1. Simane nisura ba zura 3 Yohane 3, 4, hadia zi tola mangaʼasogö khöda faʼowua-wua dödö?

HADIA tola ökhalaigö waʼomuso dödö nirasoi zinenge sotöi Yohane, me irongo wa lö faröi niha nifahaʼönia ba zindruhu ba wamosumange Yehowa? Oya sibai gabula dödö salua khöra, ba iforege sibai Yohane ba wangaroʼö famati ndra niha Keriso andrö, si no amaedola nononia ba wamati. Simanö göi, tatu tarasoi waʼomuso dödö na so ndraonoda solulu faʼaurira khö Yehowa, he iraonoda sindruhu mazui iraonoda ba wamati, ba lö laböhöli ba wamosumange yaʼia.​—Baso 3 Yohane 3, 4.

2. Hadia gohitö dödö wa isura zurania Yohane?

² Me döfi 98 M, te ba Efeso toröi Yohane mazui ba nahia sahatö ba daʼö. Tola manö iʼondrasi nahia andrö me no muʼefasi ia moroi ba gurunga si so ba Hulo Fatemo. Ba ginötö daʼö, iʼogunaʼö gehehania niʼamoniʼö Yehowa ba wamarou dödö Yohane ba wanura sura si tölu ngawua. Ohitö dödö wa musura zura andrö yaʼia daʼö ba wamarou dödö niha Keriso si lö faröi enaʼö larorogö wamatira khö Yesu, ba lö laböhöli ba wanörö lala sindruhu.

3. Hadia manö wanofu niʼaluida fanema li?

³ Me luo daʼö, hatö Yohane zinenge sauri ba gulidanö, ba iʼaombösi tödö mbanua niha Keriso börö wondrönisi dödö si lö sökhi moroi khö ndra samahaʼö sofaya. * (1 Yoh. 2:18, 19, 26) Lawaʼö ira niha sondröi sindruhu andrö wa aboto ba dödöra Lowalangi, hizaʼi lö laʼoʼö goroisa Yehowa. Ba artikel andre, tatutunö mene-mene nibeʼe Yohane, ba taʼalui wanema li ba zi tölu wanofu: Hadia geluahania wanörö lala sindruhu? Hadia daha-tahada ba wamalua daʼö? Ba hewisa wanoloda niha böʼö enaʼö lö faröi ira ba zindruhu?

4. Moloʼö 1 Yohane 2:3-6 hegöi 2 Yohane 4, 6, hadia zinangea tafalua ba wanörö lala sindruhu?

⁴ Ba wanörö lala sindruhu, moguna aboto ba dödöda zindruhu si so ba Zura Niʼamoniʼö. Baero daʼö, moguna ’taʼoʼö goroisa Yehowa’. (Baso 1 Yohane 2:3-6; 2 Yohane 4, 6.) No iröi khöda duma-duma soʼahonoa Yesu ba woloʼö somasi Yehowa. Börö daʼö, sambua lala si tohude sinangea tafalua ba woloʼö somasi Yehowa, yaʼia daʼö na taforege ba woloʼö duma-duma Yesu.​—Yoh. 8:29; 1 Fet. 2:21.

5. Hadia manö zinangea tafaduhusi tödö?

⁵ Enaʼö lö mamalö tatörö lala sindruhu, moguna tafaduhusi tödö wa no sindruhu fefu niwaʼö Yehowa hegöi fefu wehedenia si so ba Zura Niʼamoniʼö. Moguna göi faduhu dödöda wa Yesu andrö no Mesia si no mufabuʼu. Ato niha ba götöda andre si lö faduhu tödö wa no mufataro Yesu tobali Razo ba Wamatörö Lowalangi. Ifangelama ita Yohane wa ”ato zi falimo”, samaelungu niha si lö mangokhögö faʼafaduhu dödö saro ba zindruhu sanandrösa khö Yehowa hegöi Yesu. (2 Yoh. 7-11) Imane Yohane, ”Haniha zi falimo andrö na tenga sangositengagö wa Yesu andrö Keriso?” (1 Yoh. 2:22) Enaʼö tola tatimbagö walimosa andrö, moguna tafahaʼö ita ba Daromali Lowalangi. Na tafalua daʼö, tola taʼokhögö waʼaboto ba dödö sanandrösa khö Yehowa hegöi Yesu. (Yoh. 17:3) Aefa daʼö, tola faduhu dödöda wa no taʼokhögö zindruhu.

