1. Hana wa moguna tafaʼanö ita ba wanaögö folohi?

BA MBONGI fatua lö mate Soʼaya Yesu, ifatunö wa fefu niha soloʼö khönia hasambalö fatuwu niha khöra. (Yoh. 17:14) Irugi iadaʼa, niha Keriso si lö faröi ndra Samaduhuʼö Yehowa, göna ira folohi moroi ba niha si tenga samosumange Yehowa. (2 Tim. 3:12) Börö me no ahatö ginötö, itugu lafakao ita niha si fatuwu khöda.​—Mat. 24:9.

2-3. (a) Hana wa faʼataʼu andrö tola iʼasogö wamaʼala? (b) Hadia nitutunöda ba wamahaʼö daʼa?

² Hewisa wamaʼanöda yaʼita iadaʼa ba wanaögö folohi? Lö moguna taʼangeragö fefu hadia ia si tola alua khöda. Na lö aetu taʼangeragö daʼö fefu, tola manö itugu ataʼu ita ba so khöda waʼaombö dödö, irege taböhöli ba wamosumange Yehowa fatua lö si tohare fanandraigö. (Gamd. 12:25; 17:22) Faʼataʼu no sambua lala niʼogunaʼö ’si faʼudu khöda yaʼia Gafökha’ ba wolawa yaʼita. (1 Fet. 5:8, 9) Hadia nifaluada iadaʼa ba wamaʼanö yaʼita ba wanaögö folohi?

³ Ba wamahaʼö daʼa, tatutunö hewisa lalada ba wangaroʼö gamakhaitada khö Yehowa ba hana wa moguna sibai tafalua iadaʼa. Tatutunö göi hadia zinangea tafalua enaʼö itugu barani ita. Ba safuria, tatutunö hadia nifaluada ba ginötö so niha si fatuwu khöda.

4. Moloʼö Heberaiʼo 13:5, 6, hadia nifaduhusida tödö ba hana wa moguna sibai daʼa?

⁴ Yafaduhu dödömö wa iʼomasiʼö ndraʼugö Yehowa ba lö irai iröi ndraʼugö. (Baso Heberaiʼo 13:5, 6.) Ba zi hauga fakhe silalö, imane majalah Manuriaigö, ”Na sindruhu-ndruhu aboto ba dödö zi samösa niha sanandrösa khö Lowalangi, hasambalö ifaduhusi tödö Lowalangi ba ginötö göna ia folohi.” Atulö daʼö! Enaʼö tola tataögö folohi, moguna taʼomasiʼö Yehowa  ba sindruhu-ndruhu tafaduhusi tödö ia. Böi irai aombö dödöda wa iʼomasiʼö ita.​—Mat. 22:36-38; Yak. 5:11.

5. Hadia zinangea öfalua enaʼö tola örasoi waʼomasi Yehowa?

⁵ Baso Zura Niʼamoniʼö ero maʼökhö enaʼö itugu ahatö ndraʼugö khö Yehowa. (Yak. 4:8) Ba ginötö öbaso Zura Niʼamoniʼö, osambuaʼö dödöu ba mbua-bua si sökhi niʼokhögö Yehowa simane faʼomasi, faʼasökhi dödö, hegöi faʼahakhö dödö. Odödögö ba wangiʼila hawaʼebua waʼomasinia khömö ba ginötö öbaso hadia niwaʼönia hegöi nifaluania. (2 Moz. 34:6) So ösa niha, abua khöra wamaduhusi tödö wa iʼomasiʼö ira Lowalangi börö me lö irai larasoi waʼomasi moroi ba niha böʼö. Na alua khömö simane daʼö, tandraigö ba wanura ero maʼökhö hadia manö nifalua Yehowa khömö ba wangoromaʼö faʼomasi hegöi faʼahakhö dödönia. (Zin. 78:38, 39; Rom. 8:32) Na öʼangeragö zalua khömö ba öʼangerönusi hadia zi no öbaso ba Daromali Lowalangi, tola manö oya nisuramö ngawalö nifalua Yehowa khömö. Na itugu öʼandrö saohagölö ba nifalua Yehowa, itugu aro gamakhaitamö khönia.​—Zin. 116:1, 2.

