1. Hadia ”zindruhu” andrö?

”HEWISA wanöndramö sindruhu?” ”Hadia ba zindruhu teʼebuaʼö ndraʼugö?” ”Hauga fakhe no so ndraʼugö ba zindruhu?” Te no irai lafaʼema khöu wanofu-nofu simane daʼa, mazui te no irai ösofu daʼö ba niha böʼö. Hadia ”zindruhu” andrö? Si toʼölönia, no tatutunö ”zindruhu” ba ginötö tafatunö ba niha sanandrösa ba nifaduhusida tödö, lala wamosumangeda Lowalangi, hegöi lala waʼaurida. Niha si so ba zindruhu, aboto ba dödöra hadia nifahaʼö Zura Niʼamoniʼö, ba lafalua goi-goinia ba waʼaurira. Buania, teʼefaʼö ira moroi ba wamahaʼö agama sofaya, ba laʼokhögö waʼowua-wua dödö hewaʼae na auri ira ba gulidanö nifatörö Zatana.​—Yoh. 8:32.

2. Moloʼö Yohane 13:34, 35, hadia mbörö wa adöni dödö zi samösa niha ba zindruhu?

² Hana wa tola adöni dödöu ba zindruhu? Te börö mbua-bua si sökhi niforomaʼö ndraono mbanua Yehowa. (1 Fet. 2:12) Mazui, te adöni dödömö ba waʼomasi niforomaʼöra ba niha böʼö. Ato niha sangila daʼö me awena sibai laʼondrasi gangowuloa, irege tofakha sibai ba dödöra waʼomasi niʼilara, töra moroi ba wamahaʼö nifaʼema ba gangowuloa andrö. Lö ahöli dödöda ba daʼö börö me no ifatunö Yesu wa faʼomasi zi tobali tandra ndra nifahaʼönia. (Baso Yohane 13:34, 35.) Hizaʼi, enaʼö tola taʼokhögö wamati saro, so ösa nasa zinangea tafalua.

3. Hadia zalua na ha ba waʼomasi niforomaʼö ndra talifusöda teʼodane-dane wamatida?

³ Lö obönö na teʼodane-dane wamatida ha ba waʼomasi niforomaʼö nono mbanua Lowalangi. Hadia mbörö? Na ha ba daʼö teʼodane-dane wamatida, tola alio taya daʼö. Duma-dumania, te taböhöli ba wamosumange Yehowa na so samösa dalifusöda ba wamati, te satua sokubaloi mazui perintis, samalua horö sebua. Tola manö göi awuwu ita ba wamati na so dalifusöda sangafökhöiʼö tödöda, mazui so niha sangerogö sindruhu,  sangumaʼö wa fasala nifaduhusida tödö. Börö daʼö, enaʼö taʼokhögö wamati saro, moguna teʼodane-dane daʼö ba wahuwusa saro khö Yehowa. Famahaʼönia: Na mamati ndraʼugö khö Lowalangi ha börö nifalua niha böʼö ba tenga börö me öʼokhögö wahuwusa saro khönia, lö tola öʼokhögö wamati saro. Fefu hadia ia nirasoimö sanandrösa khö Yehowa hegöi ba nono mbanuania, tola möi fanolomö daʼö ba wondrouʼö famatimö. Hizaʼi, moguna sibai göi enaʼö öforege ba wamahaʼö yaʼugö ba Zura Niʼamoniʼö, aboto ba dödömö zi no öfahaʼö yaʼugö, ba öfalua riset enaʼö faduhu dödömö wa sindruhu zi no öfahaʼö yaʼugö sanandrösa khö Yehowa. Moguna faduhu dödömö wa tola ösöndra zindruhu sanandrösa khö Yehowa moroi ba Zura Niʼamoniʼö.​—Rom. 12:2.

4. Moloʼö Mataiʼo 13:3-6, 20, 21, na so ösa niha si tetandraigö ba wamati, hadia lua-luania khöra?

⁴ Iwaʼö Yesu wa so ösa niha sanemaʼö sindruhu ”si fao faʼomuso dödö”, hizaʼi awuwu ira ba wamati me itörö ira famakao. (Baso Mataiʼo 13:3-6, 20, 21.) Te lö aboto ba dödöra wa hasambalö alua gabula dödö hegöi famakao ba niha soloʼö Yesu. (Mat. 16:24) Mazui te lawaʼö tödöra wa na no tobali ira niha Keriso, hasambalö ifahowuʼö ira Lowalangi ba iʼaröuʼö khöra gabula dödö. Hizaʼi, ba gulidanö andre iadaʼa, hasambalö tataögö gabula dödö. Tola manö so zi tebulö ba waʼaurida irege taya waʼowua-wua dödöda.​—Zin. 6:7; Zango. 9:11.

