Gureta Kudo hegöi Dakula Solumö’ö Ya’ugö
”Na moroi ba dödömi mi’o’ö goroisa Lowalangimi Yehowa, ba itörö.”—ZAKHARIA 6:15.
SINUNÖ: 17, 136
1, 2. Hadia zalua ba niha Yahudi si so ba Yeruzalema me no awai gangilata Zakharia si fitu?
OYA ni’angeraigö Zakharia me no aefa i’ila gangilata si fitu. Tatu te’aro’ö dödönia börö me no ifabu’u Yehowa wa ihuku niha si falimo. Hiza’i, lö si tebulö zalua ba zi fasuinia. Ato niha samalua si lö sökhi ba si lö manörö sindruhu. Aefa da’ö, lö nasa sawai mu’ehaogö gosali ba Yeruzalema. Hana wa alio sibai laröi ira niha Yahudi halöwö nibe’e Yehowa khöra? Hadia da’ö gohitö dödöra wangawuli ba Yeruzalema ha ena’ö la’okhögö wa’auri sabölö sökhi?
2 I’ila Zakharia wa niha Yahudi sangawuli ba Yeruzalema no niha samosumange Yehowa. Ya’ira andre niha ”nibe’e Lowalangi ba dödö fe’amöi misi yawa” ba wondröi omora hegöi halöwöra ba Mbabilona. (Gesera 1:2, 3, 5) Ato ba gotaluara zi lö irai mangila Yeruzalema, hiza’i laröi nahiara si sökhi ba möi ira ba mbanua da’ö. Ba niha Yahudi, tohude sibai wangehaogö gosali Yehowa irege edöna ira wanörö lala safönu de’ala, fa’aröunia te 1.600 kilometer.
3, 4. Hadia wanandraigö nitaögö niha Yahudi sangawuli ba Yeruzalema?
3 Khalaigö hewisa wa’aröu Mbabilona irugi Yeruzalema. Sagötö wowaö-waöra, oya ginötö ni’oguna’öra ba wo’angeraigö hegöi ba wodunö-dunö nahia si möi ira andrö. Latutunö göi khöra ira niha salawa döfi hewisa wa’asökhi Yeruzalema hegöi osali. (Gesera 3:12) Na fao ndra’ugö khöra me götö da’ö, hewisa dödömö me awena sibai ö’ila Yeruzalema? Hadia abu dödömö me ö’ila gakhö-khöla si no afönu du’u hegöi göli si no agatöla ba malige si no adudu? Tola manö öfaehusi wa’afabö’ö gakhö-khöla göli andrö ba göli Mbabilona saro sibai. Hiza’i, lö ide-ide dödö niha Yahudi. Hana? Börö me sagötö wowaö-waöra, itolo ba ilumö’ö ira Yehowa. Me no larugi Yeruzalema, lahaogö nahia wame’e sumange ba nahia si no irai mufasindro gosali, ba labörögö labe’e zumange khö Yehowa ero ma’ökhö. (Gesera 3:1, 2) Owölö-ölö sibai ba omasi ira mohalöwö. Hulö lö hadöi si tola mangafatöi’ö tödöra.
4 Sagötö lahaogö gosali ira niha Yahudi, moguna göi lahaogö nomo hegöi banuara. Moguna lalau mananö sinanö ena’ö tola la’asogö gö ba nösi nomora. (Gesera 2:70) Oya sibai zinangea lafalua. Lö ara aefa da’ö, tohare nudura ba la’alui lala ena’ö tebato halöwö andrö. Alua wanaisi da’a ba zi 15 fakhe fa’ara. Itugu ara, itugu alö wa’amohi’a dödö niha Yahudi. (Gesera 4:1-4) Me döfi 522 SM, so wanaisi tanö bö’ö. Ibe’e fareta razo Persia ena’ö muböhöli fefu wamazökhi tomosa si so ba Yeruzalema. Hulö tebai mu’asiwaisi wamasindro mbanua andrö.—Gesera 4:21-24.
5. Hewisa wanolo Yehowa nono mbanuania?
5 I’ila Yehowa wa moguna wamarou dödö hegöi fa’abarani ba nono mbanuania. Ibe’e khö Zakharia gangilata safuria ena’ö tola faduhu dödöra wa i’omasi’ö ba i’ame’egö tödö hadia nifaluara ba wamosumange ya’ia. Ifabu’u wa ilumö’ö ira na lafuli lafalua halöwö si no ibe’e khöra. Imane Yehowa sanandrösa ba wangehaogö gosali, ”Na moroi ba dödömi mi’o’ö goroisa Lowalangimi Yehowa, ba itörö.”—Zakharia 6:15.
