1, 2. (a) Hewisa wanötönada fabö’ö moroi ba nitötöna niha bö’ö? (b) Hadia nitutunöda ba duho da’a?

OYA ngawalö zahöli-höli dödö nibe’e Yehowa khöda si tobali tötönaföda. No ifabu’u wa i’amoni’ö döinia ba ifalua gohitö dödönia ba zorugo hegöi ba gulidanö. (Matai’o 6:9, 10) Da’ö zabölö tohude nitötönada. Ifabu’u göi Yehowa wa ibe’e khöda fa’auri si lö aetu ba zorugo mazui ba gulidanö. Hawa’asökhi zalua andre! (Yohane 10:16; II Fetero 3:13) Tatötöna ena’ö tola ta’ila hewisa wame’e Yehowa fanuturu lala hegöi ba wotuhini ono mbanuania ba ngaluo safuria andre.

² Itutunö Zura Ni’amoni’ö wa famati andrö ”no fa’aro dödö” ba nitötönada. Eluahania, faduhu sibai dödö niha samati wa hasambalö alua zi no ifabu’u Yehowa. (Heberai’o 11:1) Baero da’ö, ato niha iada’a oya ngawalö nitötönara hegöi somasi dödöra, hiza’i lö faduhu dödöra hadia tola alua fefu da’ö. Duma-dumania, so niha zanötöna ena’ö möna ia ba zulö-zulö, hiza’i lö faduhu dödönia hadia tola möna ia. Ba duho da’a, ta’ila hadia zi tola tafalua  ba wanga’aro’ö wamatida ba nifabu’u Lowalangi. Tadunö-dunö göi hewisa famati saro tola möi fanoloda iada’a.

3. Hadia mbörö wa mamati ita wa hasambalö alua zi no ifabu’u Lowalangi?

³ Lö hadöi niha samati i’otarai me tumbu. Ba wangokhögö famati, moguna tatehegö geheha ni’amoni’ö moroi khö Lowalangi tobali fanuturu lala ba dödöda. (Galatia 5:22) Tola itolo ita eheha ni’amoni’ö ena’ö aboto ba dödöda sanandrösa khö Yehowa. Ba ginötö aboto ba dödöda wa ya’ia andrö fondrege zabölö hegöi satua-tua, itugu faduhu dödöda wa so wa’abölö khö Yehowa ba wamalua fefu zi no ifabu’u. Molo’ö Yehowa samösa, fefu gohitö dödönia andrö hulö no alua ba imane, ”No awai.” (Baso Fama’ele’ö 21:3-6.) Aboto ba dödöda wa ifalua fefu si no ifabu’u Yehowa. Ya’ia ”Lowalangi si lö faröi.” Da’ö mbörö wa faduhu dödöda ba ngawalö zi no iwa’ö khöda sanandrösa ba zi so föna.—V Moze 7:9.

4. Hadia nifaduhusi tödö niha samosumange Lowalangi meföna?

⁴ Ba Heberai’o faza 11, itutunö khöda 16 döi ndra matua ba ira alawe sangokhögö famati saro ba nifabu’u Yehowa. Itutunö göi wa ato danö bö’ö zangomusoi’ö dödö Yehowa ”ba wamati”. (Heberai’o 11:39) Fefu ira, labalo-baloi ”ma’uwu” si no ifabu’u Yehowa. Aboto ba dödöra wa ”ma’uwu” andrö zangohori fefu nudu Lowalangi ba ifuli ibali’ö gulidanö andre tobali faradaiso. (I Moze 3: 15) Niha samosumange Lowalangi andre, la’okhögö wamati saro wa ifuli isusugi ira Yehowa. Tatu manö, lö manötöna ira ena’ö lasusugi ira ba zorugo börö me no mate ira fatua lö ibokai dötönafö andrö Yesu ba niha. (Galatia 3:16) Sindruhunia manötöna ira ba wanusugi ba gulidano faradaiso si sökhi sibai.—Zinunö 37:11; Yesaya 26:19; Hosea 13:14.

5, 6. Hadia nitötöna Gaberahamo hegöi soroi yomonia? Hadia nifaluara ena’ö lö aetu aro wamatira? (Faigi gambara ba wamobörö wamaha’ö.)

