OYA fehede soroi ba dödö moroi ba nono mbanua Lowalangi sorasoi ”simane yaʼita” si no tesura ba Zura Niʼamoniʼö. (Yak. 5:17) Duma-dumania, aboto ba dödöda hadia nirasoi Faulo me imane ba Roma 7:21-24, ”Na omasi ndraʼo wamalua satulö, ba no ahatö khögu zi lö sökhi. . . . Tefakao sibai ndraʼodo andre!” Na taforege ba wolawa falömoʼahonoada samösa, terara dödöda me taʼila iforege göi simane daʼö Faulo.

Hizaʼi, iʼombakhaʼö göi nösi dödönia tanö böʼö Faulo. Ba Galatia 2:20, me ifatunö waʼafaduhu dödönia wa ’iʼomasiʼö ia Yesu ba sameʼe faʼaurinia samösa’ ba khönia! Hadia örasoi göi simane daʼö? Tola manö lö asese örasoi simane daʼö.

Na so khöda waʼide-ide dödö börö horö nifaluada ba zilalö, itaria tola abua khöda ba wamaduhusi tödö wa iʼomasiʼö ita Yehowa ba iʼefaʼö zalada. Aefa daʼö, tola manö abua khöda ba wamaigi wa höli no buala nibeʼenia khöda samösa. Hadia daʼö nitötöna Yesu khöda enaʼö tabaliʼö höli andrö si tobali buala nibeʼenia khöda samösa? Na yaʼia, hadia zi tobali fanoloda ba wangokhögö fangera-ngera simane daʼö? Datatutunö zi dombua wanofu andre.

Atulö sa, omasi Yesu na ba wamaigida höli andrö buala nibeʼenia ba khöda samösa. Hezo taʼila? Khalaigö zalua simane nisura ba Luka 23:39-43. Samösa ndra matua niʼosö ba döla geu famakao sahatö ba ngai Yesu. Ifaduhuʼö wa no irai ifalua zi lö sökhi. No oya waʼalösökhi nifaluania, andrö wa lö fangorifi saʼae khönia ba laʼosö ba döla geu famakao. Tobali ataʼu sibai ia irege iʼandrö khö Yesu, ”Törö tödöu ndraʼo na möiʼö ba Wamatöröu.”

Hadia nifalua Yesu? Khalaigö ha waʼafökhö nirasoi Yesu me ifakhölö ia ba wamaigi ndra matua si so ba ngainia. Hewaʼae irasoi waʼafökhö, iboho mbawania ba irara dödö ndra matua andrö. Imane, ”Sindruhu niwaʼögu khöu maʼökhö andre, awögu ndraʼugö ba Waradaiso.” Sindruhunia, tola manö ha ifatika khönia Yesu wa ”simane Ono . . . sameʼe nosonia höli zato”. (Mat. 20:28) Hizaʼi, lö ifalua daʼö Yesu. Si fao faʼasökhi dödö iforomaʼö wa höli nibeʼenia andrö moguna göi khö ndra matua daʼö. Ihaogö ba wangumaʼö ba iʼogunaʼö fehede ”ndraʼugö” hegöi ’khögu’. Ba ifatunö göi khö ndra matua daʼö wa auri ia dania ba waradaiso.

Omasi Yesu enaʼö so khö ndra matua daʼö foʼameʼegö tödö moroi ba höli nibeʼe Yesu si tobali buala khönia. Hewaʼae sindruhunia lö nasa niforomaʼö ndra matua andrö ba wamosumange Lowalangi. Hizaʼi, tola ökhalaigö hewisa dödö Yesu na so samösa niha Keriso si no tebayagö idanö si no mamosumange Lowalangi. Tatu omasi göi Yesu enaʼö so khönia waʼafaduhu dödö wa mate Yesu soguna khönia samösa. Tobali, hewaʼae no irai tafalua horö ba zilalö, hadia zi tola mameʼe khöda waʼafaduhu dödö wa höli nibeʼe Yesu soguna khöda samösa?

