1-2. Hana wa sinangea ba niha Keriso na omasi ira ba wamahaʼö yaʼira ba mbuku 3 Moze?

IBEʼE Faulo wamasugi ba dödö khö Dimoteo awönia si bohou ebua wa ”fefu nösi Mbuku Niʼamoniʼö andrö ba eheha Lowalangi zameʼe ba dödö niha, ba moguna ia”. (2 Tim. 3:16) Sambua ba gotalua Mbuku Niʼamoniʼö yaʼia daʼö buku 3 Moze. Hewisa moloʼö yaʼugö mbuku daʼö? So zangumaʼö wa ösinia yaʼia daʼö ngawalö gamakhoita si lö moguna khöda iadaʼa. Hizaʼi, tenga simane daʼö lala wangera-ngera niha Keriso.

² Musura mbuku 3 Moze töra 3.500 fakhe ba zilalö. Hewaʼae simanö, itatugöi Yehowa enaʼö lö tebulö so mbuku daʼö irugi iadaʼa ”ba wamahaʼö yaʼita”. (Rom. 15:4) Buku daʼa zanolo yaʼita enaʼö aboto ba dödöda hadia niʼangeragö hegöi nirasoi Yehowa. Daʼö mbörö wa sinangea na omasi ita ba wamahaʼö yaʼita ba mbuku andre. Sindruhunia, oya wamahaʼö si tola tahalö moroi ba mbuku daʼa. Datatutunö öfa ba gotaluania.

3. Ba Ngaluo Wangatulö, hana wa so gurifö nibeʼe tobali sumange?

³ Famahaʼö si oföna: Moguna taʼomusoiʼö dödö Yehowa enaʼö itema wamosumangeda. Ero röfi, owulo ndraono Gizaraʼeli ba Ngaluo Wangatulö. Ba ngaluo daʼö, labeʼe gurifö ira ere sebua si tobali sumange. Sumange nibeʼera andrö zamasugi ba dödö ndraono Gizaraʼeli wa moguna muʼefaʼö ira moroi ba horö. Ba ngaluo daʼö, moguna iʼohe ere sebua ndro  gurifö si no mubeʼe tobali sumange ba Nahia Wondrege Niʼamoniʼö enaʼö tola teʼefaʼö horöra. Hizaʼi fatua lö ifalua daʼö, so danö böʼö zinangea ifalua ba moguna sibai.

4. Simane nitutunö ba 3 Moze 16:12,13, hadia nifalua gere sebua na möi ia ba Nahia Wondrege Niʼamoniʼö si oföna sibai ba Ngaluo Wangatulö? (Faigi gambara ba guli majalah.)

⁴ Baso 3 Moze 16:12, 13. Khalaigö hadia zalua ba Ngaluo Wangatulö. Ba ngaluo daʼö, tölu kali möi gere sebua ba Nahia Wondrege Niʼamoniʼö si so ba nose Lowalangi. Na möi ia si oföna sibai, so ba dangania mako nahia wanunu kumöyö, ba ba dangania si sambua so mako anaʼa si so mbo galitö. Tebato ia föna mbaʼa-baʼa sombalugö lala weʼamöi ba Nahia Wondrege Niʼamoniʼö. Si fao famosumange möi ia bakha ba Nahia Wondrege Niʼamoniʼö ba mozizio ia föna dawöla amabuʼula. Hulö no mozizio ia föna Lowalangi Yehowa! Aefa daʼö, ihaogö-haogö ba wanunu kumöyö andrö yawa ba dete mbo galitö, ba afönu nahia daʼö hua somuhua. * Lö ara aefa daʼö, ifuli zui möi ia bakha ba Nahia Wondrege Niʼamoniʼö ba iʼohe ndro nibeʼe tobali sumange fangefa horö. Hizaʼi na tanehegö, oföna itunu gumöyö fatua lö ibeʼe ndro si tobali sumange fangefa horö.

5. Hadia wamahaʼö si tola tahalö ba wangogunaʼö kumöyö ba Ngaluo Wangatulö?

⁵ Hadia wamahaʼö si tola tahalö ba wangogunaʼö kumöyö ba Ngaluo Wangatulö? Ba Zura Niʼamoniʼö, ifagölösi wangandrö nono mbanua Yehowa si lö faröi simane sumange somuhua. (Zin. 141:2; Fam. 5:8) Törö tödömö wa si fao famosumange, iʼohe föna Yehowa zumange somuhua andrö ere sebua. Simanö göi, na mangandrö ita khö Yehowa tafalua daʼö si fao famosumange. Ahöli-höli sibai dödöda ba nifaluania. taʼandrö sibai saohagölö börö me itehegö khöda Somböi banua si yawa awö danö ba wangokhögö fahuwusa si sökhi khönia, simane iraono khö namania. (Yak. 4:8) Omasi ia na tobali ita si fahuwu khönia! (Zin. 25:14) Taʼameʼegö tödö sibai döi si sökhi andrö irege lö omasi ita na afatö dödönia.