5. Hezo tola taʼila wa ato ndra talifusöda si no mangoromaʼö faʼafaduhu dödö wa no laʼokhögö zindruhu?

⁵ Ato ndra talifusöda si no mangoromaʼö faʼafaduhu dödö wa no laʼokhögö zindruhu. Hana wa tola tawaʼö zimane daʼö? Lö mangiwa waʼafaduhu dödöra hewaʼae na so dalifusöra ba wamati sangafökhöiʼö tödöra mazui samalua amuata si lö tefaudu. (Zin. 119:165) Na alua khöra wanandraigö, itugu aro wamatira, tenga itugu awuwu. (Yak. 1:2-4) Hewisa lalamö ba wangokhögö famati saro simane daʼö?

6. Hadia dane-dane wamati niʼokhögö ndra nifahaʼö me abad siföföna?

⁶ Dane-dane wamati niʼokhögö ndra nifahaʼö me abad siföföna yaʼia daʼö faʼaboto ba dödö sanandrösa ba Zura Niʼamoniʼö hegöi ’sindruhu andrö sanandrösa ba duria somuso dödö’ nifahaʼö Yesu Keriso. (Gal. 2:5) Daʼa zindruhu nifaduhusi tödö niha Keriso, tefarahu ba daʼö zindruhu sanandrösa ba höli nibeʼe Yesu hegöi fanusuginia. Faduhu dödö zinenge sotöi Faulo wa sindruhu wamahaʼö andrö. Hadia mbörö? Börö me iʼogunaʼö Zura Niʼamoniʼö Faulo ba wamaduhuʼö ”wa hasambalö itörö wamakao Keriso ba tesusugi ia moroi ba gotalua zi mate”. (Hal. 17:2, 3) Latemaʼö wamahaʼö andre ira nifahaʼö me abad siföföna ba laʼodaligö geheha niʼamoniʼö ba wanolo yaʼira enaʼö laʼokhögö waʼaboto ba dödö sanandrösa ba Daromali Lowalangi. No lafalua riset irege faduhu dödöra wa teʼodane-dane wamahaʼö andrö ba Zura Niʼamoniʼö. (Hal. 17:11, 12; Heb. 5:14) Lö teʼodane-dane wamatira moloʼö nirasoira, ba lö lafosumange Yehowa ha börö waʼowua-wua dödö nirasoira me fariawö ira khö ndra talifusöra ba wamati. Hizaʼi, teʼodane-dane wamatira ba ”waʼaboto ba dödö si tefaudu sanandrösa khö Lowalangi”.​—Kol. 1:9, 10.

7. Hadia mbua nitemada na taʼokhögö wamati si teʼodane-dane ba Zura Niʼamoniʼö?

⁷ Lö tebulö zindruhu si so ba Zura Niʼamoniʼö. (Zin. 119:160) Duma-dumania, lö tebulö daʼö hewaʼae na so dalifusöda ba wamati sangafökhöiʼö tödöda mazui samalua horö sebua. Ba lö tebulö daʼö hewaʼae na tataögö gabula dödö. Börö daʼö, moguna sindruhu-ndruhu aboto ba dödöda Zura Niʼamoniʼö, ba tafaduhusi tödö wa sindruhu  nifahaʼönia khöda. Simane sao niʼogunaʼö enaʼö lö ahani göfa hewaʼae na so mbade, lö awuwu wamatida hewaʼae na tataögö wanandraigö börö me teʼodane-dane daʼö ba zindruhu si so ba Zura Niʼamoniʼö. Hewisa lalamö ba wangaroʼö faʼafaduhu dödö wa no öʼokhögö zindruhu?

