1, 2. (a) Hadia manö wanandraigö nirasoi niha si fatewu iada’a? (Faigi gambara ba wamobörö wamaha’ö.) (b) Hadia mene-mene nibe’e Waulo, ba hadia wanofu sinangea ta’angeraigö?

TÖRA ba zi 30 fakhe silalö, Osei si tenga Samaduhu’ö Yehowa, iröi mbanuania ba Ghana, findra ia ba Eropa. ^[1] (Faigi gonönöta.) Imane, ”Awena aboto ba dödögu wa ato niha si lö mo’ame’egö tödö ndra’o. Tokea ndra’odo börö me okafu sibai ba da’a. Ba ginötö uröi bandara, urasoi wa’okafu si oföna sibai ba wa’aurigu, ibörötaigö ulau me’e.” Börö me abua khö Osei ba wamaha’ö ya’ia ba li, töra döfi awena isöndra halöwö si sökhi. Ba börö me aröu ia moroi ba mbanuania, itörö-törö tödönia zatuania ba irasoi wa hulö ha samö-samösa ia.

² Angeraigö hadia zomasi’ö lafalua khömö na alua khöu zimane da’ö. Tatu manö ö’andrö sibai saohagölö na latema’ö ndra’ugö si fao fa’omuso dödö ba Balai Mbanua Lowalangi ira niha sangomasi’ö ya’ugö hewa’ae fabö’ö soi mazui gulimö. Sindruhunia, itutunö Sura Ni’amoni’ö ba niha Keriso sindruhu ena’ö ’lö la’olifugö, fa böi abua gölöra’.  (Heberai’o 13:2) Andrö, data’angeraigö wanofu-nofu andre, Hewisa dödö Yehowa ba niha si fatewu? Hadia moguna tafaudugö dödöda ba niha si fatewu? Ba hewisa wanoloda niha si tohare moroi ba soi bö’ö ena’ö larasoi wa latema’ö ira ba mbanua niha Keriso si so ya’ita?

3, 4. Molo’ö II Moze 23:9, hewisa wamalua ndraono Gizara’eli niha si fatewu molo’ö somasi Lowalangi, ba hadia mbörö?

³ Me no i’efa’ö ndraono Gizara’eli Yehowa moroi ba wangosawuyu ba Miserai, ibe’e khöra goi-goi samaha’ö ya’ira ena’ö laforoma’ö fa’ebua dödö ba niha si fatewu si fao khöra. (II Moze 12:38, 49; 22:21) Lö aoha wa’auri ba niha si fatewu, andrö i’ame’egö tödö ira Yehowa si fao fa’omasi. Duma-dumania, tola la’ozaragö gandru niröi ndra samasi.—III Moze 19:9, 10.

⁴ Moroi na ha i’o’ou manö ndraono Gizara’eli ena’ö la’osinangegö niha si fatewu, omasi Yehowa na latörö tödöra hewisa worasoira me tobali ira niha si fatewu. (Baso II Moze 23:9.) Fatua lö tobali ira sawuyu ba danö Miserai, lö omasi niha Miserai khöra börö me fabö’ö ira. (I Moze 43:32; 46:34; II Moze 1:11-14) Abua wa’auri ndraono Gizara’eli börö me tobali ira niha si fatewu. Omasi Yehowa na latörö tödöra da’ö ba lafalua zi sökhi ba niha si fatewu.—III Moze 19:33, 34.

5. Hadia zanolo ya’ita ba wangoroma’ö fa’ebua dödö ba niha si fatewu molo’ö somasi Yehowa?

⁵ Lö si tebulö Yehowa. Andrö, na so niha si fatewu sangondrasi mbanua niha Keriso si so ya’ita, böi olifu ita wa lö iböhöli Yehowa ba wangoroma’ö fa’ebua dödö ba niha simane da’ö. (V Moze 10:17-19; Maleakhi 3:5, 6) Angeraigö hadia manö wanandraigö nirasoi niha si fatewu. Duma-dumania, tola manö lö aboto ba dödöra li si bohou mazui laböbögö khöra zi lö duhu. Andrö, dataforege ba wanolo ya’ira hegöi ba wamalua si sökhi khöra.—I Fetero 3:8.

