1. Moloʼö Mataiʼo 7:13, 14, hana wa tola tawaʼö wa no amaedola zamalua fofanö ita?

NO AMAEDOLA zamalua fofanö fefu ita. Nahia si möi yaʼita mazui ohitö dödöda, yaʼia daʼö ba wanöndra faʼauri ba gulidanö si bohou barö gamatöröwa Yehowa safönu faʼomasi. Ero maʼökhö, taforege ba wanörö lala sofeta ba waʼauri. Hizaʼi, simane niwaʼö Yesu, no ise-ise sibai lala andrö ba itaria abua ba wanörö yaʼia. (Baso Mataiʼo 7:13, 14.) Börö me lö moʼahonoa ita, tola manö alio khöda ba wondröi lala andrö.​—Gal. 6:1.

2. Hadia nitutunöda ba artikel daʼa? (Faigi göi kotak ” Fangide-ngideʼö Zanolo Yaʼita ba Wamalua Fombulöʼö”.)

² Enaʼö lö tebulö tatörö lala sise-ise saekhu ba waʼauri, moguna aoha gölöda ba wombulöʼö lala wangera-ngerada, somasi-masi dödöda, hegöi amuatada. Ifarou niha Keriso si so ba Gorindro Faulo enaʼö lö aetu ’lafaudugö lala wangera-ngerara’. (2 Kor. 13:11) Moguna göi khöda mene-mene nibeʼenia andrö. Ba artikel daʼa, tatutunö hewisa Zura Niʼamoniʼö ba wanolo yaʼita ba wamalua fombulöʼö, ba hewisa wa tola latolo ita ira talifusöda saro ba wamati enaʼö lö tebulö tatörö lala saekhu ba waʼauri. Tatutunö göi hadia manö mbörö wa tola abua khöda ba woloʼö fanuturu lala nibeʼe organisasi Yehowa. Taʼila dania hewisa wa tola möi fanoloda mbua-bua fangide-ngideʼö enaʼö tola tafalua wombulöʼö ba lö aetu taʼokhögö waʼomuso dödö ba wamosumange Yehowa.

3. Hewisa wa tola itolo ita Taromali Lowalangi?

³ Abua khöda ba wamareso era-erada hegöi tödöda. Hadia mbörö? Börö me no si tefuyu dödöda andrö, ba tebai taʼodaligö. (Yer. 17:9) Alio sibai ilimo ita ’fangera-ngerada si fasala’. (Yak. 1:22) Börö daʼö, moguna khöda Daromali Lowalangi ba wamareso faʼaurida. Taromali Lowalangi zangoromaʼö khöda hadia ’gera-era dödö ba söndra dödöda’ fondrege zabakha. (Heb. 4:12, 13) Simane fakake niʼogunaʼö ba woronsen, tola iforomaʼö khöda ngawalö zi lö oroma Taromali Lowalangi.  Hizaʼi, moguna taʼokhögö wangide-ngideʼö na omasi tatema mbua moroi ba mene-mene nibeʼe Zura Niʼamoniʼö mazui moroi ba niha niʼogunaʼö Lowalangi si tobali salahinia.

4. Hezo tola taʼila wa so wayawasa ba dödö Razo Saulo?

⁴ Moroi ba duma-duma Razo Saulo, tola taʼila hadia lua-luania na lö khöda fangide-ngideʼö. Börö me so wayawasa khö Zaulo, lö omasi ifaduhuʼö wa moguna ibulöʼö lala wangera-ngerania hegöi amuatania. (Zin. 36:2, 3; Hab. 2:4) Tola oroma daʼö ba ginötö ibeʼe khönia wanuturu lala Yehowa sanandrösa ba zinangea ifalua na no aefa ikalaisi niha Gamaleki. Me luo daʼö, lö iʼoʼö Saulo niwaʼö Yehowa. Ba me itegu ia Samueli, lö omasi ifaduhuʼö Saulo wa no ifalua zala. Hizaʼi, iwaʼö wa tenga amuata si fasala sibai daʼö, ba ibörögö itahigö niha böʼö. (1 Zam. 15:13-24) No göi irai ifalua zimane daʼö Saulo ba zilalö. (1 Zam. 13:10-14) Alimagö sibai, itehegö so wayawasa ba dödönia. Börö me lö ibulöʼö lala wangera-ngerania, mofönu khönia Yehowa ba itimbagö ia.