8. Simane nisura ba 2 Timoteo 3:14, 15, hewisa wa tola faduhu dödö Dimoteo wa no iʼokhögö zindruhu?

⁸ Faduhu dödö Dimoteo wa no iʼokhögö zindruhu. Hadia mbörö? (Baso 2 Timoteo 3:14, 15.) Inania hegöi nenenia zi oföna sibai mamahaʼö yaʼia ba ”Mbuku Niʼamoniʼö”. Baero daʼö, tatu ibeʼe göi ginötö hegöi faʼabölönia ba wamahaʼö yaʼia sanandrösa ba daʼö. Buania, tola ’ifaduhusi tödö me no lafatunö khönia’ wa sindruhu zi no tesura andrö. Ba gafuriata, Timoteo, inania, hegöi nenenia, lafahaʼö ira sanandrösa khö Keriso. Tatu adöni dödö Dimoteo sanandrösa ba waʼomasi niforomaʼö ndra soloʼö khö Yesu irege terou dödönia fariawö khöra hegöi ba wanolo yaʼira. (Fil. 2:19, 20) Hewaʼae simanö, tenga faʼomasinia ba niha böʼö zi tobali dane-dane wamatinia, hizaʼi teʼodane-dane daʼö ba wamahaʼö si no itema moroi ba Zura Niʼamoniʼö irege terou dödönia tobali si fahuwu khö Yehowa. Moguna göi öfahaʼö ndraʼugö ba Zura Niʼamoniʼö enaʼö tola aboto ba dödöu sanandrösa khö Yehowa.

9. Hadia zi tölu ngawalö dane-dane zindruhu sinangea öfaduhusi tödö?

⁹ Ba wamobörö, so tölu ngawalö dane-dane zindruhu sinangea öfaduhusi tödö. Si oföna, moguna faduhu dödömö wa Lowalangi Yehowa andrö no Somböi fefu hadia ia. (2 Moz. 3:14, 15; Heb. 3:4; Fam. 4:11) Si dua, moguna öfaduhusi tödö wa moroi khö Lowalangi nösi Zura Niʼamoniʼö andrö. (2 Tim. 3:16, 17) Ba si tölu, moguna öfaduhusi tödö wa Yehowa zameʼe fanuturu khö ndra Samaduhuʼö Yehowa, samosumange yaʼia barö wamatörö Keriso. (Yes. 43:10-12; Yoh. 14:6; Hal. 15:14) Lö moguna aboto ba dödömö fefu nösi Zura Niʼamoniʼö enaʼö tola öfaduhusi tödö dane-dane zindruhu si tölu ngawalö andre. Hizaʼi, moguna ’öʼoigö  wangera-ngeramö’ enaʼö faduhu dödömö wa no öʼokhögö zindruhu.​—Rom. 12:1.

10. Baero ba wangokhögö faʼaboto ba dödö sanandrösa ba zindruhu, hadia nasa zinangea tafalua?

¹⁰ Na no öʼokhögö waʼafaduhu dödö sanandrösa khö Lowalangi, Sura Niʼamoniʼö, hegöi ono mbanua Lowalangi, tola öʼogunaʼö ayati Zura Niʼamoniʼö ba wamaduhuʼö sindruhu andrö ba niha böʼö. Hadia mbörö? Börö me nifahaʼö Yesu ita, taʼokhögö noro dödö ba wamahaʼö niha böʼö sanandrösa ba zindruhu si no aboto ba dödöda. * (1 Tim. 4:16) Baero daʼö, na tatolo niha böʼö enaʼö faduhu dödöra sanandrösa ba zindruhu si so ba Zura Niʼamoniʼö, itugu aro göi waʼafaduhu dödöda sanandrösa ba zindruhu andrö.

11. Hadia duma-duma niröi zinenge sotöi Faulo, ba hewisa woloʼöda duma-dumania andrö?

¹¹ Ba ginötö ifahaʼö niha böʼö Faulo, iforege ”enaʼö faduhu dödöra khö Yesu simane niwaʼö ba Goroisa Moze hegöi Nisura Ndra Samaʼeleʼö”. (Hal. 28:23) Hewisa woloʼöda duma-duma Waulo na tafahaʼö zindruhu ba niha böʼö? Lö obönö na ha tafatunö khöra hadia nifahaʼö Zura Niʼamoniʼö. Moguna tatolo niha nifahaʼöda ba Zura Niʼamoniʼö enaʼö tola lafahaʼö samösa ira ba lahaogö laʼangerönusi hadia zi no lafahaʼö yaʼira ba Zura Niʼamoniʼö. Omasi ita na latemaʼö zindruhu, tenga börö me laʼosinangegö ita, hizaʼi börö me no lafahaʼö ira sanandrösa khö Lowalangi ba aboto ba dödöra wa sindruhu zi no lafahaʼö yaʼira andrö.

