1. Ba zi ngafulu fakhe safuria, hadia wombulöʼö salua ba zi hauga soi?

NGAHÖNÖ fakhe faʼara, ato niha ba zi sagörö ulidanö laʼokhögö agama. Hizaʼi ba zi ngafulu fakhe safuria andre, tebulö sibai zalua. Itugu ato niha si lö mangokhögö agama. Ba zi hauga soi, ato niha sangumaʼö wa lö laʼokhögö agama. *—Mat. 24:12.

2. Hadia mbörö wa so ösa niha si lö mangokhögö agama?

² Hana wa itugu ato niha si lö mangokhögö agama? * So ösa niha laʼosambuaʼö dödöra ba waʼasana dödöra mazui ba gabula dödöra. (Luk. 8:14) So göi ösa si faduhu tödö khö Lowalangi, hizaʼi ba gafuriata lö faduhu dödöra. Tanö böʼönia faduhu dödöra khö Lowalangi hizaʼi lawaʼö wa agama andrö no toröi furi, lö moguna, ba lö tefaudu ba sains hegöi ba lala wangera-ngera niha. Tola manö larongo moroi khö ndra awöra, guru, mazui moroi ba niha si so ba media sangumaʼö wa faʼauri tebörögö moroi ba evolusi. Hizaʼi, lö asese larongo mbua wangera-ngera sanutunö hana wa tefaudu na mufaduhusi tödö Lowalangi. Tanö böʼönia latimbagö ira sondröniaʼö ba agama sangalui tana khöra simane kefe ba kuaso. Ba zi hauga soi, no itatugöi ira samatörö wa lö latehegö halöwö soʼamakhaita ba agama.

3. Hadia gohitö dödö wamahaʼö daʼa?

³ Ibeʼe khöda fareta Yesu ba ’wombaliʼö nifahaʼö fefu niha moroi ba ngawalö soi’. (Mat. 28:19) Hewisa wanoloda niha si lö mangokhögö agama enaʼö lafahaʼö ira ba wangomasiʼö Lowalangi ba tobali nifahaʼö Keriso? Moguna taʼila hewisa wanemaʼö niha ba duria nifaʼemada, tola manö teʼodaligö daʼö hezo teʼebuaʼö ia. Duma-dumania, niha moroi ba Eropa tenga simane  niha moroi ba Asia somasi manemaʼö duria nifaʼemada. Hadia mbörö? Ba Eropa, ato niha si no mangila sanandrösa ba Zura Niʼamoniʼö ba no toʼölö ira wamondrongo wa Lowalangi zomböi fefu hadia ia. Hizaʼi ba Asia, ha maʼifu niha sangila sanandrösa ba Zura Niʼamoniʼö mazui lö irai aboto ba dödöra, ba lö faduhu dödöra wa so Zomböi. Ohitö dödö wamahaʼö daʼa, ba wanolo yaʼita enaʼö adöni dödö niha nifalukhaisida ba wanuriaigö, gofu hezoso moroi mbanuara mazui hadia nifaduhusira tödö.

4. Hana wa moguna lö tebulö taʼokhögö lala wangera-ngera satulö?

⁴ Okhögö Lala Wangera-ngera Satulö. Ero röfi, niha si lö mangokhögö agama tobali ira Samaduhuʼö Yehowa. Fatua lö tobali ira Samaduhuʼö, no laʼokhögö mbua-bua si sökhi ba ogoro ira ba walöʼatulö nifalua agama. Tanö böʼönia, ambö laʼokhögö mbua-bua si sökhi ba ato zi toʼölö mamalua amuata niʼogorofi sinangea laröi. Börö wanolo Yehowa, tola faduhu dödöda wa tola tasöndra niha ”si sökhi amuata somasi manöndra faʼauri si lö aetu”.​—Hal. 13:48; 1 Tim. 2:3, 4. 

