1. Hadia mene-mene si so ba Filifi 2:3, ba hadia mbua nitemada na tafalua mene-mene daʼö?

SI FAO fangide-ngideʼö, taʼoʼö niwaʼö Yehowa börö me aboto ba dödöda wa ha yaʼia zangila hadia zabölö sökhi ba waʼaurida. (Ef. 4:22-24) Na taʼokhögö wangide-ngideʼö, abölö tohude ba wamaigida gohitö dödö Yehowa moroi ba zomasi-masi dödöda, ba abölö tohude niha böʼö moroi khöda samösa. Buania, taʼokhögö gamakhaita si sökhi khö Yehowa hegöi khö ndra talifusöda ba mbanua niha Keriso.​—Baso Filifi 2:3.

2. Hadia nifaduhuʼö Waulo, ba hadia nitutunöda ba artikel daʼa?

² Moguna mangelama ita börö me no afönu gulidanö andre niha si fayawa hegöi sangokhögö mbua-bua fakhögusa. * Te daʼö zalua ba niha Keriso me abad siföföna. Ba zura nifaʼoheʼö Waulo ba mbanua niha Keriso si so ba Roma, imane khöra, ”Ufatunö khömi fefu enaʼö böi so zangumaʼö ba gotaluami wa abölö ebua ia moroi ba zindruhunia, hizaʼi ndrohu-ndrohu zinangeania.” (Rom. 12:3) Sindruhu sa, ifaduhuʼö Faulo wa moguna taʼosinangegö ita samösa. Hewaʼae simanö, moguna taʼokhögö lala wangera-ngera si tefaudu. Eluahania, moguna taʼokhögö wangide-ngideʼö ba lö tawaʼö tödöda wa abölö tohude ita moroi ba niha böʼö. Ba artikel daʼa, tatutunö hewisa lalada ba wangoromaʼö fangide-ngideʼö (1) ba wongambatö, (2) ba halöwö nibeʼe khöda ba organisasi, hegöi (3) ba media sosial.

3. Hana wa itaria alua gabula dödö ba wongambatö, ba hadia nifalua niha ba wangasiwai yaʼia?

³ Omasi Yehowa na so waʼowua-wua dödö ba niha si no mongambatö. Hizaʼi, börö me lö moʼahonoa ita, itaria alua gabula dödö ba wongambatö. Sindruhunia, no isura Faulo wa oya wamakao salua ba niha si no mongambatö. (1 Kor. 7:28) So ösa zi lö aetu faʼudu khö woʼomora irege so khöra waniasa börö me no mangowalu ira. Na laʼokhögö lala wangera-ngera simane niʼokhögö niha gulidanö, tola manö lawaʼö tödöra wa abölö sökhi na fabali ira. Daʼö zangoromaʼö wa ha yaʼira samösa niʼera-erara.

4. Hadia lala wangera-ngera sinangea tatimbagö?

⁴ Moguna böi tawaʼö tödöda wa lö mofozu wongambatöda. Aboto ba dödöda wa moloʼö Sura Niʼamoniʼö, ha sambua dane-dane wa tola fabali zi faronga, yaʼia daʼö amuata fohorö. (Mat. 5:32) Börö daʼö, na alua gabula dödö ba wongambatöda, moguna tatimbagö wayawasa ba böi tamane wangumaʼö, ’Lö iʼomasiʼö ndraʼo foʼomogu. No sinangea utema waʼomasi si töra moroi ba daʼa. Te abölö owua-wua dödögu na mangowaludo ba niha böʼö.’ Na so khöda wangera-ngera simane daʼö, ha yaʼita samösa niʼangeragöda ba lö taʼera-era woʼomoda. Asese ifarou dödöda ulidanö andre, ”Oʼö niwaʼö dödöu ba falua hadia ia zi tola mangaʼasogö khöu faʼowua-wua dödö.” Lala wangera-ngera daʼö zi tobali dane-dane wa oya sibai niha si fabali. Hizaʼi, imane Sura Niʼamoniʼö, ”Miʼangeragö zoguna ba niha böʼö, tenga ha soguna khömi manö.” (Fil. 2:4) Lö omasi Yehowa na fabali ita khö woʼomoda, hizaʼi, omasi ia na tarorogö wongambatöda. (Mat. 19:6) Omasi ia na abölö taʼofönaiʼö gohitö dödönia, tenga somasi-masi dödöda samösa.

5. Moloʼö Efeso 5:33, hewisa zinangeania gamuata woʼomo ira matua hegöi foʼomo ira alawe khö ngambatöra?

⁵ Foʼomo ira matua hegöi ira alawe,  moguna faoma laʼomasiʼö ba lafosumange nawöra. (Baso Efeso 5:33.) Tefaudu daʼa ba mene-mene Zura Niʼamoniʼö enaʼö abölö taʼosambuaʼö dödöda ba wameʼe moroi ba wanema. (Hal. 20:35) Hadia mbua-bua sanolo niha si no mongambatö enaʼö faoma laʼomasiʼö ba lafosumange nawöra? Fanema linia, yaʼia daʼö fangide-ngideʼö. Na so wangide-ngideʼö khö woʼomo ira matua hegöi foʼomo ira alawe, tenga ha soguna khöra samösa niʼera-erara, hizaʼi laʼangeragö göi ’zoguna ba niha böʼö’.​—1 Kor. 10:24.

6. Hadia wamahaʼö si tola öhalö ba nitutunö Steven hegöi Stephanie?

⁶ Ato niha Keriso si no mongambatö zorasoi wa itugu owua-wua dödöra ba wongambatö börö me no laforomaʼö wangide-ngideʼö. Duma-dumania, imane samösa foʼomo ira matua sotöi Steven, ”Moguna lö aetu falulu fohalöwö woʼomo ira matua hegöi foʼomo ira alawe, mendrua manö na so gabula dödö. Böi ha si sökhi khöu manö niʼera-eramö, hizaʼi moguna öʼangeragö hadia zi sökhi khömi.” Imane göi foʼomonia sotöi Stephanie, ”Lö hadöi niha somasi fao ba niha sasese faʼudu khöra. Andrö, na alua gabula dödö, maforege ba wangalui hadia mbörö wa alua gabula dödö andrö. Aefa daʼö malau mangandrö, maʼalui mene-mene Zura Niʼamoniʼö, ba mafatunöisi hewisa lala ba wangasiwai yaʼia. Maforege ba wangasiwai abula dödö andrö, ba lö omasiga faʼudu.” Sindruhu-ndruhu laʼokhögö waʼowua-wua dödö ira niha si no mongambatö na faoma laʼangeragö hadia zoguna khö ngambatöra.

7. Hewisa zinangeania gamuata ndra talifusöda ira matua sanema halöwö ba organisasi?

⁷ Gofu hadia halöwö nifaluada ba wamosumange Yehowa, no töi si sökhi daʼö. (Zin. 27:4; 84:11) Na so samösa dalifusöda ira matua sanema halöwö ba organisasi, no si sökhi sibai daʼö. Imane Sura Niʼamoniʼö, ”Na so ndra matua sangodödögö ba wangai halöwö tobali sondröniaʼö ba mbanua niha Keriso, no halöwö si sökhi niʼaluinia.” (1 Tim. 3:1) Hewaʼae na no itema halöwö simane daʼö, tenga daʼö geluahania wa abölö tohude ia moroi ba niha böʼö. (Luk. 17:7-10) Moguna ihalö gangetula ba wamalua halöwö soguna ba niha böʼö si fao fangide-ngideʼö.​—2 Kor. 12:15.