12-13. Hewisa lala ndra satua ba wanolo iraonora enaʼö lö faröi ira ba zindruhu?

¹² Yaʼami ira satua, tatu omasi ami na lö faröi ndraonomi ba zindruhu. Te miwaʼö tödömi wa tola itugu tedou wamati ndraonomi na laʼokhögö wariawösa si sökhi ba mbanua niha Keriso. Hizaʼi, enaʼö tola faduhu dödö ndraonomi wa no so ira ba zindruhu, so nasa danö böʼö zinangea laʼokhögö. Moguna laʼokhögö wahuwusa si sökhi khö Lowalangi, ba lafaduhusi tödö wa no sindruhu nifahaʼö Zura Niʼamoniʼö.

¹³ Enaʼö tola lafahaʼö ndraonora sanandrösa ba zindruhu soʼamakhaita khö Lowalangi, moguna tobali duma-duma si sökhi ndra satua ba wamahaʼö yaʼira samösa ba Zura Niʼamoniʼö. Moguna ua labeʼe ginötöra ba woʼangerönusi hadia zi no lafahaʼö yaʼira, awena tola lafahaʼö ndraonora ba wamalua simane nifaluara andrö. Simane nifaluara ba niha nifahaʼöra ba Zura Niʼamoniʼö, moguna göi lafahaʼö ndraonora ba wangogunaʼö fakake ba wamalua riset. Na lafalua daʼö, tola latolo ndraonora ba wangomasiʼö Yehowa, ba faduhu göi dödöra wa iʼogunaʼö ”zawuyu si lö faröi ba satua-tua” Yehowa ba wameʼe soguna khöda ba wamati. (Mat. 24:45-47) Yaʼami ira satua, lö obönö na ha famahaʼö saoha nifahaʼömi ba ndraonomi.  Enaʼö tola laʼokhögö wamati saro, moguna mifahaʼö ira sanandrösa ba ”wangera-ngera Lowalangi sabölö abakha” si tefaudu moloʼö faʼebua-bua hegöi faʼatua-tuara.​—1 Kor. 2:10.

14. Hana wa moguna tafahaʼö ita ba wamaʼeleʼö si so ba Zura Niʼamoniʼö? (Faigi göi kotak ” Hadia Tola Ötutunö Ngawalö Wamaʼeleʼö Andre?”)

¹⁴ Famaʼeleʼö si so ba Zura Niʼamoniʼö tola itolo ita ba wangaroʼö famatida khö Yehowa. Te no irai teʼaroʼö wamatimö börö wamaʼeleʼö sanandrösa ba ”ngaluo safuria”. (2 Tim. 3:1-5; Mat. 24:3, 7) Hizaʼi, hadia nasa wamaʼeleʼö tanö böʼö si tola mangaroʼö famatimö? Duma-dumania, hadia tola ötutunö hewisa waʼalua wamaʼeleʼö nisura ba Danieli faza 2 mazui faza 11, si no alua ba götö föna hegöi ba götöda iadaʼa? * Na ba Zura Niʼamoniʼö teʼodane-dane wamatimö, lö tola mangiwa daʼö. Nehegö duma-duma ndra talifusöda sanaögö folohi ba Jerman me alua Wasuwöta Gulidanö II. Hewaʼae na lö aboto ba dödöra fefu wamaʼeleʼö Zura Niʼamoniʼö sanandrösa ba ngaluo safuria, laʼokhögö wamati saro ba Daromali Lowalangi.

15-17. Me göna ndra talifusöda folohi nifalua Nazi, hadia zangaroʼö famatira irege anau gölöra?

