1-3. (a) Hewisa dödöda sanandrösa ba zindruhu? Beʼe duma-duma. (Faigi gambara ba wamobörö wamahaʼö.) (b) Hadia nitutunöda ba wamahaʼö daʼa?

IADAʼA, no si toʼölö ba niha na lafangawuli hadia ia zi no laʼöli ba toko. Na so niʼöli niha ba online, sasesenia lafangawuli. Tola manö alua daʼö börö me tenga simane somasi ira mazui lö tefaudu. Börö daʼö, na lö tefaudu ba dödöra ba latukari mazui laʼandrö enaʼö lafangawuli gefera.

² Böi irai tafalua zimane daʼö ba zindruhu si so ba Zura Niʼamoniʼö. Ba ginötö ’taʼöli’ ia böi irai ’tafamawa’ eluahania tafahaʼö ita ba zindruhu, böi irai taröi. (Baso Gamaedola 23:23; 1 Timoteo 2:4) Simane si no tatutunö ba wamahaʼö si oföna, oya taʼogunaʼö ginötö ba wamahaʼö yaʼita ba zindruhu. Tola manö tatehegö göi lala halöwö si tola tobali dela khöda ba wanöndra kefe sebua. So göi nifaudugöda sanandrösa ba gamakhaitada ba niha böʼö, tabulöʼö lala wangera-ngera hegöi nifaluada mazui taböhöli wamalua hada hegöi si toʼölö mufalua si lö omasi Yehowa. Hizaʼi, faduhu dödöda wa howu-howu nitemada  börö me no aboto ba dödöda zindruhu, abölö ebua mbölinia moroi ba zi no tatehegö.

³ Ibeʼe Yesu gamaedola sanandrösa ba niha sogale sanöröi tanö misa sangalui mutiara si sökhi. Me so sambua zabölö ebua böli nisöndra ndra matua andrö, iʼanemaiʼö ifamawa hadia ia zi so khönia enaʼö tola iʼöli daʼö. Mutiara andrö no amaedola Famatörö Lowalangi. Ifatunö ba daʼa Yesu hawaʼebua mböli zindruhu ba niha sangalui yaʼia. (Mataiʼo 13:45, 46) Me awena sibai tafahaʼö ita ba zindruhu sanandrösa ba Wamatörö Lowalangi hegöi fefu zindruhu tanö böʼö sebua böli moroi ba Zura Niʼamoniʼö, tatehegö hadia ia zi so khöda ba wangokhögö yaʼia. Na lö mamalö taʼameʼegö tödö zindruhu, hasambalö lö taröi ia. Hizaʼi so ösa nono mbanua Lowalangi, laböhöli ba woʼameʼegö tödö sindruhu andrö ba laröi. Böi irai tafalua zimane daʼö! Moguna taʼoʼö mene-mene Zura Niʼamoniʼö enaʼö ’lö taböhöli wanörö lala sindruhu’. (Baso 3 Yohane 2-4.) Eluahania, taʼofönaiʼö zindruhu ba taforomaʼö ia ba lala waʼaurida. Hizaʼi, hadia mbörö ba hewisa wa tola ’ifamawa’ mazui iröi zindruhu si samösa niha? Hewisa enaʼö lö irai tafalua daʼö? Ba hewisa enaʼö ’lö taböhöli wanörö lala sindruhu’?

4. Hana wa so ösa niha si lö manohugö ba wanörö lala sindruhu me götö Yesu?

⁴ Me götö Yesu, so ösa niha sanemaʼö sindruhu ba wamobörö hizaʼi lö latohugö ba wanörö lala sindruhu. Duma-dumania, me aefa ifalua dandra sahöli-höli dödö Yesu ba wameʼe gö niha sato, laʼoʼö ia ofeta ba Nasi Galilaia. Hizaʼi, lö fatema ba dödöra me imane Yesu, ”Sindruhu-ndruhu niwaʼögu khömi, na lö miʼa nagole Nono niha ba mibadu ndronia, lö misöndra waʼauri.” Moroi na lasofu khö Yesu hadia geluaha wehedenia andrö, hizaʼi lamane, ”Abeʼe sibai wehedenia andre. Haniha saʼae zomasi mamondrongo fehede simane daʼö?” Lua-luania, ”laröi ia ira nifahaʼönia, mangawuli ira ba halöwö si no laböhöli mböröta”.​—Yohane 6:53-66.

