1, 2. Hana wa moguna tatutunö lala wame’e fondrara dödö ba niha si göna abula dödö börö wa’amate? (Faigi gambara ba wamobörö wamaha’ö.)

IMANE Susi, ”No arakhagö döfi mate nonoma matua, afökhö sibai dödöma ba tefakao wa’aurima.” Imane samösa talifusöda ira matua wa tebai ”itutunö hewisa wa’afökhö nirasoinia” me no aefa mate wo’omonia ba zi lö mudöna-döna. Ato sibai niha zanaögö fa’afökhö simane da’ö. Ba mbanua niha Keriso iada’a, ato ndra talifusöda si lö omasi na mate niha ni’omasi’öra fatua lö alua Hamagedo. Te so niha ni’omasi’ömö si no mate mazui ö’ila wa so niha si göna abula dödö börö wa’amate. Na alua da’ö, te manofu ndra’ugö, ’Hewisa ena’ö niha si göna abula dödö börö wa’amate, lasöndra wondrara dödö?’

² So ösa niha zanguma’ö wa inötö zi tola mamadöhö fefu zokho. Hiza’i, hadia simane da’ö zalua? Imane samösa ira alawe lakha mbanua, ”Molo’ö si no irai urasoi, si tola mamadöhö zokho ya’ia da’ö hewisa lala wangoguna’önia inötö.” Moguna ginötö hegöi fondrorogö si fao fa’ebolo  dödö ba wamadöhö zokho si so ba mboto. Simanö göi, moguna ginötö hegöi fondrorogö si fao fa’ebolo dödö ba wamadöhö fa’afökhö si so ba dödöda. Sindruhunia, hadia zanolo niha si göna abula dödö ena’ö alö wa’afökhö nirasoira börö wa’amate?

3, 4. Hana wa tola faduhu dödöda wa i’ila Yehowa wa’afökhö nirasoida börö wa’amate?

³ Amada Yehowa safönu fa’omasi si oföna sibai mame’e khöda fondrara dödö ni’oguna’öda. (Baso II Korindro 1:3, 4.) Ya’ia andre duma-duma sebua sangoroma’ö wa irasoi hadia nirasoi niha bö’ö ba ifabu’u ba niha, ”Ya’o, ya’odo zondrara tödömi.”​—Yesaya 51:12; Zinunö 119:50, 52, 76.

⁴ Amada sebua fa’omasi no irai göi irasoi hewisa me mate niha ni’omasi’önia, simane samosumange ya’ia sotöi Aberahamo, Iza’aki, Yakobo, Moze, hegöi Razo Dawido. (IV Moze 12:6-8; Matai’o 22:31, 32; Halöwö Zinenge 13:22) Iforoma’ö khöda Sura Ni’amoni’ö wa ibalo-baloi Yehowa ginötö ba wanusugi niha si lö faröi andre. (Yobi 14:14, 15) Ba ginötö da’ö, lasöndra wa’omuso dödö hegöi larasoi wa’alöfökhö so’ahonoa. No irai göi irasoi Yehowa hewisa wa’afökhö me mate Nononia sia’a. Iwa’ö Sura Ni’amoni’ö wa Yesu andrö no ”fa’omuso dödö” khö Lowalangi. (Gamaedola 8:22, 30) Tebai takhalaigö hewisa wa’afökhö nirasoi Yehowa me i’ila mate Nononia ba wa’amate safökhö.​—Yohane 5:20; 10:17.

5, 6. Hewisa wame’e Yehowa fondrara dödö khöda?

⁵ Tola sindruhu-ndruhu faduhu dödöda wa hasambalö itolo ita Yehowa. Da’ö mbörö wa lö aiwö ita ba wangandrö ba tatutunö khönia wa’afökhö hegöi fa’abu dödö nirasoida. Tatu omuso sibai dödöda börö me ta’ila wa aboto ba dödö Yehowa hadia nirasoida ba ibe’e khöda wondrara dödö soguna khöda! Hiza’i, hewisa wamaluania da’ö?

⁶ Sambua lala nifalua Yehowa ba wondrara tödöda ya’ia da’ö i’oguna’ö gehehania. (Halöwö Zinenge 9:31) No ifabu’u Yesu wa hasambalö ibe’e Amada wa’abölö moroi ba gehehania ni’amoni’ö ba niha sangandrö khönia. (Luka 11:13) Imane Susi, nitutunö ba wamobörö, ”Asese matuhi danö khö Yehowa ba ma’andrö ena’ö ibe’e khöma wondrara dödö. Ero na mafalua da’ö, fa’ohahau dödö sindruhu moroi khö Lowalangi zondrorogö tödö hegöi fangera-ngerama.”​—Baso Filifi 4:6, 7.

