1, 2. (a) Hadia zabölö ebua böli ba waʼaurida? (b) Hadia manö zindruhu sebua böli ba waʼaurida ba hadia mbörö? (Faigi gambara ba wamobörö wamahaʼö.)

HADIA zabölö ebua böli ba waʼaurida? Sabölö ebua böli ba waʼaurida yaʼita ono mbanua Yehowa yaʼia daʼö fahuwusada khönia. Lö irai tatehegö tatukari daʼö ba danö böʼö. Ebua göi ba dödöda mböli zindruhu moroi ba Zura Niʼamoniʼö, börö me tola fahuwu ita khö Yehowa.​—Kolose 1:9, 10.

² Yehowa andrö Samahaʼö Sebua, ifatunö khöda ngawalö zindruhu sebua böli moroi ba Daromalinia, Sura Niʼamoniʼö. Ifahaʼö ita wa moguna sibai döinia ba ifatunö göi gamuatania sahöli-höli dödö. Ifatunö khöda wa iʼomasiʼö sibai ita irege itehegö ibeʼe khöda Nononia niʼomasiʼö. Ifahaʼö ita Yehowa sanandrösa ba Wamatörö Mesia. Ibeʼe khöda dötönafö ba zi so miföna, he ba zorugo ba niha nibayoini mazui Faradaiso ba gulidanö ba ”mbiri-biri tanö böʼö”. (Yohane 10:16) Ifahaʼö ita Yehowa hewisa zinangeania ita ba waʼauri. Ba wamaigida, sindruhu andrö amaedola harato börö me tola itolo ita irege ahatö khö Zomböi ba so dötönaföda.

3. Hadia iʼandrö khöda gefe Yehowa ba wanöndra sindruhu?

 ³ Yehowa andrö Lowalangi soböwö. Iforomaʼö waʼoböwö me ibeʼe Nononia salahida. Ba ginötö so niha sangalui sindruhu, itolo ia Yehowa ba wanöndra daʼö. Lö irai iʼandrö gefe ba ginötö tafahaʼö ita ba zindruhu. Samuza inötö, samösa ndra matua sotöi Simoni, ibeʼe gefe khö zinenge sotöi Fetero enaʼö tola labeʼe khönia waʼabölö ba wameʼe eheha niʼamoniʼö ba niha böʼö. Iwaʼö khönia Fetero wa fasala lala wangera-ngerania ba imane, ”Yafao ndraʼugö waʼamate ba gefemö andrö, börö me öwalinga tola muʼöli mbuala Lowalangi faoma kefe.” (Halöwö Zinenge 8:18-20) Na simanö, hadia geluahania ’taʼöli zindruhu?’

4. Ba wamahaʼö daʼa, hadia nifahaʼöda yaʼita sanandrösa ba zindruhu?

⁴ Baso Gamaedola 23:23. Moguna wangodödögö ba wamahaʼö ba zindruhu moroi ba Zura Niʼamoniʼö, ba tatehegö hadia ia enaʼö tola taʼokhögö ia. Na no aefa ’taʼöli zindruhu’ mazui no tafahaʼö ita ba zindruhu, moguna taʼangenanöi enaʼö böi irai ’tafamawa’ mazui taröi daʼö. Hewisa ’wowöli’ sindruhu moroi ba Zura Niʼamoniʼö? Hawaʼebua mbölinia? Fanema li moroi ba zinofu andrö zanolo yaʼita enaʼö taʼila wa ebua sibai mböli zindruhu moroi ba danö böʼö ba tahalö gangetula wa lö irai taröi ia. Aboto ba dödöda dania, hadia mbörö wa ebua sibai mböli zindruhu si otarai Yehowa moroi ba danö böʼö.

5, 6. (a) Hewisa wowölida sindruhu hewaʼae lö taʼogunaʼö gefe? Tutunö. (b) Hewisa enaʼö so guna zindruhu andrö khöda?

