1, 2. Hadia geluahania mamaigi Yehowa?

AURI ita iadaʼa ba ”mbaŵa si lö sökhi”. (2 Timoteo 3:1) Ba itugu basaki waʼauri fatua lö ifakiko gulidanö si lö sökhi andre Yehowa ba ibeʼe waʼohahau dödö ba gulidanö. Daʼa mbörö wa moguna tasofu khöda samösa, ’Haʼökhö uʼandrö wanolo hegöi fanuturu lala?’ Tola manö tawaʼö ”Khö Yehowa”, ba no fanema li si sökhi daʼö.

² Hadia geluahania mamaigi Yehowa? Ba hewisa enaʼö lö tebulö tafaigi Yehowa ba ginötö alua khöda gabula dödö? Itutunö samösa zanura Sura Niʼamoniʼö me föna, wa moguna sibai tafaigi Yehowa ba ginötö moguna khöda wanolo. (Baso Zinunö 123:1-4.) Ba ginötö tafaigi Yehowa, iwaʼö wa yaʼita hulö genoni samaigi sokhö yaʼia. Eluahania, lö tebulö iʼodaligö zokhö yaʼia enoni andrö ba wanöndra ö hegöi folumöʼö. Hizaʼi moguna göi aboto ba dödönia hadia zomasi zokhö yaʼia enaʼö ifalua. Simanö göi ita, moguna tafahaʼö ita ba Daromali Lowalangi ero maʼökhö enaʼö aboto ba dödöda hadia zomasi Yehowa  khöda enaʼö tafalua. Tola faduhu dödöda wa hasambalö itolo ita Yehowa ba ginötö moguna khöda wanolo.​—Efeso 5:17.

3. Hadia zameʼe mangoloi dödöda wamaigi Yehowa?

³ Itaria mangoloi dödöda hewaʼae taʼila wa moguna sibai enaʼö böi taböhöli wamaigi Yehowa. Daʼa zalua khö Marata si fahuwu khö Yesu. Tobali ’arörö ia ba halöwönia soya sibai’. (Luka 10:40-42) Na Marata manö niha si lö faröi tola mangoloi dödönia hewaʼae so Yesu ba zingania, andrö böi tokea ita na alua göi khöda zimane daʼö. Na simanö, hadia zameʼe mangoloi dödöda wamaigi Yehowa? Ba wamahaʼö daʼa, tatutunö hewisa wa tola mangoloi dödöda börö nifalua niha böʼö ba hewisa lalania enaʼö lö tebulö tafaigi Yehowa.

4. Hana wa ahöli dödöda me lö ikhamö Moze danö amabuʼula?

⁴ Tatu manö, lö mamalö iʼandrö Moze wanuturu lala moroi khö Yehowa. Ifatunö khöda Sura Niʼamoniʼö wa ”lö awuwu ia hulö na no iʼila Lowalangi si lö oroma andrö”. (Baso Heberaiʼo 11:24-27.) Imane nasa, ”Löʼö saʼae maoso ba ndraono Gizaraʼeli zamaʼeleʼö simane Moze, ba zi fahuhuo Yehowa, si faʼila bawa ira.” (5 Moze 34:10) Hewaʼae fahuwu sibai Moze khö Yehowa, hizaʼi lö ikhamö Danö Amabuʼula. (4 Moze 20:12) Hadia mbörö?

5-7. Hadia zalua ba ndraono Gizaraʼeli lö ara me no aefa ira moroi ba Miserai, ba hadia nifalua Moze?

⁵ Ambö dua waŵa me no aefa ndraono Gizaraʼeli moroi ba Miserai, alua gabula dödö sebua fatua lö larugi hili Zinaʼi. Ibörögö mukökö-kökö ira börö me lö hadöi öra idanö. Ibörögö molawa ba mofönu ira khö Moze irege ”iʼangaröfili Yehowa Moze, imane: He uwisa ba niha andrö! Ha tö maʼifu tö, ba latebu kara ndraʼodo!” (2 Moze 17:4) Ibeʼe fareta Yehowa khö Moze enaʼö ihalö ziʼonia ba ibözi gara ba hili Horebi. Imane Sura Niʼamoniʼö, ”Ba iʼoʼö daʼö Moze, ba zi so satua ndraono Gizaraʼeli andrö.” Ba kalua nidanö irege tola labadu iraono Gizaraʼeli ba teʼasiwai gabula dödö andrö.​—2 Moze 17:5, 6.