5. Sasesenia, hadia mbörö wa omasi niha ba duria nifaʼemada?

⁵ Okhögö Waʼasökhi Dödö ba Safönu Famatimbaisi. Sasesenia, omasi niha manemaʼö turia nifaʼemada tenga börö hadia nifaʼemada, hizaʼi hewisa lala ba wamaʼema yaʼia. Lö laʼosilöʼögö ita ba ginötö taforomaʼö waʼasökhi dödö, safönu famatimbaisi ba sindruhu-ndruhu taʼameʼegö tödö ira. Lö tafaso ira enaʼö lafondrondrongo hadia nifaʼemada. Hizaʼi, moguna taforege ba wangiʼila hana wa lö laʼokhögö agama. Duma-dumania, aboto ba dödöda wa so ösa niha si lö omasi fahuhuo sanandrösa ba agama ba niha si lö faʼila khöra. Tanö böʼönia, so ba wangera-ngerara wa lö baga na manofu khö zi samösa niha sanandrösa khö Lowalangi. Tanö böʼönia göi, aila ira na laʼila ira niha böʼö ba wombaso Zura Niʼamoniʼö, mendrua manö na fao ira khö zi samösa Samaduhuʼö Yehowa. Gofu hadia ia zalua, moguna taforege enaʼö aboto ba dödöda hadia nirasoira.​—2 Tim. 2:24.

6. Hewisa Waulo ba wangoromaʼö wa ifaudugö hadia nifaʼemania, ba hewisa woloʼöda yaʼia?

⁶ Hadia nifaluada na taʼila so samösa niha, lö omasi ia na taʼogunaʼö fehede simane ”Sura Niʼamoniʼö”, ”niwöwöi”, ”Lowalangi”, mazui ”agama”? Moguna taʼoʼö duma-duma sinenge sotöi Faulo ba taʼanemaiʼö tafaudugö hadia niwaʼöda. Me fahuhuo Waulo ba niha Yahudi, iʼogunaʼö Zura Niʼamoniʼö. Hizaʼi, me fahuhuo ia khö ndra filsuf Yunani si so ba Areofago, lö iʼanemaiʼö ifatunö khöra wa hadia niʼombakhaʼönia moroi ba Zura Niʼamoniʼö. (Hal. 17:2, 3, 22-31) Hewisa woloʼöda duma-duma Waulo? Na falukha ndraʼugö khö zi samösa niha si lö faduhu tödö ba Zura Niʼamoniʼö, lala sabölö sökhi yaʼia daʼö böi anemaiʼö öfatunö khönia wa hadia niʼombakhaʼömö moroi ba Zura Niʼamoniʼö. Na öʼila wa lö omasi niha daʼö na lafaigi ia niha böʼö ba wombaso Zura Niʼamoniʼö ba wefao khömö, tola öforomaʼö khönia ayati si so ba perangkat elektronik, irege lö möi fondrönisi dödö niha böʼö.

7. Hewisa woloʼöda duma-duma Waulo nitutunö ba 1 Korindro 9:20-23?

⁷ Okhögö Waʼaboto ba Dödö ba Fondrondrongo. Moguna taforege ba wangiʼila hadia manö zondrönisi lala wangera-ngerara niha nifalukhaisida. (Gamd. 20:5) Fuli angeragö duma-duma Waulo. Teʼebuaʼö ia ba gotalua niha Yahudi. Ba ginötö manuriaigö ia ba niha si tenga niha Yahudi, moguna ifaudugö nifaʼemania börö me ha maʼifu niha sangila mazui lö laʼila hadia ia sanandrösa khö Yehowa hegöi Sura Niʼamoniʼö. Moguna tafalua riset mazui manofu ba niha sabölö mangila si so ba mbanua niha Keriso, enaʼö itugu aboto ba dödöda hewisa lala wangera-ngera niha hegöi nirasoira ba mbanua nituriaigöda.​—Baso 1 Korindro 9:20-23.