5, 6. (a) Hadia mbörö wa so ösa niha sangerogö sindruhu iadaʼa? (b) Hewisa wa tola iʼerogö zindruhu si samösa niha?

⁵ Hizaʼi, so ösa niha iadaʼa zangodödögö ba wondröi sindruhu. Hadia mbörö? Tola manö so ösa zi tetutu tödö börö me so waʼaboto ba dödö si no mubulöʼö sanandrösa ba ayati Zura Niʼamoniʼö mazui so niwaʼö hegöi nifalua ndra talifusöda si lö fatema ba dödöra. Tanö böʼönia, lö omasi ira me labeʼe khöra mene-mene moroi ba Zura Niʼamoniʼö mazui so watitisa sabölö-bölö khö zi samösa niha ba gangowuloa. Ba tanö böʼönia, tola manö laʼoʼö wamahaʼö faya moroi ba niha sondröi sindruhu hegöi niha böʼö sangumaʼö fehede si lö atulö sanandrösa khöda. Ha maʼifu daʼa moroi ba waʼoya mbörö wa tola so niha sangerogö Yehowa hegöi angowuloa. (Heberaiʼo 3:12-14) Abölö sökhi na lafaduhusi tödö Yesu simane nifalua Wetero. Me lö fatema ba dödö niha sato wehede Yesu, isofu göi Yesu  khö zinengenia hadia faröi göi ira. Hizaʼi imane Fetero, ”He Soʼaya, haʼökhö nasa möiga? Ba wehedemö so waʼauri si lö aetu.”​—Yohane 6:67-69.

⁶ Tanö böʼönia, so göi zodaʼi-daʼi ba wangerogö sindruhu ba tola manö lö laʼila hadia zalua khöra. Na idaʼi-daʼi si samösa niha ba wondröi sindruhu, fagölö ia simane tundraha na idaʼi-daʼi ba wondröi bewe nidanö. No ifangelama ita Sura Niʼamoniʼö ”faböi ahani”. (Heberaiʼo 2:1) Si toʼölönia, tenga ohitö dödöra ba wangerogö sindruhu. Hizaʼi, latehegö awuwu wahuwusara khö Yehowa irege ba ginötönia, tola taya wahuwusa daʼö. Hewisa enaʼö lö irai alua khöda zimane daʼa?

7. Hadia zanolo yaʼita enaʼö lö irai tafamawa zindruhu?

⁷ Enaʼö lö tebulö ba wanörö lala sindruhu moguna tatema ba taʼoʼö fefu hadia ia niwaʼö Yehowa. Moguna taʼofönaiʼö zindruhu andrö ba waʼaurida ba taʼoʼö goi-goi Zura Niʼamoniʼö ba ngawalö hadia ia nifaluada. Fawuʼuli Razo Dawido ba wangandrönia khö Yehowa, ”Utörö lala zindruhu andrö khöu.” (Zinunö 86:11, NW) Ihalö gangetula Dawido enaʼö lö tebulö itörö lala zindruhu, ba moguna simane daʼö göi ita. Na lö tafalua daʼö, tola manö ibörötaigö tatörö tödöda ngawalö hadia ia zi no tatehegö börö zindruhu, ba tola manö ifuli omasi ita wamalua zi no taröi ba zilalö. Hizaʼi, tebai tafili hadia zindruhu si so ba Zura Niʼamoniʼö sinangea tatemaʼö hegöi tatimbagö. Moguna tatörö ”fefu zindruhu”. (Yohane 16:13) Ba wamahaʼö si oföna, no tatutunö lima ngawalö nitehegöda börö me tafahaʼö ita ba tafalua zindruhu. Iadaʼa, datafaigi hewisa enaʼö lö irai tafuli ita furi ba zi no taröi.​—Mataiʼo 6:19.