6. Hadia wamahaʼö si tola tahalö khö gere sebua sanunu kumöyö fatua lö ibeʼe zumange?

⁶ Törö tödömö wa moguna itunu gumöyö ere sebua, fatua lö ibeʼe zumange. Na ifalua daʼö, faduhu dödönia wa tola iʼomusoiʼö dödö Lowalangi ba ginötö ibeʼe zumange. Hadia wamahaʼönia? Me so Yesu ba gulidanö so zi tohude nifaluania fatua lö ibeʼe nosonia tobali sumange. Abölö tohude daʼö moroi ba wangöhöli niha gulidanö. Hadia daʼö? Moguna lö faröi ia khö Yehowa sagötö faʼaurinia ba gulidanö enaʼö tola itema Yehowa zumange nibeʼenia. Me ifalua daʼö Yesu, no iforomaʼö hawaʼasökhi ba woloʼö goi-goi Yehowa. No iforomaʼö göi Yesu wa ha Amania zinangea mamatörö, ba atulö lala wamatörönia.

7. Sagötö waʼauri Yesu, hana wa lö tebulö iʼomusoiʼö dödö Namania?

⁷ Sagötö weʼasonia ba gulidanö oya wanandraigö hegöi fangabu dödö nitaögö Yesu. Aboto göi ba dödönia wa hasambalö itörö waʼamate ba lala safökhö. Hewaʼae simanö, moʼahonoa Yesu ba woloʼö somasi Yehowa. Ba lö tebulö iforomaʼö wa ha lala wamatörö Yehowa zabölö sökhi. (Fil. 2:8) Me itaögö wamakao, mangandrö Yesu ”si fao taŵa hörö ba feʼao sabölö-bölö”. (Heb. 5:7) Fangandrö Yesu soroi ba dödö zangoromaʼö waʼalöfaröinia khö Yehowa. Fangandrö simane daʼö zamarou tödönia ba  wangai angetula enaʼö lö tebulö iʼoʼö zomasi Namania. Fangandrö Yesu andrö, hulö hua gumöyö somuhua ba wamaigi Yehowa. Sagötö faʼaurinia, lö tebulö iʼomusoiʼö dödö Namania ba ifaduhuʼö wa ha Yehowa zinangea mamatörö.

8. Hewisa woloʼöda duma-duma Yesu?

⁸ Tola taʼoʼö duma-duma Yesu na taforege ba woloʼö somasi Yehowa ba lö faröi ita khönia. Na tataögö gabula dödö, mangandrö ita soroi ba dödö ba wangandrö fanolo moroi khö Yehowa, börö me omasi ita wangai angetula si tola mangomusoiʼö tödönia. Na tafalua daʼö, no tatuhini lala Yehowa ba wamatörö. Aboto ba dödöda wa lö itema wangandröda Yehowa na tafalua ngawalö zi fatuwu khönia. Hizaʼi, na tafalua zomasi ia, tola faduhu dödöda wa fangandrö nifaluada hulö hua gumöyö somuhua khö Yehowa. Faduhu göi dödöda wa no taʼomusoiʼö dödönia börö me moloʼö ba lö faröi ita khönia.​—Gamd. 27:11.

9. Hana wa moguna labeʼe zumange fangorifi iraono Gizaraʼeli?

⁹ Famahaʼö si dua: Tafosumange Yehowa börö me taʼandrö saohagölö khönia. Tola tafahaʼö ita ba daʼa, na tatutunö sanandrösa ba zumange fangorifi nibeʼe ndraono Gizaraeli. * Ba mbuku 3 Moze taʼila, wa tola ibeʼe zumange fangorifi zi samösa iraono Gizaraʼeli ba ’wangandrö saohagölö’. (3 Moz. 7:11-13, 16-18) Ibeʼe zumange daʼö tenga me no sinangea ifalua, hizaʼi börö me  omasi ia ba wamalua daʼö. Daʼa zumange soroi ba dödö nibeʼe zi samösa niha börö me iʼomasiʼö Lowalanginia, Yehowa. Niha sameʼe sumange, ösi nomonia, hegöi ira ere, fao ira ba wemanga urifö si tobali sumange. Hizaʼi, so ösa nösi gurifö daʼö nibeʼe khö Yehowa. Hadia manö daʼö?