8. Hadia sambua lala ba wamörögö fahuhuosa sanandrösa ba Zura Niʼamoniʼö?

 ⁸ Ohitö dödöda yaʼia daʼö ba wangalui niha ”sotemaʼö” yaʼita. (Mat. 10:11) Enaʼö mofozu ita ba wanuriaigö, moguna taʼandrö mbua wangera-ngerara ba tahaogö tafondrondrongo hadia niwaʼöra. Samösa dalifusöda ira matua ba Inggris, asese iʼandrö mbua wangera-ngera niha sanandrösa hewisa lala enaʼö so waʼomuso dödö ba wongambatö, lala ba wangebuaʼö iraono mazui lala ba wanaögö falöʼatulö. Me no aefa ifondrondrongo mbua wangera-ngerara, imane, ”Moloʼö yaʼugö, hadia moguna khöda mene-mene si no tesura arakhagö 2.000 fakhe silalö?” Aefa daʼö, lö itötöi ngawua wehede ”Sura Niʼamoniʼö”, hizaʼi iforomaʼö khöra ayati si so ba HP-nia.

9. Hadia sambua lala zi tola tafalua ba wanolo niha si lö omasi fahuhuo sanandrösa khö Lowalangi?

⁹ Tola adöni dödö niha si lö omasi fahuhuo sanandrösa khö Lowalangi yaʼia daʼö, na tatutunö hadia ia zadöni dödöra. Duma-dumania, oya zahöli-höli dödö si so ba gulidanö hegöi ba dalu mbanua. Tobali, tola tasofu khönia simane, ”Tatu aboto ba dödöu wa oya zi no lafazökhi ira ilmuwan si no lasali ba gulidanö. Duma-dumania, niha samazökhi mikrofon lafahaʼö ira ba dalinga gurifö, niha samazökhi kamera lafahaʼö ira ba hörö gurifö. Hewisa moloʼö yaʼugö? Haniha zamazökhi talinga hegöi hörö?” Me no tahaogö tafondrondrongo niwaʼönia, tola tamane nasa, ”Me lafahaʼö ira niha sagatua-tua sanandrösa ba dalinga hegöi hörö, haʼökhö zindruhunia lafahaʼö ira? Adöni dödögu ba nisura penyair me götö föna, ’Samatörö tögi dalinga andrö, hadia lö irongo? Somböi hörö andrö, hadia, lö iʼila? . . . Yaʼia, samahaö niha ba waʼaboto ba dödö!’ So ösa ndra ilmuwan fao dödöra ba nisura andrö ba faduhu dödöra ba niwöwöi.” (Zin. 94:9, 10) Tola taforomaʼö khöra sambua video si so ba jw.org^® ba ”Wawancara dan Pengalaman” artikel ”Pendapat tentang Asal Mula Kehidupan”. (Faigi ba PUBLIKASI > VIDEO.) Mazui tola tabeʼe khöra brosur Benarkah Kehidupan Diciptakan? mazui brosur Asal Mula Kehidupan—Lima Pertanyaan yang Patut Direnungkan.

10. Hadia lala tanö böʼö si tola taʼogunaʼö ba wamörötaigö fahuhuosa ba niha si lö omasi fahuhuo sanandrösa khö Lowalangi?

¹⁰ Ato niha latötöna enaʼö itugu sökhi waʼauri ba zi so miföna. Hizaʼi, ato niha sataʼu wa tekiko gulidanö andrö dania mazui tehori fefu niha. Itutunö samösa zatua samasui ba Norwegia, wa niha si lö omasi fahuhuo sanandrösa khö Lowalangi, sasesenia omasi  ira fahuhuo sanandrösa ba zalua ba gulidanö. Me no aefa iʼowai niha, imane, ”Moloʼö yaʼugö, hadia itugu sökhi dötönaföda ba zi so miföna? Hadia wanötönada teʼodaligö ba politik, ilmuwan, mazui ba niha böʼö?” Me no aefa ifondrondrongo niwaʼöra, ibaso mazui itötöi hadia nösi zi sambua ayati sanutunö faʼauri si sökhi ba zi so miföna. So ösa niha sadöni tödö ba mbuʼusa li si so ba Zura Niʼamoniʼö wa gulidanö andre so sagötö faʼara, ba niha si sökhi lasöndra waʼauri si lö aetu.​—Zin. 37:29; Zango. 1:4.

11. Hana wa moguna faböʼö-böʼö lala niʼogunaʼöda ba wamörögö fahuhuosa ba niha, ba hewisa woloʼöda duma-duma Waulo si so ba Roma 1:14-16?

