1-2. Hewisa woloʼöda mene-mene si so ba Gamaedola 4:25? Beʼe duma-duma.

KHALAIGÖ ösa duma-duma andre. Itörö tödö dalifusöda ira alawe si no alawa döfi wa oya zi sökhi salua khönia me awuyu-wuyu nasa ia. Hizaʼi, börö me no alawa ndröfinia iadaʼa, so ösa daha-taha nitaögönia. Hewaʼae simanö, lö aetu ibeʼe wondrege zi sökhi khö Yehowa. (1 Kor. 15:58) Ero maʼökhö, lö aetu ikhalaigö wa toröi ia ba Waradaiso, ba fao göi khönia niha niʼomasiʼönia. Itörö tödö dalifusöda ira alawe tanö böʼö wa no irai iʼafökhöiʼö dödönia si samösa talifusöda. Hizaʼi, lö omasi ia na itörö-törö manö tödönia daʼö. (Kol. 3:13) Itörö tödö dalifusöda ira matua wa no irai ifalua zala ba zilalö. Hewaʼae simanö, lö iʼosambuaʼö dödönia ba zalania andrö. Hizaʼi, iʼangeragö hewisa lala enaʼö lö faröi ia khö Yehowa.​—Zin. 51:12.

² Hadia waʼafagölö ndra talifusöda si datölu andrö? Fagölö-gölö latörö tödöra zi no irai alua khöra ba zilalö. Hewaʼae simanö, lö laʼosambuaʼö dödöra ba daʼö. Hizaʼi, ’laʼadölöʼö höröra’ ba zi so miföna.​—Baso Gamaedola 4:25.

3. Hana wa moguna ’taʼadölöʼö höröda’ ba zi so miföna?

³ Hana wa moguna ’taʼadölöʼö höröda’ ba zi so miföna? Tebai adölö wofanö zi samösa niha na lö aetu ifaigi zi so furinia. Simanö göi, tebai tabeʼe wondrege zi sökhi khö Yehowa na lö aetu taʼosambuaʼö dödöda ba zi no irai alua khöda mazui si no irai tafalua ba zilalö.​—Luk. 9:62.

4. Hadia nitutunöda ba artikel daʼa?

⁴ Ba artikel daʼa, tatutunö tölu ngawalö zi tola mondrönisi yaʼita irege abua khöda ba wangosambuaʼö tödöda ba zi so miföna: (1) lö aetu tawaʼö tödöda wa abölö sökhi zalua khöda me föna, (2) lö aetu taʼiröʼö waʼabao dödö, ba (3) lö aetu itahi-tahigö ita tödöda. Tatutunö göi ösa mene-mene Zura Niʼamoniʼö  si tola manolo yaʼita irege lö itörö-törö manö tödöda ”fefu hadia ia” zalua ba zilalö, hizaʼi taʼosambuaʼö dödöda ba ”zi so miföna”.​—Fil. 3:13.

5. Moloʼö Zangombakha 7:10, hadia zi tebai tafalua?

⁵ Baso Zangombakha 7:10. Lö iwaʼö ayati andrö wa fasala na tasofu, ”Hadia mbörö, wa no sökhi götö föna?” No buala moroi khö Yehowa fefu zi sökhi salua khöda ba zilalö. Hizaʼi, niwaʼönia, ”Böi ömane: ’Hadia mbörö, wa no sökhi götö föna, moroi ba götö daʼe?’” Ba Zura Niʼamoniʼö famoʼeluaha tanö böʼö, imane ayati andrö, ”Böi sofu, ’Hadia mbörö wa abölö sökhi nasa zalua me götö föna moroi ba götö daʼa?’ Ha niha si lö fangera-ngera zamalua daʼö.” Börö daʼö, moguna taʼangenanöi enaʼö lö tafaedo-faedogö waʼaurida ba zilalö ba waʼaurida iadaʼa, irege tawaʼö tödöda wa itugu lö sökhi zalua khöda iadaʼa.

