1, 2. (a) Hadia wa’atulö nirasoida iada’a? (b) Hana wa tebai sindruhu-ndruhu tarasoi wa’atulö iada’a? (Faigi gambara ba wamobörö wamaha’ö.)

FEFU ita omasi tarasoi wa’atulö ba ena’ö lö fa’aombö-aombö dödö. Ta’andrö saohagölö khö Yehowa börö me ibe’e khöda ’wa’ohahau dödö moroi khö Lowalangi’. Da’a zame’e khöda fa’ahono dödö irege tola telumö’ö wangera-ngera hegöi nirasoida moroi ba wa’aombö-aombö dödö. (Filifi 4:6, 7) Börö me no talulu wa’aurida khö Yehowa, ta’okhögö ’wa’atulö khö Lowalangi’. Eluahania, ta’okhögö wahuwusa si sökhi khönia.​—Roma 5:1.

² Hiza’i iada’a, tenga inötönia khö Lowalangi ba wame’e fa’atulö ba zi sagörö ulidanö. Auri ita ba ginötö safuria, andrö wa oya gabula dödö sanga’asogö fa’aombö-aombö dödö. So ita ba gotalua niha si lö sökhi. (II Timoteo 3:1-4) Moguna göi talawa Zatana hegöi famaha’önia si fasala. (II Korindro 10:4, 5) Hiza’i, sanga’asogö khöda fa’aombö-aombö dödö sebua ya’ia da’ö fanaisi moroi ba nösi nomoda  si tenga samosumange Yehowa. So ösa ba gotaluara zango’aya hadia nifaduhusida tödö mazui labali’ö ita samabali ösi nomo. Tola manö lawa’ö wa laheta ita tobali ösi nomo na lö taböhöli wamosumange Yehowa. Hewisa wamaigida fanaisi moroi ba nösi nomoda? Ba hewisa ena’ö tarasoi wa’atulö na alua da’a?

3, 4. (a) Hadia lua-luania na tatema’ö wamaha’ö Yesu? (b) Ba ginötö hadia ia sindruhu-ndruhu abua tobali solo’ö khö Yesu?

³ I’ila Yesu wa so niha si lö manema’ö famaha’önia. I’ila göi wa moguna la’okhögö wa’abarani ira nifaha’önia börö me so niha zanaisi ya’ira. Fanaisi andre tola molua-lua ia ba wa’atulö yomo ba nomora. Imane Yesu, ”Böi miwa’ö tödömi, ba wolohe fa’atulö ba gulidanö so ndra’o; tenga ba wolohe fa’atulö möi ndra’o, ba wolohe fasöndrata möido. Ba wama’udu niha khö namania möi ndra’o, ba ba wama’udu ono alawe khö ninania ba ba wama’udu umönö ira alawe khö ninania matuania. Ba si fa’udu ba niha dania zoroi yomonia.”​—Matai’o 10:34-36.

⁴ Hadia geluaha wehede Yesu me iwa’ö, ”Böi miwa’ö tödömi, ba wolohe fa’atulö ba gulidanö so ndra’o”? Omasi ia ena’ö la’ila niha wa so lua-luania na tobali ira nifaha’önia. Tatu manö, ohitö dödö Yesu ya’ia da’ö ba wamaha’ö niha ba zindruhu sanandrösa khö Lowalangi, tenga ba wamabali ösi nomo. (Yohane 18:37) Hiza’i, moguna la’ila ira nifaha’önia wa lataögö wanandraigö na tobali ira solo’ö khönia, töra-töra na niha si fahuwu mazui ösi nomora lö latema’ö zindruhu.

5. Hadia nitaögö niha solo’ö khö Yesu?

⁵ Iwa’ö Yesu wa fanaisi moroi ba nösi nomo no sambua moroi ba danö bö’ö sinangea lataögö ira solo’ö khönia. (Matai’o 10:38) Ba wangomusoi’ö tödönia, moguna lö faröi ndra nifaha’ö Yesu ba ginötö la’o’aya mazui latimbagö ira ösi nomora. Hiza’i, abölö oya mbua nitemara moroi ba zi no laröi.​—Baso Mareko 10:29, 30.

6. Hadia zinangea tatörö tödöda na lasaisi ita ösi nomoda?

⁶ Hewa’ae lasaisi ita ösi nomoda börö me tafosumange Yehowa, hasambalö ta’omasi’ö ira. Hiza’i, moguna tatörö tödöda wa abölö ta’omasi’ö Lowalangi hegöi Keriso moroi ba wa’omasida ba niha. (Matai’o 10:37) Moguna göi tatörö tödöda wa tola i’oguna’ö Satana wa’omasida ba nösi nomoda ena’ö faröi ita khö Yehowa. Datatutunö ngawalö zanaisi si tola alua ba hewisa wanaögöda da’ö.

7. Hewisa zinangeania wamaigimö salua khömö na tenga samosumange Yehowa ngambatömö?

⁷ No ifangelama ita Sura Ni’amoni’ö wa dozi niha sangowalu ”falukha sa wamakao” mazui abula dödö. (I Korindro 7:28) Na mangowalu ndra’ugö ba niha si tenga samosumange Yehowa, itugu monönö wa’afawuka wangera-ngera hegöi fa’aombö-aombö dödö ba wongambatömö. Hiza’i, moguna ö’okhögö lala wangera-ngera Yehowa ba ngawalö zalua khömö. Iwa’ö wa tebai fasambua mazui fabali auri ita khö ngambatöda ha börö me tenga samosumange Yehowa ia. (I Korindro 7:12-16) Na tenga samosumange Yehowa wo’omomö ira matua ba  na lö idönia’ö ami ba wamosumange satulö, moguna ö’ame’egö tödö ia si tobali högö yomo ba nomo. Ba na tenga samosumange Yehowa wo’omomö ira alawe, moguna ö’omasi’ö ia ba ö’asogö zoguna khönia.​—Efeso 5:22, 23, 28, 29.

8. Hadia wanofu-nofu si tola ösofu khöu samösa na so nola-ola nibe’e wo’omomö ba wamosumange Lowalangi?

⁸ Hadia zinangea öfalua na ibe’e khömö nola-ola fo’omomö ba wamosumange Lowalangi? Fo’omo dalifusöda ira alawe, imane khönia wa tola möi ia manuriaigö ha ba ginötö si no mutatugöi ero migu. