Foromaʼö Waʼahakhö Dödö ba ’Niha Fefu’
ME IFAHAʼÖ Yesu ndra nifahaʼönia hewisa lala wanuriaigö turia somuso dödö, ifangelama ira wa lö ero-ero lafondrondrongo niha duria nifaʼemara. (Luka 10:3, 5, 6) Alua göi khöda zimane daʼö ba wanuriaigö. So ösa niha nifalukhaisida, amuʼi mazui sofönu-fönu. Ba ginötö lafalua zimane daʼö, hulö abua khöda wangoromaʼö faʼahakhö dödö hegöi ba wanuriaigö khöra.
Niha si so faʼahakhö dödö, iʼila hadia zoguna ba niha böʼö, hadia gabula dödöra ba ahakhö dödönia khöra ba omasi itolo ira. Hizaʼi, hadia zalua na lö khöda faʼahakhö dödö ba niha nifalukhaisida ba wanuriaigö? Tola manö taya waʼaterou dödöda ba wamaʼema khöra turia somuso dödö ba lö irai tola tatolo ira. Faʼaterou dödöda tola mufagölösi ia simane alitö. Enaʼö tola ebua hola-hola galitö, moguna so nangi. Simane daʼö göi ita, enaʼö itugu aro, moguna so khöda waʼahakhö dödö!—1 Tesalonika 5:19.
Hewisa enaʼö itugu monönö waʼahakhö dödöda hewaʼae na abua wamalua yaʼia? Datatutunö tölu duma-duma si tola taʼoʼö: Yehowa, Yesu, hegöi sinenge sotöi Faulo.
OʼÖ WAʼAHAKHÖ DÖDÖ YEHOWA
Ba zi hauga ribu fakhe, ato niha sangumaʼö fehede si lö duhu sanandrösa khö Yehowa. Hizaʼi, lö tebulö ’sökhi dödönia ba niha si lö sökhi hegöi ba niha si lö mangila mangandrö saohagölö’. (Luka 6:35) Hewisa wangoromaʼönia faʼahakhö dödö? Ebolo dödönia ba niha fefu. Omasi Yehowa na teʼorifi ”fefu niha”. (1 Timoteo 2:3, 4) Hewaʼae fatuwu Lowalangi ba zi lö sökhi, hizaʼi iʼomasiʼö niha fefu ba lö omasi ia na tehori ira.—2 Fetero 3:9.
Iʼila Yehowa wa onekhe sibai Zatana ba wameʼe faduhu dödö niha ba zi lö duhu. (2 Korindro 4:3, 4) Ato niha nifahaʼö ba zi lö duhu sanandrösa khö Lowalangi iʼotarai ba waʼide-ide. Tobali, börö lala wangera-ngera hegöi nirasoi dödöra wa tola abua khöra wanemaʼö sindruhu. Hizaʼi, omasi sibai itolo ira Yehowa. Hezo tola taʼila daʼö?
Duma-dumania, angeragö hewisa dödö Yehowa ba niha si so ba kota Niniwe. Hewaʼae afaito ira, hizaʼi imane Yehowa khö Yona, ”Ba yaʼodo, ba hadia, ba lö uhakhösi tödö Niniwe andrö, banua sebua, si no töra 120.000 nono niha si lö mangila hezo gambölö, ba hezo gabera?” (Yona 4:11) Ahakhö sibai dödö Yehowa ira börö me lö aboto ba dödöra zindruhu sanandrösa khönia. Andrö wa ifatenge Yona ba wamangelama yaʼira.
Simane Yehowa, moguna göi taʼomasiʼö niha fefu. No sebua böli ira. Simane Yehowa, omasi tatolo ira ba tafahaʼö ira sanandrösa khö Yehowa hewaʼae na ba wamaigida lö omasi latemaʼö zindruhu.
OʼÖ WAʼAHAKHÖ DÖDÖ YESU
Simane Amania, ahakhö sibai dödö Yesu ba niha börö me ”tefakao ba tetiboʼö ira hulö mbiri-biri si lö kubalo”. (Mataiʼo 9:36) Aboto ba dödö Yesu hana wa tola alua khöra zimane daʼö. Börö me lö sökhi nifalua ndra sondröniaʼö ba agama khöra ba lalimo göi ira. Iʼila göi Yesu wa ato niha samondrongo yaʼia, hizaʼi lö omasi ira tobali soloʼö khönia börö zi hauga ngawalö. Hewaʼae simanö, oya ngawalö nifahaʼönia khöra.—Mareko 4:1-9.
Böi afatö dödöu hewaʼae na ba wamobörö lö omasi zi samösa niha ba wamondrongo
Ba ginötö tebulö zalua ba waʼauri zi samösa niha, tola manö adöni dödönia ba zindruhu
Na lö omasi niha wamondrondrongo turia nifaʼemada, moguna aboto ba dödöda hadia mbörö wa lafalua daʼö. Tola manö so khöra wangera-ngera si lö faudu sanandrösa ba Zura Niʼamoniʼö mazui sanandrösa ba niha Keriso, börö me laʼila wa so ösa zangotöi niha Keriso samalua si lö sökhi. Tanö böʼönia, tola manö so nirongora zi lö duhu sanandrösa ba nifaduhusida tödö. Tola manö göi so zataʼu fahuhuo khöda börö na laʼoʼaya ira si fahatö khöra mazui niha ba zi fasuira.
So ösa niha nifalukhaisida si no irai manaögö faʼalösökhi irege so khöra waʼataʼu. Samösa dalifusöda ira alawe utusan injil sotöi Kim, itutunö wa ato niha ba mbanua si so yaʼia si teʼorifi moroi ba wasuwöta ba taya fefu gokhötara. Aetu wanötönara ba tefakao sibai waʼaurira. Lö hadöi si tola lafaduhusi tödö. Niha si so ba mbanua daʼa, asese lasaisi halöwö fanuriaigö nifalua ndra Samaduhuʼö. No göi irai itaögö Kim daʼö me möi ia manuriaigö.
Hana wa tola so waʼahakhö dödö khö Kim hewaʼae na lafalua khönia zi lö sökhi? Lö aetu itörö tödönia wehede nisura ba Gamaedola 19:11, ”Faʼaboto ba dödö andrö, ba ebolo dödö niha ibeʼe.” Ba ginötö iʼangeragö hadia nitaögö niha si so ba mbanua si toröi yaʼia, daʼö zanolo yaʼia ba wangoromaʼö faʼahakhö dödö khöra. Ba sindruhunia, so nasa niha somasi manemaʼö yaʼia. Ba mbanua daʼö, so göi ösa niha sadöni tödö nifuli nifalukhaisinia.
Tandraigö sofu khöu samösa, ’Na lö menaʼö saboto ba dödögu zindruhu, hadia nifaluagu na so Zamaduhuʼö Yehowa si möi manuriaigö khögu?’ Duma-dumania, hewisa na so zi lö duhu nirongoda sanandrösa khö ndra Samaduhuʼö? Tola manö lö sökhi wanemaʼöda yaʼira, irege moguna laforomaʼö khöda waʼahakhö dödö ira Samaduhuʼö. Iwaʼö Yesu wa moguna tafalua ba niha böʼö zomasi ita enaʼö lafalua göi khöda. Börö daʼö, moguna aboto ba dödöda hadia nirasoi niha böʼö ba ebolo dödöda khöra hewaʼae na abua wamalua daʼö.—Mataiʼo 7:12.
OʼÖ WAʼAHAKHÖ DÖDÖ WAULO
Iforomaʼö waʼahakhö dödö Faulo ba niha samalua si lö sökhi khönia ba ginötö manuriaigö. Hadia mbörö? Börö me itörö tödönia hewisa ia zindruhunia me mböröta. Imane, ”Hewaʼae sangoʼaya Lowalangi ndraʼo mböröta, samakao, ba si fayawa. Falukha ndraʼo waʼahakhö dödö, börö me ambö famatigu ba lö khögu faʼaboto ba dödö.” (1 Timoteo 1:13) Iʼila Faulo wa no ahakhö dödö Yehowa hegöi Yesu khönia. Aboto ba dödönia na so niha somasi enaʼö ibato wanuriaigö, börö me no irai ifalua zimane daʼö ba zilalö.
Itaria falukha Waulo ba niha si so faʼafaduhu dödö saro ba wamahaʼö si sala. Hewisa dödö Waulo? Ba Halöwö Zinenge 17:16, tabaso wa me so ia ba Atena, ”Alangu dödönia me iʼila wa oya nadu ba mbanua andrö.” Hizaʼi, iʼogunaʼö ngawalö zameʼe alangu dödönia andrö Faulo ba wamahaʼö niha. (Halöwö Zinenge 17:22, 23) Ifaudugö lala wamaʼemania turia somuso dödö faoma salua ba niha irege tola ’iforege wamalua hadia ia enaʼö teʼorifi fefu niha’.—1 Korindro 9:20-23.
Ba ginötö falukha ita ba niha si lö manemaʼö turia nifaʼemada mazui samaduhusi tödö famahaʼö si sala, tola taʼoʼö nifalua Waulo. Tola taʼogunaʼö waʼaboto ba dödö sanandrösa khöra enaʼö tola tatolo ira ba lafahaʼö ira ba ’duria somuso dödö sangombakha fangorifi’. (Yesaya 52:7) Imane talifusöda ira alawe sotöi Dorothy, ”Ba mbanuama, ato niha nifahaʼö wa Lowalangi andrö amuʼi ba omasi ia ihuku niha. Usuno göi ira börö me faduhu dödöra khö Lowalangi. Aefa daʼö ufatunö khöra hadia niwaʼö Zura Niʼamoniʼö sanandrösa ba mbua-bua Yehowa sahakhö tödö hegöi sanandrösa ba nifabuʼunia salua ba zi so miföna.”
”MIKALAISI ZI LÖ SÖKHI FAOMA SI SÖKHI”
Börö me no ahatö gamozua götö danö, andrö wa itugu ”monönö waʼalösökhi” niha ösa. (2 Timoteo 3:1, 13) Hizaʼi, böi tatehegö taya khöda waʼahakhö dödö mazui faʼomuso dödö ha börö nifaluara. Ibeʼe khöda waʼabölö Yehowa enaʼö ’takalaisi zi lö sökhi faoma si sökhi’. (Roma 12:21) Itutunö samösa perintis sotöi Jessica wa asese falukha ia ba niha sasiliawa ba sangoʼaya yaʼita hegöi turia nifaʼemada. Inönö nasa wangumaʼö, ”Tola afatö dödöda börö daʼö. Ba ginötö ubörötaigö fahuhuo, mangandrödo khö Yehowa bakha ba dödö ba wangandrö fanolo moroi khönia enaʼö tola uʼoʼö lala wamaiginia niha.” Daʼa zanolo Jessica enaʼö lö iʼosambuaʼö dödönia ba nirasoinia samösa, hizaʼi iʼangeragö hewisa lala ba wanolo niha andrö.
Lö aetu taʼalui niha somasi manöndra sindruhu
Ba ginötönia, so niha somasi manemaʼö fanolo nibeʼeda ba lafahaʼö ira ba zindruhu
Moguna göi taʼaroʼö ndra talifusöda ba ginötö fao ita khöra manuriaigö. Iwaʼö Jessica wa ba ginötö fao ia manuriaigö ba niha böʼö, ba na so ba gotaluara zotutunö salua si lö baga ba wanuriaigö, itandraigö enaʼö lö iʼosambuaʼö dödönia ba daʼö. Hizaʼi, itutunö ngawalö zi baga simane bua si sökhi nisöndrara ba wanuriaigö hewaʼae na so ösa niha zi lö omasi manemaʼö.
Aboto ba dödö Yehowa wa itaria abua khöda wanuriaigö. Hizaʼi, omuso dödönia ba ginötö taʼoʼö waʼahakhö dödönia! (Luka 6:36) Tatu manö so ndrohu-ndrohu waʼahakhö dödö Yehowa hegöi faʼebua dödönia ba niha gulidanö andre. Faduhu dödöda wa iʼila Yehowa hawaʼara ginötönia dania ba wangohori fefu zi lö sökhi. Hizaʼi, fatua lö alua daʼö, hasambalö mangaösö halöwö fanuriaigö. (2 Timoteo 4:2) Andrö böi tebulö ita weʼamöi manuriaigö si fao faʼaterou dödö ba taforomaʼö waʼahakhö dödö ba ’niha fefu’.
