Fanofu Zombaso
Hadia tola la’oguna’ö ira niha Keriso fangöna simane pistol hegöi fana, ba wolumö’ö fa’aurira samösa moroi ba niha bö’ö?
Goi-goi da’ö zangoroma’ö wa fasala niha Keriso na la’oguna’ö fangöna simane pistol, fana mazui ngawalö fangöna tanö bö’ö ba wolumö’ö wa’aurira moroi ba niha bö’ö. Angeraigö hadia mbörö:
No ni’amoni’ö wa’auri niha föna Yehowa. Isura sanura zinunö sotöi Dawido sanandrösa khö Yehowa imane, ”Khöu sa so gumbu wangorifi andrö.” (Zinunö 36:10) Börö da’ö, na ifili zi samösa niha Keriso ba wolumö’ö fa’aurinia mazui gokhötania, böi ifalua fefu hadia ia zame’e mo’ömö do ia, ya’ia da’ö i’onorogö tödö wa’amate zi samösa niha.—V Moze 22:8; Zinunö 51:16.
Atulösa wa fefu hadia ia ni’oguna’ö zi samösa niha ba wolumö’ö fa’aurinia, tola manga’asogö ömö do ba wa’aurinia. Hiza’i, aoha wamunu zi samösa niha na la’oguna’ö wangöna, hewa’ae lö la’odödögö mazui la’odödögö wamalua ya’ia. * (Faigi nisura ba gahe zura.) Aefa da’ö, tola manö ibörötaigö ata’u niha samalua zi lö sökhi, ba na i’ila wangöna ba da’ö, tola itugu lö sökhi zalua ba tola manö so niha si mate.
Me iwa’ö Yesu khö ndra solo’ö khönia ba mbongi fatua lö mate ia ba wolohe föda, tenga da’ö geluahania wa la’oguna’ö da’ö ba wolumö’ö fa’aurira. (Luka 22:36, 38) Sindruhunia, omasi Yesu ifaha’ö ira sambua famaha’ö: Ena’ö böi lafalua zi lö sökhi ira solo’ö khönia hewa’ae na la’okhögö wangöna ira niha solawa ya’ira. (Luka 22:52) Me no aefa i’oguna’ö wöda Fetero ba wolawa zawuyu gere sebua, imane khönia Yesu, ”Saembugö wödamö.” Aefa da’ö, ibe’e goi-goi si tobali fanuturu lala ba niha Keriso irugi iada’a. Imane, ”Dozi sa sangai föda, ba föda wamunura.”—Matai’o 26:51, 52.
Simane nifa’ele’ö ba Mikha 4:3, ono mbanua Lowalangi ”labali’ö faku zi’ölira si’öli nihaogö, ba tohora, ba labali’ö fondra’a”. La’ila ira niha Keriso sindruhu wa moguna tobali ira solohe wa’atulö. La’o’ö niwa’ö Lowalangi nibe’enia khö zinenge sotöi Faulo, ”Böi misulöni zi lö sökhi awönia si lö sökhi, ba niha” ba ”ya’atulö ami ba niha fefu.” (Roma 12:17, 18) Hewa’ae ba ginötö si basaki so Waulo, simane ”ameta’uö sange’e”, lö irai ilawa goi-goi Zura Ni’amoni’ö ba wolumö’ö fa’aurinia. (II Korindro 11:26) Hiza’i, faduhu dödönia khö Lowalangi ba i’ila wa mene-mene satua-tua moroi ba Zura Ni’amoni’ö ”sökhi moroi ba wangöna”.—Zangombakha 9:18.
Ba niha Keriso, abölö tohude wa’auri moroi ba harato. Ta’ila wa fa’auri zi samösa niha ”tenga moroi ba haratonia, hewa’ae no fahöna khönia da’ö”. (Luka 12:15, Terjemahan Dunia Baru) Andrö, na lö ibato nifaluania si samösa niha sorabu si so fangöna hewa’ae no tahaogö wahuhuosa khönia, sökhi na ta’o’ö mene-mene Yesu andre, ”Böi milawa zi lö sökhi andrö.” Tola manö eluahania, tatehegö ihalö gofu hadia ia zomasi ia. (Matai’o 5:39, 40; Luka 6:29) * (Faigi nisura ba gahe zura.) Tatu manö, abölö sökhi na ta’alui lala ena’ö böi tobali ita ohitö dödö niha si lö sökhi. Te lö la’ondrasi ita na ta’o’ö mene-mene moroi ba Zura Ni’amoni’ö ba tatimbagö ”fefu, hadia ia, zi so ba gulidanö”. (I Yohane 2:16) Telumö’ö göi ita na la’ila ira si faola omo khöda wa ya’ita Samaduhu’ö Yehowa somasi satulö.—Gamaedola 18:10.