5. Hadia wamahaʼö si tola tahalö moroi ba duma-duma Zaulo?

⁵ Enaʼö lö tafalua zimane nifalua Zaulo, moguna tasofu khöda samösa, ’Na so mene-mene nibasogu ba Daromali Lowalangi, hadia uʼalu-alui dane-dane enaʼö lö ufalua mene-mene andrö? Hadia uwaʼö tödögu wa tenga sala sebua sibai daʼö? Hadia utahigö niha böʼö ba gamuatagu andrö?’ Na fanema li nibeʼeda atö, yaʼia, moguna tabulöʼö lala wangera-ngerada. Na lö tafalua daʼö, tola manö tumbu ba dödöda wayawasa irege lö saʼae omasi Yehowa tobali si fahuwu khöda.​—Yak. 4:6.

6. Tutunö hadia gamaehuta Razo Saulo khö Razo Dawido.

⁶ Nehegö gamaehuta Razo Saulo khö Razo Dawido sangomasiʼö ”oroisa Yehowa”. (Zin. 1:1-3) Aboto ba dödö Dawido wa ilumöʼö niha si so fangide-ngideʼö Yehowa hizaʼi itimbagö niha si fayawa. (2 Zam. 22:28) Daʼö mbörö wa itehegö Dawido na ibulöʼö lala wangera-ngerania Taromali Lowalangi. Imane wangumaʼö, ”Usuno Yehowa sameʼe khögu fotu. Ifareso ndraʼo fangera-ngeragu fondrege zabakha na bongi.”​—Zin. 16:7, Terjemahan Dunia Baru [NW].

7. Hadia nifaluada na taʼokhögö wangide-ngideʼö?

⁷ Na taʼokhögö wangide-ngideʼö, hasambalö tatehegö enaʼö iʼatulöʼö lala wangera-ngerada si fasala Taromali Lowalangi, fatua lö aekhu ita ba wamalua amuata si fasala. Hulö na imane khöda Taromali Lowalangi, ’Daʼö lala, törö ia!’ Daʼö dania zameʼe khöda famangelama na ibörögö taholeʼö ita ba gabera mazui ba gambölö. (Yes. 30:21) Oya sibai mbua si tola tatema na tafondrondrongo niwaʼö Yehowa. (Yes. 48:17) Duma-dumania, lö moguna tarasoi waʼaila niʼasogö degu-tegu nibeʼe niha böʼö, börö me lö nifaluada zala. Baero daʼö, tola göi itugu ahatö ita khö Yehowa börö me taʼila wa iʼameʼegö tödö sibai ita, simane nifalua zi samösa ama sebua faʼomasi khö ndraononia.​—Heb. 12:7.

8. Simane nisura ba Yakobo 1:22-25, hewisa wa tola tobali sörömi khöda Daromali Lowalangi?

⁸ Tola tobali sörömi Daromali Lowalangi ba waʼaurida. (Baso Yakobo 1:22-25.) Ato ba gotaluada zamaigi sörömi ero sihulö wongi fatua lö taröi nomoda. Na tafalua daʼö, tola taʼila hadia so zinangea taʼatulöʼö fatua lö laʼila ita niha böʼö. Simanö göi, na tabaso Zura Niʼamoniʼö ero maʼökhö, tola taʼila hadia manö lala si tola tafalua ba wombulöʼö fangera-ngerada hegöi amuatada. Ato göi zanema bua börö me no labaso ayati Zura Niʼamoniʼö ba zi maʼökhö daʼö, fatua lö laröi nomora ba zihulö wongi. Latehegö ibulöʼö lala wangera-ngerara hadia zi no labaso andrö. Aefa daʼö, lö aetu laʼalui lala ba wamalua mene-mene Daromali Lowalangi andrö ba zi maʼökhö daʼö. Te ha si toʼölö manö daʼö na ba wamaigida, hizaʼi moguna sibai tafalua  daʼö enaʼö lö aetu tatörö lala sise-ise saekhu ba waʼauri.