10. Hadia waʼafagölö zumange fangorifi nitutunö ba 3 Moze 3:6, 12, 14-16 ba halöwö nifalua Yesu khö Yehowa?

¹⁰ Famahaʼö si tölu: Börö me taʼomasiʼö Yehowa, tabeʼe khönia wondrege zi sökhi. Ba wamaigi Yehowa, tawö andrö no sumange wondrege zi sökhi ba nösi gurifö. So nasa moroi ba nösi tanö böʼö nibaliʼö sumange sabölö sökhi, yaʼia daʼö bua. (Baso 3 Moze 3:6, 12, 14-16.) Daʼö mbörö wa omuso sibai dödö Yehowa ba ndraono Gizaraʼeli, na aoha gölöra ba wameʼe tawö hegöi ösi gurifö tanö böʼö si tobali sumange. Iraono Gizaraʼeli sameʼe sumange simane daʼö, no laforomaʼö wa omasi labeʼe wondrege zi sökhi khö Yehowa. Simane daʼö göi Yesu, si fao faʼoböwö ibeʼe wondrege zi sökhi khö Yehowa. Börö me iʼomasiʼö Yehowa, ifalua fefu zomasi namania soroi ba dödö. (Yoh. 14:31) Omasi sibai Yesu ba wamalua ohitö dödö Yehowa, ba omasi sibai ia ba woloʼö oroisa Lowalangi. (Zin. 40:9) Tatu omuso sibai dödö Yehowa me ifalua daʼö Yesu soroi ba dödö!

11. Hadia waʼafagölö zumange fangorifi ba halöwö nifaluada, ba hana wa möi fondrara dödöda daʼa?

¹¹ Halöwö nifaluada khö Yehowa hulö zumange fagorifi, si tobali lala ba wangoromaʼö hewisa dödöda khö Yehowa. Tabeʼe khö Yehowa wondrege zi sökhi ba tafalua daʼö börö me taʼomasiʼö ia soroi ba dödö. Tatu omuso sibai dödö Yehowa me iʼila zuta niha solulu faʼaurira ba wamosumange yaʼia börö me laʼomasiʼö ia hegöi goi-goinia! Tenga ha iʼila ba iʼameʼegö tödö hadia nifaluada, hizaʼi inehegö hadia mbörö wa tafalua daʼö. Tatu möi fondrara dödöda daʼa. Duma-dumania, na no atua ndraʼugö ba lö oya saʼae zi tola öfalua simane nitötönamö, tola faduhu dödömö wa aboto ba dödö Yehowa hadia zalua khömö. Tola manö örasoi wa lö oya zi tola öfalua khö Yehowa, hizaʼi aboto ba dödö Yehowa hezo ndrege zi tola öfalua börö me öʼomasiʼö ia. Tatu omasi itema zumange nibeʼemö, na no öbeʼe wondrege zi sökhi.

12. Hewisa dödö Yehowa ba ginötö itema zumange fangorifi, ba hana wa möi fangabölöʼöda daʼö?

¹² Hadia wamahaʼö si tola tahalö moroi ba zumange fangorifi? Na mutunu zabölö sökhi ba nösi gurifö si tobali sumange, tola möi fangomosoiʼö dödö Yehowa zimbonia si möi miyawa. Tatu omuso göi dödönia me no öfosumange ia si fao faʼaohagölö ba soroi ba dödö. (Kol. 3:23) Khalaigö hawaʼomuso dödö Yehowa na iʼila waʼalöfaröimö khönia. Gofu hawaʼoya zi tola öfalua khö Yehowa, hasambalö iʼameʼegö tödö nifaluamö ba lö irai iʼolifugö daʼö sagötö faʼara.​—Mat. 6:20; Heb. 6:10.

13. Moloʼö 3 Moze 9:23,24 hewisa wangoromaʼö Yehowa wa ifahowuʼö ndra ere sawena mufataro?

¹³ Famahaʼö si öfa: Ifahowuʼö organisasinia Yehowa si so ba gulidanö. Nehegö hadia zalua me döfi 1512 SM me mufasindro nose Lowalangi ba gahe Hili Zinaʼi. (2 Moz. 40:17) Me luo daʼö, Moze zondröniaʼö owasa ba wamataro Aʼaroni hegöi iraononia tobali ere. Owulo ndraono Gizaraʼeli ba wamaigi ndra ere andrö ba wameʼe sumangera si oföna. (3 Moz. 9:1-5) Hewisa wangoromaʼö Yehowa wa ifahowuʼö ndra ere sawena mufataro andrö? Ba ginötö lafahowuʼö ndraono Gizaraʼeli ira Aʼaroni hegöi Moze, iʼasogö galitö Yehowa ba wotunu  fefu zumange si so ba naha wameʼe sumange.​—Baso 3 Moze 9:23, 24.