6, 7. Hadia zangoroma’ö wa niha Keriso Yahudi si föföna lafaha’ö ira lala ba wotimbagö fangenahö dödö ba soi bö’ö?

⁶ Niha Keriso si föföna lafaha’ö ira hewisa ena’ö lö mangenahö dödöra ba niha si fabö’ö soi khöra, simane sasese alua ba gotalua niha Yehuda. Me Fendrakose 33 M, niha Keriso Yehuda si toröi ba Yeruzalema laforoma’ö falö abua gölö hegöi fa’omasi ba niha sawena tohare moroi ba soi bö’ö. (Halöwö Zinenge 2:5, 44-47) Da’a zangoroma’ö wa aboto ba dödö niha Keriso Yehuda geluaha ”fa’ebua dödö” ya’ia da’ö ’faböi abua gölö ba niha si fatewu’.

⁷ Hiza’i, hewa’ae simanö so gabula dödö salua. Mukökö-kökö niha Yehuda sangoguna’ö li Yunani, börö me la’osiwawöi lakha mbanuara. (Halöwö Zinenge 6:1) Ba wangasiwaisi gabula dödö andre, lafili dafitu ndra matua ira sinenge ena’ö  möi ira lafaigi irege lö hadöi ni’osiwawöi sa’ae. Lafili ndra matua sangokhögö töi Yunani, te ena’ö ohahau dödö ndra lakha mbanua andrö.—Halöwö Zinenge 6:2-6.

8, 9. (a) Hadia wanofu-nofu zanolo ya’ita ba wanibo’ö fanahö tödö? (b) Hadia zi lö tola lö’ö tatibo’ö moroi ba wangera-ngerada? (I Fetero 1:22)

⁸ Hadia ta’ila mazui lö’ö, tedönisi dödöda fefu ba zi to’ölö alua ba mbanuada. (Roma 12:2) Tola manö, tarongo wehede si lö sökhi moroi ba zi faola omo khöda, awöda wohalöwö, mazui awöda ba zekola sanandrösa ba niha si fabö’ö soi, mbanua mazui si fabö’ö guli moroi khöda. Hewisa tola tedönisi dödöda ba wehede si lö sökhi andrö? Mazui hadia nifaluada na so zango’aya soida mazui ngawalö zi to’ölö alua ba mbanuada?

⁹ No irai mangenahö dödö Wetero ba niha si tenga Yahudi. Hiza’i, ida’i-da’i wamaha’ö ya’ia ba wanibo’ö moroi ba dödönia fangera-ngera si lö sökhi andrö. (Halöwö Zinenge 10:28, 34, 35; Galatia 2:11-14) Simanö göi, na ibörögö so wangenahö dödö mazui tasuno-suno sibai mbanua si toröi ya’ita, moguna taforege ba wanibo’ö fangera-ngera da’ö. (Baso I Fetero 1:22.) Hadia zanolo ya’ita ba wamalua da’ö? Törö tödöu, gofu hezoso mbanuada, lö mo’ahonoa ita fefu ba tenga sinangeania te’orifi. (Roma 3:9, 10, 21-24) Andrö tebai tawa’ö wa abölö sökhi ita moroi ba niha bö’ö! (I Korindro 4:7) Moguna ta’o’ö simane nirasoi Waulo. Imane khö ndra awönia niha Keriso ena’ö ”tenga sa’ae niha bö’ö ami ba tenga sa’ae si fatewu” hiza’i ”soroi yomo Lowalangi”. (Efeso 2:19) Moguna taforege ba wanibo’ö fanahö tödö ena’ö tola ta’onukha nukha si bohou.—Kolose 3:10, 11.

10, 11. Hewisa wolo’ö Boasi lala wangera-ngera Yehowa ba niha si fatewu?

