1. Hadia gangetula sinangea lahalö ira si bohou ebua sanandrösa ba wa’aurira ba zi so miföna? Hadia zanolo ya’ira ena’ö lö khöra fa’aombö-aombö dödö? (Faigi gambara ba wamobörö wamaha’ö.)

NA SAMÖSA si bohou ebua ndra’ugö, tatu fao dödömö na lawa’ö wa fatua lö mofanö, moguna ötatugöi hezo möi’ö. Fa’auri andre hulö simane wofanö. Andrö i’otarai ba wa’awuyu-wuyu, moguna ötatugöi hezo möi’ö. Tatu manö lö aoha ba wotatugöi hadia zinangea öfalua ba zi so miföna. Imane samösa ira alawe sotöi Heather, ”Ata’udo sibai da’a. Moguna öhalö gangetula hadia nifaluamö sagötö fa’aurimö.” Na örasoi zimane da’ö, törö tödömö wa imane Yehowa, ”Böi tokea’ö, Lowalangiu sa ndra’odo, u’abe’e’ö ndra’ugö, ba utolo’ö.”​—Yesaya 41:10.

2. Hewisa wa tola ö’ila wa omasi Yehowa na ötatugöi gohitö dödömö same’e fa’owua-wua dödö ba zi so miföna?

² Ifarou ndra’ugö Yehowa ena’ö öhaogö ötatugöi si fao fa’atua-tua hadia gohitö dödömö ba zi so miföna. (Zangombakha 12:1; Matai’o 6:20) Omasi ia na owua-wua dödömö. Oroma da’a ba ginötö ö’ila, örongo, ba örasoi hadia niwöwöinia. Irorogö göi ita Yehowa ba lala tanö bö’ö. Ibe’e khöda mene-mene ba ifaha’ö ita ena’ö sökhi lala wa’aurida. Andrö, ba ginötö so niha si lö manema’ö mene-menenia satua-tua, lö omuso  dödönia ba da’ö. Imane ba niha si lö molo’ö fanuturu lala moroi khönia, ”Si lö omasi ndra’o, ba omasi ami. . . . Hiza! Somuso tödö genonigu, ba ya’ami, ba saila. Hiza! Sa’iki-iki genonigu, ba wa’owua-wua dödö andrö.” (Yesaya 65:12-14) Ba ginötö tahalö gangetula satua-tua ba wa’auri, no tafolakhömi Yehowa.​—Gamaedola 27:11.

3. Hadia zomasi Yehowa ena’ö öfalua?

³ Hadia manö ni’o’ou Yehowa ena’ö öfalua? Ena’ö ösöndra wa’owua-wua dödö moguna ö’okhögö wa’aboto ba dödö sanandrösa khö Yehowa ba fosumange ia. Iwöwöi niha gulidanö Yehowa ena’ö so zoguna khöra ba wamati. (Zinunö 128:1; Matai’o 5:3) Ha manga, mamadu idanö ba mo’ono ni’ila gurifö. Hiza’i, omasi Yehowa na ötatugöi hadia nifaluamö ba wa’auri same’e mo’eluaha ba owua-wua dödömö ba wa’auri. Somböi ya’ugö ya’ia da’ö ”Lowalangi wa’omasi”, ”Lowalangi sohahau tödö”, samazökhi niha simane ”famaedonia”. (II Korindro 13:11; I Timoteo 1:11; I Moze 1:27) Tola owua-wua dödömö na ö’o’ö Lowalangida safönu fa’omasi. Imane Sura Ni’amoni’ö, ”Ohahau dödö ba wame’e, moroi ba wanema.” (Halöwö Zinenge 20:35) Hadia no örasoi da’a ba wa’aurimö? Da’a dane-dane satulö sanandrösa ba wa’auri. Andrö, omasi Yehowa na ötatugöi hadia nifaluamö ba zi so miföna si te’odane-dane ba wa’omasi ba niha bö’ö hegöi khönia.​—Baso Matai’o 22:36-39.

4, 5. Hadia zame’e fa’omuso dödö khö Yesu?