9. Hana wa moguna iʼamenesi ita talifusöda?

⁹ Hadia no irai ötörö lala sangaröuʼö yaʼugö moroi khö Yehowa? (Zin. 73:2, 3) Na iforomaʼö waʼabarani si samösa talifusöda saro ba wamati ba wameʼe khöu mene-mene, hadia öfondrondrongo ba öfalua mene-mene nibeʼenia andrö? Na yaʼia, no öfalua zatulö ba öforomaʼö wangandrö saohagölö ba wamangelama nibeʼe dalifusöda andrö.​—Gamd. 1:5.

10. Hadia zinangea öfalua na so dalifusöda soʼamenesi yaʼugö?

¹⁰ Ifasugi ba dödöda Taromali Lowalangi, ”Tandra waʼalöfaröi na iʼamenesi ita si fahuwu khöda hewaʼae afökhö.” (Gamd. 27:6, NW) Hadia geluaha wehede daʼa? Nehegö atö duma-duma andre. Khalaigö na edöna öʼötö lala si rami, ba no mangoloi dödömö ba HP-mö. Öʼötö manö lala andrö ba lö öfakhölö-khölö ndraʼugö. Hizaʼi, iʼanemaiʼö isöbi dangamö si fahuwu khömö enaʼö öfuliʼö ba ngai lala. Elezitö dangamö börö me iʼabölöʼö sibai wanöbi yaʼugö. Hizaʼi, börö me ifalua daʼö ba waʼalio, tola telumöʼö ndraʼugö irege lö itandruʼö moto. Na örasoi waʼafökhö ba zi hauga hari börö me no elezitö dangamö ibeʼe, hadia abao dödömö khönia? Tatu manö löʼö, hizaʼi mangandrö sibai saohagölö ndraʼugö khönia börö me no itolo ndraʼugö. Simanö göi, na ifangelama ndraʼugö si samösa talifusöda wa so wehede mazui amuatamö si lö tefaudu ba goi-goi Lowalangi, tola manö örasoi waʼafökhö ba wamobörö. Hizaʼi, böi timbagö mene-menenia andrö mazui abao dödömö khönia. Ha niha si lö faʼatua-tua zamalua daʼö. (Zango. 7:9) Moguna öʼandrö saohagölö khö zi fahuwu khömö andrö börö me no iforomaʼö waʼabarani ba woʼamenesi yaʼugö.

11. Hadia mbörö wa itimbagö si samösa niha mene-mene si sökhi nibeʼe dalifusönia?

¹¹ Hadia mbörö wa itimbagö si samösa niha mene-mene nibeʼe dalifusönia sangomasiʼö yaʼia? Börö wayawasa. Omasi niha si fayawa ba niha ”sanuno-nuno yaʼira enaʼö maoso dalingara”. Daʼö mbörö wa ”labato wamondrondrongo sindruhu”. (2 Tim. 4:3, 4) Lawaʼö tödöra wa lö moguna khöra mene-mene börö me abölö atua-tua mazui abölö tohude ira moroi ba niha böʼö. Hizaʼi, imane sinenge sotöi Faulo, ”Na so zangumaʼö tödönia abölö moguna ia hewaʼae lö itörö, no ilimo ia samösa.” (Gal. 6:3) No ihaogö wanutunö sanandrösa ba daʼö Razo Selomo. Imane wangumaʼö, ”Abölö sökhi nono matua si numana hizaʼi atua-tua, moroi khö razo si no atua hizaʼi bodo ba lö mamondrongo famangelama.”​—Zango. 4:13, NW.

