1, 2. (a) Hana wa no sambua faʼatua-tua na faʼawö ita khö Yehowa? (b) Hadia nifatunöda ba wamahaʼö daʼa?

NO SAMBUA faʼatua-tua na ahatö ita khö Yehowa. Ha yaʼia wondrege zabölö, satua-tua ba sebua faʼomasi! Tatu manö, omasi ita enaʼö lö tebulö waʼalöfaröida khönia hegöi ba wangoʼawögö yaʼia. (Zinunö 96:4-6) Hizaʼi, so ösa zamosumange Lowalangi zamöhöli wamalua daʼö.

² Ba wamahaʼö daʼa, tatutunö ösa duma-duma niha sangumaʼö wa laʼoʼawögö Yehowa hizaʼi ba ginötö si fagölö lafalua göi zi fatuwu khönia. Duma-dumara tobali famahaʼö sabölö moguna khöda, sanolo yaʼita enaʼö lö tebulö waʼalöfaröida khö Yehowa.

3. Hana wa omasi Yehowa wanolo Kaʼino, ba hadia iwaʼö khönia?

³ Angeragö duma-duma Gaʼino. Tenga lowalangi faya nifosumangenia, hizaʼi lö itema zumangenia Yehowa. Hadia mbörö? Börö me iʼila Yehowa wa so khö Gaʼino dödö si lö sökhi. (1 Yohane 3:12) Imane Yehowa ba wamangelama Kaʼino, ”Na satulö ölau, ba tola öfaöga mbawau; ba na tenga satulö nilaumö, ba no so moroi tou horö, itarogö  ndraʼugö ba iʼisöʼö; ba yaʼugö ba höndrögö ia.” (1 Moze 4:6, 7) Ihaogö ifatunö Yehowa khö Gaʼino wa na so khönia wamalalini era-era ba ifili ba wangoʼawögö Lowalangi, hasambalö göi iʼoʼawögö ia Lowalangi.

4. Hadia nifalua Gaʼino hewaʼae tebeʼe khönia ginötö ba wangoʼawögö Yehowa?

⁴ Na ifalalini gera-erania Kaʼino hasambalö ifuli itema zumangenia Yehowa. Hizaʼi, lö ifondrondrongo Kaʼino hadia niwaʼö Lowalangi, ba ifalua zala börö gera-era hegöi isö-isö dödönia si fasala. (Yakobo 1:14, 15) Me awuyu-wuyu Gaʼino, te lö irai so ba wangera-ngerania ba wolawa Yehowa. Hizaʼi, iadaʼa lö ibeʼe dödönia wamangelama nibeʼe Lowalangi, molawa ia khö Lowalangi ba ibunu dalifusönia!

5. Hadia manö wangera-ngera sameʼe lö omuso dödö Yehowa khöda?

⁵ Simane Kaʼino, tola manö so niha Keriso iadaʼa sangumaʼö wa samosumange Yehowa ia, hizaʼi sindruhunia ifalua zi fatuwu khö Yehowa. (Yuda 11) Lö tebulö ia weʼamöi manuriaigö hegöi ba gangowuloa. Hizaʼi, ba ginötö si fagölö, iʼangeragö zoʼamakhaita ba wohorö, fakhögusa mazui so khönia dödö faʼafatuwu. (1 Yohane 2:15-17; 3:15) Fangera-ngera simane daʼö tola molua-lua ia ba wamalua horö. Tola manö lö laʼila niha böʼö hadia niʼera-erada mazui nifaluada, hizaʼi iʼila Yehowa. Aboto ba dödönia wa lö afönu wongoʼawögöda yaʼia.​—Baso Yeremia 17:9, 10.

6. Hewisa Yehowa wanolonia yaʼita ba wolawa isö-isö dödö si fasala?

⁶ Hewaʼae tafalua zala, omasi itolo ita Yehowa. Na aekhu ita ba lala si fasala, ikaoni ita Yehowa, ”Mifuli ami khögu, ba ufulido khömi.” (Maleakhi 3:7) Aboto ba dödö Yehowa wa so zoʼambötada samösa sinangea talawa. Hizaʼi, omasi ia enaʼö lö mangiwa dödöda ba tatimbagö zi lö sökhi. (Yesaya 55:7) Na tafalua daʼö, ifabuʼu khöda wa hasambalö itolo ita ba ibeʼe khöda waʼabölö ba wolawa isö-isö dödöda si fasala.​—1 Moze 4:7.

