Tumbu ndraʼo me döfi 1954 ba St. Paul, Minnesota, AS. Farahu nösi nomoma ba agama Katolik Roma. Lö kayo ba lö numana ndraʼaga. Ono numero dua ndraʼo moroi ba zi dalima zi fatalifusö. Sekola ndraʼo ba SD Katolik, ba tobali ndraʼo sanolo ndra pastor na mufalua gangowuloa ba gereja. Hizaʼi, lö oya waʼaboto ba dödö niʼokhögögu sanandrösa ba Zura Niʼamoniʼö. Hewaʼae na faduhu dödögu wa so Lowalangi somböi fefu hadia ia, lö saʼae faduhu dödögu ba gereja.

Me no döfi kuliah ndraʼo ba jurusan hukum ba William Mitchell College of Law, tohare ndra Samaduhuʼö Yehowa ba nomogu. Manasa-nasa nukha ndraʼo ba ginötö daʼö, andrö wa lafabuʼu khögu wa lafuli ira ba ginötö tanö böʼö. Me ifuli tohare ira, so dombua wanofu nifaʼemagu khöra, ”Hana wa abölö mofozu waʼauri niha si lö sökhi moroi ba niha si sökhi?” ba ”Hadia zi tola mangaʼasogö khöda faʼowua-wua dödö sindruhu?” Labeʼe khögu mbuku Kebenaran yang Membimbing kepada Hidup yang Kekal hegöi Kitab Suci Terjemahan Dunia Baru sowugeʼe uli. Fao göi dödögu ba wamörögö famahaʼö ba Zura Niʼamoniʼö. Oya sibai waʼaboto ba dödö si bohou nisöndragu ba wamahaʼö andrö. Omuso sibai  dödögu me uʼila wa Famatörö Lowalangi dania zamatörö ba zi sagörö ulidanö. Uʼila samösa wa tebai mufaduhusi tödö wamatörö niha gulidanö, ba oya gabula dödö, falöʼatulö, ba famakao niʼasogöra ba gulidanö andre.

Ululu waʼaurigu khö Yehowa ba wamobörö ndröfi 1982, ba ba gafuriata, mubayagö ndraʼo idanö ba ndröfi daʼö ba gangowuloa sebua nifalua ba St. Paul Civic Center, tohunia ”Sindruhu Sanandrösa ba Wamatörö”. Samigu aefa daʼö, ifuli möi ndraʼo ba daʼö ba wamalua ujian ba niha sedöna tobali pengacara. Ba wamobörö mbaŵa si Fulu, urongo gangombakhata wa möna ndraʼo ba ujian andrö irege tola ubörögö wohalöwö tobali pengacara.

Ba gangowuloa sebua ”Sindruhu Sanandrösa ba Wamatörö”, falukha ndraʼo khö Mike Richardson, samösa sohalöwö ba Mbetieli Brooklyn. Ifatunö khögu wa no mufazökhi bagian hukum ba gödo sebua. Itörö tödögu wehede niha salawa faka ba Gaitiofia nisura ba Halöwö Zinenge 8:36. Usofu khögu samösa, ’Hadia daha-tahagu wa lö mohalöwödo ba Bagian Hukum?’ Börö daʼö ufasuraʼö döigu ba wohalöwö ba Mbetieli.

Me uhalö gangetula tobali Samaduhuʼö Yehowa, mofönu sibai ndra satuagu. Manofu bapagu hadia tola itugu mofozu halöwögu tobali pengacara na mohalöwödo ba Mbetieli. Ututunö khönia wa mohalöwödo ba Mbetieli tobali sukarelawan. Ufatunö göi khönia wa labeʼe khögu maʼifu gefe si tobali fogati okosigu ero waŵa, simane nitema ndra sohalöwö ba Mbetieli tanö böʼö.

Me no uʼawaisi halöwögu ba gödo zanguhuku, ibörögö ulau mohalöwö ba Mbetieli Brooklyn, New York, me dofi 1984. Lafataro ndraʼo ba Bagian Hukum. Faʼatua-tua nisöndragu me mohalöwödo ba gödo zanguhuku, moguna sibai daʼö ba wangasiwai farakaro si oföna tebeʼe khögu me mohalöwödo ba Mbetieli.