¹⁰ Boasi, ira matua si lö faröi, i’o’ö lala wangera-ngera Yehowa ba niha si fatewu. Hewisa wamaluania da’ö? Me möi Boasi ba wamareso kabunia ba ginötö wamasi, i’ila Ruti, samösa ira alawe si fatewu moroi ba danö Moabi. Iforege ba wongozaragö gandru si toröi ba danö. Barö Goroisa Moze, lö fasala nifalua Ruti. Hiza’i, ahöli-höli dödö Boasi me irongo wa no i’andrö sakali Ruti ba wangozaragö da’ö ba kabunia, ba tetehegö khönia göi ba wangozaragö ba gotalua gandru si no muböbö.—Baso Ruti 2:5-7, 15, 16.

¹¹ Salua aefa da’ö zangoroma’ö wa i’ame’egö tödö Ruti Boasi hegöi gabula dödö salua khönia si tobali niha si fatewu. Ikaoni Ruti ena’ö fao ia ba ngawawa nono alawe ena’ö lö lafakao ia ira matua sohalöwö ba kabunia. Ba ibe’e gö hegöi idanö khö Ruti, simane niha sohalöwö khönia samösa. Ifosumange ndra alawe si fatewu ba si numana andre Boasi hegöi ifarou dödönia.—Ruti 2:8-10, 13, 14.

12. Hadia mbua wa’ebua dödö ba niha si fatewu?

¹² Iforoma’ö Boasi fa’ebua dödö khö Ruti tenga ha me lö faröi ia khö nina matuania, Naomi. Hiza’i, börö me no ibörötaigö ifosumange Yehowa ba i’alui wolumö’ö moroi khönia. Me ifalua da’ö Boasi, sindruhu-ndruhu no i’o’ö wa’omasi si lö faröi moroi khö Yehowa. (Ruti 2:12, 20; Gamaedola 19:17) Simanö göi iada’a, na sökhi gamuatada, tola tatolo ”niha” ena’ö lafaha’ö ira ba zindruhu ba aboto ba dödöra wa i’omasi’ö sibai ira Yehowa.—I Timoteo 2:3, 4.

13, 14. (a) Hana wa moguna tatema niha si fatewu ba Balai Mbanua Lowalangi? (b) Hadia zi tola manolo ya’ugö ena’ö aoha khömö wahuhuosa ba niha moroi ba soi bö’ö?

 ¹³ Tola taforoma’ö wa’ebua dödö ba niha si fatewu na tatema’ö ira si fao fa’omuso dödö ba Balai Mbanua Lowalangi. Niha si fatewu sawena tohare ba mbanuada, itaria aila ira hegöi ha samö-samösa ira ba nomo. Börö zi to’ölö alua ba mbanuara mazui fabö’ö lala wa’aurira moroi ba danö bö’ö, tola manö ide-ide dödöra ba niha si fabö’ö banua mazui soi khöra. Andrö moguna ta’oföna’ö wanema’ö ya’ira ba taforoma’ö wa’omasi khöra. Na so aplikasi JW Language ba li ni’oguna’ömö, tola öfaha’ö ndra’ugö lala wangowai ba li ni’oguna’öra.—Baso Filifi 2:3, 4.

¹⁴ Tola manö lö aoha khöda fahuhuo ba niha moroi ba mbanua bö’ö. Ena’ö tola lö tarasoi da’ö, tola tatutunö khönia sanandrösa ba wa’aurimö. Tola manö ö’ila wa sindruhunia oya zi fagölö khömi moroi ba zi no ö’angeraigö. Törö tödöu wa ero-ero mbanua so zambö mazui so zi tohudenia.

15. Hadia zanolo ya’ita ena’ö aboto ba dödöda niha sawena tohare ba mbanuada?

¹⁵ Ba wanolo niha bö’ö ena’ö larasoi wa latema’ö ira ba mbanua niha Keriso, tola tasofu khöda samösa, ’Na fatewu ndra’o ba mbanua bö’ö, hadia zomasido lafalua khögu?’ (Matai’o 7:12) Moguna tabologö dödöda ba niha sawena tohare ba mbanuada. Na awena-wena, te lö aboto ba dödöda lala wangera-ngerara mazui hadia nifaluara. Hiza’i, moroi na tadöna-döna ena’ö lafagölösi lala wangera-ngerara mazui hadia nifaluara simane  si no to’ölö ba mbanuada, hana wa lö tatema’ö manö ira simane da’ö?—Baso Roma 15:7.