12. Simane nisura ba Galatia 2:11-14, hadia wamahaʼö si tola tahalö moroi ba duma-duma nibeʼe Wetero?

¹² Nehegö duma-duma nibeʼe zinenge sotöi Fetero me itegu ia Faulo föna niha sato. (Baso Galatia 2:11-14.) Tola manö mofönu Wetero ba wehede Waulo andrö börö lalania ba wamaʼema yaʼia, ba börö me iwaʼö daʼö föna niha sato. Hizaʼi, iforomaʼö waʼatua-tua Fetero. Itemaʼö mene-mene, ba lö fahöʼö ia khö Waulo. Ba gafuriata, ifotöi khö Waulo ”talifusö niʼomasiʼöda”.​—2 Fet. 3:15.

13. Fatua lö taʼamenesi zi samösa niha, hadia zinangea tatörö tödöda?

¹³ Na öwaʼö tödöu wa moguna öbeʼe mene-mene khö zi samösa talifusöda, hadia zinangea ötörö tödöu? Fatua lö fahuhuo ndraʼugö khönia, sofu khöu samösa, ’Hadia talafo atulö ndraʼodo?’ (Zango. 7:16) Na talafo atulö zi samösa niha, ihuku niha böʼö moloʼö goi-goinia samösa, tenga moloʼö goi-goi Yehowa. Baero daʼö, tola manö göi ambö khönia faʼahakhö dödö. Na no aefa öfareso ndraʼugö samösa, hizaʼi lö nasa tebulö öwaʼö tödömö wa moguna öbeʼe khönia  mene-mene, haogö wanutunö khönia, ba ogunaʼö wanofu si tola manolo yaʼia ba wangiʼila hadia zala si no ifalua. Tatugöi enaʼö teʼodane-dane wehedemö ba Zura Niʼamoniʼö, ba törö tödömö wa noro dödö nibeʼe khömö tenga ba wohuku niha böʼö, hizaʼi ba wanolo yaʼia enaʼö iʼila hewisa dödö Yehowa ba nifaluania andrö. (Rom. 14:10) Ogunaʼö waʼatua-tua si so ba Daromali Lowalangi, ba oʼö waʼahakhö dödö niforomaʼö Yesu na öʼamenesi zi samösa niha. (Gamd. 3:5; Mat. 12:20) Hadia mbörö? Börö me hasambalö isulöni khöda Yehowa hadia nifaluada ba niha böʼö.​—Yak. 2:13.

14. Hadia zi no ihenaigö khöda organisasi Lowalangi?

¹⁴ Iʼogunaʼö organisasinia si so ba gulidanö Yehowa ba wanuturu khöda lala saekhu ba waʼauri. Organisasinia andrö zangaʼasogö khöda video, publikasi, hegöi angowuloa si tola manolo yaʼita ba wamalua mene-mene si so ba Daromali Lowalangi. Tola mufaduhusi tödö fefu zi no lahenaigö andrö börö me teʼodane-dane ia ba Zura Niʼamoniʼö. Ba ginötö lahalö gangetula ira Boto Solohe sanandrösa ba lala sabölö sökhi ba wamalua halöwö fanuriaigö, laʼodaligö geheha niʼamoniʼö. Hewaʼae simanö, lö aetu lafareso gangetula andrö ira Boto Solohe enaʼö laʼila hadia so zinangea mubulöʼö. Hadia mbörö? Börö me ”si taya nösi gulidanö daʼa”, ba moguna ifaudugö ia organisasi Lowalangi ba waʼatebulö salua.​—1 Kor. 7:31.