La’ame’egö tödö dödö side-ide niha bö’ö ira niha Keriso. (Roma 14:21) So ösa ndra talifusöda si tokea mazui si tetutu tödö na la’ila wa so samösa dalifusöda ira matua niha Keriso sangokhögö fangöna ba wolumö’ö fa’aurinia moroi ba niha bö’ö. Te lö lahuku ita ira samatörö na ta’okhögö wangöna, hiza’i börö me ta’omasi’ö ndra talifusöda, lö tafalua gofu hadia zi tetutu ba dödöra.—I Korindro 10:32, 33; 13:4, 5.
Omasi niha Keriso tobali duma-duma si sökhi ba niha bö’ö. (II Korindro 4:2; I Fetero 5:2, 3) Na so samösa niha Keriso zangokhögö fangöna ba wolumö’ö fa’aurinia moroi ba niha bö’ö, labe’e khönia mene-mene moroi ba Zura Ni’amoni’ö ira satua sokubaloi. Na lö ibulö’ö gangetulania, tenga duma-duma si sökhi ia. Lua-luania, tola manö tebai i’okhögö fefu ngawalö halöwö si tohude ba mbanua niha Keriso. Tefalua göi da’a ba niha Keriso sangokhögö lala halöwö si lö tola lö’ö molohe fangöna. Abölö sökhi na i’alui lala halöwö tanö bö’ö. *—Faigi nisura ba gahe zura.
Moguna ihalö samösa gangetula niha Keriso sanandrösa ba lala nifaluania ba wolumö’ö fa’aurinia samösa, ösi nomonia, haratonia, hegöi halöwö nifilinia. Hiza’i, ba ginötö ihalö gangetula, moguna ifodane-dane gangetulania andrö ba goi-goi Zura Ni’amoni’ö. Lowalangida safönu fa’atua-tua, ibe’e khöda goi-goinia börö me i’omasi’ö ita. Da’ö mbörö wa niha Keriso sangokhögö fahuwusa saro khö Yehowa, ifili wa lö i’oguna’ö wangöna ba wolumö’ö fa’aurinia moroi ba niha bö’ö. La’ila wa na lafaduhusi tödö Lowalangi ba la’o’ö goi-goi si so ba Zura Ni’amoni’ö ba wa’aurira, la’okhögö wa’ahono dödö satulö sagötö fa’ara.—Zinunö 97:10; Gamaedola 1:33; 2:6, 7.
Sagötö alua wamakao sabölö-bölö, la’odaligö Yehowa ira niha Keriso ba lö irai latandraigö ba wolumö’ö fa’aurira samösa
^ par. 3 Tola manö ihalö gangetula zi samösa niha Keriso ba wangokhögö wangöna (simane fana mazui fana angi) ba wangalui gurifö si tobali diwo mazui ba wolumö’ö wa’aurira ba gurifö samu’i. Tatu, na lö i’oguna’ö wangöna andrö, moguna iheta nono wana moroi ba wana andrö, ba i’irö’ö ba nahia si so ono kusi. Na ba mbanua da’ö lö latehegö ira samatörö ba wangokhögö fangöna mazui so lala tanö bö’ö nihenaigöra ba wotatugöi niha sinangea wangokhögö da’ö, moguna la’o’ö goi-goi da’ö ira niha Keriso.—Roma 13:1.
^ par. 6 Ena’ö ö’ila lala tanö bö’ö ba wolumö’ö fa’aurimö moroi ba niha somasi mohoröni ya’ugö, faigi artikel ”Cara Mencegah Pemerkosaan” ba Sedarlah! 8 Mbaŵa si Tölu 1993.
^ par. 2 Ena’ö ö’ila gonönöta sanandrösa ba halöwö si lö tola lö’ö molohe fangöna, faigi Menara Pengawal 1 Mbaŵa si Felezara 2005, nga’örö 31; hegöi Watchtower 15 Mbaŵa si Fitu 1983, nga’örö 25-26.