7, 8. Hana wa tola faduhu dödöda wa hasambalö ibe’e khöda wondrara dödö Yesu?

⁷ Me so Yesu ba gulidanö, mo’ahonoa wolo’önia mbua-mbua si sökhi moroi khö Namania ba lala wehedenia hegöi ba nifaluania. (Yohane 5:19) Ifatenge  Yesu ba gulidanö Yehowa, ba wame’e fondrara dödö ba niha si no ”arasa tödö” hegöi ’fefu zabu tödö’. (Yesaya 61:1, 2; Luka 4:17-21) La’ila niha wa aboto ba dödö Yesu wanandraigö nitaögöra ba omasi ia itolo ira.​—Heberai’o 2:17.

⁸ Me awuyu-wuyu Yesu, te so niha sahatö khönia hegöi ösi nomonia si no mate. Duma-dumania, te awuyu-wuyu ndröfi Yesu me mate namania sotöi Yosefo, si tenga amania sindruhu. * (Faigi nisura ba gahe zura.) Khalaigö hewisa wa’abua ba niha sawuyu-wuyu so’ame’egö tödö niha bö’ö ba wondrorogö ena’ö anau gölönia ba wanaögö abula dödö andrö hegöi ba wame’e fondrara dödö khö ninania ba ira talifusönia.

9. Hewisa wangoroma’ö Yesu wa irasoi hadia nirasoi niha bö’ö me mate Lazaro?

⁹ Sagötö fanuriaigönia, iforoma’ö Yesu wa sindruhu-ndruhu aboto ba dödönia niha ba irasoi hadia nirasoira. Duma-dumania, ba ginötö mate zi fahuwu khönia sotöi Lazaro, fao ia ba wa’afökhö nirasoi Maria hegöi Marata. Irasoi sibai hadia nirasoira, irege ibörötaigö me’e ia hewa’ae sindruhunia i’ila wa tola ifuli isusugi Lazaro andrö.​—Yohane 11:33-36.

10. Hewisa wa tola faduhu dödöda wa aboto ba dödö Yesu hadia nirasoida iada’a?

¹⁰ Hewisa wa möi fanoloda wehede fondrara dödö moroi khö Yesu ba götö föna? Itutunö Sura Ni’amoni’ö wa lö si tebulö Yesu. Imane, ”Yesu Keriso andrö, ba ya’i-ya’ia manö, he menewi, ba he ma’ökhö, ba he irugi zi lö aetu.” (Heberai’o 13:8) Lafotöi ia ’Salawa sangorifi’ börö me itehegö ta’okhögö wa’auri si lö aetu. Ba aboto göi ba dödö Yesu gabula dödöda zamösana ba ”i’ila itolo nitandraigö andrö”. (Halöwö Zinenge 3:15; Heberai’o 2:10, 18) Andrö, tola faduhu dödöda wa irasoi Yesu wa’afökhö nirasoi niha bö’ö. Aboto ba dödönia gabula dödöra ba ibe’e khöra wondrara dödö ’ba ginötö si tefaudu’.​—Baso Heberai’o 4:15, 16.

11. Hadia ayati Zura Ni’amoni’ö sabölö mame’e khömö fondrara dödö?

¹¹ Waö-waö sanandrösa ba wa’abu dödö nirasoi Yesu me mate Lazaro awena sambua moroi ba ayati tanö bö’ö si möi fondrara dödöda ni’ilada ba Daromali Lowalangi. Lö tokea ita ba da’ö, börö me ”hadia ia sa nisura föna, ba ba wamaha’ö ya’ita tesura ia, ena’ö so khöda wanötöna andrö, moroi ba wa’ebolo dödö andrö ba moroi ba wondrara dödö andrö, nirongoda ba Zura”. (Roma 15:4) Na örasoi wa’abu dödö börö wa’amate, tola ösöndra wondrara dödö same’e khömö fa’ahono dödö moroi ba Zura Ni’amoni’ö, simane:

• ”Ahatö Yehowa ba zi no arasa tödö ba itolo zi no atata era-era.”​—Zinunö 34:19, 20.

• ”Ba wa’oya ngawalö wa’abu dödögu andrö, ba i’okafui dödögu  [Yehowa] fondrara tödö andrö khöu.”​—Zinunö 94:19.