⁴ Ibe’e duma-duma so’ahonoa Yesu Keriso khö ndra si bohou ebua. Me ide-ide ia, ilau famai-mai ba i’omusoi’ö dödönia. Simane niwa’ö Daromali Lowalangi, so ’ginötö ba wa’iki’ ba so ’ginötö ba wolaya’. (Zangombakha 3:4) Ahatö göi Yesu khö Yehowa börö me ifaha’ö ia ba Daromali. Me 12 fakhe ndröfinia, ahöli-höli dödö ndra samaha’ö si so ba gosali ”ba wa’atua-tuania ba ba wanemania li”.​—Luka 2:42, 46, 47.

⁵ Me itugu ebua-bua Yesu, ifalua hadia ni’andrö Lowalangi khönia irege isöndra wa’omuso dödö. Duma-dumania, omasi Lowalangi na ’i’ombakha’ö [Yesu] duria somuso dödö ba zi numana’ hegöi ”wangila niha ba zagau’a”. (Luka 4:18, 19) Itutunö Zinunö 40:8 hadia nirasoi Yesu. Imane, ”Folo’ö somasi ndra’ugö, ya’ugö Lowalangigu, ba no fa’omasigu.” Owua-wua dödö Yesu ba wamaha’ö niha sanandrösa khö Namania. (Baso Luka 10:21.) Samuza inötö, me no aefa ifatunö khö zi samösa ira alawe sanandrösa ba wamosumange satulö, imane Yesu khö ndra nifaha’önia, ”Ögu da’ö, na u’o’ö zomasi zamatenge ya’o, ba na u’asiwai halöwö andrö khönia.” (Yohane 4:31-34) Omuso dödö Yesu me tola iforoma’ö wa’omasinia khö Lowalangi hegöi ba niha bö’ö. Na öfalua zimane da’ö, tola örasoi wa’omuso dödö.

6. Hana wa sökhi na ötutunö ba niha bö’ö hadia gohitö dödömö ba zi so miföna?

⁶ Ato niha Keriso zangai halöwö tobali perintis i’otarai me awuyu-wuyu ira, ba da’ö zame’e khöra fa’omuso dödö. Hadia omasi’ö öfatunö hadia gohitö dödömö khöra? ”Na lö famagölö, ba tobali lö boto  niwa’ö; ba na ato zi so ba huhuo, ba mofozu.” (Gamaedola 15:22) Ira talifusöda andre, lafatunö khömö wa halöwö tobali perintis, tola ibe’e khömö wamaha’ö sanolo ya’ugö sandrohu fa’aurimö. Oya wamaha’ö nihalö Yesu moroi khö Namania me so ia ba zorugo. Hiza’i, sagötö fanuriaigönia ba gulidanö, lö mamalö ifaha’ö ia nasa. Irasoi wa’owua-wua dödö me ituriaigö duria somuso dödö ba niha bö’ö, ba irorogö wa’alöfaröinia hewa’ae ba ginötö si basaki. (Baso Yesaya 50:4; Heberai’o 5:8; 12:2) Datafaigi hana wa ösöndra wa’owua-wua dödö ba halöwö safönu inötö.

7. Hana wa ato ndra si bohou ebua sowua-wua tödö ba wamaha’ö niha bö’ö?

⁷ Iwa’ö khöda Yesu ena’ö tafaha’ö niha ba tabali’ö ira ”nifaha’ö”. (Matai’o 28:19, 20) Na öbali’ö ohitö dödömö halöwö da’a, ösöndra wa’owua-wua dödö ba wa’auri si möi famosumange Lowalangi. Simane halöwö tanö bö’ö, moguna ginötö ena’ö tola atua-tua ndra’ugö ba wamalua ya’ia. Imane samösa talifusöda ira matua sotöi Timothy samörötaigö merintis me awuyu-wuyu ia, ”Omasido sibai wamosumange Yehowa ba halöwö safönu inötö börö me da’a lala ba wangoroma’ögu fa’omasigu khönia. Ba wamobörö, lö hadöi niha nifaha’ögu ba Zura Ni’amoni’ö, hiza’i me no findra ndra’odo ba mbanua tanö bö’ö, ba zi sara waŵa ibörögö so nifaha’ögu ba Zura Ni’amoni’ö. So samösa nifaha’ögu si no ibörögö möi ba Balai Mbanua Lowalangi. Me no aefa fao ndra’odo ba Sekolah Alkitab bagi Saudara Lajang ba zi dua waŵa, utema halöwö si bohou ba so daöfa niha nifaha’ögu. Omasido sibai ba wamaha’ö niha, hulö na u’ila samösa hewisa wombulö’ö geheha ni’amoni’ö lala wa’aurira.” * (Faigi nisura ba gahe zura.)—I Tesalonika 2:19.

