Tumbu ndraʼo me döfi 1983. Lö fökhö-fökhögu me ide-idedo. Hizaʼi, me fulu fakhe ndröfigu, asese agafökhö nösigu. Mato dua fakhe aefa daʼö, tebai saʼae ufaliwa mbotogu me maoso ndraʼo sihulö wongi. Uʼoigö waʼabölögu ba wamaliwa ahegu, hizaʼi tebai. Iʼotarai daʼö, tebai saʼae ulau mowaö-waö. Fökhögu göi andre zanaha faʼatedou mbotogu. Irugi iadaʼa, hulö manö waʼebua mboto ndraono waʼebuagu.

Iʼotarai me mofökhödo, tebai saʼae uröi nomo. Hauga waŵa aefa daʼö, so darua Zamaduhuʼö Yehowa si möi ba nomoma. Si toʼölönia, ubiniʼödo na so domema, hizaʼi me luo daʼö, omasido ufondrondrongo niwaʼö ndra alawe si darua andrö. Latutunö sanandrösa ba Waradaiso, ba iʼanemaiʼö itörö tödögu zi no irai urongo me lima fakhe ndröfigu. Me luo daʼö, so samösa utusan injil si toröi ba Suriname sotöi Jethro. Möi ia ba mbanuama sakali sara waŵa ba wondröniaʼö famahaʼö ba Zura Niʼamoniʼö khö bapagu. Sökhi sibai lagunia khögu, ba omasido sibai fariawö khönia. Baero daʼö, no hauga kali laʼohedo ira kakegu hegöi nenegu ba wangondrasi angowuloa nifalua ba mbanuama. Manofu khögu zi samösa ira alawe si möi ba nomoma sotöi Florence, hadia adöni dödögu ba wamahaʼö yaʼo ba Zura Niʼamoniʼö. Börö me no irai fariawö ndraʼo khö ndra Samaduhuʼö Yehowa, omasido ba wanemaʼö daʼö.

Ifuli zui tohare Florence ba no iʼohe woʼomonia sotöi Justus, ba labörögö khögu wamahaʼö ba Zura Niʼamoniʼö. Me aboto ba dödöra wa lö uʼila mombaso, lafahaʼö ndraʼo enaʼö tola ufalua daʼö. Ba gafuriata, tola onekhedo mombaso. Samuza inötö, lafatunö khögu ira Justus hegöi Florence wa no mufataro ira ba wangai halöwö ba Suriname. Hizaʼi, lö hadöi si tola manohugö khögu famahaʼö ba Zura Niʼamoniʼö ba Orealla. Hewaʼae simanö, uʼandrö saohagölö börö me lö irai iʼolifugö ndraʼo Yehowa.

Lö ara aefa daʼö, mufataro samösa perintis sotöi Floyd ba Orealla. Falukha ia khögu me manuriaigö ia misa ba nomo-omo. Me isofu khögu hadia omasido wamahaʼö yaʼo ba Zura Niʼamoniʼö, uboho khönia mbawa. Manofu ia khögu, ”Hana wa öboho-boho?” Ufatunö khönia wa no irai ufahaʼö ndraʼo ba brosur Apa yang Allah Tuntut dari Kita? ba no ubörögö ufahaʼö ndraʼo ba mbuku Pengetahuan yang Membimbing kepada Kehidupan Abadi. * Ututunö khönia hadia mbörö wa tebato wamahaʼö yaʼo ba Zura Niʼamoniʼö. Idöniaʼö khögu wamahaʼö ba Zura Niʼamoniʼö talifusöda Floyd irege maʼasiwai mbuku Pengetahuan. Hizaʼi ba gafuriata, mufataro göi ia ba nahia tanö böʼö. Ifuli zui lö hadöi samahaʼö yaʼo ba Zura Niʼamoniʼö.

 Me döfi 2004, so darua perintis istimewa nifataro ba Orealla, sotöi Granville hegöi Joshua. Falukha göi ira khögu me manuriaigö ira misa ba nomo-omo. Me lasofu khögu hadia omasido ba wamahaʼö yaʼo ba Zura Niʼamoniʼö, uboho khöra mbawa. Uʼandrö khöra enaʼö ifuli lafahaʼö ndraʼo ba mbuku Pengetahuan iʼotarai ba wamobörö. Omasido uʼila hadia fagölö wamahaʼö nifaʼemara khögu, simane nifaʼema ndra samahaʼö yaʼo ba zilalö. Ifatunö khögu Granville wa so gangowuloa nifalua ba Orealla. Me luo daʼö, omasido weʼamöi ba gangowuloa hewaʼae na lö irai uröi nomo ba zi fulu fakhe faʼara. Börö daʼö, ifaondragö ndraʼo Granville ba ifazawado yawa ba gurusi roda, aefa daʼö ifasao ndraʼo ba Balai Mbanua Lowalangi.