⁶ Ifatunö khöda Sura Niʼamoniʼö wa ifotöi Moze nahia andrö Masa, eluahania ”Fanandraigö” ba Meriba eluahania ”Fasosota”. Hadia mbörö? Börö ”me no fasoso ndraono Gizaraʼeli ba me no latandraigö Yehowa, wanofu: Hadia, so ba khöda Yehowa, ma löʼö?”​—2 Moze 17:7.

⁷ Hewisa dödö Yehowa sanandrösa ba zalua ba Meriba? Ba dödö Yehowa tenga ha khö Moze molawa ndraono Gizaraʼeli, hizaʼi khönia hegöi ba wamatörönia. (Baso Zinunö 95:8, 9.) Fasala sibai nifalua ndraono Gizaraʼeli. Hizaʼi, satulö nifalua Moze. Iʼandrö wanuturu lala khö Yehowa ba iʼoʼö.

8. Hadia zalua me arakhagö larugi iraono Gizaraʼeli Danö Amabuʼula?

⁸ Ifuli alua zimane daʼa me arakhagö  40 fakhe aefa daʼö. Ba danö si mate nasa so ndraono Gizaraʼeli ba arakhagö larugi Danö Amabuʼula. Larugi nahia sahatö ba Gadesi, lö fandröndröu ba nola Danö Amabuʼula. Ba gafuriata mufotöi nahia andrö Meriba. * (Faigi nisura ba gahe zura.) Hadia mbörö? Börö me ifuli mukökö-kökö ndraono Gizaraʼeli me lö öra idanö. (4 Moze 20:1-5) Sakali daʼa, ifalua zala sebua Moze.

9. Hadia wanuturu lala nibeʼe Yehowa khö Moze, hizaʼi hadia nifalua Moze? (Faigi gambara ba wamobörö wamahaʼö.)

⁹ Hadia nifalua Moze me molawa ira? Ifuli iʼandrö wanuturu lala moroi khö Yehowa. Hizaʼi, sakali daʼa lö iwaʼö Yehowa khö Moze ba wamözi gara hili. Iwaʼö khö Moze ba wangai siʼonia enaʼö iʼohe ira ahatö ba gara hili, ba enaʼö mohede ia ba gara hili andrö. (4 Moze 20:6-8) Hadia ifalua daʼö Moze? Löʼö. Abao dödönia ba mofönu ia irege imane khöra, ”Mifondrondrongo, yaʼami sabeʼe tandro! Hadia maʼila maö mafalua ba gara andre gömi idanö?” Ba ibözi gara hili andrö tenga ha sakali, hizaʼi dua kali.​—4 Moze 20:10, 11.

10. Hewisa Yehowa ba nifalua Moze?

¹⁰ Mofönu sibai Yehowa khö Moze. (5 Moze 1:37; 3:26) Hadia mbörö wa mofönu Yehowa? Te sambua mbörönia yaʼia daʼö me lö iʼoʼö Moze wanuturu lala si bohou nibeʼe Yehowa khönia.

11. Hana wa tola manö so ba wangera-ngera ndraono Gizaraʼeli wa tenga Yehowa zamalua tandra sahöli-höli dödö?

¹¹ Te so mbörö tanö böʼö wa mofönu Yehowa. Kara hili ba Meriba siföföna yaʼia daʼö batu granit si fasösö (kara sabeʼe sawuzi-wuzi). Gofu hewisa waʼabölö-bölö wamözi niha batu granit, hasambalö lö kalua nidanö. Hizaʼi, faehu sibai gara hili si mendrua andre ba Meriba. Sabölö oya ba daʼö batu kapur. Börö me lö fasösö sibai gara andrö, daʼö mbörö wa tola teʼiröʼö nidanö. Tola musöndra nidanö na mutögi gara andrö. Tobali, börö me ibözi Moze gara hili andrö ba tenga iʼandrö enaʼö kalua nidanö, daʼö mbörö wa tola manö so ba wangera-ngera ndraono Gizaraʼeli wa no si toʼölö waʼakalua nidanö andrö, tenga börö dandra sahöli-höli dödö moroi khö Yehowa. * (Faigi nisura ba gahe zura.) Hizaʼi, lö taʼila sibai hewisa zindruhunia.