6. Hana wa tebai tawaʼö tödöda wa abölö sökhi zalua khöda ba zilalö? Beʼe duma-duma.

⁶ Hana wa tebai tawaʼö tödöda wa abölö sökhi zalua khöda ba zilalö? Na lö aetu taʼokhögö lala wangera-ngera simane daʼö, ha si sökhi manö nitöngönida, ba taʼolifugö gabula dödö si no irai tataögö. Duma-dumania, nehegö zalua ba ndraono Gizaraʼeli me götö föna. Me no laröi danö Miserai, iʼanemaiʼö laʼolifugö fefu waʼafökhö nirasoira me toröi ira ba daʼö. Lamane wangumaʼö, ”Itörö tödöma giʼa andrö, niʼama mege ba danö Miserai, si lö böli, ba laʼizu andrö, ba bawa limi ba kalamboza ba bawa ba dasu.” (4 Moz. 11:5) Hizaʼi, hadia ”si lö böli” fefu gö niʼara andrö? Tenga. Sindruhunia, tenga saoha wanöndrara fefu daʼö. Me luo daʼö, lataögö wamakao börö me laʼosawuyu ira ba danö Miserai. (2 Moz. 1:13, 14; 3:6-9) Hizaʼi ba gafuriata, laʼolifugö fefu waʼafökhö nitaögöra, ba omasi ira na ifuli larasoi waʼauri simane ba zilalö. Ha si sökhi ba zilalö niʼera-erara, ba laʼolifugö fefu zi sökhi sawena ifalua khöra Yehowa. Fatuwu sibai Yehowa ba gamuatara andrö.​—4 Moz. 11:10.

7. Hadia zanolo si samösa talifusöda ira alawe irege lö iwaʼö tödönia wa abölö sökhi zalua khönia ba zilalö?

⁷ Hewisa lala enaʼö lö tawaʼö tödöda wa abölö sökhi zalua khöda me föna? Nehegö duma-duma dalifusöda ira alawe sangai  halöwö ba Mbetieli Brooklyn iʼotarai me döfi 1945. Hauga fakhe aefa daʼö, mangowalu ia khö dalifusöda ira matua sohalöwö ba Mbetieli, ba fao ira wangai halöwö ba zi hauga fakhe faʼara. Hizaʼi, me döfi 1976, mofökhö woʼomonia. Lö ara fatua lö mate ia, ibeʼe ösa mene-mene khö dalifusöda ira alawe andrö si tobali fangabölöʼönia. Imane khönia foʼomonia, ”Omuso dödöda ba wongambatöda. Ato niha si lö irai morasoi simane daʼö.” Imane nasa, ”Tatu lö olifu ndraʼugö fefu zi sökhi si no irai tatörö. Hizaʼi, böi era-era manö daʼö. Na itugu ara numalö ginötö, hasambalö alö waʼabu dödömö. Böi tema öbusi tödö ba öhakhösi tödö ndraʼugö samösa. Hizaʼi, andrö saohagölö ba ngawalö waʼomuso dödö hegöi howu-howu si no tatema. . . . Fefu zi sökhi si no numalö andrö, no buala moroi khö Lowalangi.” Sökhi sibai mene-mene nibeʼenia andrö!

8. Hadia mbua nirasoi dalifusöda ira alawe andrö börö me iʼoʼö mene-mene woʼomonia?

⁸ Iʼoʼö mene-mene nibeʼe woʼomonia talifusöda ira alawe andrö. Lö faröi ia ba wangai halöwö khö Yehowa irege mate ia me 92 fakhe ndröfinia. Hauga fakhe fatua lö mate ia, imane wangumaʼö, ”No mangai halöwö safönu inötö ndraʼo khö Yehowa ba zi töra 63 fakhe. Na ifuli itörö tödögu fefu zi no ulalöi, urasoi wa sindruhu-ndruhu moʼeluaha waʼaurigu.” Imane nasa, ”Tola tarasoi waʼomuso dödö börö me taʼokhögö waʼafatalifusöta sahöli-höli dödö hegöi tötönafö faʼauri ba Waradaiso fao khö ndra talifusöda. Ba daʼö, tafosumange Zomböi yaʼita, Lowalangi sindruhu si ha samösa sotöi Yehowa, sagötö faʼara.” * Sindruhu-ndruhu iʼosambuaʼö dödönia talifusöda ira alawe andrö ba mbuʼusa li Yehowa sanandrösa ba zi so miföna. No duma-duma si sökhi nifaluania andrö!

