1. Hana tola tawaʼö wa Yehowa zangokhögö fefu hadia ia? (Faigi gambara ba wamobörö wamahaʼö.)

FEFU hadia ia, no tana khö Yehowa! Yaʼia zangokhögö ’banua si yawa, irugi ba wondrege yawa, awö danö ba ösinia fefu’. (5 Moze 10:14; Famaʼeleʼö 4:11) Börö me Yehowa zomböi niha, andrö wa no tana khönia ita fefu. (Zinunö 100:3) Hizaʼi, sagötö waö-waö waʼauri niha, so ösa nifili Yehowa zi tobali tana khönia si tohude.

2. Moloʼö Sura Niʼamoniʼö, haniha manö dana khö Yehowa si tohude?

² Duma-dumania, itutunö ba Zinunö 135 wa niha si lö faröi ba wamosumange Yehowa ba götö ndraono Gizaraʼeli, ifotöi ira ”tana khönia”. (Zinunö 135:4) Aefa daʼö, ibeʼe wamaʼeleʼö Hosea wa so ösa zi tenga iraono Gizaraʼeli zi tobali ono mbanua Yehowa. (Hosea 2:25) Alua wamaʼeleʼö daʼa ba ginötö ifili Yehowa niha si tenga iraono Gizaraʼeli tobali awö Keriso mamatörö ba zorugo. (Halöwö Zinenge 10:45; Roma 9:23-26) Niha nibayoini geheha niʼamoniʼö  lafotöi ira ”soi niʼamoniʼö”. Yaʼira andre ”ono mbanua si tohude khö Lowalangi”. (1 Fetero 2:9, 10) Hizaʼi, hewisa niha Keriso si lö faröi sanötöna sauri ba gulidanö sagötö faʼara? Ifotöi ira Yehowa ’ono mbanuania’ hegöi ’nitutuyunia’.​—Yesaya 65:22.

3. (a) Haniha zangokhögö amakhaita si tohude khö Yehowa ba ginötö iadaʼa? (b) Hadia nitutunöda ba wamahaʼö daʼa?

³ Iadaʼa, ”ngawawa si lö atoto” laʼokhögö wanötöna ba zorugo sagötö faʼara ba ’biri-biri tanö böʼö’ auri ira ba gulidanö sagötö faʼara. ”Ha sambawa nikubaloi” ira ba wamosumange Yehowa. (Luka 12:32; Yohane 10:16) Tatu taʼandrö sibai saohagölö khö Yehowa me tola taʼokhögö gamakhaita si tohude khönia. Ba wamahaʼö daʼa, tatutunö hewisa wangoromaʼöda fangandrö saohagölö khö Yehowa me no itehegö khöda daʼa.

4. Hewisa wangoromaʼöda fangandrö saohagölö khö Yehowa me no taʼokhögö gamakhaita si tohude khönia, ba hewisa göi wamalua Yesu daʼö?

⁴ Taforomaʼö wangandröda saohagölö khö Yehowa ba ginötö talulu waʼaurida khönia ba tafabayagöʼö ita idanö. Laʼila niha fefu wa no tobali ita tana khö Yehowa ba omasi taʼoʼö nifakhoinia. (Heberaiʼo 12:9) No göi ifalua daʼö Yesu ba ginötö tebayagö ia idanö. Hewaʼae no tobali Yesu soi tana khö Yehowa, hizaʼi itehegö waʼaurinia khö Yehowa. Hulö amaedola imane, ”Foloʼö somasi ndraʼugö, yaʼugö Lowalangigu, ba no faʼomasigu.”​—Zinunö 40:8, 9.

5, 6. (a) Hadia niwaʼö Yehowa me tebayagö idanö Yesu? (b) Hadia duma-duma si tobali fanolo khöda ba wangiʼila hadia nirasoi Yehowa sanandrösa ba wolulu faʼaurida?