Me baŵa si Walu 1983, iʼöli organisasi domosa Stanley Theater si so ba Jersey City, New Jersey. Laʼandrö ira talifusöda enaʼö latehegö khöra ba wamohouni sistem listrik hegöi lala nidanö si so ba domosa andrö. Me lafalukhaisi ndra samatörö ba mbanua andrö, lafatunö khöra ira talifusöda wa omasi ira laʼogunaʼö Stanley Theater tobali nahia ba wamalua angowuloa sebua khö ndra Samaduhuʼö Yehowa. Lö matötöna wa so gamakhoita ba Jersey City, sangumaʼö wa ha tomosa si so ba nahia soya omo zi tola muʼogunaʼö ba wamalua famosumange. Börö me ba nahia bisnis so domosa Stanley Theater, andrö wa lö latehegö ira samatörö na mufalua renovasi. Lafalua banding ira talifusöda andrö, hizaʼi latimbagö daʼö ira sangetuʼö huku.

 Me no arakhagö samigu mohalöwödo ba Mbetieli, laʼohe farakaro andrö ira talifusöda ba gödo zanguhuku. Börö me no irai mohalöwödo ba gödo zanguhuku si so ba St. Paul, Minnesota, tenga sawena uʼila farakaro simane daʼö. Itutunö si samösa pengacara ba organisasi wa no asese laʼogunaʼö Stanley Theater ba wamalua ngawalö acara, simane famuta film mazui konser musik rock. Andrö, hadia mbörö wa tebai muʼogunaʼö domosa andrö ba wamalua angowuloa soʼamakhaita ba agama? Me no lafareso farakaro andrö, ihalö gangetula gödo zanguhuku wa no iʼosiwawöi ita Jersey City sanandrösa ba agamada. Ibeʼe fareta gödo zanguhuku enaʼö latehegö khöda ba wamalua angowuloa. Ba daʼö uʼila hewisa wamahowuʼö Yehowa famorege nifalua organisasi ba wangogunaʼö huku si tobali fanolo ba wondrouʼö halöwöda. Omuso sibai dödögu me tola farahu ndraʼo ba wangasiwai farakaro andre.

Ibörögö mufalua renovasi sebua. Lö irugi döfi aefa daʼö, mufalua acara wisuda Sekolah Gilead kelas si-79 ba Nahia Gangowuloa Sebua Jersey City me 8 mbaŵa si Siwa 1985. No töi si sökhi me tola farahu ndraʼo ba bagian hukum ba wondrouʼö halöwö soguna ba Wamatörö Lowalangi. Owua-wua sibai dödögu ba halöwö andre, töra moroi ba waʼomuso dödö nirasoigu me mohalöwödo tobali pengacara fatua lö mohalöwödo ba Mbetieli. Lö utötöna wa lö aetu iʼogunaʼö ndraʼo Yehowa ba wangasiwai ngawalö farakaro tanö böʼö.

Me döfi 1980-an, asese laʼosiwawöi ira doto hegöi ruma saki na so gangandröwa zi samösa Samaduhuʼö si lö omasi manema transfusi darah. Abua sibai daʼa, mendrua manö khö ndra alawe sanabina, börö me lawaʼö ira sangetuʼö huku wa tenga sinangea itimbagö daʼö si samösa ira alawe. Lawaʼö wa tola mate ndra alawe andrö na itimbagö transfusi darah, irege si lö ina nononia andrö dania.

Me 29 mbaŵa si Felendrua 1988, itaögö pendarahan talifusöda ira alawe sotöi Denise Nicoleau me tumbu nononia. Lö ikhamö 5 hemoglobin ba mbotonia, ba iʼandrö khönia doto enaʼö fao dödönia ba wanema transfusi. Itimbagö daʼö talifusöda Nicoleau. Ba zihulö wonginia, iʼandrö ruma saki enaʼö itehegö khöra gödo zanguhuku ba wameʼe transfusi darah khö dalifusöda andrö. Itehegö daʼö sangetuʼö huku hewaʼae na lö nifaresonia hewisa zalua ba lö nifatunönia daʼö khö dalifusöda Nicoleau mazui khö woʼomonia.