⁵ Itutunö Heberaio 11:13 sanandrösa ba nono mbanua Yehowa si lö faröi, ”Ba ba wa’amate da’ö fefu, ba dali wamati, lö si falukha ira amabu’ula li andrö, ha moroi ba zaröu la’ila, ba la’owai.” Latötöna gulidanö si bohou ba lakhalaigö hewisa na auri ira ba da’ö. Duma-dumania Aberahamo. Itutunö Yesu wa ”owua-wua dödö” Gaberahamo ba dötö nafö andrö. (Yohane 8:56) Sara, Giza’aki, Yakobo, hegöi tanö bö’önia, ladöna-döna göi ginötö wamatörö Mbanua andrö ”ba zi no möi tuka ba sotomo Lowalangi”, samatörö ba zi sagörö ulidanö.—Heberai’o 11:8-11.

⁶ Hewisa wondrorogö Gaberahamo hegöi ösi nomonia ena’ö lö aetu aro wamatira? Lö aetu lafaha’ö ira sanandrösa khö Yehowa. Itaria, i’oguna’ö mala’ika, gangilata mazui fangifi Yehowa ba wahuhuosa khöra. Tola manö lafaha’ö ira göi moroi ba niha si lö faröi si no alawa ndröfi mazui moroi ba mbuku-buku nisura meföna. Aberahamo hegöi soroi yomonia, lö irai la’olifugö nifabu’u Lowalangi, ba omasi ira la’angerönusi da’ö. Lua-luania, lö aombö dödöra wa hasambalö ifalua zi no ifabu’u Yehowa. Andrö, lö faröi ira khönia hewa’ae lata’ögö wangabu dödö mazui göna ira folohi.

7. Hadia nibe’e Yehowa ba wanga’aro’ö wamatida, ba hadia zinangea tafalua?

 ⁷ Hadia zi tola manolo ya’ita ena’ö lö aetu aro wamatida? Ibe’e Yehowa Zura Ni’amoni’ö ba wamaha’ö ya’ita sanandrösa ba nifabu’unia ba zi so föna. Ba da’ö iforoma’ö khöda hadia zinangea tafalua ena’ö owua-wua dödöda. Da’ö mbörö wa moguna tabaso Zura Ni’amoni’ö ero ma’ökhö ba tafalua wanuturu lala andrö. (Zinunö 1:1-3; baso Halöwö Zinenge 17:11.) Ibe’e göi Yehowa khöda ’gö na inötö wemanga’ moroi khö ndra ”zawuyu andrö, si lö faröi, satua-tua”. (Matai’o 24:45) Simane ono mbanua Lowalangi meföna, moguna asese tabaso sanandrösa ba nifabu’u Lowalangi ba tahaogö ta’angerönusi. Da’ö zanolo ya’ita ena’ö lö faröi ita khö Lowalangi ba lö aetu tatötöna ginötö wamatörö mbanuania ba zi sagörö ulidanö.

8. Hewisa wangandrö tola möi fanga’aro’ö wamatida?

⁸ Hadia nasa zanolo ono mbanua Yehowa meföna ena’ö lö aetu aro wamatira? La’andrö wanolo moroi khö Yehowa, ba ginötö larasoi wanema li ba wangandröra, itugu aro wamatira. (Nehemia 1:4, 11; Zinunö 34:5, 17, 18; Danieli 9:19-21) Simanö göi, na tarasoi wa ifondro-ndrongo wangandröda Yehowa ba ibe’e zoguna khöda ba ginötö si tefaudu, itugu aro wamatida khönia. (Baso I Yohane 5:14, 15.) Moguna göi ’mangandrö’ ita khö Yehowa ena’ö ibe’e khöda gehehania ni’amoni’ö ba wanolo ya’ita ena’ö monönö wamatida.—Luka 11:9, 13.

9. Hadia manö zi tola ta’ohe ba wangandrö?

⁹ Ba ginötö mangandrö ita khö Yehowa, böi ha soguna khöda manö ni’andröda ena’ö ibe’e khöda. Moguna göi ta’andrö saohagölö khönia ba tasuno ia ero ma’ökhö. Baero da’ö, no oya ifalua Yehowa ngawalö zahöli-höli dödö! (Zinunö 40:6) Ono mbanua Yehowa, mangandrö göi ira salahi ndra talifusöra ba zi sagörö ulidanö. Duma-dumania, ’tatörö-törö tödöda nikuru andrö’. Moguna göi ta’ohe ba wangandrö niha ’zolohe ya’ita’. Na tarasoi hewisa wame’e Yehowa fanema li ba wangandröda, itugu aro wamatida ba ahatö ita khönia.—Heberai’o 13:3, 7.