6. Moloʼö Zinunö 94:17-19, hewisa wangandrö soroi ba dödö möi fanolomö?

⁶ Böi tebulö ba wangandrö. Khalaigö so samösa nono matua si bohou ebua, no italagui ia amania si fao faʼomasi. Irasoi waʼahono dödö irege lö ataʼu ia ba wanutunö khö namania hadia zi sökhi ba si lö sökhi salua khönia maʼökhö daʼö. Tola göi öʼokhögö gamakhaita simane daʼö, na ahatö ndraʼugö khö Yehowa ero maʼökhö ba wangandrö soroi ba dödö. (Baso Zinunö 94:17-19.) Ba ginötö mangandrö ndraʼugö khö Yehowa, ”faduwa dödöu, timba nidanö” ba fatunö khö Nama sebua faʼomasi sanandrösa ba waʼataʼumö hegöi faʼaombö dödömö. (Ngen. 2:19) Hadia mbuania? Tola örasoi simane niwaʼö ba Zura Niʼamoniʼö wa ’irorogö dödömö awö gera-eramö faʼohahau dödö andrö khö Lowalangi’. (Fil. 4:6, 7) Na asese mangandrö ndraʼugö, örasoi wa itugu ahatö ndraʼugö khö Yehowa.​—Rom. 8:38, 39.

7. Hana wa moguna sindruhu-ndruhu faduhu dödömö ba mbuʼusa li Lowalangi wa hasambalö alua Wamatörönia?

⁷ Yafaduhu dödömö wa hasambalö alua howu-howu Famatörö Lowalangi. (4 Moz. 23:19) Na awuwu wamatimö ba mbuʼusa linia, itugu aoha khö Zatana hegöi si so ba wamatörönia ba wametaʼu yaʼugö. (Gamd. 24:10; Heb. 2:15) Hewisa wondrouʼö famatimö iadaʼa ba Wamatörö Lowalangi? Ba ginötö öfahaʼö ndraʼugö samösa, tandraigö ba wangalui mbuʼusa li Lowalangi enaʼö itugu öʼila sanandrösa ba Wamatörönia, ba hadia mbörö wa faduhu dödömö hasambalö alua daʼö. Hana wa tobali fanolo daʼa? Angeragö duma-duma Stanley Jones, no fitu fakhe tebeʼe ia ba gurunga börö wamatinia. Hadia zanolo yaʼia enaʼö anau gölönia irege lö faröi ia? Imane,  ”Aro wamatigu börö me aboto ba dödögu sanandrösa ba Wamatörö Lowalangi, ba lö irai uʼaombösi tödö daʼö. Ba samösa lö hadöi si tola mamabali ndraʼo khö Yehowa.” Na aro wamatimö ba mbuʼusa li Lowalangi, tola itugu ahatö ndraʼugö khö Yehowa ba tola ölawa faʼataʼumö.​—Gamd. 3:25, 26.

8. Hadia zangoromaʼö moroi ba weʼamöida ba gangowuloa? Tutunö.

⁸ Lö tebulö weʼamöi ba gangowuloa. Angowuloa no tobali fanolo khöda enaʼö itugu ahatö khö Yehowa. Feʼamöida ba gangowuloa, daʼö zangoromaʼö hadia tola anau gölöda ba wanaögö folohi ba zi so miföna. (Heb. 10:24, 25) Hadia geluahania? Na iadaʼa manö tatehegö gabula dödö side-ide si tobali daha-tahada weʼamöi ba gangowuloa, hewisa dania wa tola tatehegö nosoda börö weʼamöi ba gangowuloa? Hizaʼi, na tahalö gangetula enaʼö lö tebulö weʼamöi ba gangowuloa, lö irai awuwu ita hewaʼae na so niha si fatuwu khöda ba wanaha yaʼita enaʼö tabato wamalua gangowuloa. Iʼotarai iadaʼa, moguna omuso dödöda weʼamöi ba gangowuloa. Na omasi ita weʼamöi ba gangowuloa, hewaʼae so wanandraigö mazui lö latehegö halöwö nifaluada ira samatörö, lö tobali daha-tahada daʼö ba woloʼö Lowalangi moroi ba niha.​—Hal. 5:29.

