1. Si toʼölönia, hadia zomasi ita?

HEWISA dödömö na so samösa niha si faʼila khömö hegöi nifosumangemö, olifu ia döimö mazui maʼifu lö itörö tödönia haniha ndraʼugö? Tatu ide-ide dödömö. Hadia mbörö? Börö me no si toʼölö na omasi ita enaʼö latema ita niha böʼö. Hizaʼi, lö omasi ita na ha asala laʼila haniha ita. Tatu omasi ita na aboto ba dödöra hewisa ita zindruhunia hegöi hadia manö zi no mofozu tafalua.​—4 Moze 11:16; Yobi 31:6.

2, 3. Hadia zi tola alua ba waʼedönada enaʼö laʼosinangegö ita niha böʼö? (Faigi gambara ba wamobörö wamahaʼö.)

² Hizaʼi, na lö mangelama ita, faʼomasida enaʼö laʼosinangegö tola manö lö tefaudu. Ulidanö nifatörö Zatana, tola ibeʼe tehöngö ita hegöi tohude moroi ba niha böʼö. Na alua daʼö, tola mangoloi dödöda irege lö taʼosinangegö ba lö tafolakhömi Namada si so ba zorugo, Lowalangi Yehowa.​—Famaʼeleʼö 4:11.

³ Ba götö Yesu, so ösa ndra sondröniaʼö ba agama  zangokhögö fangera-ngera si fasala sanandrösa ba wangosinangegö. Ifangelama ndra nifahaʼönia Yesu, ”Miʼangelama khö ndra sangila amakhoita andrö samangörö-ngörö yaʼira, samake baru sebua sanau ba omasi ira nifosumange ba nahia sato niha ba omasi ira modadao ba gurusi tanö föna ba nahia waʼowulo hegöi nahia si sökhi ba gowasa.” Imane nasa, ”Latema dania hukumara sabölö ebua.” (Luka 20:46, 47, nisura ba gahe zura) Hizaʼi, isuno lakha mbanua si numana Yesu sameʼe dolo-tolo si dombua loga side-ide böli, hewaʼae na lö hadöi samaigi-maigi nifalua lakha mbanua andrö. (Luka 21:1-4) Ba daʼa taʼila wa faböʼö sibai lala wangera-ngera Yesu sanandrösa ba wangosinangegö moroi ba niha böʼö. Famahaʼö daʼa zanolo yaʼita ba wangokhögö fangera-ngera satulö sanandrösa ba wangosinangegö, yaʼia daʼö ba wangokhögö lala wangera-ngera Lowalangi Yehowa.

4. Hadia wangosinangegö sabölö sökhi, ba hadia mbörö?

⁴ Hadia wangosinangegö sabölö sökhi? Daʼö tenga simane nigohi-gohi niha ba wangai sekola salawa, halöwö sofozu, tobali artis enaʼö tehöngö ba gulidanö mazui enaʼö laʼosinangegö ira niha. Hizaʼi, itutunö khöda Faulo me imane, ”Iadaʼa, me no aboto ba dödömi Lowalangi, mazui sabölö tefaudunia no aboto ba dödö Lowalangi ami, hana wa mifuli miʼoʼö lala wangera-ngera hegöi faʼauri si tobali zaya-zaya gölö ba si lö eluaha, ba omasi ami tobali sawuyura zui?” (Galatia 4:9) No töi sebua khöda na ”aboto ba dödö Lowalangi” ita, Samatörö Fondrege Zalawa ba mbanua si yawa awö danö! Aboto ba dödö Yehowa ita, iʼomasiʼö ita ba omasi ia na ahatö ita khönia. Iwöwöi ita Yehowa enaʼö tobali ita si fahuwu khönia.​—Zangombakha 12:13, 14.

5. Hadia zinangea tafalua enaʼö iʼila ita Lowalangi?

⁵ Taʼila wa si fahuwu khö Yehowa Moze. Me mangandrö ia, imane khö Yehowa, ”Beʼe aboto ba dödögu ndraʼugö” ba itema li Yehowa, ”Ba he daʼö göi, niʼandröu, ba uʼoʼö; no sa falukhaʼö waʼebua dödö khögu ba no uʼila döimö.” (2 Moze 33:12-17) Tola göi iʼila ita Yehowa zamösana. Hizaʼi, hadia nifaluada enaʼö tobali ita si fahuwu khö Yehowa? Moguna taʼomasiʼö ia ba talulu waʼaurida khönia.​—Baso 1 Korindro 8:3.

6, 7. Hadia mbörö wa tola taya wahuwusada khö Yehowa?

