1-2. (a) Moloʼö Efeso 6:16, hana wa moguna taʼokhögö ”mbaluse sebua yaʼia daʼö famati”? (b) Hadia manö wanofu-nofu nitutunöda?

HADIA öʼokhögö ”mbaluse sebua yaʼia daʼö famati”? (Baso Efeso 6:16.) Tatu manö. Simane baluse si tola molumöʼö boto zi samösa saradadu. Famati göi zolumöʼö yaʼugö moroi ba ngawalö zi lö sökhi si so ba gulidanö daʼa. Simane amuata fohorö, faʼalösökhi, hegöi tanö böʼönia si lö tefaudu ba goi-goi Zura Niʼamoniʼö.

² Börö me so ita ba ”ngaluo safuria”, lö tebulö tetandraigö wamatida. (2 Tim. 3:1) Hewisa wamaresomö hadia aro mbaluse wamati niʼokhögömö? Hadia zinangea öfalua enaʼö aro wololohemö baluse wamati? Tatutunö dania wanema linia.

3. Hadia nifalua ndra saradadu ba mbalusera, ba hadia mbörö?

³ Ba götö Zura Niʼamoniʼö, baluse niʼogunaʼö ndra saradadu si toʼölönia mubalugö faoma uli gurifö. Laguleʼö wanikha ba mbalusera enaʼö lö alio tekiko gulinia ba lö mohowu ziʼölinia. Na so zi tekiko ba mbalusenia, moguna ihaogö daʼö zi samösa saradadu enaʼö tefaʼanö ia ba wasuwöta. Moroi ba duma-duma daʼa, hadia zinangea öfalua ba wamati niʼokhögömö?

4. Hana wa moguna öfareso mbaluse wamati niʼokhögömö, ba hewisa lalania?

⁴ Börö me yaʼita niha Keriso, no so ita ba wasuwöta wamati, sambua moroi ba gotalua nududa, yaʼia daʼö malaʼika si lö sökhi. Simane saradadu ba götö föna, moguna göi öfareso ba örorogö mbaluse wamatimö enaʼö tefaʼanö ndraʼugö ba wasuwöta. (Ef. 6:10-12) Lö hadöi niha böʼö si tola mosalahini yaʼugö wamalua daʼö. Hana wa tola faduhu dödömö wa hasambalö aro wamatimö ba ginötö  tetandraigö? Si oföna, moguna öʼandrö wanolo moroi khö Yehowa ba wangandrö. Aefa daʼö, ogunaʼö Daromali Lowalangi ba wamareso, hadia no tefaudu ba zomasi Lowalangi wamati niʼokhögömö. (Heb. 4:12) Imane Sura Niʼamoniʼö, ”Döna-döna khö Yehowa, moroi siʼaikö ba dödöu, ba böi abeʼeʼö dödöu ba waʼonekheu.” (Gamd. 3:5, 6) Angeragö hadia zalua ba waʼaurimö barö-barö daʼa ba hadia nifaluamö. Duma-dumania, hadia no irai ötaögö gabula dödö sebua sanandrösa ba gefe? Me ötandraigö ba wangasiwaisi abula dödö daʼö, hadia itörö tödömö mbuʼusa li Yehowa nisura ba Heberaiʼo 13:5? Imane ba ayati daʼö, ”Lö manö uröi ndraʼugö ba lö uʼositengagö ndraʼugö.” Hadia faduhu dödömö ba mbuʼusa li daʼö wa hasambalö itolo ndraʼugö Yehowa? Na yaʼia, daʼö zangoromaʼö wa lö tebulö örorogö mbaluse wamatimö.

5. Hadia zi tola öʼila ba ginötö öfareso wamatimö?

⁵ Ba ginötö öfareso wamatimö, tola manö tokea ndraʼugö börö me öʼila wa so zoʼamböta yaʼugö si lö irai öʼila ba zilalö. Duma-dumania, tola manö örasoi wa awuwu wamatimö börö me talafo aombö dödömö, falimosa, mazui faʼide-ide dödö. Na daʼa nirasoimö, hewisa wondrorogömö famatimö enaʼö lö itugu awuwu?