9. Na tatanö ba dödöda ayati, hana wa tola itugu tefaʼanö ita ba wanaögö folohi?

⁹ Tanö ba dödömö ayati zomasi ndraʼugö. (Mat. 13:52) Börö me lö taʼokhögö lala wangera-ngera soʼahonoa, tola manö alio olifu ita. Hizaʼi, iʼogunaʼö Yehowa gehehania niʼamoniʼö ba wanolo yaʼita enaʼö ifuli itörö tödöda ayati daʼö. (Yoh. 14:26) Imane samösa dalifusöda si no irai labeʼe ba gurunga ba Jerman Timur, ”Omuso sibai dödögu börö me luo daʼö no töra 200 ayati si no utanö ba dödögu! Hewaʼae ha samösa ndraʼo, lö tebulö uʼangeragö sanandrösa ba ngawalö hadia ia si so ba Zura Niʼamoniʼö.” Börö me no itanö ba dödönia ayati, daʼö zi tobali fanolo khönia enaʼö itugu ahatö khö Yehowa ba anau gölönia irege lö faröi.

10. Hana wa moguna tatanö ba dödöda zinunö ba wamati?

¹⁰ Tanö ba dödömö ba anunöisi zinunö si so ba mbuku zinunöda hegöi ba situs Webda. Me lakuru ba Wilifi Faulo hegöi Sila, laʼanunöisi zinunö si no latanö ba dödöra ba wanuno Yehowa. (Hal. 16:25) Simane daʼö göi zalua khö ndra talifusöda si so ba soi si no irai farahu ba Uni Soviet me laʼoloiʼö ira ba Siberia. Hadia nifaluara enaʼö aro ira? Imane talifusöda ira alawe sotöi Mariya Fedun, ”Maʼanunöisi fefu zinunö si  no matanö ba dödöma si so ba mbuku zinunö.” Iwaʼö wa fefu zinunö daʼö tobali fanolo khöra enaʼö barani ba ahatö khö Yehowa. Hadia örasoi wa teʼabölöʼö ndraʼugö ba ginötö öʼanunöisi zinunö ba wamati somasi ndraʼugö? Iadaʼa, moguna ötörö tödö zinunö ba wamati!​—Faigi kotak ” Beʼe Khögu Waʼabarani”.

11-12. (a) Moloʼö 1 Zamueli 17:37, 45-47, hana wo so khö Dawido waʼabarani? (b) Hadia wamahaʼö nihalöda ba zalua khö Dawido?

¹¹ Moguna khöda faʼabarani ba wanaögö folohi. Na örasoi lö khömö faʼabarani, hadia nifaluamö? Törö tödömö wa faʼabarani sindruhu lö teʼodaligö hawaʼebua mbotomö, faʼabölömö mazui faʼatua-tuamö. Angeragö duma-duma me awuyu-wuyu Dawido ba ginötö ilawa sebua niha sotöi Goliato. No ide-ide mboto Dawido moroi khö Goliato, lö faʼabölö ba lö khönia fakake ba wasuwöta. Ba lö hadöi göi wöda khö Dawido. Hizaʼi, so khö Dawido waʼabarani irege ilawa sebua niha andrö ba wasuwöta.