Ba gafuriata, ifarou ndraʼo Granville enaʼö fao ba Sekolah Pelayanan Teokratis. Imane khögu, ”Hewaʼae na lö öʼila mowaö-waö, hizaʼi öʼila fahuhuo. Samuza inötö dania, hasambalö tola öfaʼema huhuo sebua.” Fehede Granville andrö zanolo yaʼo ba wangokhögö faʼafaduhu dödö.

Ibörögö fao ndraʼo manuriaigö khö Granville. Hizaʼi, oya lala sagaboto ba Orealla, ba abua wanörö daʼö na muʼogunaʼö gurusi roda. Börö daʼö, uʼandrö tolo khö Granville enaʼö iʼogunaʼö goroba ba wolohe yaʼo. Daʼö mbörö wa itugu aoha khöma ba weʼamöi gofu hezo manö. Tebayagö ndraʼo idanö me baŵa si Öfa 2005. Lö ara aefa daʼö, mufomaha ndraʼo ba wamöföʼö publikasi, hegöi ba wangogunaʼö fakake fangebua li si so ba Balai Mbanua Lowalangi.

Me 2007, mate bapagu börö me teʼala ia ba wanörö tundraha. Abu sibai dödö nösi nomoma. Iʼohe ndraʼaga ba wangandrö talifusöda Granville, ba ibaso ösa ayati Zura Niʼamoniʼö si tobali fondrara dödöma. Hizaʼi dua fakhe aefa daʼö, ifuli zui alua gabula dödö tanö böʼö. Mate göi dalifusöda Granville börö me teʼala ia ba wanörö tundraha.

Abu sibai dödö mbanua niha Keriso side-ide si farahu yaʼaga. Me luo daʼö, lö hadöi saʼae khöma zatua sokubaloi ba ha samösa genoni sohalöwö. Abu sibai dödögu börö me no mate zi fahuwu khögu sabölö uʼomasiʼö. Lö iböhöli ba wanolo yaʼo ba wamati hegöi ba zoguna khögu tanö böʼö. Me mufalua gangowuloa si oföna sibai me no aefa mate ia, tebeʼe khögu halöwö ba wombaso Famahaʼö Manuriaigö. Ha dombua ngenoli zi tola ubaso, börö me ibörögö ulau meʼe ba lö aetu mowöi dawa hörögu. Börö daʼö, moguna möi ndraʼo tou ba panggung.

Ibörögö terara dödögu börö me so ösa ndra talifusöda si möi ba Orealla, ba wanolo banua niha Keriso si farahu yaʼaga. So göi samösa perintis istimewa sotöi Kojo, nifataro gödo ndraha ba wangai halöwö ba daʼa. Ba gafuriata, omasi mamagu hegöi akhigu ba wamahaʼö yaʼira ba Zura Niʼamoniʼö irege tebayagö ira idanö. Omuso sibai dödögu. Me baŵa si Tölu 2015, mufataro ndraʼo tobali enoni sohalöwö. Lö ara aefa daʼö, labeʼe khögu halöwö ba wamaʼema huhuo sebua. Iʼanemaiʼö itörö tödögu wehede Granville ba zi hauga fakhe silalö me imane, ”Samuza inötö dania, hasambalö tola öfaʼema huhuo sebua.” Me itörö tödögu wehedenia andrö, uboho mbawa ba mowöi dawa hörögu.

Na ufaigi JW Broadcasting^®, uʼila wa so ösa waö-waö waʼauri ndra talifusöda si fakhili-khili ba zalua khögu. Hewaʼae na oya zi tobali taha-tahara, lö tebulö laʼokhögö waʼomuso dödö, ba oya zi tola lafalua. Börö me oya nasa zi tola ufalua ba omasido ba wameʼe fondrege zi sökhi khö Yehowa, uhalö gangetula tobali perintis biasa. Aefa daʼö, me baŵa si Siwa 2019, tebeʼe khögu halöwö si lö udöna-döna. Mufataro ndraʼo tobali satua sokubaloi ba mbanua niha Keriso si farahu yaʼaga. So 40 waʼato ndra sanuriaigö ba daʼö.

Uʼandrö sibai saohagölö khö ndra talifusöda samahaʼö yaʼo ba Zura Niʼamoniʼö, hegöi sanolo yaʼo ba wamalua fanuriaigö. Ba sabölö tohudenia, uʼandrö sibai saohagölö börö me lö irai iʼolifugö ndraʼo Yehowa.