7. Hana wa tola taya wahuwusa Zelomo khö Yehowa?

⁷ Me awuyu-wuyu Zelomo, iʼokhögö wahuwusa si sökhi khö Yehowa. Ibeʼe göi khönia waʼatua-tua Lowalangi hegöi halöwö sebua ba wamonsindro osali Lowalangi ba Yeruzalema. Hizaʼi, ba gafuriata taya wahuwusa Zelomo khö Yehowa. (1 Razo 3:12; 11:1, 2) Moloʼö Oroisa Lowalangi, samösa razo ”ba böi yamuʼoyaʼö ndrongania, faböi iʼerogö [Yehowa]”. (5 Moze 17:17) Lö iʼoʼö goroisa andrö Selomo. So 700 ndrongania sindruhu ba 300 ndrongania ba döi! (1 Razo 11:3) Ato moroi ba gotalua woʼomonia niha baero samosumange lowalangi faya. Fangowalunia ba ndra alawe niha baero zangoromaʼö wa molawa ia ba goroisa Lowalangi.​—5 Moze 7:3, 4.

8. Hadia manö zala nifalua Zelomo khö Yehowa?

⁸ Arara manö, taya waʼomasi Zelomo ba goroisa Yehowa. Ba gafuriata, sindruhu-ndruhu ifalua ngawalö zi lö sökhi. Ifasindro naha wamosumange lowalangi faya sotöi Asitore hegöi Kamosi, ba mangalulu ia khö lowalangi  faya andrö faoma foʼomonia. Ifasindro ba hili naha zumange andrö Selomo föna Yeruzalema, ba nahia me ifasindro gosali Yehowa! (1 Razo 11:5-8; 2 Razo 23:13) Te so ba wangera-ngera Zelomo wa lö iʼameʼegö tödö Yehowa fefu zala nifaluania asala lö iböhöli ba wameʼe sumange ba gosali.

9. Hadia zalua me lö ifondrondrongo Selomo wamangelama nibeʼe Yehowa?

⁹ Hizaʼi, lö iʼaohasi ba dödö Yehowa horö si no mufalua. Imane Sura Niʼamoniʼö, ”Ba mofönu Yehowa khö Zelomo, me no iʼerogö Yehowa.” Itandraigö itolo Zelomo Lowalangi. Ba ”no mendrua ae, ba si no mameʼe oroisa andrö khönia, böi itörö lala Lowalangi böʼö; ba hadia niwaʼö Yehowa khönia ba lö niʼoʼönia”. Lua-luania, lö omasi khönia Lowalangi ba lö ituhini ia. Lö itehegö Yehowa ba ngaʼötö Zelomo ba wamatörö iraono Gizaraʼeli fefu ba oya gabula dödö salua ba ngaʼötönia ba zi hauga ngaotu fakhe.​—1 Razo 11:9-13.

10. Hadia manö zi tola mamakiko fahuwusada khö Yehowa?

¹⁰ Na tafili nawöda niha si lö faʼaboto ba dödö mazui si lö mangosinangegö goi-goi Lowalangi, tola tedönisi lala wangera-ngerada ba tola tekiko wahuwusada khö Yehowa. Tola manö yaʼira andre niha si so ba mbanua niha Keriso, hizaʼi lö aro wahuwusara khö Yehowa. Mazui yaʼira andrö  talifusöda ba waʼaniha, si fasinga omo khöda, awöda wohalöwö, mazui awöda ba zekola si tenga samosumange Yehowa. Na asese fariawö ita ba niha si lö moloʼö goi-goi Yehowa tola ladönisi ita khöra irege taya wahuwusada si sökhi khö Lowalangi.

11. Hadia manö wanofu-nofu sanolo yaʼita ba wamili awöda?

¹¹ Baso 1 Korindro 15:33. Ato niha sangokhögö bua-bua si sökhi hewaʼae yaʼira tenga samosumange Yehowa ba lö ero-ero lafalua zi lö sökhi. Tola manö, so ösa niha simane daʼö niʼilamö. Hadia daʼö geluahania wa yaʼira andre awö si sökhi ba wariawösa? Hadia lua-luania ba wahuwusamö khö Yehowa? Hadia latolo ndraʼugö enaʼö ahatö khö Lowalangi? Hadia manö zabölö moguna ba waʼaurira? Hadia manö nifadunö-dunöra? Hadia asese ladunö-dunö sanandrösa ba nukha, kefe, perangkat elektronik, hiburan, hegöi ngawalö zimane daʼö? Hadia asese lakata-kataʼö niha böʼö? Hadia asese latunö-tunö wehede hokha? Imane Yesu, ”Hadia zi no fahöna ba dödö, daʼö zalua ba mbewe.” (Mataiʼo 12:34) Na ibörögö tekiko wahuwusau khö Yehowa börö nawöu fariawö, so zi moguna öfalua! Alösi ginötömö fariawö ba na tola etuʼö wahuwusamö khöra.​—Gamaedola 13:20.

12. (a) Hadia niwaʼö Yehowa ba ndraono Gizaraʼeli lö ara me no aefa ira ba Miserai? (b) Hadia niwaʼö ndraono Gizaraʼeli me iʼandrö khöra Lowalangi enaʼö lö faröi?