8. Hadia wamahaʼö si tola tahalö moroi ba duma-duma Dioterefe, Usia, hegöi Abisalomi?

⁸ No itutunö Sura Niʼamoniʼö sanandrösa ba niha sangumaʼö tödöra wa abölö tohude ira moroi ba niha böʼö. Duma-dumania, omasi Dioterefe na yaʼia zi ”tobali siföföna” ba mbanua niha Keriso. (3 Yoh. 9) Si fao fayawasa, ifalua zi tenga halöwönia Usia. (2 Nga. 26:16-21) Iforege Abisalomi ba wangai tödö ndraono Gizaraʼeli börö me omasi ia tobali razo. (2 Zam. 15:2-6) Ba waö-waö salua nitutunö ba Zura Niʼamoniʼö andre, tola taʼila wa lö omasi Yehowa ba niha sangalui lakhömi ba khönia samösa. (Gamd. 25:27) Ba gafuriata, hasambalö alua gabula dödö ba niha si fayawa hegöi ba niha somasi tobali samatörö.​—Gamd. 16:18.

9. Hadia duma-duma niforomaʼö Yesu?

⁹ Faböʼö sibai Yesu moroi ba niha si fayawa andrö. Imane Sura Niʼamoniʼö, ”Hewaʼae hulö simane Lowalangi ia, hizaʼi lö irai so ba wangera-ngerania ba wamadöni dadaoma Lowalangi mazui ifagölösi ia khö Lowalangi.” (Fil. 2:6) Hewaʼae na sebua kuaso numero dua Yesu ba mbanua si yawa awö danö, lö irai so ba dödönia wa abölö tohude ia moroi ba zindruhunia. Imane khö ndra nifahaʼönia, ”Niha sangide-ngideʼö yaʼia ba gotaluami, daʼö zabölö ebua.” (Luk. 9:48) Tatu latema howu-howu sebua ira perintis, enoni sohalöwö, satua sokubaloi, hegöi ira satua samasui, na laforomaʼö wangide-ngideʼö simane niforomaʼö Yesu! Na taʼokhögö wangide-ngideʼö, itugu taforomaʼö waʼomasi ba niha böʼö. Ba iwaʼö Yesu  wa faʼomasi zi tobali tandra nono mbanua Lowalangi sindruhu.​—Yoh. 13:35.

10. Hadia zinangea öfalua na öwaʼö tödömö wa lö tefaudu lala niʼogunaʼö ba wangasiwai abula dödö si so ba mbanua niha Keriso?

¹⁰ Hewisa na so gabula dödö ba mbanua niha Keriso, ba öwaʼö tödömö wa lö tefaudu lala niʼogunaʼö ndra satua sokubaloi ba wangasiwai yaʼia? Moroi na mukökö-kökö ndraʼugö, tola öforomaʼö wangide-ngideʼö na ötuhini ndra talifusöda si tobali sondröniaʼö ba mbanua niha Keriso. (Heb. 13:17) Angerönusi wanofu-nofu andre si tobali fanolomö ba wangokhögö fangide-ngideʼö: ’Hadia ebua sibai gabula dödö andrö irege moguna muʼasiwai? Hadia daʼa ginötö si tefaudu ba wangasiwai yaʼia? Hadia no tebeʼe khögu noro dödö ba wangasiwai abula dödö andrö? Hadia sindruhu-ndruhu uforege ba wangaʼasogö fahasara dödö ba mbanua niha Keriso, mazui uforege enaʼö abölö tohude ndraʼo?’

