1. Simane nisura ba Mataiʼo 28:18-20, hadia halöwö nibeʼe Yesu khö ndra nifahaʼönia?

ME NO tesusugi Yesu, möi ia ifalukhaisi ndra nifahaʼönia si no owulo ba Galilaia. Omasi ia ibeʼe khöra halöwö sabölö tohude. Hadia daʼö? No musura ngawua wehede Yesu andrö ba Mataiʼo 28:18-20.​—Baso.

2. Hadia manö wanofu nitutunöda ba artikel daʼa?

² Moguna göi fao fefu nono mbanua Lowalangi ba wamalua halöwö fombaliʼö nifahaʼö. Börö daʼö, datatutunö tölu wanofu soʼamakhaita ba halöwö andrö. Si oföna, hadia nasa zinangea tafalua baero ba wanolo niha nifahaʼö ba Zura Niʼamoniʼö ba wangokhögö faʼaboto ba dödö sanandrösa ba zomasi Lowalangi? Si dua, hadia manö zinangea lafalua ira sanuriaigö ba mbanua niha Keriso ba wanolo niha nifahaʼö enaʼö tedou ba wamati? Si tölu, hewisa wanoloda niha si no mamöhöli halöwö ba wamati enaʼö ifuli fao ira ba wamalua halöwö fanuriaigö?

3. Hadia zi tebai taʼolifugö moroi ba wehede Yesu?

³ No aboto ba dödöda halöwö nibeʼe Yesu. Moguna tafahaʼö niha böʼö ba goroisania. Hizaʼi, so sambua zi tohude si tebai taʼolifugö. Lö imane Yesu, ’Mifahaʼö ira sanandrösa ba niwaʼögu khömi maʼafefu.’ Hizaʼi imane, ”Mifahaʼö ira ba woloʼö fefu niwaʼögu khömi.” Börö daʼö, na tafahaʼö niha ba Zura Niʼamoniʼö, tenga ha asala tafatunö khöra hadia manö zinangea lafalua. Moguna göi tabeʼe khöra wanuturu lala enaʼö tola lafalua hadia zi no lafahaʼö yaʼira. (Hal. 8:31) Hana wa moguna tafalua daʼö?

4. Beʼe duma-duma sangoromaʼö khöda hewisa lala ba wanolo si samösa niha enaʼö tola iʼoʼö fefu goroisa Keriso.

⁴ Hewisa wanoloda si samösa niha ba woloʼö fefu oroisa  Yesu? Nehegö duma-duma andre. So ösa zinangea ifalua niha samahaʼö ba wolohe moto, enaʼö tola itolo niha nifahaʼönia ba woloʼö fefu gamakhoita sanandrösa ba wanörö lala. Si oföna, moguna itutunö ba niha nifahaʼönia hadia manö gamakhoita sinangea iʼoʼö. Hizaʼi, lö obönö daʼö. Moguna göi fao ia ba niha nifahaʼönia na iʼohe moto. Na ifalua daʼö, tola ibeʼe wanuturu lala ba niha nifahaʼönia ba wamalua si no ifahaʼö yaʼia. Hadia wamahaʼö si tola tahalö moroi ba duma-duma andre?

5. (a) Moloʼö Yohane 14:15 hegöi 1 Yohane 2:3, hadia manö zinangea lafalua ira niha nifahaʼöda ba Zura Niʼamoniʼö? (b) Hadia manö wanolo si tola tabeʼe ba niha nifahaʼöda ba Zura Niʼamoniʼö?

⁵ Ba ginötö tadöniaʼö wamahaʼö ba Zura Niʼamoniʼö khö zi samösa niha, tafahaʼö khönia hadia manö niʼandrö Lowalangi khöda. Hizaʼi, lö obönö daʼö. Moguna göi tatolo ia ba wamalua si no ifahaʼö yaʼia. (Baso Yohane 14:15; 1 Yohane 2:3.) Moroi ba duma-dumada, tola taforomaʼö khönia hewisa lala ba wamalua goi-goi Zura Niʼamoniʼö ba zekola, ba nahia wohalöwö, mazui na tafalua rekreasi. Tola göi tatutunö khönia hadia manö mbua nirasoida börö me taʼoʼö wanuturu lala moroi ba Zura Niʼamoniʼö. Duma-dumania, te no irai ilumöʼö ita moroi ba deʼala ba wamati, mazui itolo ita ba wangai angetula si tefaudu. Baero daʼö, na fao ita wangandrö ba niha nifahaʼöda, moguna taʼandrö geheha niʼamoniʼö moroi khö Yehowa ba wameʼe fanuturu lala ba niha nifahaʼöda andrö.​—Yoh. 16:13.