¹² Tola göi tafahaʼö ita ba zalua khö ndraono Gizaraʼeli me no aefa iʼefaʼö ira Yehowa moroi ba Miserai. Me owulo ira ba Hili Zinaʼi, iforomaʼö ia khöra Yehowa si fao faʼahöli-höli dödö! Laʼila lawuo saitö, haga hegöi simbo ba larongo garimbanua hegöi li dorofe sebua. (2 Moze 19:16-19) Ba larongo wehede Yehowa me imane ”me no Lowalangi solohu ndraʼo”. Ifabuʼu khöra wa lö faröi ia ba niha sangomasiʼö yaʼia hegöi soloʼö niwaʼönia. (Baso 2 Moze 20:1-6.) Omasi Yehowa enaʼö laʼila iraono Gizaraʼeli wa na faʼawö ira khönia ba faʼawö göi ia khöra. Na so ndraʼugö ba gotaluara, hewisa dödöu me örongo wehede Yehowa? Te öbeʼe wanema li simane niwaʼö ndraono Gizaraʼeli me lamane, ”Oroisa andrö fefu, nibeʼe Yehowa, ba maʼoʼö!” (2 Moze 24:3) Hizaʼi lö ara aefa daʼö tetandraigö waʼalöfaröi ndraono Gizaraʼeli khö Lowalangi. Hadia zalua?

13. Hadia zanandraigö faʼalöfaröi ndraono Gizaraʼeli?

¹³ Me iforomaʼö ia Lowalangi si fao faʼahöli-höli dödö, ataʼu sibai ndraono Gizaraʼeli irege laʼandrö khö Moze enaʼö möi ia ba Hili Zinaʼi ba fahuhuo khö Yehowa ba wosalahini yaʼira. (2 Moze 20:18-21) Hizaʼi, ara sibai Moze ba hili ba lö mangawuli ia ba tendra. Te so ba wangera-ngerara wa laröi ira ba danö si mate ba lö sondröniaʼö yaʼira. Hadia nifaluara? Tola manö talafo laʼodaligö Moze iraono Gizaraʼeli ba wondröniaʼö yaʼira. So khöra waʼaombö-aombö dödö ba lamane khö Gaʼaroni, ”Labu, asogö khöda Lowalangi sowaö-waö fönada; löʼö sa maʼila, hadia zi göna niha andrö, Moze andrö, sangeheta yaʼita ba danö Miserai.”​—2 Moze 32:1, 2.

14. Hadia lala wangera-ngera ndraono Gizaraʼeli si fasala, ba hewisa wamaigi Yehowa nifaluara andrö?

 ¹⁴ Aboto ba dödö ndraono Gizaraʼeli wa fasala wamosumange adu. (2 Moze 20:3-5) Hizaʼi, lö ara ba no mangalulu ira khö nono zawi anaʼa! Hewaʼae no lasawö niwaʼö Yehowa, so ba wangera-ngerara wa lö si tebulö wangoʼawögöra Yehowa. Mendrua manö me ifotöi zalua andre Aʼaroni, ’owasa khö Yehowa!’ Hadia nifalua Yehowa ba zalua andre? Iwaʼö khö Moze wa ”noa sa elungu mbanuau andrö” ba ”no alio sibai laröi lala andrö, nifakhoigu khöra”. Mofönu sibai Yehowa irege edöna ihori soi andrö fefu.​—2 Moze 32:5-10.

15, 16. Hewisa wangoromaʼö Moze hegöi Aʼaroni wa afönu ira ba wangoʼawögö Yehowa? (Faigi gambara ba wamobörö wamahaʼö.)

¹⁵ Hizaʼi, Yehowa no Lowalangi sahakhö tödö. Ihalö gangetula wa lö alua ihori soi andrö. Ibeʼe ginötö ba ndraono Gizaraʼeli ba wangoromaʼö wa omasi ira wangoʼawögö yaʼia. (2 Moze 32:14) Me iʼila Moze woʼirara, fanunöra, ba fanarira föna nadu, ifakiko nono zawi anaʼa irege tobali hawu-hawu. Imane khöra, ”Yamöi khögu ba daʼe zi lö aefa khö Yehowa! Ba owulo khönia nono Lewi, fefu.”​—2 Moze 32:17-20, 26.

¹⁶ Hewaʼae Aʼaroni zamazökhi ono zawi anaʼa andrö, hizaʼi yaʼia hegöi niha Lewi tanö böʼö lafalalini gera-erara ba lafili ba wangoʼawögö Yehowa. Yaʼira si lö faröi andre laforomaʼö wa lö laʼoʼawögö niha samalua horö. No angetula si sökhi daʼa börö me ba ginötö daʼö ngahönö niha samosumange ono zawi anaʼa nibunu. Hizaʼi, teʼorifi niha sangoʼawögö Yehowa ba ifabuʼu khöra Lowalangi wa hasambalö tefahowuʼö ira.​—2 Moze 32:27-29.