⁵ Hewaʼae so zi lö muʼandrö mböli, tenga daʼö geluahania wa lö hadöi sinangea mufalua ba wanöndra yaʼia. Ngawua wehede Heberaiʼo niʼogunaʼö ba wamoʼeluaha Gamaedola 23:23 sanandrösa ba ngawua wehede ”öli” tola göi daʼö geluahania ”okhögö”. Ngawua wehede daʼa zangoromaʼö wa moguna wangodödögö khö zi samösa niha mazui itehegö hadia ia niʼokhögönia ba wanöndra sebua böli ba wamaiginia. Enaʼö aboto ba dödöda hewisa wowöli sindruhu, khalaigö na tarongo so mböra si lö muʼandrö mböli ba balai desa. Hadia tabalo-baloi enaʼö so niha samasao daʼö ba dete mezada? Löʼö, moguna möi ita tahalö ba taʼohe ba nomo. Hewaʼae lö tabeʼe gefe hizaʼi so zinangea tafalua ba wanöndra böra andrö. Simanö göi, hewaʼae lö moguna tabeʼe gefe ba wanöndra sindruhu, hizaʼi moguna taʼodödögö ba tatehegö hadia ia ba wangokhögö yaʼia.

⁶ Baso Yesaya 55:1-3. Fehede Yehowa zanolo yaʼita enaʼö taʼila hadia geluaha ’öli zindruhu’. Ifagölösi Yehowa ngawua wehede sindruhu andrö simane idanö, susu, hegöi agu. Simane idanö sokafu, tola iʼokafui dödö niha sowökhi tödö, simanö göi zindruhu tola iʼokafui dödöda. Börö susu tola tedou wa ebua hegöi faʼabölö ndraono, simanö göi zindruhu ba Zura Niʼamoniʼö tola iʼaroʼö wahuwusada khö Yehowa. Hana wa ifagölösi wehedenia Yehowa simane agu? Iwaʼö Sura Niʼamoniʼö wa agu andrö tola iʼasogö waʼomuso dödö. (Zinunö 104:15) Me ifatunö khöda Yehowa enaʼö ’taʼöli agu’, iʼila wa tola tarasoi waʼomuso dödö na taʼoʼö wanuturu lala nibeʼenia soguna ba waʼaurida.  (Zinunö 19:8) Iʼogunaʼö duma-duma andre Yehowa enaʼö taʼila hadia manö gunania na tafahaʼö ita ba zindruhu ba tafalua ia ba waʼaurida. Datatutunö lima ngawalö ’zi tola tatehegö ba wowöli sindruhu’.

7, 8. (a) Hana wa moguna ginötö ba wamahaʼö ba zindruhu? (b) Hadia nifalua zi samösa niha samahaʼö yaʼia ba Zura Niʼamoniʼö ba hadia mbuania?

⁷ Inötö. Moguna ginötö khö zi samösa niha ba wamondrondrongo turia Wamatörö Lowalangi, wombaso Sura Niʼamoniʼö hegöi publikasi si teʼodane-dane ba Zura Niʼamoniʼö, famahaʼö ba Zura Niʼamoniʼö khö ndra Samaduhuʼö Yehowa, famaʼanö ba gangowuloa hegöi feʼamöi ba gangowuloa. Ba wamalua daʼö fefu, moguna tatehegö ginötö si toʼölö taʼogunaʼö ba wamalua sambö moguna. (Baso Efeso 5:15, 16, hegöi nisura ba gahe zura.) Hawaʼoya ginötö niʼogunaʼöda ba wamahaʼö yaʼita sanandrösa ba dane-dane zindruhu si so ba Zura Niʼamoniʼö? Faböʼö-böʼö ero samösa niha. Lö hadöi ola na tafahaʼö ita sanandrösa ba waʼatua-tua Yehowa, lalania, hegöi ngawalö nifaluania. (Roma 11:33) Edisi si oföna moroi ba Watch Tower ifagölösi zindruhu andrö simane ”bunga side-ide” ba imane, ”Böi obönö ba dödöu zi ha sambua bunga zindruhu. Na ibönö zi ha sambua tatu lö hadöi tanö böʼö. Owuloi manö nasa ba alui enaʼö oya.” Börö daʼö tola tasofu khöda samösa, ’Hawaʼoya zi no ufahaʼö yaʼo sanandrösa khö Yehowa?’ Hewaʼae na tasöndra waʼauri si lö aetu, lö taböhöli wamahaʼö yaʼita sanandrösa khö Yehowa. Iadaʼa, moguna sibai enaʼö taʼogunaʼö ginötöda ba wondrouʼö famahaʼöda moloʼö faʼabölöda. So dania ba daʼa duma-duma niha samalua simane daʼö.