¹² Hana wa tola barani Dawido? Börö me faduhu dödönia wa fao khönia Yehowa. (Baso 1 Zamueli 17:37, 45-47.) Lö iʼosambuaʼö dödönia Dawido ba waʼebua mboto Goliato moroi ba waʼebua mbotonia. Hizaʼi, iʼosambuaʼö dödönia wa abölö ebua Yehowa moroi khö Goliato. Hadia wamahaʼö si tola tahalö ba zalua andre? Tola so khöda waʼabarani na faduhu dödöda wa fao khöda Yehowa ba no ide-ide nududa moroi khö Lowalangi Fondrege Zabölö. (2 Nga. 20:15; Zin. 16:8) Hadia nifaluada iadaʼa ba wondrouʼö faʼabaranida fatua lö alua wolohi?

13. Hadia nifaluada enaʼö tedou waʼabaranida? Tutunö.

¹³ Tola tedou waʼabaranida iadaʼa na möi ita manuriaigö ba wangombakha turia somuso dödö sanandrösa ba Wamatörö Lowalangi. Hadia mbörö? Na möi ita manuriaigö, tafahaʼö ita ba wamaduhusi tödö Yehowa hegöi ba wolawa faʼataʼuda ba niha. (Gamd. 29:25) Simane ndroto-ndroto mbotoda, tola abölö ia na olahraga ita. Tola itugu monönö waʼabarani na möi ita manuriaigö ba nomo-omo, ba nahia sato niha, si lö resmi, hegöi ba nahia bisnis. Na iadaʼa tadouʼö waʼabaranida weʼamöi manuriaigö, tola tefaʼanö ita enaʼö lö tebulö ba wanuriaigö hewaʼae na lö latehegö halöwö nifaluada ira samatörö.​—1 Tes. 2:1, 2.

14-15. Hadia wamahaʼö nihalöda moroi khö Nancy Yuen hegöi Valentina Garnovskaya?

¹⁴ Oya wamahaʼö si tola tahalö moroi ba  duma-duma khö ndra talifusöda ira alawe si darua si lö faröi, laforomaʼö waʼabarani sahöli-höli dödö. Faʼalawa mboto Nancy Yuen ha 1,5 meter, hizaʼi lö khönia faʼataʼu hewaʼae no ide-ide mbotonia. * Lö ibato weʼamöi manuriaigö ba wangombakha turia somuso dödö sanandrösa ba Wamatörö Lowalangi. Lua-luania, labeʼe ia ba gurunga arakhagö 20 fakhe ba Cina Komunis. Lafatunö ira samatörö zamareso yaʼia wa ”niha sabeʼe högö” ia ba soira!

¹⁵ Alua göi khö Valentina Garnovskaya, tölu kali labeʼe ia ba gurunga ba soi si no irai farahu ba Uni Soviet. Na laʼerai fefu waʼarania ba gurunga arakhagö 21 fakhe. * Hadia mbörö? Ihalö gangetula wa lö faröi ia weʼamöi manuriaigö, irege lawaʼö wa yaʼia ”niha fondrege zi lö sökhi”. Hana wa tola so waʼabarani khö ndra talifusöda si darua si lö faröi? Faduhu dödöra wa fao khöra Yehowa.

16. Hadia manö zinangea mufalua ba wangokhögö faʼabarani sindruhu?

¹⁶ No tatutunö wa enaʼö tedou waʼabaranida, moguna böi taʼodaligö waʼabölöda hegöi faʼatua-tuada. Hizaʼi, moguna faduhu dödöda wa fao khöda Yehowa ba yaʼia zi fasuwö khöda. (5 Moz. 1:29, 30; Zakh. 4:6) Daʼö zi tobali lala ba wangokhögö faʼabarani sindruhu.

17-18. Moloʼö Yohane 15:18-21, hadia wamangelama nibeʼe Yesu khöda? Tutunö.