6. Hadia mbörö wa tola iböhöli ba wanörö lala sindruhu si samösa Samaduhuʼö Yehowa si bohou ebua?

⁶ Moguna mangelama fefu niha Keriso enaʼö lö telimo ira ba wamahaʼö niha gulidanö. (1 Yoh. 2:26) Mendrua manö ndra si bohou ebua, moguna mangelama ira ba deʼala andre. Imane samösa dalifusöda ira alawe moroi ba Prancis si 25 fakhe faʼebua, sotöi Alexia, * ”Me sekola nasa ndraʼodo, mufahaʼö ndraʼo sanandrösa ba evolusi hegöi ba waʼatua-tua tanö böʼö moroi ba niha, irege uʼaombösi tödö zindruhu. Itaria adöni dödögu ba wamahaʼö andrö. Hizaʼi, aboto ba dödögu wa fasala na ufaduhusi tödö fefu niwaʼö ndra samahaʼö yaʼo, ba lö ufondrondrongo wamahaʼö Zura Niʼamoniʼö.” Ifahaʼö ia Alexia ba mbuku Kehidupan—Bagaimana Asal Mulanya? Melalui Evolusi atau Penciptaan? Me no ifahaʼö ia ba mbuku andrö ba zi hauga migu, lö saʼae  faʼaombö dödö khö Alexia. Imane wangumaʼö, ”No ufaduhuʼö samösa wa sindruhu nösi Zura Niʼamoniʼö. Aboto göi ba dödögu wa hasambalö uʼokhögö waʼowua-wua dödö hegöi faʼahono dödö na uʼoʼö mene-menenia.”

7. Hadia zi tebai tafalua, ba hadia mbörö?

⁷ Fefu niha Keriso, si no atua mazui si bohou ebua, moguna mangelama ira enaʼö lö khöra famini tödö. Iwaʼö sinenge sotöi Yohane wa tebai tatörö lala sindruhu na lö taböhöli wamalua horö. (1 Yoh. 1:6) Na omasi ita tatema howu-howu moroi khö Yehowa, iadaʼa hegöi ba zi so miföna, moguna böi aetu tatörö tödöda wa lö irai tobini ba hörö Yehowa fefu nifaluada. Börö daʼö, hewaʼae na lö hadöi niha böʼö sangila hadia nifaluada ba zi ha yaʼi-yaʼita, tola iʼila daʼö Yehowa.​—Heb. 4:13.

8. Hadia zinangea tatimbagö?

⁸ Moguna tatimbagö lala wangera-ngera gulidanö andre sanandrösa ba wamalua horö. Imane sinenge sotöi Yohane, ”Na tawaʼö, ’Lö horöda,’ eluahania no talimo ita ba lö ba dödöda zindruhu.” (1 Yoh. 1:8) Ba götö Yohane, lawaʼö ira niha si no mondröi sindruhu wa tola fahuwu khö Lowalangi zi samösa niha hewaʼae na lö iböhöli wamalua horö. Iadaʼa, so göi lala wangera-ngera simane daʼö ba niha si so ba zi fasuida. Lawaʼö wa faduhu dödöra khö Lowalangi, hizaʼi lö fao dödöra ba lala wangera-ngera Yehowa sanandrösa ba horö, mendrua manö sanandrösa ba wamalua faʼorudu. Lawaʼö tödöra wa lö fasala na lafalua horö, börö me yaʼira samösa zinangea mangai angetula.

9. Hadia mbua nirasoi ndra si bohou ebua si no tobali niha Keriso, soloʼö mene-mene Zura Niʼamoniʼö?

⁹ Ato niha ba zi fasui ndra si bohou ebua si no tobali niha Keriso, ba zekola hegöi ba nahia wohalöwö, si lö fao tödö ba lala wangera-ngera Zura Niʼamoniʼö sanandrösa ba wamalua faʼorudu. Daʼö mbörö wa abua khö ndra si bohou ebua ba wondrorogö lala wangera-ngera satulö. Daʼö zalua khö Aleksandar.  Imane wanutunö, ”So ösa ndraono alawe ba zekolagu, samaso yaʼo ba wamalua faʼorudu. Börö me utimbagö daʼö ba lö göi hadöi kawagu, lawaʼö wa homo ndraʼo.” Na alua khömö zimane daʼö, törö tödömö hadia mbuania na lö öböhöli ba woloʼö mene-mene Zura Niʼamoniʼö. Duma-dumania, lö ogoro ndraʼugö ba wamaigi faʼauriu, telumöʼö ndraʼugö ba ngawalö wökhö hegöi faʼafökhö dödö, ba lö aetu öʼokhögö wahuwusa si sökhi khö Yehowa. Baero daʼö, ero na mofozu ndraʼugö ba wanimbagö fondrönisi dödö, itugu aoha khömö ba wamalua satulö. Törö tödömö, wa moroi khö Zatana lala wangera-ngera si fasala niʼokhögö gulidanö sanandrösa ba wamalua faʼorudu. Na lö öʼoʼö lala wangera-ngera gulidanö andre, no ’ökalaisi Zatana’.​—1 Yoh. 2:14.