• ”Ba ya’ia, So’aya ya’ita, Yesu Keriso ba Lowalangi, Amada, si no mangomasi’ö ya’ita, ba si no mame’e fondrara dödö khöda, si lö aetu, awö wanötöna, si sökhi, ba wa’ebua dödö, ba yamurara dödömi ba yamu’a’aro’ö.”​—II Tesalonika 2:16, 17. *—Faigi nisura ba gahe zura.

12. Hewisa wame’eda fondrara dödö ba niha bö’ö?

¹² Niha si göna gabula dödö börö wa’amate tola lasöndra wondrara dödö ba mbanua niha Keriso. (Baso I Tesalonika 5:11.) Hewisa wangaro’ömö hegöi wame’emö fondrara dödö ba niha ’sarasa tödö’? (Gamaedola 17:22) Törö tödömö wa ’so ginötönia fahuhuo ba so ginötönia lö hede-hede’. (Zangombakha 3:7) Samösa ira alawe lakha mbanua sotöi Dalene, itutunö wa si göna gabula dödö börö wa’amate moguna latutunö wangera-ngera hegöi nirasoira. Börö da’ö, lala sabölö moguna öfalua ya’ia da’ö öhaogö öfondro-ndrongo ba böi taba dalu huhuora. Imane Junia sangokhögö talifusö ira matua si no mamunu ya’ia samösa, ”Hewa’ae ambö aboto ba dödömö gabula dödöra, hiza’i sabölö moguna ya’ia da’ö omasi’ö örasoi hadia nirasoira.”

13. Hadia zinangea tatörö tödöda sanandrösa ba gabula dödö börö wa’amate?

¹³ Moguna tatörö tödöda wa fefu ita lö fagölö-gölö worasoida hegöi wanaögöda abula dödö. Itaria, lö aoha khöda ba wanutunö hawa’abua wa’afökhö nirasoida. Imane Taromali Lowalangi, ”Tödö zangila safökhö khönia; ba tebai ihalö khönia niha bö’ö wa’omuso dödö zamösana.” (Zangombakha 14:10) Hewa’ae na itutunö si samösa niha hadia nirasoinia, itaria lö aboto ba dödö niha bö’ö hadia nirasoinia.

14. Hadia zi tola tawa’ö ba wondrara tödö niha si göna abula dödö börö wa’amate?

¹⁴ Tola manö abua khöda ba wotatugöi hadia zinangea tawa’ö ba niha si göna abula dödö börö wa’amate. Hiza’i, imane Sura Ni’amoni’ö wa ”lela zatua-tua ba no dalu-dalu”. (Gamaedola 12:18) Ato zi no manöndra ngawua wehede fondrara dödö si so ba brosur Bila Seseorang yang Anda Kasihi Meninggal. * (Faigi nisura ba gahe zura.) Si to’ölönia, lala sabölö sökhi si tola öfalua ya’ia da’ö ”mi’ege-ege awö zege-ege”. (Roma 12:15) Gaby, si no mate wo’omonia  ira matua, iwa’ö wa itaria hatö fe’e zi tola ifalua ba wanutunö hadia nirasoinia. Imane nasa, ”Terara dödögu börö me fao ndra awögu ba we’e. Ba ginötö da’ö, urasoi wa tenga ha ya’odo samösa zorasoi abula dödögu andre.”

15. Hewisa wame’eda fondrara dödö ba niha bö’ö na abua khöda wamalua da’ö? (Faigi göi kotak ” Fehede Fondrara Dödö Same’e Fa’ahono Dödö”.)

¹⁵ Na abua khömö ba wotatugöi hadia niwa’ömö ba wondrara dödö niha bö’ö, te aoha khömö ba wama’ohe’ö kartu, e-mail, SMS, mazui sura. Tola ö’adogoi’ö wanutunö ayati Zura Ni’amoni’ö si möi fondrara dödö, mbua-bua si sökhi ni’okhögö niha si no mate andrö si tebai ö’olifugö mazui ötutunö hadia zi sökhi si no irai mifalua. Imane Junia, ”Ebua sibai mbua nitemagu me utema zura sadogo-dogo samarou tödögu mazui me lakaoni ndra’odo ira talifusöda si sara lala wamati ena’ö u’oguna’ö ginötögu ba wariawösa khöra. Moroi ba nifaluara urasoi wa la’omasi’ö ba la’ame’egö tödö ndra’o.”