6. Hadia nasa zinangea tafalua na tafahaʼö zi samösa niha ba woloʼö oroisa Yesu?

⁶ Hadia nasa zinangea tafalua na tafahaʼö zi samösa niha ba woloʼö oroisa Yesu? Moguna göi tatolo niha nifahaʼöda ba Zura Niʼamoniʼö enaʼö itugu omasi ia ba wombaliʼö nifahaʼö. Tola manö ataʼu niha nifahaʼöda andrö ba wamalua fanuriaigö. Börö daʼö, moguna tatolo ia si fao faʼebolo dödö, enaʼö itugu aboto ba dödönia zindruhu si so ba Zura Niʼamoniʼö ba tofakha ba dödönia zi no ifahaʼö yaʼia, irege terou dödönia ba wamalua fanuriaigö. Hewisa wamaluada daʼö?

7. Hewisa lalada ba wanolo niha nifahaʼöda ba Zura Niʼamoniʼö enaʼö itugu omasi ia ba wamalua fanuriaigö?

⁷ Tola tabeʼe wanofu-nofu andre ba niha nifahaʼöda ba Zura Niʼamoniʼö: ”Hadia mbua si no örasoi börö me no öfalua zi no ifahaʼö Sura Niʼamoniʼö? Hadia moguna göi larongo duria somuso dödö andre ira niha böʼö? Hadia zi tola öfalua ba wanolo yaʼira?” (Gamd. 3:27; Mat. 9:37, 38) Foromaʼö khönia fefu risalah si farahu ba Wakake Niʼogunaʼöda ba Wamahaʼö. Aefa daʼö, andrö khönia enaʼö ifili risalah si tefaudu si tola ibeʼe ba nösi nomonia, khö ndra si fahuwu khönia, mazui khö ndra awönia wohalöwö. Beʼe khönia risalah si no ifili mato hauga ngaʼörö. Mifalua wamadumaisi enaʼö aboto ba dödönia hewisa wamaehagö risalah andrö ba lala si tefaudu. Ba na no tobali ia sanuriaigö si lö mubayagö idanö, moguna fao ndraʼugö khönia ba wanuriaigö enaʼö tola öbeʼe khönia wanolo.​—Zango. 4:9, 10; Luk. 6:40.

8. Hana wa moguna iforege niha nifahaʼö ba Zura Niʼamoniʼö ba wondrouʼö faʼomasinia khö Lowalangi hegöi ba nawönia niha? (Faigi göi kotak ” Lala ba Wanolo Niha Nifahaʼöda ba Zura Niʼamoniʼö Enaʼö Itugu Iʼomasiʼö Lowalangi”.)

⁸ Törö tödömö wa no ibeʼe khöda halöwö Yesu ba wanolo niha böʼö enaʼö ’laʼoʼö fefu niwaʼönia’. Tefarahu ba daʼö zi dombua oroisa fondrege zebua, yaʼia daʼö ba wangomasiʼö Lowalangi hegöi ba wangomasiʼö niha böʼö. Moʼamakhaita sibai goroisa andre ba halöwö fanuriaigö hegöi ba wombaliʼö nifahaʼö. (Mat. 22:37-39) Hadia gamakhaitania? Dane-dane sabölö tohude wa tafalua wanuriaigö yaʼia daʼö faʼomasida khö Yehowa hegöi ba niha böʼö. Aboto ba dödöda wa so ösa  niha nifahaʼö ba Zura Niʼamoniʼö sorasoi faʼataʼu ba wamalua halöwö fanuriaigö. Hizaʼi, tola tafaduhuʼö ba dödöra wa hasambalö itolo ira Yehowa ba wolawa faʼataʼura ba niha. (Zin. 18:2-4; Gamd. 29:25) Ba kotak si so ba artikel andre, tola taʼila hadia manö zinangea tafalua ba wanolo niha nifahaʼöda ba Zura Niʼamoniʼö enaʼö itugu iʼomasiʼö Lowalangi. Hewisa göi mbanua niha Keriso ba wanolo niha nifahaʼö enaʼö itugu iforomaʼö waʼomasi?