10. Moloʼö 1 Yohane 1:9, hadia zinangea tafalua enaʼö tola taʼokhögö dödö side-ide si lö sinegu ba wamosumange Yehowa?

¹⁰ Aboto ba dödöda wa Yehowa zotatugöi hadia manö gamuata si farahu ba wamalua horö. Tatu manö, taforege sibai enaʼö lö tafalua horö. Ba hewaʼae no tafalua horö, omasi ita tatörö zindruhu khö Yehowa ba wangandrö. (Baso 1 Yohane 1:9.) Na horö sebua nifaluada, moguna taʼalui wanolo moroi khö ndra satua sokubaloi, si no ituyu Yehowa ba wanolo yaʼita. (Yak. 5:14-16) Hizaʼi, lö moguna itegu-tegu manö ita tödöda börö horö si no tafalua ba zilalö. Hadia mbörö? Börö me no ibeʼe nononia Amada sebua faʼomasi si tobali höli enaʼö tola teʼefaʼö zalada. Iwaʼö Yehowa wa na sindruhu-ndruhu ifalalini gera-erania si samösa niha, hasambalö wa iʼefaʼö zala niha daʼö. Tenga mbuʼusa li faya-faya wehede Yehowa andrö. Daʼö mbörö wa hasambalö taʼokhögö dödö side-ide si lö sinegu ba wamosumange yaʼia.​—1 Yoh. 2:1, 2, 12; 3:19, 20.

11. Hadia zinangea tafalua ba wondrorogö faʼaurida moroi ba wamahaʼö si tola mamakiko famatida?

¹¹ Moguna tatimbagö wamahaʼö moroi ba niha si no mondröi sindruhu. Iʼotarai me  tefasindro mbanua niha Keriso, no iforege Afökha enaʼö awuwu wamati niha Keriso. Daʼö mbörö wa moguna aboto ba dödöda hewisa lala ba wamaehusi angombakhata si tefaudu ba zi lö tefaudu. * Niha si fatuwu khöda, tola manö laʼogunaʼö Internet mazui media sosial ba wamazaewe falimosa. Omasi ira na lö saʼae tafaduhusi tödö Yehowa ba lö saʼae taʼomasiʼö ndra talifusöda. Hizaʼi, moguna aboto ba dödöda wa moroi khö Zatana fefu walimosa andrö. Daʼö mbörö wa lö moguna tafaduhusi tödö daʼö!​—1 Yoh. 4:1, 6; Fam. 12:9.

12. Hana wa moguna taʼaroʼö wamatida ba zindruhu si no tafahaʼö yaʼita?

¹² Enaʼö lö mofozu Zatana ba wamakiko famatida, moguna taʼaroʼö wamatida khö Yesu. Moguna göi faduhu dödöda wa yaʼia niʼogunaʼö Yehowa ba wamalua ohitö dödönia. Baero daʼö, moguna göi tafaduhusi tödö ndra sawuyu si lö faröi ba satua-tua, wa ha yaʼira niʼogunaʼö Yehowa ba wondröniaʼö organisasinia. (Mat. 24:45-47) Tola taʼaroʼö wamatida na tafahaʼö ita ba Zura Niʼamoniʼö ero maʼökhö. Na tafalua daʼö, tola aro wamatida, simane eu saro waʼa ba narö danö. Iwaʼö göi wehede simane daʼö Faulo me isura zura ba mbanua niha Keriso si so ba Kolose. Imane, ”Börö me no mitema Keriso Yesu, Soʼaya yaʼita, enaʼö hasara dödömi khönia. Enaʼö mowaʼa wamatimi, tefasindro ba detenia, ba tehonogöigö.” (Kol. 2:6, 7) Na taforege ba wangaroʼö famatida, tebai idönisi dödöda Satana hegöi niha si no so barö wamatörönia, enaʼö taböhöli ba wanörö lala sindruhu.​—2 Yoh. 8, 9.

13. Hadia zi lö tola löʼö alua khöda, ba hadia mbörö?

¹³ Hasambalö wa fatuwu khöda gulidanö andre. (1 Yoh. 3:13) Ifasugi ba dödöda Yohane wa ”Satana zamatörö ulidanö”. (1 Yoh. 5:19) Lö ara tö gamozua gulidanö andre, daʼö mbörö wa itugu abölö-bölö wönu Zatana. (Fam. 12:12) Ba wamakiko famatida, iʼogunaʼö Satana lala si lö alio taʼila, simane fondrönisi dödö ba wamalua amuata fohorö mazui falimosa moroi niha si no mondröi sindruhu. Baero daʼö, iʼogunaʼö göi lala salio taʼila, simane famakao. Aboto ba dödö Zatana wa hatö maʼifu tö ginötönia. Daʼö mbörö wa iforege sibai ba wanaisi halöwö fanuriaigö, mazui iʼalui lala enaʼö awuwu wamatida. Börö daʼö, lö tokea ita na so ösa soi zanaisi mazui si lö manehegö halöwöda. Hewaʼae simanö, lö aetu anau gölö ndra talifusöda si toröi ba soi andrö. Andrö, gofu hadia lala niʼogunaʼö Zatana ba wamakiko famatida, tola anau gölöda!