15. Hadia daha-taha nitaögö ndra sanuriaigö ösa?

¹⁵ Na ibeʼe khöda waʼaboto ba dödö si bohou organisasi Lowalangi sanandrösa ba wamahaʼö Zura Niʼamoniʼö, mazui ibeʼe khöda wanuturu lala sanandrösa ba gamuata, hasambalö tatema ba tafalua ia. Hizaʼi, hadia nifaluada na ifalua wombulöʼö organisasi Lowalangi, si tola molua-lua ba lala waʼaurida tanö böʼö? Duma-dumania, barö zi hauga fakhe andre, itugu tedou waʼebua gefe niʼogunaʼö ba wamasindro hegöi ba wondrorogö nahia wamosumange Lowalangi. Börö daʼö, labeʼe wanuturu lala ira Boto Solohe enaʼö abölö oya mbanua niha Keriso sangogunaʼö Balai Mbanua Lowalangi si fagölö. Daʼö mbörö wa so ösa mbanua niha Keriso niʼosambuaʼö, ba muʼamawa ösa Balai Mbanua Lowalangi. Muʼogunaʼö gefe daʼö ba wamazökhi Balai Mbanua Lowalangi ba nahia sabölö moguna mufasindro. Na no muʼosambuaʼö mbanua niha Keriso si farahu yaʼugö, ba mufamawa Balai Mbanua Lowalangi si so ba daʼö, tola manö abua khömö ba wamaudugö faʼaurimö ba waʼatebulö andrö. Tola manö itugu fandröndröu lala sinangea  latörö ira sanuriaigö ba weʼamöi ba gangowuloa. Te so ösa göi ndra talifusöda sanofu-nofu hadia mbörö wa mufamawa zi sambua Balai Mbanua Lowalangi, börö me no irai falulu fohalöwö ira ba wamasindro mazui ba wondrorogö tomosa andrö. Tola manö lawaʼö tödöra wa zaya-zaya gölö ginötöra hegöi famorege si no lafalua. Hizaʼi no sinangea musuno ira, börö me laʼoʼö wanuturu lala si bohou andre.

16. Na tafalua mene-mene si so ba Kolose 3:23, 24, hewisa wa tola möi fanoloda daʼö enaʼö lö aetu taʼokhögö waʼomuso dödö?

¹⁶ Lö aetu tarasoi waʼomuso dödö na tatörö tödöda wa khö Yehowa mohalöwö ita ba yaʼia zameʼe fanuturu lala ba organisasinia. (Baso Kolose 3:23, 24.) No iröi khöda duma-duma si sökhi Razo Dawido me ibeʼe dolo-tolo ba wamazökhi osali. Imane, ”Haniha sa ndraʼodo andre, ba hadia mbanuagu andre, wa tola enaʼö mabeʼe daʼö fefu, saohagölö? Moroi ba khöu fefu hadia ia, ba moroi ba dangau wa no mabeʼe ia khöu.” (1 Nga. 29:14) Simanö göi, moroi khö Yehowa fefu dolo-tolo nibeʼeda khönia. Hewaʼae simanö, iʼandrö sibai saohagölö Yehowa börö me tabeʼe khönia ginötö, faʼabölö, hegöi kefeda ba wamalua halöwö si no ibeʼe khöda.​—2 Kor. 9:7.

17. Hana wa lö moguna ide-ide dödömö na so zinangea öbulöʼö?

¹⁷ Enaʼö lö tebulö tatörö lala sise-ise saekhu ba waʼauri, moguna tahaogö ba woloʼö duma-duma nibeʼe Yesu. (1 Fet. 2:21) Böi so khöu waʼide-ide dödö na öʼila wa so zinangea öbulöʼö. No tandra si sökhi daʼö, sangoromaʼö wa omasi ndraʼugö ba woloʼö fanuturu lala nibeʼe Yehowa. Törö tödömö, aboto ba dödö Yehowa wa niha si lö moʼahonoa ita. Daʼö mbörö wa lö itötöna enaʼö moʼahonoa woloʼöda duma-duma Yesu.

18. Hadia zinangea tafalua enaʼö tola takhamö gohitö dödöda?

¹⁸ Datahalö gangetula ba wangosambuaʼö tödöda ba gohitö dödöda ba zi so miföna. Omasi göi ita tabulöʼö lala wangera-ngerada, somasi-masi dödöda, hegöi amuatada. (Gamd. 4:25; Luk. 9:62) Yalötebulö taʼokhögö wangide-ngideʼö, ’böi taböhöli waʼomuso dödöda, tafaudugö lala wangera-ngerada’. (2 Kor. 13:11) Na tafalua daʼö, ”fao [khöda] Lowalangi safönu faʼomasi ba faʼatulö”. Ba tenga ha takhamö nahia sedöna möi ita, hizaʼi tarasoi göi waʼomuso dödö ba wanörö lala sofeta ba daʼö.