9. Hewisa enaʼö tola onekhe zi samösa niha ba wolohe moto?

⁹ Fuli angeragö duma-duma sanandrösa ba niha nifahaʼö ba wolohe moto no mege. Ba ginötö itema wamomaha moroi khö zamahaʼö yaʼia ba wolohe moto, hadia manö lala si tola iʼogunaʼö ba wamahaʼö yaʼia? Baero ba wamondrondrongo samahaʼö yaʼia, tola göi ifaigi-faigi niha tanö böʼö si no onekhe ba wolohe moto. Duma-dumania, tola iforomaʼö khönia samahaʼö yaʼia na so samösa zolohe moto si sökhi tödö sanehegö niha böʼö ba wotaluʼi yaʼia. Mazui, tola iforomaʼö khönia samahaʼö yaʼia na so zolohe moto tanö böʼö soʼalösi haga wandrunia enaʼö lö fandrundru haga ba hörö niha böʼö. Moroi ba duma-duma andrö, isöndra wamahaʼö si sökhi si tola iʼogunaʼö ba wolohe moto.

10. Hadia zanolo niha nifahaʼöda ba Zura Niʼamoniʼö ba wangoromaʼö faʼatedou ba wamati?

¹⁰ Na omasi tobali samosumange Yehowa zi samösa niha nifahaʼö ba Zura Niʼamoniʼö, lö obönö na ha khö zamahaʼö yaʼia itema wamahaʼö. Moguna göi ifahaʼö ia moroi ba duma-duma si sökhi niforomaʼö nono mbanua Yehowa tanö böʼö. Börö daʼö, enaʼö tola tedou ia ba wamati, moguna iʼondrasi gangowuloa. Hadia mbörö? Börö me fefu nifaʼema ba gangowuloa tola tobali fondrouʼö waʼaboto ba dödönia, sangaroʼö famatinia, ba sondrouʼö faʼomasinia khö Lowalangi. (Hal. 15:30-32) Baero daʼö, na iʼondrasi gangowuloa, tola iʼohe ia samahaʼö yaʼia ba Zura Niʼamoniʼö ba wamalukhaisi ira talifusöda tanö böʼö sangokhögö waö-waö waʼauri si fakhili khönia. Hadia manö duma-duma si tola iʼila niha nifahaʼöda ba Zura Niʼamoniʼö moroi khö ndra talifusöda sangoromaʼö faʼomasi si so ba mbanua niha Keriso? Datanehegö duma-duma andre.

11. Hadia manö zi tola iʼila niha nifahaʼöda ba Zura Niʼamoniʼö na möi ia ba gangowuloa, ba hadia mbua si tola itema?

¹¹ Na hatö niha nifahaʼöda ba Zura Niʼamoniʼö zombönökhi soguna ba nösi nomonia börö me no mate woʼomonia ira matua, tola manö iʼila wa fagölö zalua khönia andrö ba zalua khö zi samösa talifusöda ira alawe ba mbanua niha Keriso. Tatu tofakha sibai ba dödönia me iʼila wamorege nifalua dalifusöda ira alawe andrö ba wolohe iraononia si gide-ide ba Balai Mbanua Lowalangi. Na abua ba niha nifahaʼöda wamöhöli foroko, tola manö falukha ia khö zanuriaigö si no mofozu ba wanaögö taha-taha simane daʼö. Ifatunö khönia sanuriaigö andrö wa faʼomasinia khö Yehowa zamarou tödönia ba woloʼö oroisa Lowalangi. (2 Kor. 7:1; Fil. 4:13) Me no aefa ifatunö sanuriaigö andrö hewisa wa tola iböhöli woroko, imane göi khönia, ”Hasambalö wa tola mofozu ndraʼugö ba wamöhöli foroko.” Tatu teʼaroʼö dödö niha nifahaʼöda ba faduhu dödönia wa tola mofozu ia wamalua daʼö. Te iʼila ono alawe nifahaʼöda ba Zura Niʼamoniʼö wa omuso sibai dödö zi samösa talifusöda ira alawe si bohou ebua ba wamosumange Yehowa hegöi ba wanolo niha böʼö. Daʼa zamarou tödö nono alawe andrö ba wangalui hadia manö zangaʼasogö faʼomuso dödö khö dalifusöda andrö.