14. Hana wa moguna tafahaʼö ita ba lala wotuhini Yehowa ndra ere ba Gizaraʼeli?

¹⁴ Hadia niforomaʼö Yehowa me iʼasogö galitö daʼö? Iforomaʼö Yehowa wa ituhini Gaʼaroni hegöi iraononia si no ifataro tobali ere. Me laʼila iraono Gizaraʼeli wa ituhini ndra ere andrö Yehowa, aboto ba dödöra wa moguna göi latuhini ndra ere. Hadia so gamakhaita zalua andrö khöda? So. Ira ere andrö no tobali amaedola ndra ere sabölö ebua. Yesu no Ere Sebua salawa, ba so 144.000 niha si fao khö Yesu si tobali ere hegöi razo ba zorugo.​—Heb. 4:14; 8:3-5; 10:1.

15-16. Hewisa wangoromaʼö Yehowa wa ituhini zawuyu si lö faröi ba satua-tua?

¹⁵ Me döfi 1919, ituyu Yesu ngawawa side-ide si no mubayoini si tobali ”sawuyu si lö faröi ba satua-tua”. Sawuyu si lö faröi zondröniaʼö halöwö fanuriaigö ba labeʼe ’gö ba ginötö si tefaudu’ khö ndra soloʼö Keriso. (Mat. 24:45) Hadia no taʼila samösa wa ituhini Lowalangi zawuyu si lö faröi ba satua-tua?

¹⁶ lforege Satana hegöi si fao khönia ba wombatogö halöwö nifalua ndra sawuyu si lö faröi. Na lö fanolo moroi khö Yehowa, tebai lafalua halöwöra ira sawuyu si lö faröi. Hewaʼae lataögö dombua wasuwöta sebua ba gulidanö, faʼambö-ambö soguna, fanandraigö si lö irai tebato, hegöi falöʼatulö, lö irai laböhöli ira sawuyu si lö faröi ba wamaʼanö gö ba wamati khö ndra soloʼö Keriso ba zi sagörö ulidanö. Khalaigö atö, oya sibai gö ba wamati niʼogunaʼöda irugi iadaʼa. No tefaʼanö publikasida ba zi töra 900 ngawalö li, ba fefu daʼö lö muʼandrö mböli! Daʼa dandra sangoromaʼö  wa ituhini ndra sawuyu si lö faröi Lowalangi. Baero daʼö, so dandra tanö böʼö sangoromaʼö fanuhini moroi khö Lowalangi, oroma daʼa moroi ba halöwö fanuriaigö nifaluada. Iadaʼa, sindruhu-ndruhu no mufaʼema duria somuso dödö ”ba zi sagörö ulidanö misa”. (Mat. 24:14) Andrö wa faduhu dödöda wa sindruhu-ndruhu ibeʼe wanuturu lala ba ifahowuʼö organisasinia Yehowa irugi iadaʼa.

17. Hewisa wangoromaʼöda wa tatuhini organisasi niʼogunaʼö Yehowa?

¹⁷ Angeragö wanofu daʼa: ’Hadia uʼandrö saohagölö börö me no fao ndraʼo ba organisasi Yehowa?’ Ba götö Moze, iʼekhugö Yehowa galitö moroi ba mbanua si yawa, ba wangoromaʼö wa fao dödönia khö ndra ere si no mufataro. Ba götöda iadaʼa, no iforomaʼö khöda Yehowa wa ha organisasi daʼa niʼogunaʼönia. Tatu taʼandrö sibai saohagölö. (1 Tes. 5:18, 19) Hewisa lalada ba wotuhini organisasi niʼogunaʼö Yehowa? Tola tafalua ia na taʼoʼö wanuturu lala si teʼodane-dane ba Zura Niʼamoniʼö si no lafaʼanö ba publikasida, angowuloa hegöi ba kebaktian. Tola göi tafalua daʼö na owölö-ölö ita manuriaigö hegöi ba wamahaʼö.​—1 Kor. 15:58.

18. Hadia gangetula nihalöda?

¹⁸ Datahalö gangetula ba wamalua hadia zi no tafahaʼö yaʼita moroi ba mbuku 3 Moze. Omasi ita fefu na itema Yehowa zumange nibeʼeda. Omasi ita ba wamosumange yaʼia börö me taʼandrö saohagölö khönia. Lö tebulö ita ba wameʼe zabölö sökhi khö Yehowa börö me taʼomasiʼö ia soroi ba dödö. Ba sindruhu-ndruhu tatuhini organisasi niʼogunaʼönia iadaʼa. Na tafalua fefu daʼö, no taforomaʼö khö Yehowa wa taʼameʼegö tödö döi si sökhi ba wamosumange yaʼia tobali Samaduhuʼö khönia!