16, 17. (a) Hadia zi tola tafalua ena’ö tarasoi wa ahatö ita ba niha moroi ba soi bö’ö? (b) Hadia wanolo si tola tabe’e khö ndra niha si fatewu ba mbanua niha Keriso si so ya’ita?

¹⁶ Na tabe’e ginötöda ba wamaha’ö sanandrösa ba mbanua mazui si to’ölö lafalua ira niha si fatewu, abölö aoha khöda fahuwu khöra. Ba ginötö wamaha’ö zi sambua omo, tola tafaha’ö ita sanandrösa ba zi to’ölö lafalua ira niha si fatewu si so ba mbanua niha Keriso mazui ba mbanuada. Lala tanö bö’ö ena’ö tola ahatö ita khöra göi na takaoni ira manga ba nomoda. ”Ifolala ba wamati niha baero” Yehowa, andrö moguna ta’o’ö ia ba tabokai mbawa ndruhö nomoda ba niha si fatewu ”zi sara lala wamati, awöda”.—Halöwö Zinenge 14:27; Galatia 6:10; Yobi 31:32.

¹⁷ Na ta’oguna’ö ginötöda wefao ba nösi nomo niha si fatewu, da’ö zanolo ya’ita ena’ö aboto ba dödöda ba ta’ame’egö tödö famorege nifaluara ba wamaudugö wa’aurira ba zi to’ölö ba soida. Tola göi aboto ba dödöda wa moguna tatolo ira ba wamaha’ö ya’ira ba li ni’oguna’öda. Tola tafarou ira we’amöi ba organisasi zanolo ya’ira ba wanöndra omo mazui halöwö si sökhi khöra. Fanolo side-ide simane da’ö tola ebua lua-luania  ba wa’auri ndra talifusöda.—Gamaedola 3:27.

18. Hewisa tola la’o’ö duma-duma Ruti ira niha si fatewu ba wangoroma’ö famosumange hegöi fangandrö saohagölö?

¹⁸ Tatu manö, moguna laforege ira niha si fatewu ba wamaudugö ya’ira ba zi to’ölö alua ba mbanua si bohou andrö. Ruti no tobali duma-duma si sökhi ba zalua andre. Si oföna, iforoma’ö wa ifosumange ngawawa ndra alawe ba mbanua si bohou andrö me i’andrö sakali ba wangozaragö gandru. (Ruti 2:7) Lö i’owuloi gandru ba zomasi dödönia ha börö me no so ba goroisa mazui so ba dödönia wa lö tola lö’ö itolo ia niha bö’ö. Si dua, alio ifatunö ba niha wa i’andrö sibai saohagölö börö wa’ebua dödö niforoma’ö khönia. (Ruti 2:13) Na lafalua gamuata si sökhi simane da’ö niha si fatewu, ira talifusöda ba wamati la’osinangegö ira hegöi niha si toröi ba mbanua andrö.

19. Hadia mbörö wa moguna tatolo niha si fatewu ena’ö larasoi wa latema’ö ira?

¹⁹ Omuso sibai dödöda börö me iforoma’ö Yehowa wa’ebua dödönia khöda me no itehegö ba niha fefu ba wamondro-ndrongo turia somuso dödö. Ba mbanuara, so ösa zi tebai mamaha’ö ya’ira ba Zura Ni’amoni’ö mazui möi ba gangowuloa fao khö ndra ono mbanua Yehowa. Hiza’i, tola falukha ira khöda iada’a, moguna tatolo ira ena’ö lö larasoi wa niha si fatewu ira. Tola manö lö oya gefeda mazui lö oya zi tola tafalua ba wanolo ya’ira, hiza’i na sökhi gamuatada ba niha si fatewu, ta’o’ö wa’omasi Yehowa khöra. Börö me ’ta’o’ö Lowalangi’ datafalua zabölö sökhi ba wanema’ö niha si fatewu ba gotaluada!—Efeso 5:1, 2.