17. Hadia wamahaʼö si tola tahalö moroi ba nisura Waulo sanandrösa ba nono zawi anaʼa?

¹⁷ Hadia wamahaʼönia khöda? Imane Faulo, ”Fefu daʼa tobali famahaʼö khöda” enaʼö böi irai ”tafosumange nadu”. Itutunö Faulo wa duma-duma daʼa ”tesura ia si möi famangelama khöda yaʼita sauri ba götö safuria andre. Na so zangumaʼö tödönia sizizio ia, ba yamufaigi enaʼö böi alau ia.” (1 Korindro 10:6, 7, 11, 12) Iforomaʼö Faulo wa niha samosumange Yehowa tola manö ifalua zi lö sökhi. Tola manö so ba wangera-ngerara wa lö si tebulö ira wangomusoiʼö tödö Yehowa. Hizaʼi, na ha faʼedöna zi so khö zi samösa niha wa omasi ia tobali si fahuwu khö Yehowa mazui iwaʼö wa yaʼia niha si lö faröi, tenga daʼö geluahania wa sindruhu-ndruhu omasi khönia Yehowa.​—1 Korindro 10:1-5.

18. Hana wa tola manö fandröndröu ita ba lala Yehowa, ba hadia lua-luania?

¹⁸ Börö me ara tohare Moze moroi ba Hili Zinaʼi simane nidöna-döna ndraono Gizaraʼeli, ibörögö aombö dödöra. Na lö alio tohare  gamozua götö danö andre simane nidöna-dönada, te ibörögö so khöda waʼaombö-aombö dödö. Tola manö so ba wangera-ngerada wa ara nasa alua nifabuʼu Yehowa safönu faʼahöli-höli dödö mazui lö tatu na alua ia. Ba lua-luania ibörögö taʼofönaiʼö hadia zomasi ita moroi ba zomasi Yehowa. Na lö mangelama ita, tola manö fandröndröu ita moroi ba lala Yehowa ba tafalua zi lö irai so ba wangera-ngerada.

19. Hadia zinangea lö aetu tatörö tödöda, ba hadia mbörö?

¹⁹ Omasi Yehowa enaʼö afönu ita ba woloʼö khönia ba ha yaʼia nifosumange. (2 Moze 20:5) Hadia mbörö wa iʼandrö khöda daʼa? Börö me iʼomasiʼö ita. Na lö tafalua hadia zomasi Yehowa, no tafalua zomasi Zatana, ba tobali famakikoda daʼö. Imane Faulo, ”Tebai faoma mibadu nösi mako moroi khö Yehowa ba mibadu göi nösi mako moroi khö ndra malaʼika si lö sökhi, mazui manga ami ba ’meza Yehowa’ hegöi ba meza malaʼika si lö sökhi.”​—1 Korindro 10:21.

20. Hewisa wanolo Yehowa yaʼita hewaʼae no tafalua zala?

²⁰ No tebeʼe ginötö khö Gaʼino, Selomo hegöi iraono Gizaraʼeli fefu ba wamalalini era-era hegöi ba wombulöʼö amuatara. (Halöwö Zinenge 3:19) Hewaʼae lafalua zala niha, omasi Yehowa ba wanolo yaʼira. Angeragö hewisa wangefaʼönia sala Aʼaroni. Iadaʼa, ibeʼe khöda Yehowa wamangelama si fao faʼomasi ba wolumöʼö yaʼita faböi tafalua zala. Iʼogunaʼö Zura Niʼamoniʼö, publikasida, hegöi niha Keriso tanö böʼö. Na taʼameʼegö tödö wamangelama nibeʼe Yehowa, faduhu dödöda wa hasambalö iforomaʼö khöda waʼahakhö dödö.

21. Hadia zinangea tafalua ba ginötö tetandraigö waʼalöfaröida khö Yehowa?

²¹ No iforomaʼö khöda Yehowa waʼasökhi dödö sebua. (2 Korindro 6:1) Börö waʼasökhi dödö andrö tebeʼe khöda ginötö ba ”wolawa si lö sökhi si fatuwu khönia, tatimbagö gisö-isö dödö ba gulidanö”. (Baso Tito 2:11-14.) Iadaʼa, lö aetu so zi tobali sanandraigö faʼalöfaröida khö Yehowa. Halö gangetula enaʼö afönu ba wangoʼawögöu Yehowa ba törö tödöu ”öʼataʼufi Lowalangi Yehowa ba öfosumange” ba ”khönia molemba ndraʼugö”.​—5 Moze 10:20.