¹¹ Moguna faböʼö-böʼö lala niʼogunaʼöda ba wamörögö fahuhuosa ba niha nifalukhaisida. Hadia mbörö? Börö me no faböʼö-böʼö ero samösa niha. Itaria, na adöni dödö zi samösa niha ba nitutunöda, tola manö lö omasi niha böʼö ba wamondrongo daʼö. So ösa niha somasi fahuhuo sanandrösa khö Lowalangi mazui Sura Niʼamoniʼö. Ba so göi zomasi, na tanö böʼö ua zi oföna tatutunö. Moroi ba zalua andrö, moguna taʼogunaʼö ginötö ba wahuhuosa ba ngawalö niha. (Baso Roma 1:14-16.) Tatu manö, böi olifu ita wa Yehowa zamanöi sindruhu ba dödö niha somasi mangila hadia zindruhu.​—1 Kor. 3:6, 7.

12. Hewisa wanoloda niha moroi ba Asia si lö irai laʼangeragö wa so Zomböi?

¹² Ba zi sagörö ulidanö, ato ndra sanuriaigö falukha ba niha moroi ba Asia si lö faduhu tödö khö Lowalangi sindruhu, duma-dumania so zi otarai moroi ba soi si lö manehegö halöwö soʼamakhaita ba agama. Ato niha moroi ba zi hauga soi si so ba Asia, lö irai laʼangeragö wa so Zomböi. So ösa zomasi manema wamahaʼö moroi ba Zura Niʼamoniʼö börö me omasi laʼila. Hizaʼi tanö böʼönia, aombö dödöra ba wanemaʼö börö me hadia nifahaʼö ba Zura Niʼamoniʼö bohou khöra daʼö. Hadia nifaluada enaʼö mofozu ita ba wanolo yaʼira? So ösa ndra sanuriaigö si no toʼölö, labörögö fahuo-huo ba laforomaʼö wa laʼameʼegö tödö ira. Ba na tefaudu ginötö, latutunö hewisa goi-goi Zura Niʼamoniʼö ba wanolo faʼaurira enaʼö itugu sökhi.

13. Hadia zanolo niha enaʼö tola adöni dödöra ba Zura Niʼamoniʼö? (Faigi gambara ba guli majalah.)

¹³ Ato niha sadöni tödö ba mene-mene Zura Niʼamoniʼö. (Zango. 7:12) Imane samösa dalifusöda ira alawe si so ba New York, sasese manuriaigö ba niha sangila li Mandarin, ”Uforege ba wangoromaʼö wa uʼameʼegö tödö ba ufondrondrongo ira. Na uʼila wa sawena findra ira moroi ba soi böʼö, usofu khöra, ’Hadia no tola öfaudugö waʼaurimö ba daʼa? Hadia no ösöndra halöwö? Hewisa lagura khömö?’” Itaria, daʼa zi tobali fanolo khönia ba wamaʼema famahaʼö moroi ba Zura Niʼamoniʼö. Na tefaudu, imane nasa dalifusöda andrö, ”Moloʼö yaʼugö, hadia zinangea tafalua enaʼö sökhi gamakhaitada ba niha? Hadia tola uforomaʼö khömö sambua mene-mene moroi ba Zura Niʼamoniʼö? Imane, ’Böröta wasosota ba no hulö na tatölaʼö mbaʼa-baʼa nidanö; andrö boto wasosota, fatua lö oroma nifö.’ Moloʼö yaʼugö, hadia mene-mene daʼa tobali fanolo khöda ba wahuwusa ba niha?” (Gamd. 17:14) Fahuhuosa simane daʼö, tobali fanolo khöda ba wangiʼila hadia omasi niha daʼö na mufuli mufalukhaisi.