¹⁵ Me mamatörö Nazi ba Jerman, so ngahönö ndra talifusöda niʼohe ba kamp konsentrasi. Fatuwu Hitler khö ndra Samaduhuʼö Yehowa, ba simane daʼö göi niha salawa faka khönia sotöi Heinrich Himmler. Itutunö samösa dalifusöda ira alawe wa no irai iwaʼö zimane daʼa Himmler khö ndra talifusöda ira alawe si so ba kamp konsentrasi, ”Ha ba zorugo mamatörö Yehowami andrö, hizaʼi na ba gulidanö andre yaʼaga zamatörö! Hasambalö maforomaʼö khömi haniha zi oföna mate, hadia yaʼami mazui yaʼaga!” Hadia zanolo ono mbanua Yehowa irege lö faröi ira?

¹⁶ Aboto ba dödö Ndraono Zekola Zura Niʼamoniʼö wa no tefasindro Wamatörö Lowalangi iʼotarai me döfi 1914. Lö tokea ira ba ginötö göna ira folohi. Faduhu dödö nono  mbanua Yehowa wa lö hadöi niha si tola manaisi Lowalangi ba wamalua ohitö dödönia. Lö faʼabölö khö Hitler ba wamakiko lala wamosumange satulö, ba tebai ifasindro wamatörö sangokhögö faʼabölö si töra moroi ba Wamatörö Lowalangi. Faduhu dödöra wa ba gafuriata, hasambalö tedudugö wamatörö Hitler.

¹⁷ Lö fasala waʼafaduhu dödö niʼokhögö ndra talifusöda andrö. Lö ara aefa daʼö, tedudugö wamatörö Nazi, ba moloi Heinrich Himmler, si no irai mangumaʼö, ”ba gulidanö andre yaʼaga zamatörö”. Me moloi ia, falukha ia khö dalifusöda ira matua si no irai mukuru sotöi Lübke, ba iʼila Himmler wa yaʼia andrö samösa Samaduhuʼö Yehowa. Si fao faʼafawuka wangera-ngera, manofu Himmler khö dalifusöda Lübke, ”He Ono Zekola Zura Niʼamoniʼö, hadia zalua andre?” Itutunö khönia talifusöda andrö wa faduhu sibai dödö ndra Samaduhuʼö Yehowa wa hasambalö teʼefaʼö ira ba tedudugö wamatörö Nazi. Ba zilalö, oya zi lö sökhi niwaʼö Himmler khö ndra Samaduhuʼö Yehowa. Hizaʼi ba ginötö daʼö, lö iʼila hadia zinangea iwaʼö. Lö ara aefa daʼö, ibunu ia samösa. Hadia wamahaʼönia khöda? Na tafahaʼö ita ba Zura Niʼamoniʼö hegöi ba wamaʼeleʼö si so ba daʼö, tola möi fanoloda daʼö ba wangokhögö famati saro ba lö awuwu ita hewaʼae na göna ita folohi.​—2 Fet. 1:19-21.

18. Simane nisura Waulo ba Yohane 6:67, 68, hana wa moguna taʼokhögö ”waʼaboto ba dödö si tefaudu hegöi fangera-ngera si sökhi”?

¹⁸ Moguna taforomaʼö waʼomasi si tobali tandra wa yaʼita andre niha Keriso sindruhu. Baero daʼö, moguna göi taʼokhögö ”waʼaboto ba dödö si tefaudu hegöi fangera-ngera si sökhi”. (Fil. 1:9) Na lö taʼokhögö daʼö, tola manö tedönisi dödöda ”ba ngawalö wamahaʼö faya moroi ba waʼonekhe zamaelungu andrö”, duma-dumania niha sangerogö sindruhu. (Ef. 4:14) Me ato nifahaʼö Yesu samöhöli ba woloʼö yaʼia, iʼombakhaʼö Fetero waʼafaduhu dödönia sanandrösa khö Yesu, imane, ”Ba wehedemö so waʼauri si lö aetu.” (Baso Yohane 6:67, 68.) Hewaʼae na lö aboto sibai ba dödönia wehede Yesu andrö, lö faröi ia khö Yesu börö me no aboto ba dödönia zindruhu sanandrösa khö Keriso. Simane Fetero, tola göi öʼaroʼö waʼafaduhu dödömö ba wamahaʼö si so ba Zura Niʼamoniʼö. Na öfalua daʼö, lö mamalö aro wamatimö gofu hadia ia zalua, ba tola göi ötolo niha böʼö ba wangaroʼö famatira.​—2 Yoh. 1, 2.