⁵ Hewisa dödö Yehowa me tebayagö idanö Yesu? Imane Sura Niʼamoniʼö, ”Me no aefa tebayagö idanö Yesu, iʼanemaiʼö kalua ia moroi ba nidanö. Ba ginötö daʼö göi, teboka mbanua si yawa ba iʼila Yohane geheha Lowalangi si möi khö Yesu, hulö marafadi. Ba terongo li moroi ba mbanua si yawa imane, ’Onogu daʼa, niʼomasiʼögu, waʼomasigu ia.’” (Mataiʼo 3:16, 17) No tobali Yesu tana khö Lowalangi. Hizaʼi, omuso dödö Yehowa me iʼila wa itehegö iʼogunaʼö waʼaurinia Yesu ba wamosumange yaʼia. Omuso göi dödö Yehowa ba ginötö talulu waʼaurida khönia ba ifahowuʼö ita.​—Zinunö 149:4.

⁶ Hizaʼi, so khö Yehowa fefu hadia ia! Hadia zi tola tabeʼe khönia? Khalaigö samösa ndra matua si so kabu mbunga si sökhi. Samuza inötö, ifatö sambua bunga moroi ba kabu andrö ononia alawe side-ide ba ibeʼe khö namania. Hewaʼae khö namania mbunga andrö, hizaʼi omuso dödönia ba mbuala nononia. Daʼö zangoromaʼö wa iʼomasiʼö ia ononia. No sebua böli ba dödönia mbunga nibeʼe nononia andrö moroi ba mbunga tanö böʼö si so ba kabunia. Simanö göi Yehowa, omuso dödönia ba ginötö talulu waʼaurida khönia soroi ba dödö.​—2 Moze 34:14.

7. Hewisa Maleakhi ba wanolo yaʼita enaʼö taʼila hewisa dödö Yehowa sanandrösa ba niha samosumange yaʼia soroi ba dödö?

⁷ Baso Maleakhi 3:16. Hadia mbörö wa moguna ölulu waʼaurimö khö Yehowa  ba öfabayagöʼö ndraʼugö idanö? Iʼotarai me so ba dalu, no tobali ndraʼugö tana khö Yehowa, Somböi hadia ia fefu. Hizaʼi, angeragö hewisa waʼomuso dödö Yehowa ba ginötö ötema ia tobali Samatörö yaʼugö ba ölulu waʼaurimö khönia! (Gamaedola 23:15) Iʼila Yehowa haniha manö zamosumange yaʼia soroi ba dödö ba isura döira ba ’zura wamasugi ba dödö’.

8, 9. Hadia niʼandrö Yehowa ba niha si no tesura töi ba ’zura wamasungi ba dödö’?

⁸ Na omasi ita lö tebulö tesura döida ba ’zura wamasugi ba dödö’ khö Yehowa, so zinangea tafalua. Itutunö Maleakhi wa moguna taʼataʼufi Yehowa ba taʼangerönusi döinia. Na mangalulu ita ba danö böʼö mazui hadia ia, aheta döida moroi ba zura Yehowa!​—2 Moze 32:33; Zinunö 69:29.

⁹ Hizaʼi, lö ibönö na ha tafabuʼu khönia wa tafalua zomasi Yehowa ba tafabayagöʼö ita idanö. Ha sakali tafalua daʼö, hizaʼi famosumange Yehowa tafalua ia sandrohu faʼaurida. Sagötö faʼaurida, moguna taforomaʼö ba nifaluada si ero maʼökhö wa taʼoʼö nifakhoi Yehowa.​—1 Fetero 4:1, 2.

10. Hadia waʼafaehu sindruhu-ndruhu oroma ba gotalua niha samosumange Yehowa hegöi si tenga?

¹⁰ Ba wamahaʼö si no tataluʼi, no tafahaʼö ita sanandrösa khö Gaʼino, Selomo hegöi iraono Gizaraʼeli sangumaʼö wa lafosumange Yehowa hizaʼi faröi ira khönia. Moroi ba duma-duma daʼa, taʼila wa lö ibönö na ha tawaʼö wa samosumange Yehowa ita. Moguna fatuwu ita ba zi lö sökhi ba taʼomasiʼö hadia zi sökhi. (Roma 12:9) Iwaʼö Yehowa wa sindruhu-ndruhu oroma waʼafaehu ”zatulö zi lö atulö, ba faʼafaehura zamosumange Lowalangi zi lö mamosumange yaʼia”.​—Maleakhi 3:18.