14. Hewisa zi samösa dalifusöda ba Timur Jauh wanolonia niha sangumaʼö wa lö faduhu dödöra khö Lowalangi?

¹⁴ Hewisa na so zi samösa niha iʼanemaiʼö ifatunö wa lö faduhu dödönia khö Lowalangi? Imane samösa dalifusöda sasese manuriaigö ba niha si lö mangokhögö agama si so ba Timur Jauh, ”Si toʼölönia, na imane niha si so ba mbanua daʼa, ’Lö faduhu dödögu khö Lowalangi,’ eluahania lö faduhu dödönia khö lowalangi nifosumange niha sato si  so ba mbanua daʼö. Tobali, ufatunö khöra wa fao dödögu ba niwaʼöra wa lowalangi daʼö nifazökhi niha ba lö hadöi eluahania. Asese ufabasoʼö khöra Yeremia 16:20, ’Hadia iʼila niha ifazökhi khönia lowalangi? Tenga sa Lowalangi zimanö!’ Aefa daʼö usofu, ’Hewisa enaʼö tola taʼila hezo lowalangi sindruhu hegöi nifazökhi niha?’ Uhaogö ufondrondrongo ba ubaso Yesaya 41:23, ’Miʼombakhaʼö khöma zalua dania, enaʼö aboto ba dödöma, wa no lowalangi ami.’ Aefa daʼö ubeʼe sambua duma-duma zangoromaʼö wa hadia niwaʼö Yehowa sanandrösa ba zi so miföna hasambalö alua.”

15. Hadia wamahaʼö si tola tahalö moroi khö zi samösa dalifusöda ira matua ba Asia Timur?

¹⁵ Samösa dalifusöda ira matua ba Asia Timur itutunö hadia lala niʼogunaʼönia ba ginötö ifuli ifalukhaisi niha nituriaigönia. Imane, ”Si oföna, ufatunö khöra mene-mene si sökhi moroi ba Zura Niʼamoniʼö, famaʼeleʼö si so ba Zura Niʼamoniʼö si no alua, goi-goi faʼatoföfö banua si yawa awö ulidanö. Aefa daʼö, uforomaʼö khöra wa fefu daʼö zangoromaʼö wa so Zomböwöi satua-tua. Ba ginötö fatema ba dödö zi samösa niha wa so Lowalangi, awena ufatunö sanandrösa khö Yehowa moroi ba Zura Niʼamoniʼö.”

16. Moloʼö ba Heberaiʼo 11:6, hana wa moguna ba niha nifahaʼö ba Zura Nʼamoniʼö enaʼö mamati khö Lowalangi hegöi ba Zura Niʼamoniʼö, ba hewisa wanoloda yaʼira ba wangaroʼö famatira?

¹⁶ Ba ginötö tabeʼe wamahaʼö moroi ba Zura Niʼamoniʼö ba niha si lö mangokhögö agama, böi taböhöli ba wanolo yaʼira enaʼö sindruhu-ndruhu mamati ira wa so Lowalangi. (Baso Heberaiʼo 11:6.) Ba tatolo göi ira enaʼö mamati ira wa tola mufaduhusi tödö Zura Niʼamoniʼö. Ba wamalua daʼa moguna tafuli furi ba wanutunö rahu-rahu moroi ba wamahaʼö. Ero tafalua wamahaʼö khöra, moguna tatutunö hadia manö zangoromaʼö wa Sura Niʼamoniʼö no Daromali Lowalangi. Duma-dumania, tatutunö khöra famaʼeleʼö Zura Niʼamoniʼö si no irai alua, faʼatefaudu nösinia moloʼö ilmu pengetahuan hegöi sejarah, hegöi mene-mene soguna si so ba Zura Niʼamoniʼö.

17. Na taforomaʼö waʼomasi ba niha böʼö, hadia mbuania?

¹⁷ Tola tatolo niha tobali nifahaʼö Keriso na taʼomasiʼö ira hewaʼae laʼokhögö agama mazui löʼö. (1 Kor. 13:1) Ohitö dödöda ba wamahaö yaʼira yaʼia daʼö, wa iʼomasiö ira Lowalangi ba enaʼö göi laʼomasiʼö ia. Ero röfi, ngahönö niha si lö mangokhögö agama, tebayagö ira idanö börö me laʼomasiʼö Lowalangi. Tobali, okhögö lala wangera-ngera satulö ba böi tebulö ba wangoromaʼö faʼomasi, ba ameʼegö tödö fefu niha. Haogö fondrondrongo ira. Forege enaʼö aboto ba dödömö ira. Moroi ba duma-duma nifaluamö, fahaʼö ira enaʼö tobali nifahaʼö Keriso.