¹⁷ Tatu omuso dödöda na lafosumange ita niha böʼö. Hizaʼi, böi irai so ba dödöda wa niha si lö moguna ita na so niha si fatuwu khöda. Imane Yesu, ”Yaʼahowu ami na fatiu dödö niha khömi, na laʼerogö ami, laʼoʼaya ami, ba laʼobousi döimi börö Nono niha.” (Luk. 6:22) Hadia geluaha niwaʼö Yesu?

¹⁸ Lö niwaʼö Yesu wa omasi niha Keriso na fatuwu niha khöra. Hizaʼi, ifangelama ita hadia zalua khöda. Yaʼita tenga tana khö niha gulidanö. Tafaudugö waʼaurida  ba nifahaʼö Yesu, ba taturiaigö hadia nituriaigönia. Lua-luania, fatuwu niha gulidanö khöda börö me taʼomusoiʼö dödö Yehowa. (Baso Yohane 15:18-21.) Sabölö moguna khöda yaʼia daʼö ba wangomusoiʼö tödö Yehowa. Tobali, na fatuwu niha khöda börö me taʼomasiʼö Namada, lö tahalö röröda daʼö.

19. Hewisa woloʼöda duma-duma ndra sinenge?

¹⁹ Böi tehegö gofu hadia ia niwaʼö niha mazui nifaluara irege so khöda waʼaila tobali samösa Samaduhuʼö Yehowa. (Mi. 4:5) Enaʼö lö khöda faʼataʼu ba niha, moguna taʼangerönusi duma-duma ira sinenge si so ba Yeruzalema me no aefa mate Yesu. Aboto ba dödöra wa fatuwu sibai ndra sondröniaʼö agama Yahudi khöra. (Hal. 5:17, 18, 27, 28) Hewaʼae simanö, lö tebulö ero maʼökhö möi ira ba gosali ba latutunö ba niha sato wa yaʼira nifahaʼö Yesu. (Hal. 5:42) Lö latehegö waʼataʼura si tobali daha-taha khöra. Tola göi talawa waʼataʼuda ba niha, na lö tebulö ita wangombakha ba nahia wohalöwöda, ba zekola, hegöi ba zi falazi omo khöda wa yaʼita samösa Samaduhuʼö Yehowa.​—Hal. 4:29; Rom. 1:16.

20. Hana wa so waʼomuso dödö khö ndra sinenge hewaʼae fatuwu niha khöra?

²⁰ Hana wa so waʼomuso dödö khö ndra sinenge? Börö me laʼila hadia mbörö wa fatuwu niha khöra, ba no töi si sökhi na lafakao börö wamalua somasi Yehowa. (Luk. 6:23; Hal. 5:41) Imane Fetero ba zurania, ”Na mitörö wamakao börö wamalua satulö, yaʼahowu ami.” (1 Fet. 2:19-21; 3:14) Ba ginötö aboto ba dödöda wa fatuwu niha khöda börö wamalua satulö, lö tatehegö waʼafatuwu niha böʼö möi faʼataʼuda irege tabato ba wamosumange Yehowa.

21-22. (a) Hadia nifaluamö ba wamaʼanö ndraʼugö wanaögö folohi? (b) Hadia wamahaʼö nitutunöda aefa daʼa?

²¹ Lö taʼila hawaʼara so wolohi mazui lö latehegö khöda ira samatörö ba wamosumange Yehowa. Hizaʼi, moguna iadaʼa tafaʼanö ita ba wangaroʼö fahuwusada khö Yehowa, tadouʼö waʼabaranida, ba tafahaʼö ita ba wolawa faʼataʼuda ba niha. Na no tafaʼanö ita ba wamalua daʼa, tola anau gölöda wamosumange Yehowa ba zi so miföna.

²² Hizaʼi, hewisa na sindruhu-ndruhu lö latehegö khöda ba wamosumange Yehowa? Ba wamahaʼö fönada, tatutunö goi-goi Zura Niʼamoniʼö sanolo yaʼita enaʼö lö faröi khö Yehowa hewaʼae na lö latehegö halöwö nifaluada.