BA GÖTÖ Zura Niʼamoniʼö, halöwö zi samösa sondrorogö yaʼia daʼö ba wondrorogö ösi nomo mazui tanö hegöi tomosa niʼokhögö niha böʼö. Ngawua wehede ”zondrorogö” nifoʼeluha ba li Heberaiʼo hegöi li Yunani, itaria eluahania yaʼia daʼö samösa sondröniaʼö mazui högö yomo ba nomo.

Me tobali sawuyu ba danö Miserai Yosefo ono Yakobo, tobali ia sondrorogö omo zokhö yaʼia. Tenga ha daʼö nifalua zokhö yaʼia khö Yosefo, hizaʼi ”ibeʼe manö ba danga Yosefo gombayasö dangania fefu”. (1 Moz. 39:2-6) Ba gafuriata, me tobali Yosefo samatörö ba Misirai, ifataro göi samösa niha tobali sondrorogö omonia.​—1 Moz. 44:4.

Ba götö Yesu, si toʼölönia toröi zokhö kabu ba mbanua böʼö, fandröndröu moroi ba kabura. Andrö, lafataro zondrorogö ba wamaigi-maigi halöwö nifalua ndra sohalöwö ba kabu ero maʼökhö.

Haniha zinangea tobali sondrorogö? Imane samösa sanura moroi ba Roma me abad siföföna sotöi Columella, samösa sawuyu nifataro tobali sondrorogö mazui sondröniaʼö enaʼö niha ”si no so faʼatua-tua”. Moguna iʼila ”hadia no lahaogö ba wamalua halöwora andro ira sohalöwö, hizaʼi tebai amuʼi ia khöra”. Imane nasa Columella, ”Sabölö moguna, böi talafo iʼodaligö waʼonekhenia ba moguna ifahaʼö ia ba ngawalö zi bohou.”

Ba Daromali Lowalangi, iʼogunaʼö duma-duma zi samösa sondrorogö hegöi halöwönia ba woʼamaedolagö halöwö nifalua ba mbanua niha Keriso. Duma-dumania, ifarou dödö niha Keriso Fetero enaʼö laʼogunaʼö waʼatua-tua nitemara moroi khö Lowalangi ”tobali sohalöwö si sökhi moroi ba waʼasökhi dödö sebua khö Lowalangi”.​—1 Fet. 4:10.

Ba gamaedola nisura ba Luka 16:1-8, iʼogunaʼö göi Yesu duma-duma zi samösa sondrorogö. Baero daʼö, ba wamaʼeleʼö sanandrösa ba dandra waʼatoharenia tobali Razo, iʼaroʼö dödö ndra nifahaʼönia Yesu wa ifataro ’zawuyu si lö faröi ba satua-tua’, mazui ’sondorogö si lö faröi’. Halöwö si oföna nifaluara yaʼia daʼö, lö tebulö laʼasogö zoguna ba wamati khö ndra soloʼö Keriso sagötö ngaluo safuria. (Mat. 24:45-47; Luk. 12:42) Sondrorogö si lö faröi zamaʼanö ngawalö publikasi sangaʼaroʼö famatida, ba tehenaigö ia ba zi sagörö ulidanö. Taʼandrö sibai saohagölö me tola tatema publikasi-publikasi simane daʼö.