6. Hadia manö waʼaombö dödö si lö fasala?

⁶ Lö fasala na so waʼaombö dödö. Duma-dumania, tola manö aombö dödöda na tabeʼe afatö dödö Yehowa hegöi Yesu. (1 Kor. 7:32) Na tafalua horö sebua, tola manö aombö dödöda wa tebai saʼae taʼokhögö gamakhaita si sökhi khö Lowalangi. (Zin. 38:19) Tola manö aombö dödöda na tabeʼe afatö dödö woʼomoda. Tola göi aombö dödöda na lö tebönökhi zoguna ba nösi nomoda mazui tebai tatolo ndra talifusöda si sara lala wamati.​—1 Kor. 7:33; 2 Kor. 11:28.

7. Moloʼö Gamaedola 29:25, hana wa lö moguna ataʼu ita ba niha?

⁷ Hizaʼi, tola awuwu wamatida na talafo aombö dödöda. Duma-dumania, tola manö lö tebulö so khöda waʼaombö dödö na lö tebönökhi zoguna khöda hegöi nukha niʼogunaʼöda. (Mat. 6:31, 32) Börö me daʼö manö niʼera-erada, tola manö taʼosambuaʼö dödöda ba wangalui harato irege ibörögö taʼomasiʼö gefe. Lua-luania, tola awuwu wamatida khö Yehowa ba tekiko gamakhaitada khönia. (Mrk. 4:19; 1 Tim. 6:10) Mazui, tola manö talafo taʼangeragö hewisa niha böʼö wamaigi yaʼita. Lua-luania, ataʼu ita na laʼoʼaya mazui lafakao ita niha si fatuwu khöda, irege itugu ebua waʼataʼuda ba niha moroi ba wangataʼufida Yehowa. Enaʼö lö alua daʼö, moguna lö taböhöli wangandrö famati hegöi faʼabarani ba wolawa faʼataʼuda ba niha.​—Baso Gamaedola 29:25; Luk. 17:5.

8. Hadia zinangea tafalua na so zamatunö khöda sanandrösa ba walimosa?

⁸ Afökha andrö ”ama zofaya”, ba iʼogunaʼö niha si so barö wamatörönia ba wamaʼema falimosa sanandrösa khö Yehowa hegöi khö ndra talifusöda. (Yoh. 8:44) Duma-dumania, niha sondröi sindruhu laʼogunaʼö situs web, TV, hegöi tanö böʼönia ba wamaʼema falimosa, ba laböbögö zi lö duhu sanandrösa ba organisasi Yehowa. Falimosa daʼö, no sambua ba gotalua ’wana soʼalito’ moroi khö Zatana. (Ef. 6:16) Hadia zinangea tafalua na so niha zamatunö khöda falimosa daʼö? Tatu manö lö omasi ita tafondrondrongo! Hadia mbörö? Börö me mamati ita khö Yehowa ba tafaduhusi tödö ndra talifusöda. Ba lö omasi ita fahuhuo ba niha si no mondröi sindruhu.  Lö omasi ita fabuʼa khöra ba ngawalö zalua mazui gofu hadia ia mbörö, hewaʼae na adöni sibai dödöda ba niwaʼöra.

9. Na so khöda waʼide-ide dödö, hadia lua-luania khöda?

⁹ Tola awuwu wamatida ibeʼe faʼide-ide dödö. Itaria ide-ide dödöda börö me tataögö gabula dödö. Sindruhu sa wa tebai taʼosilöʼögö gabula dödö daʼö, hizaʼi tebai göi talafo taʼangeragö sibai. Hadia mbörö? Börö me tola manö taʼolifugö fefu zi sökhi si no ifabuʼu khöda Yehowa. (Fam. 21:3, 4) Itugu ara, tola awuwu wamatida ibeʼe faʼide-ide dödö andrö ba tabato wamosumange Yehowa. (Gamd. 24:10) Sindruhunia sa, tola taʼasiwai daʼö.