SARADADU YEHOWA—IRA MALA’IKA
6. (a) Hezo tebörögö gangilata si walu ni’ila Zakharia? (Faigi gambara ba wamobörö wamaha’ö.) (b) Hana wa fabö’ö-bö’ö la’a-la’a kudo andrö?
6 Gangilata Zakharia safuria si mewalu, tola manö tobali sabölö mangaro’ö famatira. (Baso Zakharia 6:1-3.) Khalaigö hadia ni’ila Zakharia. ’Moroi ba gotalua zi dombua hili’ nifazökhi moroi ba tembaga, tohare öfa gureta kudo. No fabö’ö-bö’ö la’a-la’ania ena’ö aoha ba wotatugöi haniha zi fakudo yawania. Imane Zakharia, ”Hadia geluaha da’ö?” (Zakharia 6:4) Omasi göi ta’ila geluahania börö me so gamakhaitania khöda.
7, 8. (a) Hadia ni’amaedolagö zi dombua hili andrö? (b) Hana wa moroi ba tembaga tefazökhi hili andrö?
7 Ba Zura Ni’amoni’ö, hili andrö tola mu’amaedolagö simane sambua famatörö. Hili ni’ila Zakharia fagölö ia ba Danieli 2:35, 45) Tobali Razo Yesu me baŵa si Fulu 1914. I’otarai da’ö, no mosindro hili si dombua andre ba lafalua halöwöra ena’ö mofozu gohitö dödö Lowalangi ba gulidanö.
hili si dombua nisura ba wama’ele’ö Danieli. Hili si sambua mu’amaedolagö ia famatörö Yehowa ba zi sagörö ulidanö si lö irai tebulö. Hili si dua, mu’amaedolagö ia Famatörö Mesia ba Razonia Yesu. (Lö mamalö i’oguna’ö mala’ikania Yehowa ba wolumö’ö hegöi ba wanga’aro’ö ono mbanuania
8 Hana wa moroi ba tembaga tefazökhi hili andrö? Tembaga andre firö sebua böli ba si takile. Sindruhunia, me lafazökhi nose Lowalangi hegöi osali ba Yeruzalema, i’andrö Yehowa ba ndraono Gizara’eli ena’ö la’oguna’ö tembaga ba wangehaogö ya’ia. (II Moze 27:1-3; I Razo 7:13-16) Hili si dombua nifazökhi moroi ba tembaga, da’ö zangoroma’ö ha wa’asökhi wamatörö Yehowa hegöi Famatörö Mesia sanga’asogö fa’ahono dödö ba niha gulidanö ba same’e khöra howu-howu.
9. Haniha zi fakudo yawa ba gureta kudo, ba hadia halöwöra?
9 Hadia ni’amaedolagö gureta kudo hegöi si fakudo yawania? Si fakudo ya’ia da’ö ira mala’ika, tola manö ya’ira andre ngawawa mala’ika si fabö’ö-bö’ö. (Baso Zakharia 6:5-8.) Tohare ira la’otarai föna ”Zamatörö ösi gulidanö ma’afefu” ba so halöwöra si tohude. Lafatenge ndra mala’ika andrö ero sambua nahia ba wolumö’ö ono mbanua Lowalangi mendrua manö moroi ba ”danö yöu” ya’ia da’ö Babilona. Ba gangilata da’a, iforoma’ö Yehowa ba nono mbanuania wa lö sa’ae tobali ira sawuyu Mbabilona. Da’a zi möi fondrara dödö ba niha Yahudi sangehaogö osali ba götö Zakharia! La’ila wa lö hadöi si tola lafalua ira udura ba wamatogö halöwöra.
10. Hewisa wa möi fanoloda iada’a wama’ele’ö Zakharia sanandrösa ba gureta kudo hegöi si fakudo yawania?
10 Iada’a, lö mamalö i’oguna’ö mala’ikania Yehowa ba wolumö’ö hegöi ba wanga’aro’ö ono mbanuania. (Maleakhi 3:6; Heberai’o 1:7, 14) Me 1919, aheta nono mbanua Yehowa moroi ba Mbabilona Sebua. I’otarai da’ö, laforege la’alui lala ira udura ena’ö lö tedou wamosumange satulö. (Fama’ele’ö 18:4) Hiza’i, tebai lafalua da’ö. Börö me so ndra mala’ika solumö’ö organisasi Yehowa, lö moguna ata’u ita wa tola ifuli la’ohe nono mbanua Yehowa ba agama faya. (Zinunö 34:8) Börö da’ö, böi aetu owua-wua dödöda ba owölö-ölö ita ba wamosumange Yehowa. Fama’ele’ö Zakharia andre zanolo ya’ita ena’ö ta’ila wa telumö’ö ba lö moguna ata’u ita börö hili si dombua andrö.