Me luo Zumaha, 30 mbaŵa si Felendrua, lafalua transfusi darah ira sohalöwö ba ruma saki khö dalifusöda Nicoleau, hewaʼae na lö fao dödö woʼomonia hegöi ösi nomonia tanö böʼö. Bongi daʼö, so ösa nösi nomo dalifusöda Nicoleau hegöi satua sokubaloi niraʼu wolisi, börö me no lafasui nahia wemörö dalifusöda Nicoleau ba wanimbagö enaʼö lö latransfusi ia. Me sihulö wongi hari Satu, 31 mbawa si Felendrua, oya media berita si so ba  New York City hegöi ba Long Island sanutunö sanandrösa ba wondraʼu yaʼira.

Me sihulö wongi hari Sinaya, uʼondrasi samösa zangetuʼö huku moroi ba gödo zanguhuku sabölö alawa sotöi Milton Mollen. Ufatunö khönia hadia zalua, ba uwaʼö wa lö nifareso zangetuʼö huku andrö hewisa zindruhunia zalua fatua lö itehegö wamalua transfusi darah. Iʼandrö khögu ba weʼamöi ba gödonia tanö owi daʼö, ba wamatunöisi farakaro andrö hegöi ngawalö huku soʼamakhaita ba daʼö. Möi awögu dalifusöda sondröniaʼö ba bagian hukum sotöi Philip Brumley ba wamalukhaisi Mollen. Ikaoni göi Mollen pengacara ruma saki enaʼö tola fao ia ba wamatunöisi salua andrö. Ba gafuriata, ibörögö alua wabuʼa-buʼasa ba wamatunöisi daʼö. Ba dalu wabuʼa-buʼasama, isura ba mbukunia talifusöda Brumley, imane khögu, ”Taha dödömö.” Sökhi sibai mene-menenia andrö, börö me uforege sibai ba ginötö daʼö ba wangoromaʼö wa fasala pengacara ruma saki andrö.

Me no arakhagö sambua za faʼara, iwaʼö Mollen wa farakaro andrö zi oföna mufareso mahemolunia sihulö wongi. Me edöna mofanö ndraʼaga moroi ba gödonia, iwaʼö Mollen wa so ”halöwö sabua” sinangea ifalua pengacara ruma saki andrö mahemolunia. Eluahania, hasambalö abua khö pengacara andrö ba wangoʼawögö ruma saki. Me luo daʼö, hulö na iʼaroʼö dödögu Yehowa wa hasambalö möna ndraʼaga. Iʼogunaʼö ndraʼaga Yehowa ba wangoʼozui ohitö dödönia. No sahöli-höli dödö daʼö.

Mohalöwö ndraʼaga irugi talu mbongi ba wamaʼanö hadia manö zinangea mawaʼö. Me sihulö wonginia, ato ndra sohalöwö ba bagian hukum sanörö tanö weʼamöi ba gödo zanguhuku, börö me lö fandröndröu sibai daʼö moroi ba Mbetieli Brooklyn. Me no aefa lafondrondrongo nifaʼemama ira sangetuʼö huku si daöfa, lahalö gangetula wa tenga sinangea na latehegö wamalua transfusi darah. Ihalö gangetula gödo zanguhuku andrö wa talifusöda Nicoleau zi möna ba warakaro andrö, ba iwaʼö wa no sangosiwawöi hak asasi manusia na muhalö gangetula fatua lö lasofu hewisa mbua gera-era niha sofökhö andrö.

Lö ara aefa daʼö, ihalö gangetula gödo zanguhuku sabölö alawa si so ba New York, wa no sinangea na itimbagö transfusi darah talifusöda Nicoleau. Me no aefa farakaro andrö, fao ndraʼo ba wangasiwai tölu farakaro tanö böʼö soʼamakhaita ba wanimbagö do föna Mahkamah Agung si so ba Amerika Serikat, ba möna ita ba farakaro  andrö. (Faigi kotak ” Ngawalö Waʼamöna ba Mahkamah Agung”.) Falulu fohalöwö göi ndraʼo khö ndra pengacara tanö böʼö si so ba Mbetieli ba wangasiwai farakaro soʼamakhaita ba hak asuh anak, fabalisa, hegöi fangogunaʼö tanö awö domosa.