9. Simane nisura ba 3 Moze 19:18, hadia mbörö wa tola abua khöda ba wangefaʼö sala niha si no mangafökhöiʼö tödöda?

⁹ Baso 3 Moze 19:18. Tola manö abua khöda ba wangefaʼö sala niha si no irai mangafökhöiʼö tödöda, mendrua manö na talifusöda  ba wamati zamalua daʼö, si fahuwu khöda, mazui ösi nomoda. Duma-dumania, so samösa dalifusöda ira alawe samobahulu talifusöda ira alawe tanö böʼö, ba iwaʼö wa no itagö gefenia talifusöda andrö, hizaʼi sindruhunia lö atulö daʼö. Ba gafuriata, iʼandrö waʼebolo dödö talifusöda ira alawe samobahulu yaʼia. Hizaʼi, lö manö taya waʼabao dödö dalifusöda nifobahulu, ba lö aetu itörö tödönia zalua andrö. Hadia no irai alua khömö zimane daʼö? Hewaʼae na lö irai alua khöda zimane salua khö dalifusöda ira alawe andrö, hizaʼi te no irai abao dödöda, ba abua khöda ba wangefaʼö sala niha sangafökhöiʼö tödöda.

10. Hadia zanolo yaʼita na lö aetu tarasoi waʼabao dödö?

¹⁰ Hadia zanolo yaʼita na lö aetu tarasoi waʼabao dödö? Sambua ba gotaluania, böi taʼolifugö wa lö hadöi si tobini föna Yehowa. Aboto ba dödö Yehowa fefu zalua khöda, tefarahu ba daʼö na so niha samalua khöda si lö atulö. (Heb. 4:13) Abu dödö Yehowa na tefakao ita. (Yes. 63:9) Ba no ifabuʼu khöda wa ba zi so miföna, hasambalö iheta fefu wangabu dödö salua khöda börö me tataögö walöʼatulö.​—Fam. 21:3, 4.

11. Hadia mbua si tola tarasoi na taheta khöda waʼabao dödö?

¹¹ Moguna göi tatörö tödöda wa hasambalö tatema mbua si sökhi na taʼefaʼö zala niha böʼö. Daʼö nirasoi dalifusöda ira alawe nifobahulu no mege. Ba gafuriata, iʼefaʼö zala dalifusöda samobahulu yaʼia, ba lö saʼae abao dödönia. Aboto ba dödönia wa hasambalö iʼefaʼö zalania Yehowa na iʼefaʼö zala niha böʼö. (Mat. 6:14) Hewaʼae na no iʼefaʼö zala dalifusöda samobahulu yaʼia, tenga daʼö geluahania wa iʼaohasi ba dödö mazui fao dödönia ba gamuata dalifusöda andrö. Hizaʼi, omasi ia ba wangeheta faʼabao dödönia. Buania, itugu irasoi waʼomuso dödö ba tola iʼosambuaʼö dödönia ba wamosumange Yehowa.

12. Hadia wamahaʼö si tola tahalö moroi ba 1 Yohane 3:19, 20?

¹² Baso 1 Yohane 3:19, 20. Fefu ita, itaria tarasoi wa itahi-tahigö ita tödöda. Duma-dumania, so ösa zorasoi simane daʼö börö gamuatara ba zilalö, fatua lö lafahaʼö ira ba zindruhu. So göi zorasoi simane daʼö börö zala si no lafalua me no aefa tebayagö ira idanö. No si toʼölö daʼö. (Rom. 3:23) Tatu manö, omasi ita ba wamalua satulö. Hizaʼi, ”asese fasala ita fefu”. (Yak. 3:2; Rom. 7:21-23) Hewaʼae na lö omasi ita na itahi-tahigö ita tödöda, sindruhunia tola möi fanoloda daʼö. Hadia mbörö? Börö me daʼö zamarou tödöda ba wombulöʼö faʼaurida ba tahalö gangetula enaʼö lö ifuli tafalua zala.​—Heb. 12:12, 13.