⁸ Mariko, * (faigi nisura ba gahe zura) samösa nono alawe si bohou ebua moroi ba jepang, findra ia ba Amerika Serikat börö me sekola ia ba New York City. Samuza inötö so samösa dalifusöda ira alawe perintis, sangombakha khönia turia somuso dödö ba nomonia. Hewaʼae sangai halöwö ba agama ia, hizaʼi ibörögö ifahaʼö ia Mariko ba Zura Niʼamoniʼö. Iʼomasiʼö sibai hadia zi no ifahaʼö ia ba iʼandrö enaʼö dua kali samigu lafalua wamahaʼö. Hewaʼae sindruhunia oya ginötö Mariko weʼamöi ba zekola hegöi ba wohalöwö si matonga hari, hizaʼi ibörötaigö möi ia ba gangowuloa. Iʼalösi ginötönia ba wanörö-nörö ba iʼdouʼö ginötönia ba wamahaʼö yaʼia sanandrösa ba zindruhu. Börö me itehegö ifalua daʼö Mariko, itugu monönö waʼahatönia khö Yehowa. Ambö döfi ba ifabayagöʼö ia idanö. Önö waŵa aefa daʼö me 2006, tobali ia perintis ba lö iböhöli daʼö irugi iadaʼa.

9, 10. (a) Hewisa wa tola tebulö lala wangera-ngerada sanandrösa ba harato na no tafahaʼö ita ba zindruhu? (b) Hadia niröi zi samösa ira alawe sawuyu-wuyu ba hadia nirasoinia sanandrösa ba daʼö?

 ⁹ Harato. Na asese tafahaʼö ita ba zindruhu, tola manö tatehegö taröi halöwö sebua gazi mazui dadaoma si sökhi ba gulidanö daʼa. Duma-dumania, Fetero hegöi Andrea, yaʼira andre niha si fagai. Hizaʼi me ikaoni ira Yesu enaʼö tobali nifahaʼönia laröi halöwöra andrö. (Mataiʼo 4:18-20) Tenga daʼa geluahania ba ginötö öfahaʼö ndraʼugö ba zindruhu, moguna öröi halöwömö. Moguna mohalöwö zi samösa niha ba wombönökhi soguna ba nösi nomonia. (1 Timoteo 5:8) Ba ginötö öfahaʼö ndraʼugö ba zindruhu, moguna öbulöʼö lala wangera-ngeramö sanandrösa ba harato. Moguna aboto ba dödömö hadia zindruhunia zabölö moguna ba waʼauri. Imane Yesu, ”Böi mihöna khömi harato ba gulidanö.” Hizaʼi ifarou ita enaʼö, ’Tahöna khöda harato ba zorugo.’ (Mataiʼo 6:19, 20) Daʼa nifalua ndra alawe sawuyu-wuyu sotöi Maria.

¹⁰ Iʼotarai me ide-ide omasi Maria famai golf. Me SMA ia, itugu monönö waʼonekhenia. Börö me onekhe ia, labeʼe khönia bea siswa weʼamöi kuliah. Ohitö dödö Maria yaʼia daʼö enaʼö tobali ia pemain golf sabölö onekhe irege oya gefenia. Lö ara, ibörötaigö ifahaʼö ia ba Zura Niʼamoniʼö. Iʼomasiʼö sibai hadia zi no ifahaʼö yaʼia ba ibörötaigö ifalua ba waʼaurinia. Imane, ”Ufaudugö gamuatagu hegöi lagu waʼaurigu enaʼö tefaudu ba goi-goi Zura Niʼamoniʼö ba urasoi waʼomuso dödö.” Aboto ba dödö Maria wa abua khönia wangosambuaʼö tödö ba zi dombua balö, yaʼia daʼö amakhaitania khö Yehowa hegöi halöwönia ba olahraga. (Mataiʼo 6:24) Börö daʼö itehegö iröi gohitö dödönia tobali pemain golf sabölö onekhe, börö me omasi igohi zabölö moguna. Iadaʼa, no tobali ia perintis ba iwaʼö wa ”daʼö waʼomuso dödö sabölö moʼeluaha ba waʼauri”.