10. Hadia zanolo niha sato ba wangokhögö falö’ata’u hegöi falöfaröi khö Lowalangi?

¹⁰ Imane Faulo ba Heberai’o faza 11, ”No ba wemaoso, moroi ba ngai zi mate, latema mangawuli zi mate khöra ira alawe, ba so ni foröfa, sanimba fangefa, ena’ö lakhamö wemaoso si sökhi.” (Heberai’o 11:35) Ato zanaögö fanandraigö ba lö faröi ira khö Lowalangi, börö me la’okhögö wamati saro ba wanusugi nifabu’u Lowalangi. Aboto ba dödöra wa ba zi so föna, tola isusugi ira Yehowa ba lasöndra wauri si lö aetu ba gulidanö. Angeraigö sanandrösa khö Naboti hegöi Zakharia. Latebu kara ira irege mate börö wolo’öra khö Lowalangi. (I Razo 21:3, 15; II Nga’ötö 24:20, 21) Latibo’ö  Danieli bakha ba dögi zingo solofo, ba latibo’ö ndra awönia ba mbaho galitö sohola-hola. Latehegö mate ira moroi na faröi ira khö Yehowa. Mamati sibai ira wa ibe’e khöra geheha ni’amoni’ö Yehowa ba itolo ira ena’ö anau gölöra ba wanaögö fanandraigö.—Danieli 3:16-18, 20, 28; 6:14, 17, 22-24; Heberai’o 11:33, 34.

11. Hadia manö wanandraigö nitaögö ndra sama’ele’ö börö wamatira?

¹¹ Ato zama’ele’ö simane Mikha hegöi Yeremia, la’oaya mazui lebe’e ira ba gurunga. Tanö bö’önia simane Eliya, ”ba danö si mate misa elungu-lungu ira, ba ba hili misa, ba dögi narö gara, ba ba zo’arö hili”. Anau gölöra ba wanaögö fanandraigö ba lö faröi ira khö Lowalangi börö me la’okhögö ”fa’aro dödö ba nidöna-döna andrö”.—Heberai’o 11:1, 36-38; I Razo 18:13; 22:24-27; Yeremia 20:1, 2; 28:10, 11; 32:2.

12. Haniha duma-duma si sökhi si tola ta’o’ö? Hadia zanolo ya’ia ba wanaögö fanandraigö?

¹² Anau gölö Yesu Keriso ba wanaögö fanandraigö sabua sibai ba lö faröi ia khö Yehowa. Hadia zanolo ena’ö anau gölönia? Imane Faulo, ”Salahi wa’omuso dödö andrö, si no so fönania, si no mangositengagö fa’aila, ba si no mudadao ba gambölö dadaoma Lowalangi andrö.” (Heberai’o 12:2) Aefa da’ö, ifarou niha Keriso Faulo ba ’wanörö-nörö tödö’ duma-duma Yesu. (Baso Heberai’o 12:3.) Simane Yesu, ato niha Keriso si mate ba götö si föföna börö me lö faröi ira khö Yehowa. Samösa ba gotaluara ya’ia da’ö Gandrifa. (Fama’ele’ö 2:13) Niha Keriso andrö no latema luora, fa’auri ba zorugo. Hiza’i, ono mbanua Lowalangi tanö bö’önia sauri fatua lö ya’ira, latötöna luora fa’auri ba gulidanö. (Heberai’o 11:35) Lö ara me no tobali Razo Yesu me döfi 1914, niha Keriso nibayoini si no mate tesusugi ira ba wa’auri si lö aetu ba zorugo, ba mamatörö ira ba niha gulidanö fao khönia.—Fama’ele’ö 20:4.

13, 14. Hadia manö wanandraigö nitaögö Rudolf Graichen, ba hadia zanolo ya’ia ena’ö lö faröi khö Lowalangi?

¹³ Zuta wa’ato nono mbanua Lowalangi zolo’ö duma-duma Yesu. La’angerönusi nifabu’u Lowalangi ba lö faröi ira khönia ba ginötö lataögö wanandraigö. Angeraigö sanandrösa khö Rudolf Graichen si tumbu ba Jerman me döfi 1925. Me awuyu-wuyu ia, lafalemba gambara ba nomora ira satuania sanandrösa ba waö-waö Zura Ni’amoni’ö. Itutunö, ”So gambara nasu gatua hegöi ono mbiri-biri, iraono side-ide ba harimo, ono zawi ba singo. Orudu ira fefu, ba iraono zi tobali gubalora.” (Yesaya 11:6-9) Tofakha ba wangera-ngera Rudolf gambara-gambara andrö irege aro wamatinia ba gulidanö faradaiso. Da’ö mbörö wa lö faröi ia khö Yehowa hewa’ae göna ia famakao sabölö-bölö moroi khö ndra Gestapo Nazi ba zi  hauga fakhe, hegöi ira Stasi Komunis ba Jerman tanö ba Gatumbukha.