11. Hana wa lö moguna ata’u ita na so zanuwö ono mbanua Lowalangi ba zi so miföna?
11 Lö aratö, orudu fefu wa’abölö politik si so ba gulidanö Zatana ba wanuwö ono mbanua Lowalangi. Hezekieli 38:2, 10-12; Danieli 11:40, 44, 45; Fama’ele’ö 19:19) Ba wama’ele’ö Hezekieli, ta’ila wa fa’abölö politik andre no mu’amaedolagö ia simane lawuo sangahawui tanö. Möi ira yawa ba kudo ba si fao fönu lasuwö nono mbanua Lowalangi. (Hezekieli 38:15, 16) * (Faigi nisura ba gahe zura.) Hadia moguna ata’u ita khöra? Lö’ö! So mala’ika Yehowa si tola molumö’ö ya’ita. Sagötö wamakao sabölö-bölö, i’oguna’ö mala’ikania Yehowa ba wolumö’ö ono mbanuania hegöi ba wangohori fefu niha samadaö ba wamatörö Yehowa. (II Tesalonika 1:7, 8) Sindruhu-ndruhu tobali ngaluo sahöli-höli dödö da’ö! Hiza’i, haniha zondrönia’ö mala’ika Yehowa si so ba zorugo?
(IFOTAKULA RAZO HEGÖI ERENIA YEHOWA
12, 13. (a) Hadia nifalua Zakharia niwa’ö Yehowa khönia? (b) Hewisa wa tola ta’ila wa niha sotöi Lewiö no mu’amaedolagö Yesu Keriso?
12 Ha Zakharia zangila si walu gangilata andre. Hiza’i, so nifaluania si tola la’ila niha, ba da’a zi möi famarou dödö niha sangehaogö osali Lowalangi. (Baso Zakharia 6:9-12.) So datölu ndra matua si tohare moroi ba Mbabilona ya’ia da’ö Helida’i, Tobia ba Yedaya. I’andrö Yehowa khö Zakharia ena’ö ihalö wirö hegöi ana’a si so khöra ba i’oguna’ö da’ö ba wangehaogö ’dakula’. (Zakharia 6:11) Hadia tefazökhi dakula andre ena’ö labe’e ia khö Gubernur Zerubabeli soroi ba mado Yehuda hegöi nga’ötö Dawido? Tenga. Iwa’ö Yehowa khö Zakharia ena’ö ibe’e dakula andrö ba högö Gere Sebua sotöi Yosua. Tatu manö, ahöli-höli dödö niha samaigi zalua andre.
13 Hadia da’ö geluahania wa Ere Sebua sotöi Yosua zi tobali razo? Tenga. Yosua andre tenga nga’ötö Dawido, andrö wa tenga sinangea tobali ia razo. Da’a zo’amaedolagö hadia zalua ba zi so miföna khö zi samösa razo hegöi ere nifotöi Lewiö. Itutunö Sura Ni’amoni’ö wa Lewiö andre ya’ia da’ö Yesu Keriso.—Yesaya 11:1; Matai’o 2:23.
14. Hadia nifalua Yesu börö me no tobali ia Razo hegöi Ere Sebua?
14 Yesu andre Razo hegöi Ere Sebua. Ya’ia zondrönia’ö ngawawa mala’ika Yehowa ba iforege wolumö’ö nono mbanua Lowalangi moroi ba gulidanö si lö sökhi andre. (Yeremia 23:5, 6) Börö me ituhini wamatörö Lowalangi Keriso ba ilumö’ö nono mbanua Yehowa, andrö wa ba zi lö aratö ihori fefu soi. (Fama’ele’ö 17:12-14; 19:11, 14, 15) Hiza’i, fatua lö alua da’ö, Yesu mazui Lewiö moguna ifalua halöwö sebua.
IFAZÖKHI GOSALI
15, 16. (a) Hewisa wamohouni hegöi wangamoni’ö ono mbanua Lowalangi iada’a, ba haniha zamalua ya’ia? (b) Hewisa gulidanö na no awai Wamatörö Keriso ba zi Saribu Fakhe?
15 Baero tobali Razo hegöi Ere Sebua, i’okhögö göi Yesu halöwö ba ’wolau osali khö Yehowa’. (Baso Zakharia 6:13.) Me 1919, ifalua halöwö da’a me iheta nono mbanua Lowalangi moroi ba agama faya, Babilona Sebua. Ibohouni mbanua niha Keriso ba ifili ”zawuyu andrö, si lö faröi, satua-tua”. Da’a ngawawa ndra talifusöda nibayoini same’e fanuturu lala ba halöwö si tohude nifalua ba gulidanö, si no tobali faosatö gosali sebua ba wamati. (Matai’o 24:45) I’amoni’ö göi nono mbanua Lowalangi ba itolo ira ena’ö lö ra’iö lala wamosumange nifaluara.—Maleakhi 3:1-3.