8. Hadia manö nifalua zi bohou ebua ena’ö abölö ato niha nituriaigöra?

⁸ So ösa ndra si bohou ebua samaha’ö ya’ira ba li bö’ö. Duma-dumania, isura Jacob moroi ba Amerika Utara, ”Me fitu fakhe ndröfigu, ato ndra awögu ba kelas niha Vietnam. Omasido ufatunö khöra sanandrösa khö Yehowa, andrö wa lö ara aefa da’ö ufaha’ödo ba li ni’oguna’öra. Lala sasese ufalua ba wamaha’ö ya’o ba lira ya’ia da’ö ufaedogö wamaha’ö Manuriaigö ba li Inggris faoma Vietnam. Fariawö ndra’odo göi ba mbanua niha Keriso sangoguna’ö li Vietnam sahatö ba da’a. Me 18 fakhe ndröfigu, ubörögö merintis. Aefa da’ö, fao ndra’odo ba Sekolah Alkitab bagi Saudara Lajang. Da’a zanolo ya’o ba wamalua halöwö perintis börö me ba kelompok sangoguna’ö li Vietnam, ha ya’odo zatua sokubaloi. Ato niha Vietnam sahöli-höli tödö börö me tola u’ila li ni’oguna’öra. Ladönia’ö ndra’odo ba sasesenia ufaha’ö ira ba Zura Ni’amoni’ö. So ba gotaluara zi tedou ba wamati irege tola tebayagö idanö.”​—Fatimbaisi Halöwö Zinenge 2:7, 8.

9. Hadia wamaha’ö si tola tahalö moroi ba halöwö ba wamaha’ö niha?

⁹ Halöwö fombali’ö niha tobali nifaha’ö, ifaha’ö ndra’ugö ena’ö sökhi lala wohalöwö, hewisa wahuhuosa si sökhi hegöi lala ena’ö tola atua-tua ba ena’ö tola tafaduhusi tödö ita. (Gamaedola 21:5; II Timoteo 2:24) Hiza’i, sabölö tohudenia, halöwö da’a zame’e khömö fa’owua-wua dödö börö me öfaha’ö ndra’ugö lala ba wamaduhu’ö hadia nifaduhusimö tödö ba Daromali.  Öfaha’ö göi ndra’ugö lala falulu fohalöwö khö Yehowa.​—I Korindro 3:9.

10. Hewisa ena’ö tola ösöndra wa’owua-wua dödö ba halöwö wombali’ö nifaha’ö hewa’ae oya gabula dödö ba mbanua si so ya’ugö?

¹⁰ Tola ösöndra wa’owua-wua dödö ba wamalua halöwö wombali’ö niha tobali nifaha’ö hewa’ae na ba mbanua si so ya’ugö lö ato zomasi mamaha’ö ya’ira ba Zura Ni’amoni’ö. Ba wombali’ö nifaha’ö, moguna falulu fohalöwö mbanua niha Keriso tobali sambua tim. Hewa’ae ha samösa dalifusöda sanöndra niha si tobali nifaha’ö, fefu ita tasöndra wa’owua-wua dödö börö me falulu fohalöwö ita ba wamalua ya’ia. Duma-dumania, imane Brandon, si no siwa fakhe merintis ba nahia si lö ato samaha’ö ya’ira ba Zura Ni’amoni’ö, ”Omasido halöwö fanuriaigö börö me da’ö ni’andrö Yehowa khöda. Ubörötaigö merintis lö ara me no tama ndra’odo sekola. Owua-wua dödögu ba wamarou dödö ndra si bohou ebua ba mbanua niha Keriso si so ndra’odo, ba u’ila wa’atedou wamatira. Me no aefa fao ndra’odo ba Sekolah Alkitab bagi Saudara Lajang, utema halöwö si bohou. Sindruhusa wa ba mbanua da’ö lö irai so niha nifaha’ögu irege tebayagö idanö, hiza’i la’okhögö ira talifusöda tanö bö’ö. Omuso dödögu börö me no uhalö gangetula wefao ba halöwö fombali’ö nifaha’ö.”​—Zangombakha 11:6.