11. Moloʼö Efeso 4:2, 3, hadia mbuania na tafosumange Yehowa si fao fangide-ngideʼö?

¹¹ Ba wamaigi Yehowa, abölö tohude wangide-ngideʼö moroi ba ngawalö nekhe-nekhe danga niʼokhögöda. Tohude sibai göi ba wamaiginia fahasara dödö ba gotalua nono mbanuania moroi ba wangasiwai abula dödö ba lala salio hegöi si tefaudu. Börö daʼö, moguna taforege ba wamosumange Yehowa si fao fangide-ngideʼö. Na tafalua daʼö, tola fao ita ba wangaʼasogö fahasara dödö ba mbanua niha Keriso. (Baso Efeso 4:2, 3.) Hewisa lalada ba wangoromaʼö fangide-ngideʼö? Moguna owölö-ölö ita manuriaigö. Taʼalui lala ba wangoromaʼö faʼasökhi dödö ba niha böʼö, ba taforomaʼö waʼoböwö ba niha fefu, tefarahu ba daʼö ndra talifusöda si lö mangokhögö halöwö ba mbanua niha Keriso. (Mat. 6:1-4; Luk. 14:12-14) Na falulu fohalöwö ita khö ndra talifusöda ba mbanua niha Keriso, tola  laʼila wa taʼokhögö wangide-ngideʼö tenga ha nekhe-nekhe danga.

12. Hadia wamarou dödö nibeʼe Zura Niʼamoniʼö sanandrösa ba wangokhögö si fahuwu? Tutunö.

¹² Omasi Yehowa na tarasoi waʼomuso dödö ba ginötö fariawö ita khö ndra si fahuwu khöda hegöi ba nösi nomoda. (Zin. 133:1) Ato niha si fahuwu khö Yesu. (Yoh. 15:15) Ifatunö khöda Sura Niʼamoniʼö hadia mbuania na taʼokhögö zi fahuwu sindruhu. (Gamd. 17:17; 18:24) Ifatunö göi khöda hadia deʼala salua na lö omasi ita fariawö ba niha böʼö. (Gamd. 18:1) Ato niha sangumaʼö tödöra wa tola itolo ira media sosial ba wanöndra si fahuwu sato sibai enaʼö lö saʼae larasoi wa lö awö-awöra. Hewaʼae simanö, moguna mangelama ita ba wangogunaʼö media sosial.

13. Hana wa so ösa niha zorasoi falöʼawö-awö mazui faʼafawuka wangera-ngera ba ginötö laʼogunaʼö media sosial?

¹³ Moloʼö penelitian, niha sangohorigö inötöra ba wangogunaʼö media sosial hasambalö larasoi wa lö awö-awöra ba fawuka wangera-ngerara. Hadia mbörö? Sambua dane-danenia yaʼia daʼö börö me koda nifasa ba media sosial si toʼölönia ha koda ba ginötö waʼomuso dödö. Lafili kodara sabölö sökhi, simane kodara me ha samösa-mösa ira, kodara me fao ira khö ndra awöra, mazui me möi ira ba nahia si sökhi famaigi. Niha samaigi koda simane daʼö, tola manö ifaehusi waʼaurinia ba niha si so ba koda, irege so ba dödönia wa ha si toʼölö manö waʼaurinia ba si lö faʼomuso dödö. Imane samösa dalifusöda ira alawe si 19 fakhe faʼebua, ”Ba ginötö uʼila koda niha si möi manörö-nörö ba ngaluo satu mazui migu, so khögu waʼafökhö dödö börö me ha ba nomo manö so ndraʼo ba lö halö-halöwögu.”

14. Hewisa mene-mene Zura Niʼamoniʼö nisura ba 1 Fetero 3:8, tola möi fanoloda ba wangogunaʼö media sosial?

¹⁴ Tatu manö, tola muʼogunaʼö media sosial ba lala si tefaudu. Duma-dumania, tola taʼogunaʼö daʼö ba wariawösa khö ndra awö-awöda hegöi ba nösi nomoda. Hizaʼi na tanehegö, ato niha sangogunaʼö media sosial ba wangalui lakhömira föna niha böʼö. Hulö na lawaʼö ba niha böʼö, ”Mifaigido”. Ba tola manö, so ösa niha sanura fehede si lö sökhi mazui falelesa ba kodara samösa hegöi ba koda niha böʼö. Lö tefaudu na lafalua zimane daʼö ira  niha Keriso. No faehu sibai daʼö ba wamarou dödö nibeʼe khöra enaʼö laʼokhögö wangide-ngideʼö ba larasoi hadia nirasoi niha böʼö.​—Baso 1 Fetero 3:8.