12. Hewisa wa tola fao fefu zi farahu ba mbanua niha Keriso ba wanolo niha nifahaʼö ba Zura Niʼamoniʼö?

¹² Ba ginötö iʼondrasi gangowuloa, tola falukha niha nifahaʼöda ba Zura Niʼamoniʼö khö ndra sanuriaigö si faböʼö waö-waö waʼauri. Tola ifahaʼö ia moroi ba duma-duma ndra sanuriaigö andrö sanandrösa ba woloʼö  oroisa Keriso ba wangomasiʼö Lowalangi hegöi niha böʼö. (Yoh. 13:35; 1 Tim. 4:12) Baero daʼö, simane si no tatutunö no mege, tola göi ifahaʼö ia moroi khö ndra sanuriaigö si no irai manaögö abula dödö si fagölö ba zalua khönia. Daʼö zangaʼasogö khönia faʼafaduhu dödö wa tola ibulöʼö waʼaurinia irege tobali ia nifahaʼö Keriso. (5 Moz. 30:11) Fefu zi farahu ba mbanua niha Keriso, tola fao ira ba wanolo niha nifahaʼö ba Zura Niʼamoniʼö enaʼö tedou ba wamati. (Mat. 5:16) Hadia no öforege göi ba wameʼe famarou dödö ba niha nifahaʼö ba Zura Niʼamoniʼö sangondrasi angowuloa?

13-14. Hadia nifalua Yesu me larasoi waʼide-ide dödö ira sinengenia?

¹³ Omasi ita tatolo ndra talifusöda si no mamöhöli halöwö ba wamati enaʼö ifuli fao ira ba wombaliʼö nifahaʼö, simane si no ifaretakö Keriso. Iadaʼa, tola tafahaʼö ita ba nifalua Yesu khö ndra sinengenia me larasoi waʼide-ide dödö.

¹⁴ Lö ara fatua lö laʼetuʼö hukuma faʼamate khö Yesu, ”moloi fefu ndra nifahaʼö laröi ia”. (Mrk. 14:50; Yoh. 16:32) Hadia nifalua Yesu me larasoi waʼide-ide dödö ira sinengenia? Lö ara me no aefa tesusugi ia, imane Yesu khö ndra alawe si no tobali soloʼö khönia, ”Böi miʼataʼufi! Miʼae mifatunö khö ndra talifusögu [wa no tesusugi ndraʼo].” (Mat. 28:10a) Lö iröi ndra sinengenia Yesu. Hewaʼae no laröi ia ira sinengenia, lö aetu ikaoni khöra ”talifusögu”. Simane Yehowa, iʼokhögö waʼahakhö dödö Yesu ba omasi ia ba wangefaʼö sala.​—2 Raz. 13:23.

15. Hewisa dödöda ba niha si no mamöhöli halöwö fanuriaigö?

¹⁵ Simanö göi, taʼameʼegö tödö sibai niha si no mamöhöli halöwö ba wamati. Yaʼira andrö talifusöda, ba taʼomasiʼö sibai ira! Tatu itörö nasa tödöda halöwö si no lafalua ira talifusöda andrö ba zilalö, ba te no lafalua daʼö ba zi ngafulu fakhe faʼara. (Heb. 6:10) Tatu taʼamalösi sibai ira! (Luk. 15:4-7) Hewisa woloʼöda duma-duma Yesu ba wangoromaʼö wa taʼameʼegö tödö ira?

16. Hewisa wangoromaʼöda wa taʼameʼegö tödö ndra talifusöda si no mamöhöli halöwö ba wamati?

¹⁶ Si fao faʼasökhi, kaoni ira weʼamöi ba gangowuloa. Sambua lala niʼogunaʼö Yesu ba wameʼe famarou dödö khö ndra sinengenia sorasoi faʼide-ide dödö, yaʼia daʼö ikaoni ira ba wangondrasi si sambua angowuloa. (Mat. 28:10b; 1 Kor. 15:6) Simanö göi iadaʼa, moguna tafarou dödö niha si no mamöhöli halöwö ba wamati enaʼö ifuli möi ira ba gangowuloa. Aboto ba dödöda wa tola manö moguna takaoni ira ba zi hauga kali irege terou dödöra weʼamöi ba gangowuloa. Tatu omuso dödö Yesu me iʼila wa latemaʼö wogaoni nibeʼenia ira nifahaʼö.​—Fatimbaisi Mataiʼo 28:16 hegöi Luka 15:6.