8. Hewisa wa tola iʼerogö zindruhu si samösa niha Keriso ba lala wangogunaʼönia inötö? Beʼe duma-duma.

⁸ Inötö. Enaʼö lö irai taʼerogö zindruhu, moguna taʼogunaʼö ginötöda si fao faʼatua-tua. Na lö mangelama ita, tola manö tahorigö ginötöda ba wanörö-nörö, wamalua hobi, wamoka-mokai Internet, mazui ba wamaigi TV. Hewaʼae lö fasala fefu daʼa, hizaʼi abölö baga na taʼogunaʼö ginötöda ba wamalua sabölö moguna ba wamahaʼö hegöi ba wamalua halöwö fanuriaigö. Simane daʼö zalua khö Emma. * (Faigi nisura ba gahe zura.) Iʼotarai me ide-ide, omasi sibai ia kudo ba ilau fakudo gofu hawaʼara manö zomasi ia. Hizaʼi, ibörötaigö itegu-tegu ia tödönia börö me oya ihorigö ginötönia ba wamalua hobinia ba ihalö gangetula ba wombulöʼö ohitö dödönia. Ifahaʼö ia göi Emma moroi ba zalua khö Cory Wells,  samösa dalifusöda ira alawe si fakudo ba rodeo. * (Faigi nisura ba gahe zura.) Iadaʼa, abölö oya ihorigö ginötönia Emma ba wamosumange Yehowa, ba nösi nomonia hegöi khö ndra awö-awönia samosumange Yehowa. Irasoi wa itugu ahatö ia khö Lowalangi ba omuso dödönia börö me iʼogunaʼö ginötönia si fao faʼatua-tua.

9. Hewisa wa tola taʼofönaiʼö wangalui harato?

⁹ Harato. Enaʼö lö mamalö tatörö lala sindruhu, böi tatehegö harato zabölö moguna ba waʼaurida. Me tafahaʼö ita ba zindruhu, aboto ba dödöda wa töra moroi ba harato wamosumange Yehowa ba omuso dödöda me tatehegö hadia ia börö zindruhu. Me itugu numalö ginötö, tola manö tafaigi-faigi niha sowöli perangkat elektronik si bohou mazui omuso dödöra börö me tola laʼöli hadia ia börö gefe. Ibörötaigö tarasoi wa no taya fefu daʼö. Tola manö lö obönö khöda zi no so irege taʼosambuaʼö dödöda ba wangalui harato moroi ba wamosumange Yehowa. Daʼa zamasugi ba dödöda salua khö Dema. Iʼomasiʼö sibai ”gulidanö ba götö daʼa” irege iröi halöwönia ba wefao khö zinenge sotöi Faulo. (2 Timoteo 4:10) Tola manö abölö omasi Dema harato moroi ba wamosumange Lowalangi. Mazui te lö omasi ia saʼae falulu fohalöwö khö Waulo. Hadia wamahaʼönia khöda? Me ba zilalö, tola manö abölö taʼomasiʼö harato. Na lö mangelama ita, tola manö monönö ba wangomasiʼöda harato ba itugu aro ia ba dödöda irege taya waʼomasida ba zindruhu.

10. Hadia wondrönisi dödö sinangea tatimbagö?

¹⁰ Amakhaitada ba niha böʼö. Enaʼö lö mamalö tatörö lala sindruhu, böi tatehegö tedönisi dödöda ba niha si lö mamosumange Yehowa. Me tafahaʼö ita ba zindruhu, tola manö tebulö gamakhaitada ba nösi nomoda si tenga Samaduhuʼö Yehowa hegöi khö ndra awö-awöda. Tola manö so zangosinangegö nifaduhusida tödö si bohou ba so göi ösa zi fatuwu. (1 Fetero 4:4) Tatu manö, taforege enaʼö sökhi gamakhaitada ba nösi nomoda ba taforomaʼö waʼasökhi dödö. Hizaʼi böi tatimbagö goi-goi Yehowa ha börö me omasi taʼomusoiʼö dödöra. Simane si no tafahaʼö ita ba 1 Korindro 15:33, enaʼö fahuwu ita ba niha sangomasiʼö Yehowa.