12. Hadia mbörö tanö böʼö wa mofönu sibai Yehowa khö Moze hegöi Aʼaroni?

¹² Te so mbörö tanö böʼö wa mofönu sibai Yehowa khö Moze hegöi Aʼaroni. Imane Moze ba niha andrö, ”Hadia maʼila maö mafalua ba gara andre gömi idanö?” Me iwaʼö Moze ”mafalua”, tola manö eluahania yaʼia faoma Aʼaroni. Fehede Moze zangoromaʼö wa lö khönia fangosinangegö börö me lö ibeʼe khö Yehowa fefu lakhömi me ifalua dandra sahöli-höli dödö. Imane ba Zinunö 106: 32, 33, ”Ba labaosi dödö Lowalangi, ba nidanö wasosota andrö, ba itörö Moze si lö sökhi, börö ira. Lafadaö saʼae dödönia, ba iwaʼö bewenia zi lö mutulo tödö.” * (Faigi nisura ba gahe zura.) (4 Moze 27:14) Lö ibeʼe Moze khö Yehowa lakhömi sinangea itema. Imane Yehowa khö Moze hegöi khö Gaʼaroni, ”Lö nifondrondrongomi niwaʼögu.” (4 Moze 20:24) No horö sebua daʼö!

13. Hana wa atulö ba lö ebua dödö zambuana hukuma nibeʼe Yehowa khö Moze?

¹³ Börö me sondröniaʼö ono mbanua Yehowa Moze hegöi Aʼaroni, andrö wa laʼokhögö noro dödö sebua. (Luka 12:48) Me föna, no irai lö itehegö Yehowa ba ndraono Gizaraʼeli weʼamöi ba Danö Amabuʼula börö me molawa ira. (4 Moze 14:26-30, 34) Tobali, no ifalua zatulö Yehowa ba lö ebua dödö zambuana me ihuku Moze simane daʼö. Lö irugi Moze Danö Amabuʼula simanö göi zalua ba niha solawa tanö böʼö.

14, 15. Hadia mbörö wa molawa Moze khö Yehowa?

¹⁴ Hadia mbörö wa molawa Moze khö Yehowa? Fuli faigi hadia niwaʼö ba Zinunö 106:32, 33 imane, ”Ba labaosi dödö Lowalangi, ba nidanö wasosota andrö, ba itörö Moze si lö sökhi, börö ira. Lafadaö saʼae dödönia, ba iwaʼö bewenia zi lö mutulo tödö.” Hewaʼae sindruhunia khö Yehowa molawa ndraono Gizaraʼeli, hizaʼi afökhö dödö Moze mazui mofönu ia. Lö khönia fanaha tödö irege lö iʼangeragö hadia lua-lua moroi ba niwaʼönia.

¹⁵ Tebato Moze ba wamaigi Yehowa börö me itehegö mangoloi dödönia ba nifalua niha böʼö. Si oföna mukökö ira sanandrösa ba nidanö, ba no ifalua zatulö Moze. (2 Moze 7:6) Hizaʼi, tola manö atage ba abao dödönia börö me molawa ndraono Gizaraʼeli ba zi hauga fakhe. Lua-luania, ha nirasoi dödönia niʼangeragö Moze, tenga famolakhömi Yehowa.

16. Hana wa moguna sibai taʼangeragö nifalua Moze?

¹⁶ Na niha si lö faröi manö simane Moze tola tefangoloi dödönia ba ifalua horö, tola göi alua khöda zimane daʼö.  Lö ara tö irugi Danö Amabuʼula Moze ba lö göi ara tö tarugi gulidanö si bohou. (2 Fetero 3:13) Tatu lö omasi ita na taya khöda daʼa. Hizaʼi, enaʼö tarugi gulidanö si bohou, moguna böi tebulö tafaigi Yehowa ba taʼoʼö niwaʼönia. (1 Yohane 2:17) Hadia wamahaʼö si tola tahalö moroi ba zala nifalua Moze?