11. Ba ginötö tafahaʼö ita ba zindruhu, hadia manö zi tola lafalua ira si fahatö khöda?

¹¹ Amakhaitada ba niha böʼö. Me ibörötaigö tafalua hadia zi no tafahaʼö yaʼita ba Zura Niʼamoniʼö, tola manö tebulö gamakhaitada khö ndra awöda hegöi ba zoroi yomoda. Itolo ita Yesu enaʼö aboto ba dödöda hadia mbörö wa alua daʼö me mangandrö ia salahi zoloʼö khönia, ”Amoniʼö ira ba zindruhu, taromalimö zindruhu.” (Yohane 17:17) Ngawua wehede ”amoniʼö” tola göi daʼö geluahania mamabali. Ba ginötö tafalua zindruhu ba waʼaurida, tafabali ita moroi ba gulidanö börö me taʼoʼö goi-goi Zura Niʼamoniʼö. Hewaʼae no taʼodödögö ba wondrorogö amakhaitada si sökhi khö ndra awöda mazui khö dalifusöda, hizaʼi tola manö lö omasi ira khöda simane ba zilalö ba lö omasi ira sanandrösa ba zawena tafaduhusi tödö. Andrö wa lö tokea ita. Imane Yesu, ”Si faʼudu ba niha dania zoroi yomonia.” (Mataiʼo 10:36) Hizaʼi ifabuʼu göi Yesu wa gofu  hadia ia niröida börö zindruhu hasambalö tatema zi töra moroi ba daʼö!​—Baso Mareko 10:28-30.

12. Hadia nitehegö mazui niröi zi samösa ira matua Yahudi börö zindruhu?

¹² Samösa ndra matua niha Yahudi sotöi Aaron, sandrohu faʼaurinia faduhu dödönia wa fasala na mutötöi döi Lowalangi. Hizaʼi, sindruhu-ndruhu omasi iʼila sanandrösa khö Lowalangi. Samuza maʼökhö, so samösa Zamaduhuʼö Yehowa iforomaʼö khönia döi Lowalangi ba zi öfa ngawua huruf vokal Heberaiʼo, na mutötöi daʼö ”Yehowa”. Terou sibai dödö Aaron me no iʼila daʼa, irege möi ia ba nahia waʼowulo ba ifatunö khö ndra samahaʼö! Iwalinga omuso dödöra me no laʼila zindruhu sanandrösa ba döi Lowalangi, hizaʼi löʼö. Latiloini ba lafofanö ia. Simanö göi nösi nomonia, laʼuduni ia. Hewaʼae simanö, lö iböhöli ba wamahaʼö yaʼia sanandrösa khö Yehowa. Tobali ia samösa Samaduhuʼö Yehowa ba lö faröi ia ba wamosumange Yehowa sandrohu faʼaurinia. Simanö göi, tola manö tebulö gamakhaitada ba niha böʼö me no tafahaʼö ita ba zindruhu.

13, 14. Hadia nibulöʼöda sanandrösa ba lala wangera-ngera hegöi nifaluada ba ginötö tafahaʼö ita ba zindruhu? Beʼe duma-duma.

¹³ Fangera-ngera hegöi amuata si raʼiö. Ba ginötö tafahaʼö ita ba zindruhu ba ibörötaigö taʼaurifagö goi-goi Zura Niʼamoniʼö, moguna tabulöʼö lala wangera-ngera hegöi nifaluada. Imane sinenge sotöi Fetero, ”Börö me iraono soloʼö-loʼö ami, böi saʼae ifatörö ami fangisö andrö nifaluami mböröta, fatua lö misöndra waʼaboto ba dödö.” Imane nasa, ”Miʼamoniʼö ami ba ngawalö gamuatami.” (1 Fetero 1:14, 15) Ba mbanua Korindro me föna, ato niha samalua amuata wohorö. Niha si toröi ba daʼö moguna lahaogö labulöʼö gamuatara enaʼö lö raʼiö ira föna Yehowa. (1 Korindro 6:9-11) Iadaʼa, ato niha samalua fombulöʼö simane daʼö börö me no lafahaʼö ira ba zindruhu. Imane Fetero ba woʼamaedolagö salua andrö, ”Me föna, no ara mifalua wangisö niha andrö ba gulidanö yaʼia daʼö amuata si lö faʼaila, fangisö si lö fanaha tödö, femabu-mabu, famalua owasa si lö sökhi, fatandrisa ba wamadu tuo, fanömba adu sogoro ita.”​—1 Fetero 4:3.