10. Hadia wamahaʼö si tola tahalö ba nösi zura zi samösa dalifusöda ira alawe?

¹⁰ Nehegö hewisa zi samösa dalifusöda ira alawe ba Amerika Serikat ba wondrorogö enaʼö aro wamatinia, ba irorogö göi woʼomonia si göna fökhö sabölö-bölö. Imane ba zura nifaʼoheʼönia ba gödo sebua, ”Börö me abua zalua khöma, itaria fawuka wangera-ngerama ba so khöma waʼide-ide dödö. Hizaʼi, lö tebulö aro wanötönama. Uʼandrö sibai saohagölö khö Yehowa me no ibeʼe zi tobali fondrara dödöma ba sangaroʼö famatima. Moguna sibai khöma mene-mene hegöi fondrara dödö andrö. Daʼö zanolo yaʼaga irege lö tebulö mafosumange Yehowa, ba anau gölöma ba wanaögö abula dödö niʼogunaʼö Zatana enaʼö awuwu wamatima.” Moroi ba wehede dalifusöda andre, tafahaʼö ita wa tola tataögö waʼide-ide dödö! Hewisa lalania? Törö tödömö, wa abula dödö nitaögömö no moroi khö Zatana. Yafaduhu dödömö wa hasambalö irara dödömö Yehowa. Ba haogö wangogunaʼö ö ba wamati si no ihenaigö.

11. Hadia manö wanofu-nofu sinangea taʼangeragö ba wamareso famatida?

¹¹ Hadia no aro wamatimö? Angeragö wanofu-nofu daʼa: Ba zi hauga waŵa safuria andre, hadia lö talafo öʼokhögö waʼaombö-aombö dödö? Hadia ötimbagö ba wamondrongo niha si no mondröi sindruhu mazui fadaʼawa ndraʼugö khöra sanandrösa ba walimosa nifaʼemara? Hadia tola öʼasiwai waʼide-ide dödö? Na fanema li moroi ba zi  tölu wanofu andrö yaʼia daʼö noa, daʼa zangoromaʼö wa no örorogö wamatimö. Hizaʼi, so fakake tanö böʼö niʼogunaʼö Zatana ba wolawa yaʼita, andrö moguna mangelama ita. Datatutunö sambua fakake niʼogunaʼönia.

12. Hadia lua-luania khöda na taʼomasiʼö harato?

¹² Faʼomasi ba harato tola möi fangawuwu wamatida irege lö teʼosambuaʼö dödöda ba wamosumange Yehowa. Imane sinenge sotöi Faulo, ”Lö hadöi saradadu sarörö ba wangalui kefe, börö me omasi ia iʼomusoiʼö dödö niha samasuraʼö töinia.” (2 Tim. 2:4) Me föna, lö latehegö khö ndra saradadu Romawi ba wamalua halöwö tanö böʼö. Hadia lua-luania na so zaradadu si lö moloʼö amakhoita daʼö?

13. Hana wa tebai mamawa mazui mogale zi samösa saradadu?

¹³ Khalaigö zalua andre. Ba zihulö wongi, so ngawawa zaradadu samahaʼö yaʼira ba wangogunaʼö föda, hizaʼi so samösa nawöra zi lö tohare. Saradadu si lö tohare daʼö, no arörö ia mamawa ö ba fasa. Ba zi tanö owinia, lafareso wödara ira saradadu ba ladali. Hizaʼi saradadu samawa no mege, arörö ia ba wamaʼanö ö sinangea ifamawa mahemolu. Aefa daʼö me sihulö wonginia, ba zi lö ladöna-döna iʼanemaiʼö tohare nudu ba wanuwö yaʼira. Moloʼö yaʼugö, haniha zaradadu si no tefaʼanö ba wasuwöta ba sangomusoiʼö dödö gafalonia? Na fao ndraʼugö ba wasuwöta daʼö, haniha zaradadu somasiʼö tobali awömö, si no mamaʼanö yaʼia mazui samalua halöwö tanö böʼö?

14. Yaʼita saradadu Keriso, hadia zabölö moguna ba waʼaurida?

¹⁴ Fagölö ita khö ndra saradadu si no tefaʼanö no mege. Sabölö moguna khöda yaʼia daʼö taʼomusoiʼö dödö Gafaloda, Yehowa hegöi Yesu. Ba wamaigida, abölö ebua mbölinia moroi ba ngawalö hadia ia nibeʼe gulidanö Zatana. Moguna tatatugöi enaʼö lö ambö ginötö hegöi faʼabölö nibeʼeda ba wangai halöwö khö Yehowa. Moguna göi lö tebulö tarorogö mbaluse wamatida hegöi fakake ba wamati tanö böʼö niʼokhögöda.