11. Hana wa moguna laʼila niha fefu wa ha Yehowa nifosumangeda?

¹¹ Taʼandrö saohagölö khö Yehowa me no ifili ita tobali ono mbanuania! Moguna laʼila niha fefu wa si faʼawö khö Yehowa ita. (Mataiʼo 5:16; 1 Timoteo 4:15) Sofu khöu samösa, ’Hadia laʼila niha böʼö wa afönu waʼalöfaröigu khö Yehowa? Hadia lö ailado wangumaʼö ba niha wa samösa Samaduhuʼö Yehowa ndraʼo?’ Khalaigö hewisa dödö Yehowa na aila ita ba wamatunö ba niha wa tana khönia ita.​—Zinunö 119:46; baso Mareko 8:38.

12, 13. Hadia mbörö wa abua ba niha böʼö ba wangiʼila wa Samaduhuʼö Yehowa ita?

¹² Hewaʼae simanö, so ösa Zamaduhuʼö soloʼö ”eheha gulidanö”. Lua-luania, lö aröu faehu ira ba niha si tenga samosumange Yehowa. (1 Korindro 2:12) Tola ibeʼe teʼosambuaʼö dödö niha ”eheha gulidanö” ba gisö-isö dödöra samösa. (Efeso 2:3) Duma-dumania, no oya labeʼe khöda mene-mene sanandrösa ba wonukha, hizaʼi so ösa zofili ba wangogunaʼö nukha si lö  tefaudu simane nukha si fandroli ba nösi hegöi si teboka. Mendrua manö, lafake göi daʼö ba gangowuloa niha Keriso. Mazui lafili wangogunaʼö fotonga mbu si lö tefaudu. (1 Timoteo 2:9, 10) Lua-luania, abua ba niha böʼö ba wamaehusi hadia Samaduhuʼö Yehowa ira mazui tenga.​—Yakobo 4:4.

¹³ So mbörö tanö böʼö wa tola lö aröu faböʼö ösa Zamaduhuʼö moroi ba gulidanö. Duma-dumania na so gowasa, so ösa zanari ba samalua si lö fatema moloʼö niha Keriso. Tanö böʼönia, labeʼe koda hegöi fehede sangoromaʼö lala wangera-ngera gulidanö ba media sosial. Tola manö lö nitemara fotu moroi ba mbanua niha Keriso börö me lö nifaluara horö sebua, hizaʼi tola lö sökhi lua-lua nifaluara andrö khö ndra talifusö tanö böʼö si no mangodödögö enaʼö faböʼö moroi ba gulidanö.​—Baso 1 Fetero 2:11, 12.

14. Hadia zinangea tafalua enaʼö telumöʼö wahuwusada khö Yehowa?

¹⁴ Fefu zi so ba gulidanö tola iʼosambuaʼö wangera-ngerada ba ’waʼomasi nösi, faʼomasi hörö, ba fohöni-höni okhöta’. (1 Yohane 2:16) Börö me tana khö Yehowa ita, andrö wa moguna faböʼö ita. Moguna ’talawa zi lö sökhi si fatuwu khönia, tatimbagö gisö-isö dödö ba gulidanö, taʼokhögö wangera-ngera si sökhi, faʼatulö, ba famosumange Lowalangi soroi ba dödö ba gotalua niha gulidanö ba götö daʼa’. (Tito 2:12) Fefu nifaluada ba waʼauri simane na mohede, mamadu, monukha, hegöi fohalöwö moguna oroma ba niha fefu wa yaʼita no tana khö Yehowa.​—Baso 1 Korindro 10:31, 32.

15. Hadia mbörö wa moguna tafalua zi sökhi ba taʼomasiʼö ndra talifusöda niha Keriso tanö böʼö?

¹⁵ Ba nifaluada khö ndra talifusöda zangoromaʼö hadia taʼameʼegö tödö wahuwusada khö Yehowa mazui löʼö. Simane yaʼita, tana khö Yehowa göi ira. Na tatörö tödöda daʼa, lö tebulö tafalua khöra zi sökhi ba taʼomasiʼö ira. (1 Tesalonika 5:15) Hana wa moguna daʼa? Imane Yesu khö ndra soloʼö khönia, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.”​—Yohane 13:35.