14. Hadia lala si tola tafalua ba wanolo ira talifusöda enaʼö lö faröi ira ba zindruhu?

¹⁴ Moguna taforomaʼö waʼahakhö dödö ba wanolo ndra talifusöda enaʼö lö faröi ira ba zindruhu. (1 Yoh. 3:10, 11, 16-18) Moguna taʼomasiʼö nawöda, tenga ha ba ginötö waʼomuso dödö hizaʼi na alua göi gabula dödö. Duma-dumania, hadia so dalifusöda ba wamati sinangea mubeʼe fondrara dödö mazui fanolo tanö böʼö, börö me no mate niha niʼomasiʼönia? Mazui, hadia no örongo wa so ndra talifusöda si göna bencana alam, ba sinangea mutolo ba wangehaogö Balai Mbanua Lowalangi niʼogunaʼöra mazui omora? Na omasi ita taforomaʼö waʼomasi hegöi faʼahakhö dödö, lö obönö na ha ba wehededa taforomaʼö daʼö. Sabölö tohude, moguna so zinangea tafalua ba wangoromaʼö yaʼia.

15. Simane nisura ba 1 Yohane 4:7, 8, hadia zinangea tafalua?

¹⁵ Na faoma taforomaʼö waʼomasi, no taʼoʼö duma-duma Namada sebua faʼomasi. (Baso 1 Yohane 4:7, 8.) Sambua lala si tola tafalua ba wangoromaʼö faʼomasi yaʼia daʼö faoma  taʼefaʼö zala nawöda. Duma-dumania, na no iʼafökhöiʼö dödöda si samösa niha, moguna taforege ba wangefaʼö hegöi ba wangolifugö zala si no ifalua andrö. (Kol. 3:13) Abao sibai dödö dalifusöda ira matua sotöi Aldo me so samösa dalifusöda ira matua nifosumangenia, sangumaʼö fehede si lö tefaudu sanandrösa ba niha si otarai mbanuania. Imane Aldo, ”Lö aetu ulau mangandrö khö Yehowa enaʼö uʼokhögö lala wangera-ngera satulö khö dalifusöda andrö.” Baero daʼö, so nasa nifaluania. Iʼandrö khö dalifusöda andrö enaʼö fao ira manuriaigö. Me fao ira manuriaigö, itutunö Aldo wa afökhö dödönia me irongo wehede dalifusöda andrö. Imane, ”Me iʼila wa afökhö dödögu ba wehedenia, iʼandrö waʼebolo dödögu. Ba lagu wehedenia, aboto ba dödögu wa sindruhu-ndruhu maniasa ia ba zi no iwaʼö. Aefa daʼö, ifuli atulö ndraʼaga ba lö saʼae matörö-törö tödöma zalua andrö.”

16-17. Hadia gangetula nihalöda?

¹⁶ Iʼomasiʼö sibai ndra talifusönia ba wamati sinenge sotöi Yohane. Omasi ia na laʼokhögö wamati saro. Tola taʼila waʼomasi hegöi foʼameʼegö tödö niforomaʼö Yohane ba ginötö tabaso mene-mene nisurania ba zurania si tölu ngawua. Tatu omuso sibai dödöda börö me no sangokhögö faʼomasi ndra matua hegöi ira alawe si fao khö Yesu ba wamatörö ba zorugo, ba laʼameʼegö tödö niha böʼö simane nifalua Yohane!​—1 Yoh. 2:27.

¹⁷ Tatötöna enaʼö tola tafalua mene-mene si no tesura ba artikel andre. Datahalö gangetula ba wanörö lala sindruhu. Eluahania, moloʼö ita khö Yehowa ba ngawalö hadia ia. Fahaʼö ndraʼugö ba Daromalinia ba faduhusi tödö fefu niwaʼö Zura Niʼamoniʼö. Aroʼö wamatimö khö Yesu. Timbagö wamahaʼö niha gulidanö hegöi niha si no mondröi sindruhu. Oʼö goi-goi Yehowa sanandrösa ba gamuata. Böi böhöli ba wangefaʼö sala ndra talifusöda si no mangafökhöiʼö tödömö, ba tolo niha sinangea mutolo, enaʼö lö mamalö latörö lala zindruhu. Na tafalua fefu daʼö, tola anau gölöda ba wanörö lala sindruhu gofu hadia zalua khöda.