16 Mamatörö Yesu hegöi si 144.000 razo ba ere ba zi saribu fakhe fa’ara. Ba götö da’ö, latolo niha si lö faröi ena’ö tola mo’ahonoa ira. Na no awai lafalua halöwö da’a ira razo hegöi ere, hatö samosumange Yehowa zi toröi ba
gulidanö. Ba gafuriata, sindruhu-ndruhu mubohouni wamosumange satulö!FAO BA HALÖWÖ FANGOTOMOSI
17. Hadia nifabu’u Yehowa ba niha Yahudi, ba hadia mbuania khöra?
17 Hewisa dödö niha Yahudi ba duria nifa’ema Zakharia? No ifabu’u Yehowa wa itolo ba ilumö’ö ira irege tola la’asiwaisi gosali andrö. Bu’usa li da’a zame’e khöra dötönafö. Hiza’i, börö me lö atoto ira, te so khöra wa’aombö-aombö dödö hadia tola la’asiwaisi halöwö soya andrö mazui lö’ö. Andrö, ibe’e khöra Zakharia wehede si tola mangeheta fa’ata’u hegöi fa’aombö-aombö dödöra. Iwa’ö Yehowa wa ato niha si ”möi manolo ba wolau osali Yehowa” simane ira Helida’i, Tobia ba Yedaya. (Baso Zakharia 6:15.) Faduhu dödö niha Yahudi wa ituhini halöwöra Yehowa. Ifuli so khöra wa’abarani ba wangehaogö osali hewa’ae lö itehegö razo Persia halöwö da’ö. Fanaisi andre hulö simane hili sebua ba lala nitöröra, hiza’i i’anemai’ö iheta da’ö Yehowa. Ba gafuriata, awai mufazökhi gosali me döfi 515 SM. (Gesera 6:22; Zakharia 4:6, 7) Hiza’i, fehede Yehowa andre i’amaedolagö zalua sabölö ebua iada’a.
Lö irai olifu Yehowa wa’omasi si no taforoma’ö khönia! (Faigi ngenoli si-18, 19)
18. Hewisa wa’alua ba götöda iada’a Zakharia 6:15?
18 Iada’a, zuta niha zamosumange Yehowa. Omuso sibai dödöra börö me tola labe’e ngawalö zi sökhi ni’okhögöra simane inötö, fa’abölö, hegöi gokhötara ba wanuhini osali sebua ba wamati khö Yehowa. (Gamaedola 3:9) Tola göi faduhu dödöda wa i’ame’egö tödö hadia nifaluada Yehowa ba wotuhini ya’ia. Törö tödömö wa Helida’i, Tobia, Yedaya la’ohe wirö hegöi ana’a, ba i’oguna’ö da’ö Zakharia ba wangehaogö dakula. Dakula andre tobali ’famasugi ba dödö’ ba zi no lafalua ba wamosumange satulö. (Zakharia 6:14) Lö irai i’olifugö Yehowa hadia zi no tafalua hegöi fa’omasi si no taforoma’ö khönia.—Heberai’o 6:10.
Omuso dödöda börö me fao ita ba organisasi si lö irai tebulö, si lö ameta’uö, ba si so sagötö fa’ara
19. Hadia zinangea tafalua börö me no tafaha’ö ita ba gangilata Zakharia?
19 Ba götö safuria andre, no lafalua halöwö sebua iraono mbanua Yehowa. Alua da’a börö howu-howu moroi khö Yehowa hegöi fondrönia’ö moroi khö Keriso. Omuso dödöda börö me fao ita ba organisasi si lö irai tebulö, si lö ameta’uö, ba si so sagötö fa’ara. Ta’ila göi wa hasambalö alua gohitö dödö Yehowa ba wamohouni famosumange satulö. Andrö, ame’egö tödö halöwö ni’okhögömö ba gotalua nono mbanua Yehowa ba ”ö’o’ö niwa’ö Lowalangiu Yehowa”. Na öfalua da’ö, tola ilumö’ö ndra’ugö Ere Sebua ba Razoda hegöi ira mala’ika. Falua fefu zi tola öfalua ba wotuhini famosumange satulö. Hasambalö irorogö ndra’ugö Yehowa irugi gangohorita götö danö andre hegöi ba zi sagötö fa’ara!
^ par. 11 Ena’ö ö’ila danö bö’önia nasa, faigi ”Pertanyaan Pembaca” ba Menara Pengawal 15 Mbaŵa si Lima 2015, nga’örö 29-30.