11. Hadia lala halöwö nifalua zi bohou ebua ba wamosumange Yehowa si tola manga’asogö fa’owua-wua dödö?

¹¹ Oya ginötö si tola ö’okhögö ba wamosumange Yehowa. Duma-dumania, ato ndra si bohou ebua sanolo ba halöwö konstruksi. Moguna ngaotu Balai Mbanua Lowalangi si bohou. Nahia da’a möi famosumange Yehowa, andrö wa ösöndra wa’owua-wua dödö ba ginötö fao ndra’ugö ba wangehaogö ya’ia. Tola göi örasoi wa’owua-wua dödö falulu fohalöwö khö ndra talifusöda ba oya wamaha’ö si tola öhalö, duma-dumania lala wohalöwö si sökhi ena’ö lö te’ala hegöi lala falulu fohalöwö khö pengawas.

12. Hadia halöwö si no tehenaigö ba niha sangai halöwö tobali perintis?

¹² Imane samösa talifusöda ira matua sotöi Kevin, ”I’otarai me ide-idedo, ohitö dödögu ya’ia da’ö ba wangai halöwö safönu inötö ba wamosumange Yehowa. Ba gafuriata, ubörögö merintis me 19 fakhe ndröfigu. Ulau mohalöwö matonga hari khö dalifusöda sohalöwö ba bangunan ba wotuhini fa’aurigu. Ufaha’ö ndra’odo ba wangehaogö zagö nomo, sandrela hegöi mbawandruhö. Aefa da’ö, dua fakhe fa’ara faodo ba tim sanolo na alua nangi sabölö-bölö. Mahaogö Balai Mbanua Lowalangi hegöi omo ndra talifusöda. Me urongo wa moguna wanolo ba konstruksi sahatö ba Afrika Selatan, ufo’ösi formulir ba lakaoni ndra’o. Ba Afrika, findra ndra’odo moroi ba nahia si sambua numalö ba nahia bö’ö ba wangehaogö Balai Mbanua Lowalangi ero ba zi hauga migu. Ira awögu sohalöwö ba konstruksi hulö simane ösi nomogu. Orudu nahiama, fao ndra’aga wohalöwö hegöi ba wamaha’ö Zura Ni’amoni’ö. Owua-wua göi dödögu wefao manuriaigö  ero migu khö ndra talifusö si so ba da’ö. Hadia nifakhoi dödögu i’otarai me ide-ide no möi fangowua-wua dödögu ba lala si lö irai u’angeraigö.”

13. Hana wa ato ndra si bohou ebua sowua-wua tödö ba wamosumange Yehowa ba Mbetieli?

¹³ So ösa ndra perintis sohalöwö ba Mbetieli iada’a. Fohalöwö ba Mbetieli, no sambua lala same’e fa’owua-wua dödö ba wa’auri börö me fefu nifaluada tafalua ia khö Yehowa. Ösi nomo Mbetieli latolo ba wanga’asogö Zura Ni’amoni’ö hegöi publikasi irege tola tefaha’ö niha ba zindruhu. Imane samösa sohalöwö ba Mbetieli sotöi Dustin, ”Halöwö safönu inötö, no tobali ohitö dödögu i’otarai siwa fakhe ndröfigu, ba ubörötaigö ulau merintis me no aefa tama ndra’o sekola. Me no aefa döfi amatonga, lakaonido ba Mbetieli. Ba da’ö ufaha’ödo ba wangoguna’ö mesin cetak, ba aefa da’ö ba woprogram komputer. Owua-wua dödögu ba Mbetieli börö me urongo hewisa wa’atedou halöwö fombali’ö nifaha’ö ba zi sagörö ulidanö. Omasido mohalöwö ba da’a börö me fefu nifaluama möi fanolo ba niha ena’ö ahatö ira khö Yehowa.”