⁶ Moguna göi tarorogö wahuwusada khö Namada si so ba zorugo. Simane niha Keriso siföföna ba Galatia, moguna göi tatimbagö ”lala wangera-ngera hegöi faʼauri si tobali zaya-zaya gölö ba si lö eluaha” simane faʼamofozu ba halöwö si so ba gulidanö andre hegöi faʼatehöngö. (Galatia 4:9) Niha Keriso si so ba Galatia, no aboto ba dödöra haniha Lowalangi ba aboto göi ba dödö Lowalangi haniha ira. Hizaʼi, iwaʼö Faulo wa so ösa ndra talifusö sangawuli furi ba lagohi zi tobali zaya-zaya gölö. Mazui manofu ia khöra, ’Hadia guna wa mifuli migohi zi tobali zaya-zaya gölö mazui si lö eluaha?’

⁷ Hadia tola göi alua khöda zimane  daʼö? Tatu manö. Simane Faulo, ba ginötö taʼila zindruhu tola manö lö omasi ita tehöngö ba mofozu ba gulidanö Zatana andre. (Baso Filifi 3:7, 8.) Tola manö tatehegö taya khöda beasiswa, halöwö si sökhi mazui fanöndra kefe sebua. Mazui, tola manö tehöngö ita ba mokefe börö me onekhe ita ba musik mazui olahraga. Hizaʼi, tatimbagö fefu daʼö. (Heberaiʼo 11:24-27) Böi irai so khöda waniasa mazui fangera-ngera wa abölö sökhi na tagohi daʼö fefu! Fangera-ngera simane daʼö tola idönisi dödöda ba ngawalö hadia ia zi so gulidanö daʼa, si no tafotöi ”zaya-zaya gölö ba si lö eluaha”.

8. Hewisa wangaroʼöda faʼedöna enaʼö iʼila ba iʼameʼegö tödö ita Yehowa?

⁸ Enaʼö lö adöni dödöda ba nibeʼe gulidanö daʼa, moguna taʼaroʼö waʼedönada enaʼö iʼila ba iʼameʼegö tödö ita Yehowa. Hewisa lalania? Moguna taʼosambuaʼö dödöda ba zindruhu si dombua ngawalö. Si oföna, lö irai olifu Yehowa ba woʼameʼegö tödö niha si lö faröi khönia. (Baso Heberaiʼo 6:10; 11:6) No sebua böli föna Yehowa fefu nono mbanuania si lö faröi, irege so ba dödönia wa ”si lö atulö” ia na lö iʼameʼegö tödö ira. Lö aetu iʼila Yehowa ”haniha dana khönia”. (2 Timoteo 2:19) ”Iʼila Yehowa lala zatulö” ba iʼila hewisa lala ba wolumöʼö yaʼira.​—Zinunö 1:6; 2 Fetero 2:9.

9. Beʼe duma-duma hewisa wangoromaʼö Yehowa faʼomasinia ba nono mbanuania.

⁹ Itaria iforomaʼö waʼomasinia Yehowa ba nono mbanuania moloʼö lala si tohude. (2 Ngaʼötö 20:20, 29) Duma-dumania, angeragö hewisa lala Yehowa ba wolumöʼö ono mbanuania ba Nasi Soyo me lagohi ira saradadu sagabölö khö Waraʼo. (2 Moze 14:21-30; Zinunö 106:9-11) No sahöli-höli dödö zalua andre irege lö aetu ladunö-dunö niha si so ba mbanua daʼö hewaʼae no aefa 40 fakhe me alua ia. (Yosua 2:9-11) Daʼa zi tobali fangaroʼöda enaʼö tatörö tödöda hewisa waʼomasi Yehowa nono mbanuania hegöi wangogunaʼönia faʼabölönia ba wolumöʼö yaʼira me föna, börö me lö ara tö isuwö ita Gogi moroi ba danö Magogi. (Hezekieli 38:8-12) Ba ginötö daʼö, omuso sibai dödöda börö me no taʼodödögö enaʼö iʼomasiʼö ita Lowalangi, tenga ulidanö daʼa.

10. Hadia manö zindruhu si dua sinangea tatörö tödö?

¹⁰ Sindruhu si dua yaʼia daʼö, iʼosinangegö ita Yehowa ba ibeʼe howu-howu moloʼö lala si lö irai tadöna-döna. Na so niha zolau si sökhi ha enaʼö lasuno ia niha, lö ifahowuʼö ia Yehowa. Hadia mbörö? Börö me iwaʼö Yesu, ba ginötö lasuno ia niha, ha daʼö howu-howu nisöndrania. (Baso Mataiʼo 6:1-5.) Hizaʼi, na so niha samalua si sökhi ba lö laʼila niha böʼö hadia zi no ifalua, hasambalö iʼila daʼö Yehowa. Inehegö Yehowa hadia nifaluara ba howu-howu  mazui ifahowuʼö ira. Itaria ifahowuʼö nono mbanuania Yehowa moloʼö lala si lö mudöna-döna. Datafaigi duma-dumania.