11. Hewisa enaʼö tola tatimbagö lala wangera-ngera hegöi amuata si raʼiö?

¹¹ Fangera-ngera hegöi amuata si raʼiö. Ba wanörö lala sindruhu, moguna taʼamoniʼö ita mazui böi raʼiö ba wamaigi Yehowa. (Yesaya 35:8; baso 1 Fetero 1:14-16.) Me tafahaʼö ita ba zindruhu, tabohouni lala waʼaurida börö me taʼoʼö goi-goi Zura Niʼamoniʼö. So ösa zamalua famohouni sebua. Hizaʼi, moguna mangelama ita enaʼö böi tabulöʼö waʼaurida si lö raʼiö ba wamalua amuata fohorö. Hadia zanolo yaʼita enaʼö tola tatimbagö wondrönisi dödö ba wamalua amuata fohorö? Angeragö hadia nibeʼe Yehowa khöda irege tola teʼamoniʼö ita. Ibeʼe waʼauri Nononia niʼomasiʼö sebua böli yaʼia daʼö Yesu  Keriso! (1 Fetero 1:18, 19) Enaʼö lö raʼiö ita föna Yehowa, moguna böi taʼolifugö höli sebua böli nibeʼe Yesu khöda.

12, 13. (a) Hadia mbörö wa moguna simane famaigi Yehowa wamaigida owasa? (b) Hadia nitutunöda aefa daʼa?

¹² Hada hegöi si toʼölö mufalua si lö omasi Lowalangi. Tola manö laʼandrö khöda ira ösi nomoda, awöda wohalöwö, awöda ba zekola enaʼö fao ita khöra wamalua owasa. Hadia zanolo yaʼita enaʼö lö fao ita ba wamalua hada hegöi owasa si lö omasi Yehowa? Moguna tarorogö enaʼö lö raʼiö wangera-ngerada börö me taʼila hadia mbörö wa lö fao dödö Yehowa ba gowasa simane daʼö. Tola taʼalui ba publikasida ba tafasugi ba dödöda samösa hezo moroi mböröta wamalua owasa andrö. Ba ginötö taʼangerönusi ayati Zura Niʼamoniʼö si tobali dane-dane wa lö tafalua gowasa, tarasoi wa no tatörö lala ’somasi Zoʼaya’. (Efeso 5:10) Na tafaduhusi tödö Yehowa hegöi Taromalinia, lö taʼataʼufi sanandrösa ba niʼera-era niha khöda.​—Gamaedola 29:25.

¹³ Tatötöna enaʼö lö taböhöli wanörö lala sindruhu andrö irugi zi lö aetu. Hadia zanolo yaʼita enaʼö tahalö gangetula ba wanörö lala sindruhu? So tölu ngawalö zi tola tafalua.

14. (a) Hana wa tobali fanoloda na lö taböhöli wamahaʼö yaʼita ba Zura Niʼamoniʼö irege tola tahalö gangetula wa lö irai taröi zindruhu? (b) Hana wa moguna khöda waʼatua-tua, degu-tegu, hegöi faʼaboto ba dödö?