16. Hadia lala sabölö tefaudu ba wame’e fondrara dödö ba niha bö’ö?

¹⁶ Fangandröda tola möi fondrara dödö khö ndra talifusöda si göna abula dödö börö wa’amate. Tola mangandrö ita salahira mazui fao ita khöra ba wangandrö. Hewa’ae abua wamalua da’a börö me tola ibörötaigö me’e ndra’ugö, hiza’i fangandrö soroi ba dödö nifaluamö tola tobali fondrara dödö sebua da’ö. Ifuli itörö tödö Dalene imane, ”Itaria ba ginötö möi ndra talifusöda ira alawe ba wondrara tödögu, u’andrö khöra ena’ö lalau mangandrö.  Me awena labörögö wangandrö, si to’ölönia aetu-aetu dalu wangandröra. Hiza’i me no ara ma’ifu, ibörögö la’ila lafa’oli niwa’öra ba sindruhu-ndruhu moroi ba dödö wangandröra andrö. Famatira saro, fa’omasira hegöi fo’ame’egöra tödö, sindruhu-ndruhu möi fanga’aro’ö wamati.”

17-19. Hana wa moguna böi mamalö tabe’e wondrara dödö?

¹⁷ Lö ta’ila tatatugöi hawa’ara awena alö wa’abu dödö zi samösa niha börö wa’amate. Ba ginötö mate niha ni’omasi’öra, ato zi fahuwu khöra hegöi ösi nomora zame’e fondrara dödö. Hiza’i, sindruhunia na no aefa lafuli ira ba lala wa’aurira si to’ölö, moguna nasa wondrara dödö ba niha si göna abula dödö börö wa’amate andrö. Andrö, moguna tabe’e ginötöda wa wanolo ya’ira. ”Sindruhu si fahuwu, ba no fadoro i’omasi’ö nawönia; ba ba wamakao, ba tumbu ia si fatalifusö.” (Gamaedola 17:17) Moguna tarara dödö niha si göna abula dödö börö wa’amate sagötö moguna khöra da’ö.​—Baso I Tesalonika 3:7.

¹⁸ Törö tödömö wa so ginötönia tola manö atage zi samösa niha börö gabula dödö nitaögönia. Tola manö alua da’a börö me itörö tödönia ginötö wangowalu mazui fa’amate niha ni’omasi’önia, musik, koda, nifaluara, mazui hua, li, hegöi musim ero röfi. Tola manö abua khö zi samösa ira alawe hegöi ira matua lakha mbanua ba wamalua hadia ia na awena mate wo’omora, simane ba we’amöi ba kebaktian mazui ba Wanörö Tödö. Itutunö samösa talifusöda ira matua imane, ”Ba wamaigigu, abua khögu ba ata’udo na itörö tödögu ginötö wangowalugu i’otarai me no aefa mate wo’omogu. Hiza’i, so ösa ndra talifusöda sanga’asogö angowuloa side-ide si fao khö ndra niha si fahatö khögu irege lö urasoi wa ha ya’o-ya’o.”

¹⁹ Törö tödömö wa niha si göna abula dödö börö wa’amate, moguna khöra wamarou dödö tenga balazi so gangowuloa si tohude. Imane Junia, ”Sasesenia, fanolo hegöi fariawösa nibe’e niha bö’ö hewa’ae na tenga ba ginötö si tohude, tola ebua sibai mbuania. Sökhi sibai zalua simane da’ö, ba oya wondrara dödö si tola tatema.” Sindruhusa wa tebai taheta fefu gabula dödö mazui falö’awö-awöra, hiza’i tola tarara dödöra na tafalua khöra da’ö. (I Yohane 3:18) Imane Gaby, ”Sindruhu-ndruhu u’andrö saohagölö khö Yehowa börö wa’omasi ndra satua sokubaloi si fao khögu ba wa’abu dödö nirasoigu. Latolo ndra’odo ba worasoi fa’omasi Yehowa ba zi fasuigu.”

20. Hana wa no umbu wondrara dödö sebua mbu’usa li Yehowa?

²⁰ Terara sibai dödöda börö me ta’ila wa Yehowa, Lowalangi wondrara dödö, sindruhu-ndruhu ihori fefu gabula dödö na alua wanusugi. (Yohane 5:28, 29) No ifabu’u Lowalangi wa ”ifakiko wa’amate, si lö mamalö-malö; ba i’osi So’aya Yehowa daŵa hörö ba mbawa niha, idozigö”. (Yesaya 25:8) Aefa da’ö, lö hadöi niha ’sege-ege awö zege-ege’. Fefu niha si so ba gulidanö ’la’omusoi’ö dödöra awö zomuso tödö’.​—Roma 12:15.