16. Hadia wamahaʼö si tola tahalö moroi ba Goroisa Moze sanandrösa ba waʼomasi Yehowa ba nono mbanuania?

¹⁶ Ba Goroisa Moze, so sambua duma-duma sanolo yaʼita enaʼö taʼila hewisa zinangeania ita khö ndra talifusöda ba mbanua niha Keriso. Ba gosali Yehowa, so ösa fakake niʼogunaʼö ha ba ginötö labeʼe zumange. Ba Goroisa so wanuturu lala ba niha Lewi, hewisa zinangeania ira ba wondrondrogö fakake andrö, ba na lö laʼoʼö wanuturu lala andre tola lahuku mate ira. (4 Moze 1:50, 51) Na iʼameʼegö tödö sibai Yehowa wondrondrogö fakake niʼogunaʼö ba wameʼe sumange, tatu abölö iʼameʼegö tödö nifalua nono mbanuania si lö faröi khönia! Iʼameʼegö tödö sibai ita Yehowa, oroma daʼa moroi ba wehedenia me imane, ’Me no sombambaya ono hörögu zombambaya yaʼami.’​—Zakharia 2:8.

17. Hadia ’ninehegö Lowalangi ba irongo’?

¹⁷ Itutunö Maleakhi wa ”inehegö Lowalangi ba irongo” hadia nifalua nono  mbanuania khö nawöra zamösana. (Maleakhi 3:16) ”Iʼila Yehowa haniha dana khönia.” (2 Timoteo 2:19) Aboto ba dödönia fefu nifaluada hegöi niwaʼöda. (Heberaiʼo 4:13) Iʼila Yehowa na lö sökhi ita khö ndra talifusöda. Hizaʼi, tola göi faduhu dödöda wa iʼila Yehowa na aoha gölöda ba wanema tome, oböwö, taʼefaʼö zala niha ba so khöda waʼasökhi dödö.​—Heberaiʼo 13:16; 1 Fetero 4:8, 9.

18. Hewisa woʼandröda saohagölö khö Yehowa me no ifili ita tobali ono mbanuania?

¹⁸ Tatu omasi taforomaʼö wangandrö saohagölö khö Yehowa me tana khönia ita si tobali ono mbanuania. Ba ginötö talulu waʼaurida khönia, aboto ba dödöda wa no angetula si sökhi daʼö. Hewaʼae auri ita ba ”gotalua ngaʼötö niha si lö sökhi ba safaito”, tola lö tebulö tobali ita niha si ’lö mosinegu ba atulö’ hegöi ”haga ba niha gulidanö”. (Filifi 2:15) Andrö moguna tahalö gangetula ba wotimbagö hadia ia zi fatuwu khö Yehowa. (Yakobo 4:7) Taʼomasiʼö ba taʼosinangegö ndra talifusöda börö me tana khö Yehowa göi ira.​—Roma 12:10.

19. Hewisa wamahowuʼö Yehowa dana khönia?

¹⁹ Ifabuʼu Sura Niʼamoniʼö, ”Lö sa itiboʼö mbanuania Yehowa.” (Zinunö 94:14) Ba daʼa oroma wa lö irai iröi ita Yehowa gofu hadia ia zalua. Hewaʼae mate ita, lö olifu ia khöda. (Roma 8:38, 39) ”Na auri ita, khö Yehowa waʼaurida. Na mate ita, khö Yehowa waʼamateda. Tobali, he auri he mate, khö Yehowa ita.” (Roma 14:8) Taʼila dania ba ginötönia na isusugi Yehowa zi fahuwu khönia si lö faröi si no mate. (Mataiʼo 22:32) Iadaʼa göi, no oya tatema howu-howu sahöli-höli dödö moroi khö Namada. Simane niwaʼö Zura Niʼamoniʼö, ”Yaʼahowu niha si no mangai Lowalangira Yehowa andrö, niha nitutuyunia tana khönia.”​—Zinunö 33:12.