Me awena sibai falukhado khö woʼomogu sotöi Dawn, yaʼia andrö zandro sangebuaʼö iraononia si datölu. Yaʼia samösa zangalui soguna ba nösi nomonia, ba merintis göi ia. Abua sibai waʼaurinia, ba ahöli dödögu börö me lö aetu iforege ba wamosumange Yehowa. Me döfi 1992, maʼondrasi Gangowuloa ba zi Sambua Distrik ba New York City, tuhonia, ”Solohe Haga”, ba ufatunö khö Dawn wa omasido khönia. Döfi aefa daʼö, mangowalu ndraʼaga. Lö iböhöli foʼomogu ba wangofönaiʼö Yehowa ba onekhe ia ba wamaʼiki yaʼo. No buala sahöli-höli dödö ia moroi khö Yehowa. Sagötö wefaoma, lö aetu urasoi waʼowua-wua dödö ba waʼaurigu sero maʼökhö börö woʼomogu Dawn.​—Gamd. 31:12.

Me mangowaluga, faʼebua-bua nono Dawn yaʼia daʼö 11, 13 ba 16 fakhe. Omasido tobali ama si sökhi khöra, andrö wa ubaso ba uforege ba wamalua fefu mene-mene si so ba publikasida sanandrösa khö zatua tiri. Sindruhu sa, so ösa gabula dödö salua khöma. Hizaʼi, omuso dödögu khöra, börö me no labaliʼö ndraʼo si fahuwu hegöi ama sangomasiʼö yaʼira. Tola möi ndra awöra ba nomoma gofu hawaʼara zomasi ira. Omuso dödöma börö me so ndraʼaga ba gotalua zi bohou ebua sangokhögö faʼamohiʼa dödö.

Me döfi 2013, findra ndraʼaga ba Wisconsin ba wondrorogö satuama si no atua. Hizaʼi, tokea ndraʼo börö me tola nasa mohalöwödo ba Mbetieli. Lakaoni ndraʼo tobali sukarelawan sementara, ba lö aetu utolo organisasi ba ngawalö halöwö soʼamakhaita ba huku.

Me baŵa si Siwa 2018, urasoi wa asese so mbörö keha ba dölö-tölögu. No möido khö doto, hizaʼi lö iʼila hadia mbörö. Ba gafuriatania, ifarou ndraʼo doto tanö böʼö enaʼö uʼondrasi doto sonekhe ba saraf. Me baŵa si Sara 2019, ifatunö khögu doto sonekhe ba saraf andrö wa so khögu wökhö si lö asese göna ba niha, nifotöi progressive supranuclear palsy (PSP).

Tölu hari aefa daʼö, alabu ndraʼodo me ulau faʼolahraga irege afatö mbagi mbölökha dangagu kambölö, hewaʼae sindruhunia, no ufalua olaraga andrö sandrohu faʼaurigu. Ba daʼö uʼila wa no molua-lua wökhö andrö ba waʼabölögu ba wamatöro ndroto-ndroto si so ba mbotogu. Lö utötöna wa alio sibai waʼatedou wökhögu. Itugu numalö ginötö, itugu abua khögu fahuhuo, mowaö-waö, hegöi ba wanölö ö mazui idanö.

Urasoi sibai waʼowua-wua dödö me tola mohalöwö ndraʼo tobali pengacara ba wangoʼawögö organisasi Yehowa. Omuso göi dödögu me tola usura artikel soya si no mufaʼanö ba ngawalö majalah si tola labaso ira doto, sangetuʼö huku hegöi pengacara. Uʼokhögö göi ginötö ba wamaʼema huhuo ba ngawalö seminar nifalua ba zi sagörö ulidanö. Ba daʼö, tola uʼoʼawögö waʼasinangea ndraono mbanua Yehowa ba wamili perawatan medis mazui operasi si lö mangogunaʼö do. Hewaʼae simanö, tola uwaʼö wehede simane nisura ba Luka 17:10, ’Sawuyu si lö guna ndraʼodo. Ufalua zinangea halöwögu.’