14. Hadia zi tola öfalua iada’a ba wama’anö ya’ugö ba halöwö safönu inötö?

¹⁴ Hewisa wama’anömö ya’ugö ba wangai halöwö safönu inötö? Ba wamosumange  Yehowa ba lala sabölö sökhi si tola öfalua, moguna ödou’ö mbua-bua niha Keriso. Asese’ö faha’ö ndra’ugö ba Daromali Lowalangi, haogö angerönusi ba foroma’ö wamatimö ba gangowuloa mbanua niha Keriso. Na lö nasa si tama ndra’ugö sekola, tola ödou’ö wa’onekhe ba wahuhuosa ba niha bö’ö sanandrösa ba duria somuso dödö. Öfaha’ö ndra’ugö ba wangoroma’ö fa’adöni dödö ba niha, ba tola öfalua da’ö na ösofu mbua wangera-gerara ba öfondro-ndrogo wanema lira. So ösa göi zi tola öfalua ba mbanua niha Keriso, simane fondrorogö hegöi fangehaogö Balai Mbanua Lowalangi. Omuso dödö Yehowa ba wangoguna’ö niha si so fangide-ngide’ö ba somasi mohalöwö. (Baso Zinunö 110:3; Halöwö Zinenge 6:1-3) Idönia’ö Timoteo sinenge sotöi Faulo ba wohalöwö tobali utusan injil börö me ”sökhi duriania ba dalifusö”.​—Halöwö Zinenge 16:1-5.

15. Hadia zi tola öfalua ba wanöndra halöwö si tola manolo ya’ugö tobali perintis?

¹⁵ Ato zohalöwö safönu inötö, moguna göi mohalöwö ira ba wangalui soguna. (Halöwö Zinenge 18:2, 3) Tola fao ndra’ugö ba kursus sekolah si lö arara si tola manolo ya’ugö ba wangokhögö halöwö si tenga ma’ö-ma’ökhö si so ba mbanua si toröi ya’ugö. Fatunö khö zatua samasui hegöi khö ndra perintis tanö bö’ö sanandrösa ba gohitö dödömö, ba andrö mbua wangera-ngerara. Aefa da’ö, simane niwa’ö Zura Ni’amoni’ö, ”be’e balazi Yehowa wolau-laumö andrö; ba mofozu nikhoi dödöu”.​—Gamaedola 16:3; 20:18.

16. Hewisa wa tola möi fama’anömö halöwö safönu inötö ba wangokhögö noro dödö tanö bö’ö ba zi so miföna?

¹⁶ Tola öfaduhusi tödö wa omasi Yehowa na ’ökhamö zindruhu’ si tola mame’e fa’owua-wua dödö khömö ba zi so miföna. (Baso I Timoteo 6:18, 19.) Halöwö safönu inötö möi fanolomö ena’ö tola tobali ndra’ugö niha Keriso saro ba wamati na falulu fohalöwö ndra’ugö khö ndra sohalöwö safönu inötö tanö bö’ö. Ato göi zi no morasoi wa na lahalö halöwö safönu inötö i’otarai me awuyu-wuyu tola möi fanolora da’ö ba wongambatö. Si to’ölönia, niha si merintis fatua lö sangowalu, faoma latohugö merintis tobali sambua fongambatö.​—Roma 16:3, 4.

17, 18. Hana wa moguna soroi ba dödö ba ginötö ötatugöi gohitö dödömö ba zi so miföna?

¹⁷ Imane Zinunö 20:5 sanandrösa khö Yehowa, ’Ya’ibe’e khöu zomasi dödöu ba yamofozu fefu nifakhoi dödöu.’ Simane ohitö dödömö ba zi so miföna, angeraigö hadia zabölö omasi’ö öfalua ba wa’aurimö. Angeraigö hadia nifalua Yehowa ba götöda iada’a ba hadia zi tola öfalua ba halöwönia. Aefa da’ö, tatugöi hadia nifaluamö ba wangomusoi’ö tödönia.

¹⁸ Ba ginötö ö’oguna’ö wa’aurimö ba wangai halöwö khö Yehowa hegöi ba wamosumange ya’ia, hasambalö owua-wua dödömö. Tola ”omuso dödöu ba khö Yehowa, ba ibe’e khöu zomasi dödöu”.​—Zinunö 37:4.