17. Hewisa enaʼö lö taya khöda wanaha tödö hewaʼae ba ginötö abao dödöda?

¹⁷ Böi taya khöu wanaha tödö ba ginötö abao dödöu. Itaria mato hauga kali alua khöda gabula dödö si fagölö. Hizaʼi, imane Sura Niʼamoniʼö, ”Böi atage ita wamalua si sökhi. Na lö atage ita, tatema mbua dania ba ginötönia.” (Galatia 6:9; 2 Tesalonika 3:13) Ba ginötö so hadia ia mazui ibeʼe abao dödöda si samösa niha ba zi hauga kali, hadia taʼangeragö fatua lö tawaʼö niwaʼöda? Hadia tataha wönuda? (Gamaedola 10:19; 17:27; Mataiʼo 5:22) Moguna tafahaʼö ita ba ’wamonaha fönu Lowalangi’ ba ginötö so zangandrö fönuda mazui tatehegö khö Yehowa ba wamalua fönunia. (Baso Roma 12:17-21.) Hadia geluahania? Na edöna mofönu ita, moguna so khöda waʼebolo dödö ba wombaloi  Yehowa ba wangasiwai abula dödöda moloʼö lala wangera-ngerania. Na tatandraigö wolau balö moroi na tafaigi Yehowa, daʼö zangoromaʼö wa lö tafosumange ia.

18. Hadia zinangea tatörö tödöda sanandrösa ba woloʼö fanuturu lala?

¹⁸ Oʼö wanuturu lala si bohou. Hadia lö faröi ita ba woloʼö fanuturu lala si bohou nibeʼe Yehowa khöda? Si bagania lö moguna tafalua hadia zi no toʼölö tafalua ba zilalö ha börö me asese tafalua ia. Hizaʼi, moguna alio tafaudugö lala wangera-ngerada ba taʼoʼö wanuturu lala si bohou nibeʼe Yehowa khöda ba organisasinia. (Heberaiʼo 13:17) Aefa daʼö, moguna mangelama ita faböi ’tasawö zi no tesura’. (1 Korindro 4:6) Na sökhi woloʼöda fanuturu lala nibeʼe Yehowa, daʼö zangoromaʼö wa lö tebulö ita wamaigi yaʼia.

19. Hewisa enaʼö lö tekiko wahuwusada khö Yehowa börö zala nifalua niha böʼö?

¹⁹ Böi tehegö tekiko wahuwusau khö Yehowa börö zala nifalua niha böʼö. Na lö tebulö tafaigi Yehowa, lö tekiko wahuwusada khönia mazui mofönu ita ha börö nifalua niha böʼö. Moguna sibai daʼa, mendrua manö na taʼokhögö halöwö ba organisasi Lowalangi simane Moze. Yaʼita zamösana, tatu taʼodödögö ba woloʼö nifakhoi Yehowa enaʼö tola teʼorifi ita. (Filifi 2:12) Andrö, na itugu oya halöwö niʼokhögöda, itugu ebua noro dödöda khö Yehowa. (Luka 12:48) Hizaʼi, na sindruhu-ndruhu taʼomasiʼö Yehowa, lö hadöi si tola mameʼe manendre ita mazui samabali faʼomasida khönia.​—Zinunö 119:165; Roma 8:37-39.

20. Hadia gangetula sinangea tahalö?

²⁰ Auri ita ba ginötö si basaki ba safönu fanandraigö. Tobali, moguna sibai enaʼö lö mamalö tafaigi Yehowa ”sidadao ba zorugo”, enaʼö aboto ba dödöda hadia zomasi ia tafalua. Böi tatehegö tekiko wahuwusada khö Yehowa ha börö nifalua niha böʼö. Salua khö Moze tobali famahaʼö sabölö moguna khöda. Moroi na talafo taʼangeragö zala nifalua niha böʼö, datahalö gangetula enaʼö lö tebulö ’höröda khö Lowalangida Soʼaya, irege ihakhösi tödö ita’.​—Zinunö 123:1, 2.