15. Hadia mene-mene Zura Niʼamoniʼö si tola manolo yaʼita ba wangokhögö fangide-ngideʼö?

¹⁵ Na öʼogunaʼö media sosial, sofu khöu samösa, ’Hadia oroma wa so khögu waʼasiliyawa moroi ba wehede, koda, mazui video nifasagu ba media sosial? Hadia tola iʼasogö waʼafökhö dödö ba niha böʼö?’ Imane Sura Niʼamoniʼö, ”Fefu zi so ba gulidanö andre simane faʼomasi nösi, faʼomasi hörö, ba fohöni-höni okhöta, tenga moroi khö Nama, hizaʼi moroi ba gulidanö.” (1 Yoh. 2:16) So sambua wamoʼeluaha Zura Niʼamoniʼö samoʼeluaha ngawua wehede ”fohöni-höni okhöta” tobali ”niha somasi tohude”. Lö hadöi ba dödö niha Keriso wa abölö tohude ira moroi ba niha böʼö ba lö laforege enaʼö lasuno-suno ira niha. Laʼoʼö mene-mene Zura Niʼamoniʼö andre, ”Böi fayawa ita, fahulö, mazui afökhö dödöda khö nawöda.” (Gal. 5:26) Na so khöda wangide-ngideʼö, tola tobali fanoloda daʼö ba wanimbagö amuata niha ba gulidanö andre, sasiliyawa ba somasi tohude moroi ba niha böʼö.

16. Hana wa moguna tatimbagö waʼasiliyawa?

¹⁶ Niha sasiliyawa, lö lafaigi ira ’ndrohu-ndrohu zinangeania’. (Rom. 12:3) Omasi ira faʼudu ba so khöra mbua-bua fakhögusa. Börö lala wangera-ngerara hegöi amuatara, asese laʼasogö gabula dödö ba waʼaurira samösa hegöi ba niha böʼö. Na lö labulöʼö lala wangera-ngerara, tola manö ifakiko ba ifaelungu ira Satana. (2 Kor. 4:4; 11:3) Niha sangokhögö fangide-ngideʼö, tola lafaigi ira ndrohu-ndrohu zinangeania. Aboto ba dödöra wa abölö oya waʼatohude niha böʼö moroi khöra. (Fil. 2:3) Iwaʼö Sura Niʼamoniʼö wa ”fatuwu khö Lowalangi niha si fayawa ba ibeʼe waʼasökhi dödö sebua ba niha sangide-ngideʼö yaʼia”. (1 Fet. 5:5) Börö daʼö, na lö omasi ita fatuwu khöda Yehowa, moguna taʼokhögö wangide-ngideʼö.

17. Hadia zinangea tafalua enaʼö lö mamalö taʼokhögö wangide-ngideʼö?

¹⁷ Enaʼö lö mamalö taʼokhögö wangide-ngideʼö, moguna taʼoʼö mene-mene Zura Niʼamoniʼö enaʼö ’taheta khöda gamuata si tohöna andrö hegöi si toʼölö tafalua me föna, ba tabohouni gamuatada’. Moguna wamorege ba wamalua daʼö. Moguna tafahaʼö ita ba duma-duma Yesu, ba taforege ba woloʼö duma-dumania. (Kol. 3:9, 10; 1 Fet. 2:21) Hizaʼi, tenga zaya-zaya gölö nifaluada andrö. Na lö aetu taforege ba wangokhögö fangide-ngideʼö, tola itugu owua-wua dödöda ba wongambatö, itugu teʼosambuaʼö mbanua niha Keriso, ba tola taʼogunaʼö media sosial ba lala si tefaudu. Sabölö tohudenia, ifahowuʼö ita Yehowa ba iʼomasiʼö ita.