¹⁴ Devynn hegöi Jasmine, yaʼira andre niha si mabu-mabu ba zi hauga fakhe. Hewaʼae na Devynn andre samösa niha sonekhe ba halöwö wangerai kefe hizaʼi lö iʼila mohalöwö börö me mamadu-madu manö ia. Tehöngö Jasmine börö me mofönu-fönu ia ba lö baga gamuatania. Samuza maʼökhö, me mabu ia so darua Zamaduhuʼö Yehowa si falukha khönia ba lala. Lawaʼö khönia wa möi ira ba nomonia ba wamahaʼö ba Zura Niʼamoniʼö. Hizaʼi me tohare ira migu fönada, no mabu Jasmine hegöi Devynn. Lö faduhu dödöra wa möi ba nomora utusan injil andrö. Ba ginötö tanö böʼö ifuli tohare utusan injil andrö hizaʼi faböʼö zalua. No ifaʼanö ia Jasmine hegöi Devynn ba wamörötaigö wamahaʼö ba Zura Niʼamoniʼö ba laʼanemaiʼö lafalua hadia zi no lafahaʼö yaʼira. Ambö tölu waŵa labato wamadu-madu, ba lafasuraʼö wangowalura khö wamareta. Ato niha ba zi fasuira sonehe-nehegö waʼatebulö gamuata Jasmine hegöi Devynn, ba ibörötaigö göi lafahaʼö ira ba Zura Niʼamoniʼö.

15. Hadia zabölö abua khöda tabulöʼö börö zindruhu ba hadia mbörö?

 ¹⁵ Hada hegöi si toʼölö mufalua si lö tefaudu ba zomasi Lowalangi. Sambua zabölö abua khöda tabulöʼö yaʼia daʼö ba wamöhöli enaʼö lö fao ba hada hegöi ba zi toʼölö mufalua si lö tefaudu ba zomasi Yehowa. Hewaʼae so ösa niha si no mangila hewisa wamaigi Yehowa fefu daʼö, hizaʼi abua nasa khöra wamöhöli yaʼia. Aombö dödöra sanandrösa ba nirasoi nösi nomora, awöra wohalöwö, hegöi si fahuwu khöra. Laʼila göi wa asese abeʼe dödö niha sanandrösa ba hada simane ba wamosumange niha si no mate. (5 Moze 14:1) Börö daʼö, hadia zanolo yaʼita ba wombulöʼö daʼö? Tola tafahaʼö ita moroi ba duma-duma si sökhi si no mamulöʼö faʼaurira me no lafahaʼö ira ba zindruhu, simane niha Keriso ba Efeso me götö föna.

16. Hadia nitehegö niha Efeso?

¹⁶ Ba mbanua Efeso me föna, no toʼölö wamalua fakelemusa. Hadia nifalua niha samalua fakelemusa me tobali ira niha Keriso? Imane Sura Niʼamoniʼö, ”Ato ba gotaluara mböröta zi fakelemu, laʼowuloi mbukura ba latunu föna niha sato. Me no laʼerai mbölinia, tesöndra 50.000 firö waʼebua. Börö daʼö, itugu tehöngö ba monönö waʼabölö daromali Yehowa misa si fao faʼahöli-höli dödö.” (Halöwö Zinenge 19:19, 20) Niha Keriso si lö faröi latehegö latunu mbukura sebua böli, ba ifahowuʼö ira Yehowa.

17. (a) Hadia manö zi tola tatehegö börö zindruhu? (b) Hadia wanofu nibeʼeda fanema li ba wamahaʼö aefa daʼa?

¹⁷ Hadia nitehegömö enaʼö tola öfahaʼö ndraʼugö ba zindruhu? Fefu ita tola tatehegö ginötöda. So ösa moroi ba gotaluada, latehegö enaʼö lö kayo ira hewaʼae sindruhunia tola lafalua daʼö ba latehegö tebulö gamakhaitara ba niha böʼö. Ato göi ba gotaluada latehegö labulöʼö lala wangera-ngerara hegöi nifaluara. Tola tatimbagö hada hegöi si toʼölö mufalua si lö omasi Yehowa. Faduhu dödöda waʼabölö ebua mböli zindruhu moroi ba Zura Niʼamoniʼö moroi ba ngawalö hadia ia zi no tatehegö. Börö zindruhu moroi ba Zura Niʼamoniʼö wa tola ahatö ita khö Yehowa, daʼa zabölö ebua böli ba waʼaurida. Na taʼangeragö fefu howu-howu nitemada börö zindruhu, itugu aboto ba dödöda hadia mbörö wa tebai ’mufamawa’ ia. Hewisa na alua daʼö? Ba hewisa enaʼö lö tafalua zala sabölö-bölö? Tatutunö wanema linia ba wamahaʼö aefa daʼa.