13. Hana wa moguna taʼangenanöi na lö aetu itahi-tahigö ita tödöda?

¹³ Tola manö lö aetu itahi-tahigö ita tödöda hewaʼae na no tabulöʼö lala wangera-ngerada ba no iʼefaʼö zalada Yehowa. Tola tobali teʼala khöda na tarasoi zimane daʼö. (Zin. 31:11; 38:4, 5) Hadia mbörö? Nehegö duma-duma dalifusöda ira alawe samorege ba wolawa fangera-ngera simane daʼö börö horö si no ifalua ba zilalö. Imane, ”Urasoi wa zaya-zaya gölö na uforege wangai halöwö khö Yehowa börö me uwaʼö tödögu, te lö saʼae teʼorifi ndraʼodo andre.” Ato ba gotaluada zorasoi simane daʼö. Börö daʼö, moguna taʼangenanöi lala wangera-ngera simane daʼö. Baero daʼö, angeragö hawaʼomuso dödö Zatana na awuwu ita ibeʼe fangera-ngerada samösa, hewaʼae na sindruhunia no iʼefaʼö zalada Yehowa!​—Fatimbaisi 2 Korindro 2:5-7, 11.

14. Hewisa wa tola faduhu dödöda wa no iʼefaʼö zalada Yehowa?

¹⁴ Tola manö manofu-nofu dödöda, ’Hewisa wa tola faduhu dödögu wa no iʼefaʼö zalagu Yehowa?’ Na ösofu zimane daʼö, daʼa zangoromaʼö wa tola iʼefaʼö zalamö Yehowa.  Ba zi ngafulu fakhe silalö, imane majalah The Watchtower, ”[Tola manö] tafuli tafalua zala si fagölö ba zi hauga kali. Te abua khöda ba wondröi amuata si lö sökhi sasese tafalua ba zilalö fatua lö tobali ita samosumange Lowalangi. . . . Böi aetu wanötönamö. Böi waʼö tödömö wa no öfalua horö si tebai iʼefaʼö Yehowa. Omasi Zatana na öʼokhögö lala wangera-ngera simane daʼö. Tatu manö abu dödömö ba fawuka wangera-ngeramö na öfalua zala. Hizaʼi sindruhunia, daʼa zangoromaʼö wa tenga niha si lö sökhi ndraʼugö, ba tola iʼefaʼö zalamö Yehowa. Böi aetu okhögö wangide-ngideʼö, ba böi böhöli wangandrö khö Lowalangi enaʼö iʼefaʼö zalamö, ibeʼe khöu dödö side-ide si lö sinegu, ba itolo ndraʼugö ba wamöhöli amuata si fasala andrö. Hewaʼae na asese alua gabula dödö si fagölö khö zi samösa iraono, lö aetu iʼandrö wanolo moroi khö namania. Börö daʼö, böi aetu andrö wanolo moroi khö Yehowa, ba hasambalö itolo ndraʼugö börö waʼasökhi dödönia sebua.” *

15-16. Hadia nirasoi ndra talifusöda me laʼila wa no iʼefaʼö zalara Yehowa?

¹⁵ Ato nono mbanua Yehowa si terara tödö börö me laʼila wa no iʼefaʼö zalara Yehowa. Duma-dumania, ba zi hauga fakhe silalö, so samösa dalifusöda ira matua zi terara tödö me no aefa ibaso seri ”Alkitab Mengubah Kehidupan”. Ba artikel andrö, itutunö si samösa talifusöda ira alawe wa ambö faduhu dödönia wa tola iʼomasiʼö ia Yehowa börö zi lö sökhi si no irai ifalua ba waʼaurinia. Lö aetu irasoi zimane daʼö hewaʼae no hauga fakhe tebayagö ia idanö. Hizaʼi, awena ibörögö faduhu dödönia wa iʼomasiʼö ia Yehowa börö me no ihaogö iʼangerönusi höli si no itema. *