17. Hadia zinangea tafalua na so niha si no mamöhöli halöwö ba wamati zangondrasi angowuloa?

¹⁷ Temaʼö ira soroi ba dödö. Omasi Yesu na larasoi ira nifahaʼönia wa itemaʼö ira. Daʼö mbörö wa yaʼia zi oföna fahuhuo khöra. (Mat. 28:18) Hadia nifaluada na so niha si no mamöhöli halöwö ba wamati zangondrasi Balai Mbanua Lowalangi? Moguna tafalukhaisi ba tatemaʼö ia si fao faʼafahuwu. Ba wamobörö, te aombö dödöda börö me lö taʼila hadia zinangea tawaʼö. Hizaʼi, tola taʼombakhaʼö wa omuso sibai dödöda me no falukha ita khönia, ba böi taʼailasi ia.

18. Hewisa wameʼeda famarou dödö khö ndra sanuriaigö si no mamöhöli halöwö ba wamati?

¹⁸ Beʼe khöra wamarou dödö. Tola manö larasoi ira nifahaʼö Yesu wa tebai manuriaigö ira ba zi sagörö ulidanö. Hizaʼi, iʼaroʼö dödöra Yesu ba imane, ”Fao khömi ndraʼo ero maʼökhö.” (Mat. 28:20) Hadia mofozu nifaluania andrö? Mofozu. Lö ara aefa daʼö, laforomaʼö waʼowölö-ölö ba ”wamahaʼö hegöi  ba wanuriaigö turia somuso dödö”. (Hal. 5:42) Moguna göi wamarou dödö khö ndra sanuriaigö si no mamöhöli halöwö ba wamati. Te ataʼu ira ba wamalua mangawuli halöwö fanuriaigö. Moguna tafaduhuʼö khöra wa hasambalö so nawöra ba wanuriaigö, ba tola fao ita khöra na no tefaʼanö ira. Tatu laʼandrö sibai saohagölö börö me no tatuhini ira me ifuli lafalua halöwö fanuriaigö turia somuso dödö. Na taforomaʼö ba niha si no mamöhöli halöwö ba wamati wa yaʼira andrö talifusöda, tola manö ifuli lafalua halöwö fanuriaigö ba tarasoi waʼomuso dödö ba mbanua niha Keriso.

19. Hadia gangetula sinangea tahalö, ba hadia mbörö?

¹⁹ Irugi hawaʼara tafalua halöwö fombaliʼö nifahaʼö? Irugi gamozua götö daʼa. (Mat. 28:20; faigi Geluaha Ngawua Wehede, ”Amozua götö daʼa”.) Hadia tola tafalua halöwö fanuriaigö hegöi fombaliʼö nifahaʼö irugi tohare ginötö andrö? Datahalö gangetula ba wamalua daʼö! Tatehegö ginötöda, faʼabölöda, hegöi kefeda ba wangalui ”niha si sökhi amuata somasi manöndra faʼauri si lö aetu”. (Hal. 13:48) Na tafalua daʼö, no taʼoʼö duma-duma Yesu me imane, ”Daʼö gögu yaʼia wamalua somasi zamatenge yaʼo hegöi ba wangasiwai halöwö nibeʼenia khögu.” (Yoh. 4:34; 17:4) Edöna sibai göi ita ba wamalua simane daʼö. Omasi ita ba wangasiwai halöwö si no mufaduhusi tödö khöda. (Yoh. 20:21) Ba omasi göi ita na fao khöda niha böʼö ba wamalua halöwö andre si fao faʼanau gölö, tefarahu ba daʼö niha si no mamöhöli halöwö ba wamati.​—Mat. 24:13.

20. Moloʼö Filifi 4:13, hana wa tola mofozu ita ba wamalua halöwö si no ibeʼe khöda Yesu?

²⁰ Sindruhu sa, lö aoha khöda ba wamalua halöwö si no ibeʼe Yesu. Hizaʼi, tenga ha yaʼita zamalua halöwö andre. No ifabuʼu khöda Yesu wa hasambalö fao ia khöda. Na tafalua halöwö fombaliʼö nifahaʼö, no tobali ita ”si falulu fohalöwö . . . ba halöwö Lowalangi” ba ”tobali soloʼö khö Keriso”. Daʼö mbörö wa hasambalö itolo ita Yehowa hegöi Yesu ba wamalua halöwö andre. (1 Kor. 3:9; 2 Kor. 2:17) Börö daʼö, tola mofozu ita ba wamalua yaʼia. No töi si sökhi ba no faʼomuso dödö me tola tafalua halöwö daʼa ba tatolo göi niha böʼö ba wamalua yaʼia!​—Baso Filifi 4:13.