Börö me no ibeʼe Yesu khö Waulo halöwö fanuriaigö, faduhu dödö Waulo wa mate Yesu ba khönia samösa. Imane ba wanutunö, ”Uʼandrö  saohagölö khö Keriso Yesu Soʼaya yaʼita sameʼe khögu faʼabölö, börö me lö faröi ndraʼo ba wamaiginia, andrö ibeʼe khögu halöwö andre, hewaʼae sangoʼaya Lowalangi ndraʼo mböröta, samakao, ba si fayawa.” (1 Tim. 1:12-14) Halöwö nitema Waulo moroi khö Yesu zameʼe khönia waʼafaduhu dödö wa no iforomaʼö khönia Yesu waʼahakhö dödö, faʼomasi ba lafaduhusi tödö ia. Ibeʼe göi khöda Yesu halöwö ba wamaʼema turia somuso dödö. (Mat. 28:19, 20) Hadia halöwö daʼa tola ibeʼe khöda waʼafaduhu dödö wa mate Yesu ba khöda samösa?

Barö-barö daʼa mangawuli Albert khö Yehowa, me no aefa 34 fakhe laʼefasi ia ba mbanua niha Keriso. Imane, ”Lö aetu itörö tödögu horö zi no ufalua. Hizaʼi ba ginötö möi ndraʼo ba wanuriaigö, urasoi wa no ibeʼe khögu halöwö Yesu simane khö Waulo. Itugu so khögu waʼomuso dödö ba uʼokhögö lala wangera-ngera si sökhi sanandrösa ba khögu samösa, faʼaurigu hegöi ba zalua khögu ba zi so miföna.”​—Zin. 51:5.

Fatua lö aboto ba dödö Allan sanandrösa ba zindruhu, yaʼia niha salio aukhu ba oya zi lö sökhi nifalua. Imane, ”Asese itörö tödögu ngawalö zi lö sökhi si no irai ufalua ba niha böʼö. Itaria, iʼasogö khögu waʼabu dödö. Hizaʼi, uʼandrö sibai saohagölö khö Yehowa börö me no itehegö ba niha samalua horö simane yaʼo ba wangombakha turia somuso dödö. Me uʼila niha somasi manemaʼö turia somuso dödö, ba daʼö aboto ba dödögu wa Yehowa no Lowalangi si sökhi ba sangomasiʼö. Urasoi wa iʼogunaʼö ndraʼo ba wanolo niha böʼö sangokhögö waö-waö waʼauri simane yaʼo.”

Ba ginötö möi ita manuriaigö, no tafalua ba taʼangeragö zi sökhi. Daʼö zameʼe khöda waʼafaduhu dödö wa iforomaʼö khöda Yesu waʼahakhö dödö, iʼomasiʼö ba ifaduhusi tödö ita.

Irugi tehori gulidanö nifatörö Zatana, tola manö lö tebulö itahi-tahigö ita tödöda börö horö nifaluada ba zilalö. Hadia zanolo yaʼita ba wolawa tödöda daʼö?

Me awuyu-wuyu Jean, sökhi gamuatania föna zatuania hegöi ba gangowuloa hizaʼi na baero no aröu faböʼö. Lua-luania, asese itahi-tahigö ia tödönia samösa. Imane, ”Omuso sibai dödögu me no uʼila wa ’abölö ebua Lowalangi moroi ba dödöda.’” (1 Yoh. 3:19, 20) Tola göi terara dödöda börö me taʼila wa aboto ba dödö Yehowa hegöi Yesu zalua khöda me yaʼita niha sebua horö. Törö tödömö wa yaʼira andrö si fao faʼomasi no labeʼe khöda höli, tenga ha ba niha soʼahonoa, hizaʼi ba niha sebua horö somasi mamalalini era-era.​—1 Tim. 1:15.

Andrö moguna taʼangerönusi hewisa Yesu ba woʼameʼegö tödö niha si lö moʼahonoa. Moguna göi taforege ndrege zi tola tafalua ba wamalua fanuriaigö si no ibeʼe Yesu khöda. Börö zimanö, faduhu dödöda wa mate Yesu ba khöda samösa, ba simane Faulo tola tamane wangumaʼö wa, ’iʼomasiʼö ndraʼo Yesu ba sameʼe faʼaurinia ba khögu’.