¹⁴ Anau gölö Rudolf ba wanaögö ngawalö wanandraigö. Mate ninania börö wökhö tifus ba kamp konsentrasi Ravensbrück. Iteka zura amania zanguma’ö wa tenga Samuduhu’ö Yehowa ia sa’ae. Hiza’i, irorogö Rudolf ena’ö aro wamatinia. Me no te’efa’ö ia moroi ba gurunga, tobali ia satua samasui. Aefa da’ö lakaoni ia ba Sekola Gilead ba lafuli labe’e halöwönia tobali satua samasui ba Chile. Ba da’ö mangowalu ia khö samösa utusan injil sotöi Patsy. Hiza’i, döfi aefa da’ö, mate khönia nono sawuyu ono alawe. Lö ara aefa da’ö mate göi Patsy, awena 43 fakhe dröfinia. Hewa’ae itaögö da’ö fefu, lö iböhöli Rudolf ba wamosumange Yehowa. Iada’a, no alawa ndröfinia ba ambö fa’abölönia, hiza’i ihalö halöwö tobali perintis biasa hegöi satua sokubaloi. Tola tabaso waö-waö wa’aurinia ba Menara Pengawal 1 mbaŵa si Walu 1997 ba nga’örö 20-25. ^[1] (Faigi gonönöta.)

15. Be’e duma-duma ira talifusöda iada’a zamosumange Yehowa si fao fa’owua-wua dödö hewa’ae göna ira famakao.

 ¹⁵ Iada’a ato ndra talifusöda samosumange Yehowa si fao fa’owua-wua dödö, hewa’ae lata’ögö wamakao sabölö-bölö. Ngaotu ndra talifusöda nibe’e bakha ba gurunga ba Eritrea, Singapura hegöi ba Korea Selatan börö me latimbagö ba ’wangai föda’. (Matai’o 26:52) Duma-dumania, Isaac, Negede, hegöi Paulos, no labe’e ira ba gurunga ba Eritrea töra moroi ba 20 fakhe! Ba da’ö abölö-bölö lafakao ira. Ba zi hauga fakhe andrö, tebai mangowalu ira mazui larorogö zatuara. Hiza’i, lö faröi ira khö Yehowa ba lö aetu aro wamatira. Iada’a lafosumange ira niha sozago gurunga. Tola tafaigi kodara ba situs web jw.org. No laboho mbawa hewa’ae göna ira famakao.

16. Hadia gunania na aro wamatida?

¹⁶ Ato nono mbanua Yehowa si lö labe’e ba gurunga mazui abölö-bölö lafakao hulö simane ira talifusöda no mege. Hiza’i, ato zi tefakao börö wa’anumana, wasuwöta, nduru danö, angi sabölö-bölö mazui tanö bö’önia. So göi zolo’ö duma-duma simane Gaberahamo, Giza’aki, Yakobo, hegöi Moze ba lö omasi ira tehöngö hegöi kayo ena’ö tola laosambua’ö wangera-ngerara ba wamosumange Yehowa. Hadia zanolo ndra talifusöda ba wamosumange Yehowa si fao fa’owua-wua dödö? Börö me la’omasi’ö ia ba mamati sibai ira ba nifabu’unia. Aboto ba dödöra wa ibe’e ba nono mbanuania si lö faröi, fa’auri si lö aetu ba gulidanö si bohou safönu fa’atulö.—Baso Zinunö 37:5, 7, 9, 29.

17. Hewisa lalania ena’ö lö aetu aro wamatimö, ba hadia nitutunöda ba wamaha’ö migu fönada?

¹⁷ Ba duho da’a, aboto ba dödöda wa famati ”no fa’aro dödö ba nidöna-döna andrö”. Ena’ö ta’okhögö wamati saro, moguna mangandrö ita khö Yehowa ba lö aetu ta’angerönusi nifabu’unia. Na tafalua simane da’ö, tola tataögö ngawalö wanandraigö. Ba wamaha’ö migu fönada tatutunö abölö oya sanandrösa geluaha mangokhögö famati.