehowa niha si tobali börö wangala ba niha böʼö irege ifalua horö niha daʼö mazui iböhöli wamosumange Yehowa. Imane Yesu, ”Haniha zanaisi niha samati simane ono side-ide andre, abölö sökhi latawi ba mbaginia gara sebua, aefa daʼö latiboʼö ia ba nasi.” (Mareko 9:42) Fehede sabeʼe daʼa! Taʼila göi wa Yesu andrö simane Amania. Börö daʼö, aboto ba dödöda wa lö göi omasi Yehowa na so niha sameʼe tetutu dödö zoloʼö khö Yesu.​—Yohane 14:9.

¹⁰ Hadia simane famaigi Yehowa hegöi Yesu wamaigida niha si tobali börö wangala ba niha böʼö? Hadia oroma daʼö ba nifaluada? Duma-dumania, so zomasi ita sanandrösa ba lagu wonukha hegöi fangehao sikhala. Hizaʼi, hadia nifaluada na lö fatema ba dödö ndra talifusöda ba gangowuloa lagu wonukhada mazui tola ifatumbuʼö ba dödö niha ba wangokhögö lala wangera-ngera sanandrösa ba gamuata fohorö? Hadia tatehegö lö tafalua daʼö börö me taʼomasiʼö ndra talifusöda?​—1 Timoteo 2:9, 10.

11, 12. Hana wa tobali folumöʼö khöda na fatuwu ita ba zi fatuwu khö Yehowa ba taʼokhögö wanaha tödö?

¹¹ Duma-duma si tölu, fatuwu khö Yehowa walöʼatulö. (Yesaya 61:8) Tatu manö, aboto ba dödönia wa itaria abua khöda wamalua satulö börö me lö moʼahonoa ita. Hizaʼi omasi ia na fatuwu ita ba zi lö sökhi simane yaʼia. (Baso Zinunö 97:10.) Na taʼangerönusi hadia mbörö wa fatuwu Yehowa ba ngawalö zi lö sökhi, daʼö zanolo yaʼita ba wangokhögö fangera-ngerania ba ibeʼe khöda waʼabölö ba wanimbagö ngawalö zi lö sökhi.

¹² Na tafomaha ita enaʼö fatuwu ba zi lö sökhi, daʼö göi zanolo yaʼita ba wangiʼila si fasala hewaʼae lö nihaogö mututunö daʼö ba Zura Niʼamoniʼö. Duma-dumania, amuata soʼamakhaita ba wohorö nifotöi tari pangkuan (lap dancing) si no toʼölö nifalua ba gulidanö  daʼa. So ösa niha sangumaʼö wa lö fagölö daʼö ba wamalua fohorö, irege moloʼö yaʼira tenga si lö sökhi daʼö. * (Faigi nisura ba gahe zura.) Hizaʼi, hewisa zindruhunia dödö Yehowa sanandrösa ba daʼö? Törö tödöu wa fatuwu khö Yehowa ngawalö hadia ia zi lö sökhi. Börö daʼö, datafahaʼö ita wangokhögö fanaha tödö irege aröu ita moroi ba ngawalö hadia ia zi lö sökhi ba fatuwu ita ba zi fatuwu khö Yehowa.​—Roma 12:9.

13. Hana wa moguna taʼangeragö sanandrösa ba wamaigi Yehowa hadia ia iadaʼa irege tola tahalö gangetula si sökhi ba zi so miföna?

¹³ Ba ginötö tafahaʼö ita, moguna taʼangeragö hewisa wamaigi Yehowa hadia ia, börö me daʼö zanolo yaʼita ba wangai angetula si sökhi. Na so zalua khöda irege moguna taʼanemaiʼö tahalö gangetula, böi hulö zi tokea ita. (Gamaedola 22:3) Datafaigi ösa duma-duma moroi ba Zura Niʼamoniʼö.

