BA Huku Moze, tola möi ba hölu niha na lawa’ö, ”Fahölu ndra’o khöu föna Lowalangi” mazui ”Fahöludo ba döi Yehowa”. Hiza’i, ba götö Yesu, asese sibai fahölu niha Yahudi irege arakhagö fefu hadia niwa’öra hasambalö lalau fahölu. Lafalua da’ö ena’ö abölö faduhu dödö niha bö’ö ba niwa’öra. Hiza’i, dua kali i’elifi niha samalua da’a Yesu. Ifaha’ö ita Yesu, ”Da’ö wehedemi: ’Ya’ia’, na ya’ia ba ’Lö’ö’, na lö’ö.”​—Matai’o 5:33-37; 23:16-22.

Molo’ö Theological Dictionary of the New Testament, itolo ita kitab Talmud ena’ö ta’ila hawa’asese fahölu niha Yahudi wa atulö wehede niwa’öra. Ta’ila da’ö börö me no itutunö Talmud hadia manö hölu si lö tola lö’ö mufalua hegöi hölu si tola musawö.

Tenga ha Yesu zi lö fao tödö ba zi to’ölö mufalua andrö. Duma-dumania, isura sejarawan Yahudi sotöi Flavius Josephus sanandrösa ba zi sambua sekte Yahudi si lö manehegö nono mbanuania ba wanguma’ö hölu. Faduhu dödöra wa fahölu abölö lö sökhi ia moroi ba walimosa. Ba wamaigira, na so niha si fahölu ena’ö faduhu dödö niha bö’ö ba niwa’önia, hasambalö wa lö itörö zindruhu niha da’ö. Iwa’ö göi wehede si fagölö apokrifa Yahudi, kitab Kebijaksanaan Sirakh mazui Eklesiastikus, (23:11). Lamane, ”Niha somasi fahölu, lö i’okhögö dödö si sökhi.” Iwa’ö Yesu wa lö moguna fahölu ita ba ngawalö zi lö moguna. Na lö mamalö tawa’ö zindruhu, lö moguna fahölu ita ha ena’ö lafaduhusi tödö hadia niwa’öda.