¹⁴ Si oföna, böi böhöli wamahaʼö yaʼugö ba Zura Niʼamoniʼö ba angeragö hadia zi no öfahaʼö yaʼugö. Na lö öböhöli wamahaʼö yaʼugö, itugu monönö waʼomasimö ba zindruhu ba öhalö gangetula wa lö irai öröi ia. Imane Gamaedola 23:23, ’öli zindruhu’, ba öli ’waʼatua-tua ba fangenanö ba faʼaboto ba dödö’. Lö obönö na ha taʼila zindruhu ba Zura Niʼamoniʼö. Moguna göi tafalua ia ba waʼaurida. Ba ginötö taʼodödögö ba wangokhögö faʼaboto ba dödö, moguna tafaogö hadia zi no tafahaʼö yaʼita faoma hadia ia zi no taʼila. Faʼatua-tua zanolo yaʼita enaʼö tafalua hadia zi no taʼila. Itaria zindruhu andre ibeʼe khöda degu-tegu ba iforomaʼö khöda hadia manö zinangea tabulöʼö. Moguna taʼanemaiʼö tatemaʼö ia, börö me iwaʼö Sura Niʼamoniʼö wa abölö ebua mbölinia moroi ba wirö.​—Gamaedola 8:10.

15. Hewisa wa tobali folumöʼöda zindruhu andrö simane böbö löwi?

¹⁵ Si dua, tahalö gangetula ba wamalua sindruhu ba waʼaurida si ero maʼökhö. Ifagölösi zindruhu andrö Sura  Niʼamoniʼö simane böbö löwi zaradadu. (Efeso 6:14) Ba götö Zura Niʼamoniʼö, na aro mböbö löwi zaradadu, tola tobali fanolo hegöi folumöʼö daʼö khönia na fasuwö. Na iheta, lö saʼae tobali fanolonia. Hewisa wa tola ilumöʼö ita sindruhu simane böbö löwi? Na ero inötö lö mamalö ahatö ita ba zindruhu, daʼö zondrorogö yaʼita moroi ba lala wangera-ngera si fasala ba itolo ita ba wangai angetula si sökhi. Na so gabula dödöda sebua mazui tedönisi dödöda ba wamalua sala, sindruhu moroi ba Zura Niʼamoniʼö zanolo yaʼita enaʼö tahalö gangetula ba wamalua satulö. Simane saradadu, hasambalö ifake mböbö löwi na fasuwö, moguna göi böi irai taröi zindruhu. Tatatugöi hadia no tafalua zindruhu moroi ba Zura Niʼamoniʼö ba waʼaurida. Moguna göi ibeʼe wödania saradadu ba löwi-löwinia. Datafaigi hewisa göi enaʼö tola tafalua zimane daʼö.

16. Hewisa wamahaʼö sindruhu tobali fanoloda enaʼö lö taböhöli wanörö lala sindruhu?

¹⁶ Si tölu, tafahaʼö niha böʼö ba zindruhu moroi ba Zura Niʼamoniʼö ndrege zi tola tafalua. Sura Niʼamoniʼö no amaedola wöda. Simane saradadu si sökhi, ihaogö igogohe wöda niʼohenia ba löwi-löwi. Simanö göi ita, moguna tahaogö tagogohe Daromali Lowalangi. (Efeso 6:17) Fefu ita tola tobali samahaʼö si sökhi, ”sangogunaʼö taromali sindruhu ba zi tefaudu”. (2 Timoteo 2:15) Ba ginötö taʼogunaʼö Zura Niʼamoniʼö ba wamahaʼö niha böʼö, tola itugu aboto ba dödöda ba itugu taʼomasiʼö zindruhu. Ba itugu tahalö gangetula wa lö mamalö tatörö lala sindruhu.

17. Hana wa ebua sibai mböli zindruhu andrö khöu?

¹⁷ Sindruhu andrö no buala moroi khö Yehowa. Daʼö mbörö wa tola taʼokhögö gamakhaita si sökhi khö Namada si so ba zorugo. Daʼö zabölö ebua böli niʼokhögöda. No oya zi no ifahaʼö Yehowa khöda, hizaʼi awena famobörönia daʼa! No ifabuʼu khöda wa ifahaʼö ita sagötö faʼara. Tobali, ameʼegö tödö zindruhu andrö simane mutiara sebua böli. Böi böhöli ba ’wowöli sindruhu ba böi fuli amawa’ ia. Aefa daʼö, simane Dawido, moguna öfalua zi no öfabuʼu khö Yehowa, ”Utörö lala zindruhu andrö khöu.”​—Zinunö 86:11, NW.