15. Hadia wamangelama nibeʼe Waulo, ba hadia mbörö?

¹⁵ Moguna mangelama ita! Hadia mbörö?  Ifangelama ita Faulo wa ”dozi sedöna mangebuaʼö anaʼa” hasambalö ’elungu wamatinia’. (1 Tim. 6:9, 10) Ngawua wehede ’elungu wamatinia’ zangoromaʼö wa tola mangoloi dödöda na talafo taʼosambuaʼö dödöda ba harato si lö moguna khöda. Tola ibörötaigö taʼokhögö ’wangisö faya-faya si möi famaʼala’. Moguna tatörö tödöda wa iʼogunaʼö Satana gisö-isö dödö simane daʼö, si tobali fakakenia enaʼö awuwu wamatida.

16. Hadia manö wanofu-nofu sinangea taʼangeragö na tatörö tödöda waö-waö nisura ba Mareko 10:17-22?

¹⁶ Tola manö sagu khöda ba wowöli gama-gama soya börö me so gefeda. Na taʼöli gama-gama somasi ita, hizaʼi ambö taʼogunaʼö, hadia fasala daʼö? Tola manö löʼö. Hizaʼi angeragö wanofu-nofu daʼa: Hewaʼae na sagu khöda ba wowöli yaʼia, hadia sagu khöda ba wangogunaʼö hegöi ba wondrorogö gama-gama daʼö? Aefa daʼö, hadia abölö taʼomasiʼö gama-gama daʼö? Hadia faʼomasida ba gama-gama daʼö, tola idönisi ita ba wamalua simane nifalua zi samösa ira matua sanimbagö wogaoni nibeʼe Yesu enaʼö oya zi tola ifalua ba wanuriaigö? (Baso Mareko 10:17-22.) Moroi na tahorigö ginötöda ba wangalui harato, abölö baga na taʼöna-önaiʼö waʼaurida ba taʼogunaʼö ginötö hegöi faʼabölöda ba wamalua ohitö dödö Lowalangi!

17. Hadia zi tebai taʼolifugö?

¹⁷ Böi olifu ndraʼugö wa no so ita ba wasuwö ta ba wamati, ba moguna tefaʼanö ita ero maʼökhö. (Fam. 12:17) Yaʼita samösa zinangea mangaroʼö wololohe baluse wamatida. Tebai lasalahini ita ira talifusöda tanö böʼö ba wamalua yaʼia.

18. Hana wa laforege sibai ira saradadu me götö föna ba wololohe balusera?

¹⁸ Ba götö föna, na so zaradadu sangokhögö faʼabarani ba wasuwöta, hasambalö labeʼe khönia döi si sökhi. Hizaʼi na mangawuli ia ba lö iʼohe mbalusenia, sindruhu-ndruhu irasoi waʼaila. Imane sejarawan Romawi sotöi Tacitus, ”Na so zaradadu sondröi mbalusenia, no tobali fangaila sebua daʼö khönia.” Daʼa mbörö wa laforege sibai ira saradadu ba wololohe balusera.

19. Hewisa enaʼö aro wololoheda mbaluse wamatida?

¹⁹ Na owölö-ölö ita weʼamöi ba gangowuloa ba tafatunö ba niha boʼö sanandrösa ba döi Yehowa hegöi Famatörönia, no taʼaroʼö wololohe baluse wamatida. (Heb. 10:23-25) Aefa daʼö, tabaso Daromali Lowalangi ero maʼökhö ba mangandrö khö Yehowa, enaʼö itolo ita ba wamalua hadia niwaʼönia. (2 Tim. 3:16, 17) Na tafalua daʼö, gofu hadia ia fakake niʼogunaʼö Zatana ba wolawa yaʼita, tebai iʼasogö khöda wangabu dödö sagötö faʼara. (Yes. 54:17) Ilumöʼö ita ’baluse wamatida’. Hasambalö taʼokhögö waʼabarani ba möna ita ba wasuwöta wamati ero maʼökhö, fao khö ndra talifusöda. Ba sabölö tohudenia, taʼokhögö döi si sökhi wefao khö Yesu ba ginötö möna ia ba wolawa Satana hegöi ira soloʼö khönia.​—Fam. 17:14; 20:10.