¹⁶ Hadia lua-lua waö-waö waʼauri andrö khö dalifusöda ira matua no mege? Imane, ”Me awuyu-wuyudo, sandru ndraʼo ba wamaigi pornografi. Barö-barö daʼa, ifuli zui ufalua daʼö. Uʼandrö wanolo moroi khö ndra satua sokubaloi, ba ibörögö uböhöli wamalua daʼö. Lafaduhuʼö khögu ira satua sokubaloi andrö wa iʼomasiʼö ba ihakhösi tödö ndraʼo Lowalangi. Hizaʼi, itaria urasoi wa lö eluaha waʼaurigu, ba lö iʼomasiʼö ndraʼo Yehowa. Sindruhu-ndruhu wa tola möi fanologu waö-waö waʼauri [dalifusöda ira alawe] andrö. Iadaʼa, no aboto ba dödögu, na uwaʼö tödögu wa tebai iʼefaʼö zalagu Lowalangi,  eluahania lö ibönö höli nibeʼe Nononia ba wangefaʼö horögu. No uguti khögu artikel andrö enaʼö tola ubaso ba uʼangerönusi daʼö ero na ifuli urasoi wa lö eluaha waʼaurigu.”

17. Hadia nifalua Waulo enaʼö lö itahi-tahigö manö ia tödönia?

¹⁷ Waö-waö waʼauri simane daʼö zamasugi ba dödöda salua khö zinenge sotöi Faulo. Fatua lö tobali ia niha Keriso, oya sibai horö sebua nifaluania. Lö olifu Waulo zi no ifalua, hizaʼi lö iʼera-era manö daʼö. (1 Tim. 1:12-15) Faduhu dödönia wa khönia samösa mufanandrösa höli andrö. (Gal. 2:20) Börö daʼö, lö itehegö itahi-tahigö manö ia tödönia, ba iʼosambuaʼö dödönia ba wameʼe fondrege zi sökhi khö Yehowa.

18. Hadia wamahaʼö si tola tahalö moroi ba artikel daʼa?

¹⁸ Hadia wamahaʼö si tola tahalö me no tatutunö dandrawa si tölu ngawalö ba artikel daʼa? (1) No buala moroi khö Yehowa fefu zi sökhi salua khöda ba zilalö, hizaʼi gofu hewisa waʼaurida ba zilalö, abölö sökhi nasa dania waʼaurida ba gulidanö si bohou. (2) Tola manö laʼafökhöiʼö dödöda niha böʼö, hizaʼi na taʼefaʼö zalara, tola taʼosambuaʼö dödöda ba wamosumange Yehowa iadaʼa. (3) Na lö aetu itahigö ita tödöda, tola tobali fanaisida daʼö irege lö khöda faʼomuso dödö ba wamosumange Yehowa. Börö daʼö, simane Faulo, moguna faduhu dödöda wa no iʼefaʼö zalada Yehowa.

19. Hezo tola taʼila wa lö saʼae itörö tödöda fefu zi lö sökhi salua ba zilalö na auri ita ba gulidanö si bohou?

¹⁹ No taʼokhögö dötönafö faʼauri si lö aetu. Na auri ita ba gulidanö si bohou, lö saʼae itörö tödöda fefu zi lö sökhi salua ba zilalö. Iwaʼö Sura Niʼamoniʼö wa ba ginötö daʼö, ”lö saʼae itörö tödö ziföföna andrö”. (Yes. 65:17) Angeragö atö: So ösa ba gotaluada zi no numalö döfi ba wangai halöwö khö Yehowa, hizaʼi ifuli dania awuyu-wuyu ita ba gulidanö si bohou. (Yob. 33:25) Börö daʼö, datahalö gangetula ba wangosambuaʼö tödöda ba gulidanö si bohou, ba taforege ba wamalua si sagu khöda iadaʼa enaʼö tola auri ita ba daʼö!