11. Hewisa Yehowa wangosinangegö Maria?

¹¹ Ifili samösa ndra alawe sangide-ngideʼö Yehowa sotöi Maria si tobali ina Yesu, Ono Lowalangi. Toröi Maria ba mbanua side-ide nifotöi Nazareta, si fandröndröu moroi ba Yeruzalema hegöi osali si baga-baga. (Baso Luka 1:26-33.) Hana wa Maria nifili Yehowa? Fahuhuo malaʼika Gaberieli khö Maria ba iwaʼö wa ’iʼomasiʼö ia Lowalangi’. Moroi ba wehedenia khö Gelizabe, talifusönia ba waʼaniha ba daʼö taʼila wa fahuwu sibai ia khö Yehowa. (Luka 1:46-55) Inehe-nehegö Maria Yehowa börö me lö faröi ia, andrö wa ifahowuʼö ia Yehowa.

12, 13. Hewisa wangosinangegöra Yesu me tumbu ia hegöi ba ginötö iʼohe ia Maria ba gosali me no aefa 40 hari me tumbu ia?

¹² Me tumbu Yesu, haʼökhö ifatunö Yehowa waʼatumbunia? Tenga khö pejabat mazui khö zamatörö ba Yeruzalema hegöi Betilekhema. Hizaʼi, ifatenge malaʼika khö ndra kubalo si so fangide-ngideʼö, sanaro mbiri-birira ba mbenua baero ba Mbetilekhema. (Luka 2:8-14) Ba möi ndra kubalo andre ba wamalukhaisi ono sawuyu sawena tumbu andrö. (Luka 2:15-17) Tatu, tokea sibai dödö Maria hegöi Yosefo me laʼila wa lafosumange Yesu simane daʼö. Faböʼö lala Yehowa ba wamalua hadia ia moroi ba lala nifalua Gafökha. Me ifatenge Satana ndra sanahö döfi andrö ba wamalukhaisi Yesu hegöi satuania, fefu niha si so ba Yeruzalema laʼila sanandrösa ba waʼatumbu Yesu irege oya iʼasogö gabula dödö. (Mataiʼo 2:3) Lua-luania, ato nono side-ide si lö fasala nibunu.​—Mataiʼo 2:16.

¹³ Moloʼö Oroisa Yehowa ba ndraono Gizaraʼeli, na no aefa 40 hari tumbu nono matua khö zi samösa ina, moguna ibeʼe zumange khö Yehowa. Andrö wa mofanö Maria faoma Yosefo hegöi Yesu  moroi ba Mbetilekhema möi ira ba gosali si so ba Yeruzalema, faʼaröunia arakhagö siwa kilometer. (Luka 2:22-24) Ba wofanö-fanöra, tola manö manofu-nofu dödö Maria hadia so zi tohude nifalua gere ba wamosumange Yesu. Sindruhu sa wa lafosumange Yesu, hizaʼi moloʼö lala si lö idöna-döna Maria. Ifili Zimoni Yehowa, ”niha satulö ba sangataʼufi Lowalangi”, ba samösa zamaʼeleʼö ira alawe sotöi Ana, lakha mbanua döfinia 84 fakhe, ba wanutunö ba niha wa Yesu andrö Mesia si no mufabuʼu mazui Keriso.​—Luka 2:25-38.

14. Hewisa Yehowa wamahowuʼö Maria?

¹⁴ Hadia lö tebulö Yehowa ba wangosinangegö Maria börö me no irorogö Yesu irugi ebua-bua si fao faʼalöfaröi? Tatu manö. Omasi Lowalangi enaʼö tesura ösa ba Zura Niʼamoniʼö wehede hegöi nifalua Maria. Tola manö, lö fao Maria khö Yesu me ifalua halöwö fanuriaigö si tölu fakhe amatonga. Te börö me lakha mbanua ia, si lö tola löʼö toröi ia ba Nazareta. Daʼö mbörö wa lö oya zahöli-höli dödö nirasoi Maria simane salua ba niha böʼö. Hizaʼi me mate Yesu, so ba daʼö Maria. (Yohane 19:26) Ba gafuriata so Maria ba gotalua ndra nifahaʼö Yesu ba Yeruzalema, fatua lö latema geheha niʼamoniʼö ba ginötö Wendrakose. (Halöwö Zinenge 1:13, 14) Te göi fao ia me labayoini ndra nifahaʼö tanö böʼö. Na simanö, tebeʼe khönia ginötö wefao khö Yesu ba zorugo sagötö faʼara. No howu-howu fondrege zi sökhi daʼö börö waʼalöfaröinia!

