BA ZI sambua mbanua side-ide ba Gujarat, India, mubayagö idanö nama John tobali samösa Samaduhu’ö Yehowa me gangohorita ndröfi 1950-an. Hiza’i, John ba si dalima dalifusönia hegöi inania, ya’ira andre agama katolik, ba mamati sibai ira ba agamara. Andrö wa lasaisi wamati namara.

Sambua inötö, i’andrö amania khö John ba wamasao sambua amplop khö zi samösa talifusöda ira matua ba mbanua niha Keriso. Hiza’i ba zi hulö wongi da’ö, me ibokai John drum sebua, mesokho durunia. Hewa’ae simanö, omasi ia i’o’ö niwa’ö namania. Andrö wa ihalö nukha ba iböbö ba durunia si no mesokho, aefa da’ö ifasao amplop andrö.

Me irugi John nomo dalifusöda andrö, ibe’e amplop da’ö khö wo’omo dalifusöda. Samaduhu’ö Yehowa göi ia. I’ila duru John si no mesokho ba ibe’e wanolo. Ihalö kotak P3K, i’osi zinga zokho ba ifasa perban. Ifazökhi göi tesi ö John. Me ifalua da’ö fefu, ihaogö wahuhuosa khö John sanandrösa ba Zura Ni’amoni’ö.

Börö wa’ebua dödö dalifusöda ira alawe andrö, tebulö wangera-ngera John sanandrösa khö ndra Samaduhu’ö. Andrö wa ibe’e dombua wanofu khö dalifusöda andrö sanandrösa ba wa’afaehu hadia nifaduhusi tödö ndra Samaduhu’ö faoma ba nifaduhusi tödö Gereja Katolik. Isofu hadia Lowalangi Yesu ba hadia hasambalö mangandrö niha Keriso khö Maria. Börö me no ifaha’ö ia dalifusöda andre ba li Gujarati, tola ibe’e wanema li khö John ba li da’ö. Iforoma’ö wanema linia moroi ba Zura Ni’amoni’ö ba ibe’e khönia buku side-ide ”This Good News of the Kingdom”.

Me no aefa ibaso mbuku side-ide andrö, i’ila John wa nibasonia andrö no sindruhu. Möi ia khö gerenia ba ibe’e dombua wanofu si fagölö simane nibe’enia khö dalifusöda. Mofönu sibai gere andrö ba itebu Zura Ni’amoni’ö khö John. Mo’ao ia, ”No tobali’ö Satana! Foroma’ö khögu ayati zanguma’ö wa tenga Lowalangi Yesu. Foroma’ö ayati zanguma’ö wa lö moguna tasömba Maria. Foroma’ö khögu!” Tokea sibai John ba nifalua gere andrö. Iwa’ö khö gere andrö wa lö sa’ae irai möi ia ba gereja Katolik. Ba lö irai göi möi ia sa’ae!

Ibörögö ifaha’ö ia John khö ndra Samaduhu’ö, itema’ö zindruhu ba ifosumange Yehowa. Ba gafuriata, so ösa nösi nomonia zamalua simane da’ö. Arakhagö 60 fakhe aefa da’ö, laheto si so ba duru John lö mamalö möi famasugi ba dödönia ba wa’ebua dödö moroi ba niha Keriso sondrönisi ya’ia ba wamosumange Yehowa sandrohu fa’aurinia.​—II Korindro 6:4, 6.