14. Hadia wamahaʼönia khöda wanema li Yosefo khö woʼomo Wotifa?

¹⁴ Me idönisi Yosefo foʼomo Wotifa, iʼanemaiʼö itimbagö daʼö. Ifalua daʼa börö me iʼangerönusi hewisa wamaigi Yehowa fongambatö. (Baso 1 Moze 39:8, 9.) Imane Yosefo khö woʼomo Wotifa, ”Ba hadia, ulau zi lö atulö andrö, sabölö-bölö sibai, wamazökhi horö ba Lowalangi?” Daʼa zangoromaʼö wa iʼokhögö lala wangera-ngera Yehowa. Hewisa göi ita? Hadia nifaluau na ibörötaigö ibunu-bunu khöu hörö awöu wohalöwö? Mazui na so niha zokirim ba HP-mö fehede hegöi gambara soʼamakhaita ba wohorö? * (Faigi nisura ba gahe zura.) Tola aoha khöda wangoromaʼö faʼalöfaröi khö Yehowa na no tahenaigö tafaʼanö ita sanandrösa khönia ba tatemaʼö lala wamaiginia hadia ia ba tola tatatugöi hadia zinangea tafalua.

15. Hewisa enaʼö lö faröi ita simane ono matua Heberaiʼo si datölu?

¹⁵ Angeragö göi duma-duma ndraono matua heberaiʼo si datölu yaʼia daʼö Saderakhi, Mezakhi ba Abedonego. Lö laʼoʼö me iʼandrö khöra Razo Nebukanesa ba wanömba adu anaʼa nifazökhinia. Fanema li nibeʼera zangoromaʼö wa no tefaʼanö ira hewaʼae so zi lö tola löʼö alua khöra börö me faröi khö Yehowa. (2 Moze 20:4, 5; Danieli 3:4-6, 12, 16-18) Hewisa göi iadaʼa? Hewisa na iʼandrö kafaloda gefe soguna ba gowasa soʼamakhaita ba agama sofaya? Moroi na tabaloi-baloi irege alua khöda zimane daʼö, abölö sökhi na taʼangerönusi iadaʼa hewisa wamaigi Yehowa daʼö. Irege na alua khöda zimane daʼö, aoha khöda ba wamalua hegöi ba wangumaʼö satulö simane iraono matua Heberaiʼo si datölu andrö.

16. Na sindruhu-ndruhu aboto ba dödöda lala wangera-ngera Yehowa, hana wa tobali fanolo khöda daʼö ba wamaʼanö yaʼita na so wökhö sabölö-bölö?

 ¹⁶ Na taʼangerönusi lala wangera-ngera Yehowa tola tobali fanolo khöda enaʼö lö faröi ita khönia ba ginötö göna ita fökhö sabölö-bölö. Tatu manö, tahalö gangetula ba wotimbagö transfusi darah mazui öfa komponen darah. (Halöwö Zinenge 15:28, 29) Hizaʼi, so ösa prosedur samaso niha Keriso ba wangogunaʼö do irege moguna lahalö gangetula samösa si teʼodane-dane ba goi-goi Zura Niʼamoniʼö. Hawaʼara ginötö si tefaudu ba wangai angetula? Hadia me mofökhö ita ba rumah sakit lafaso ita ba wangai angetula? Tatu manö tenga. Moguna tafalua riset, tafaʼanö zura-surada soʼamakhaita ba kesehatan sanutunö hadia zomasi ita hegöi nifatunöda khö dokter. * (Faigi nisura ba gahe zura.)

17-19. Hana wa moguna sibai tafahaʼö ita ba lala wangera-ngera Yehowa iʼotarai iadaʼa? Beʼe duma-duma.

