IDÖNIAʼÖ ndraono Gizaraʼeli Yosua ba Danö Amabuʼula. Tenga zaoha wamalua daʼa. Hewaʼae simanö, iʼabölö ia Yehowa ba ifarou dödönia. Iwaʼö, ’Yaʼabölö ndraʼugö, yaʼabeʼe dödöu.’ Iwaʼö nasa khö Yosua, na ibaso ba iʼoʼö Goroisa, tola ihalö gangetula si sökhi ba mofozu ia.​—Yosua 1:7, 8.

No so ita ba ”mbaŵa si lö sökhi”, andrö wa basaki waʼaurida. (2 Timoteo 3:1) Na omasi ita mofozu simane Yosua, moguna taʼoʼö mene-mene nibeʼe Yehowa khönia. Moguna tabaso Zura Niʼamoniʼö ero maʼökhö ba taʼogunaʼö hadia zi no tafahaʼö yaʼita ba wangai angetula si sökhi.

Tola manö so moroi ba gotaluada zi lö mangila hewisa lala wamahaʼöda yaʼita mazui si lö morasoi faʼowua-wua dödö ba wamahaʼö samösa. Moguna sibai wamahaʼö samösa ba Zura Niʼamoniʼö. Faigi kotak ” Tandraigö Falua Daʼa”, si tola manolo yaʼugö ba wanema bua moroi ba wamahaʼö samösa ba tola so khöu waʼowua-wua dödö.

Manunö samösa zanura buku Zinunö, ”Fatörödo ba lala goroisamö andrö; omasido sa ia.” (Zinunö 119:35) Tola göi owua-wua dödöu ba ginötö öfahaʼö ndraʼugö ba Daromali Lowalangi. Tola oya ösöndra ngawalö zi sökhi na lö aetu öfahaʼö ndraʼugö ba Zura Niʼamoniʼö.

Hewaʼae lö ödöniaʼö zi sambua soi simane nifalua Yosua, tola manö öʼokhögö gabula dödö. Börö daʼö, simane Yosua, moguna öfahaʼö ndraʼugö ba öʼoʼö Daromali Lowalangi. Na öfalua daʼö, tola öhalö gangetula si sökhi ba mofozu ndraʼugö.