15. Hewisa wangoromaʼö Yehowa faʼomasinia khö Yesu me so Yesu ba gulidanö?

¹⁵ Lö manötöna Yesu enaʼö lafosumange ia ira sondröniaʼö ba agama mazui politik. Hizaʼi, tölu kali fahuhuo khönia Yehowa moroi ba zorugo ba wangoromaʼö wa iʼomasiʼö ia Yehowa. Tatu möi fangaro dödö Yesu daʼa! Me aefa sibai mubayagö idanö Yesu ba Nungo Nidanö Yoridano, imane Yehowa, ”Onogu daʼa,  niʼomasiʼögu, waʼomasigu ia.” (Mataiʼo 3:17) Tola manö ha Yohane Samayagö Idanö zamondrongo fehede andrö. Aefa daʼö, mato döfi fatua lö mate Yesu, so datölu zinenge samondrongo fehede Yehowa sanandrösa khö Yesu, ”Onogu daʼa, niʼomasiʼögu, waʼomasigu ia. Mifondrondrongo niwaʼönia.” (Mataiʼo 17:5) Ba gafuriata, mato hauga hari fatua lö mate Yesu, ifuli zui fahuhuo Yehowa moroi ba zorugo khö Nononia.​—Yohane 12:28.

16, 17. Hewisa Yehowa wangosinangegö Yesu moloʼö lala si lö mudöna-döna?

¹⁶ Iʼila Yesu wa lafotöi ia niha sangoʼaya Lowalangi, ba lö baga waʼamatenia. Hizaʼi, mangandrö ia enaʼö somasi Lowalangi zalua, tenga somasi ia samösa. (Mataiʼo 26:39, 42) ”Itaögö waʼafökhö ba döla geu famakao” börö me omasi na Amania zangosinangegö yaʼia, tenga ulidanö. (Heberaiʼo 12:2) Hewisa Yehowa wangosinangegö Yesu?

¹⁷ Me ba gulidanö so Yesu, mangandrö ia enaʼö isöndra lakhömi simane niʼokhögönia ba zorugo me fao ia khö Namania. (Yohane 17:5) Lö niwaʼö Zura Niʼamoniʼö wa si töra moroi ba daʼö nitötöna Yesu. Lö itötöna howu-howu sabölö tohude börö me no ifalua gohitö dödö Yehowa ba gulidanö. Hizaʼi, hadia nifalua Yehowa? Iʼosinangegö Yesu moloʼö lala si lö mudöna-döna. Me isusugi Yesu Yehowa, ibeʼe khönia ”dadaoma sabölö alawa” ba zorugo. Ibeʼe göi khö Yesu waʼauri si tebai mate. Lö irai so zanema daʼa! * (Faigi nisura ba gahe zura.) (Filifi 2:9; 1 Timoteo 6:16) No sahöli-höli dödö lala niʼogunaʼö Yehowa ba wameʼe howu-howu khö Yesu!

18. Hadia zanolo yaʼita enaʼö tatema waʼomasi Yehowa, tenga ulidanö daʼa?

¹⁸ Hadia zanolo yaʼita enaʼö tatema waʼomasi Yehowa, tenga ulidanö daʼa? Moguna tatörö tödöda wa lö irai tebulö Yehowa ba wangosinangegö ono mbanuania si lö faröi. Ba asese ifahowuʼö ira moloʼö lala si lö mudöna-döna. Tola takhalaigö hewisa wamahowuʼö Yehowa yaʼita ba zi so miföna! Hizaʼi iadaʼa, oya gabula dödö hegöi famakao nitaögöda ba gulidanö si lö sökhi andre. Andrö moguna tatörö tödöda wa arakhagö irugi gamozuania ulidanö daʼa. Tobali, na iʼosinangegö ita ulidanö, ha ba zi sabata daʼö. (1 Yohane 2:17) Hizaʼi, Amada sebua faʼomasi, Yehowa, lö irai olifu ia nifaluada hegöi faʼomasi niforomaʼöda ba döinia börö me yaʼia ”tenga sa si lö atulö”. (Heberaiʼo 6:10) Hasambalö iʼomasiʼö ita moloʼö lala si lö irai takhalaigö!