¹⁷ Ba gafuriata, angeragö sanandrösa khö Yesu me ibeʼe khönia Fetero mene-mene si lö tefaudu me iwaʼö, ”He Soʼaya, hakhösi tödö ndraʼugö.” Sindruhu-ndruhu iʼangerönusi Yesu hadia zomasi Lowalangi khönia enaʼö ifalua hegöi sanandrösa ba waʼauri hegöi faʼamatenia ba gulidanö. Faʼaboto ba dödö andre zameʼe khönia faʼabölö ba ibeʼe waʼaurinia tobali höli khöda fefu.​—Baso Mataiʼo 16:21-23.

¹⁸ Iadaʼa, omasi göi Lowalangi enaʼö tobali ita si fahuwu khönia ba tafalua wondrege zi sökhi ba wanuriaigö turia somuso dödö. (Mataiʼo 6:33; 28:19, 20; Yakobo 4:8) Hizaʼi, itaria so ösa niha si sökhi tödö latandraigö lafarou ita ba wamalua simane niwaʼö Wetero khö Yesu. Duma-dumania, hadia nifaluamö na inönö gazimö kafalomö ba öʼila wa moguna önönö ginötömö wohalöwö irege lö inötömö weʼamöi  ba gangowuloa mazui ba wanuriaigö? Mazui na sekola nasa ndraʼugö, tola manö lawaʼö khöu ira gurumö enaʼö öröi nomo ba wolohi sekola salawa. Na alua daʼö, hadia moguna ölau mangandrö, öfalua riset ba fahuhuoʼö ba nösi nomomö mazui satua sokubaloi fatua lö öhalö gangetula? Abölö sökhi na iʼotarai iadaʼa öfahaʼö ndraʼugö hewisa wamaigi Yehowa daʼö ba öfaudugö lala wangera-ngeramö. Aefa daʼö, na no irai alua khöu daʼa, tola manö öʼalui lala enaʼö lö adöni dödöu. Tatu öʼila hadia zinangea öfalua börö me no öhalö gangetula wa hasambalö öʼosambuaʼö dödömö ba wamosumange Yehowa.

¹⁹ Tola manö öʼangeragö zalua tanö böʼö si lö ödöna-döna si tola manandraigö faʼalöfaröimö khö Yehowa. Tatu manö, lö si tefaʼanö ita fefu ba ngawalö hadia ia zalua. Hizaʼi, na taʼangerönusi lala wangera-ngera Yehowa ba ginötö tafalua wamahaʼö samösa, tola itörö tödöda hadia zi no tafahaʼö ita ba taʼila hewisa wamalua yaʼia ba ngawalö hadia ia zalua khöda. Börö daʼö ba ginötö tafalua wamahaʼö, dataʼalui hewisa wamaigi Yehowa hadia ia, taʼokhögö lala wangera-ngerania, ba taʼalui lala hewisa enaʼö tola tobali fanolo khöda daʼö ba wangai angetula iadaʼa hegöi ba zi so miföna.

20, 21. (a) Hana wa omuso dödöda ba wangefa nitemada ba gulidanö si bohou? (b) Hewisa enaʼö owua-wua dödöda ba waʼauri iadaʼa?

²⁰ Fefu ita numalö ba gulidanö si bohou. Ato ba gotaluada zanötöna enaʼö auri ba gulidanö Faradaiso. Barö Wamatörö Lowalangi, teʼefaʼö ita fefu moroi ba ngawalö hadia ia zi möi börö waʼafökhö hegöi famakao sasese tataögö ba gulidanö iadaʼa. Ba hasambalö tola tahalö gangetula si teʼodane-dane ba wangera-ngera hegöi somasi-masi ita.

²¹ Hizaʼi, tenga daʼö geluahania wa lö ola-ola nifaluada. Niha satulö tödö hasambalö lahalö gangetula moloʼö huku Yehowa hegöi fangera-ngerania. Iʼasogö waʼowua-wua dödö sebua ba faʼatulö. (Zinunö 37:11) Irege tohare ginötö daʼö, tola so khöda waʼomuso dödö iadaʼa na taʼokhögö lala wangera-ngera Yehowa.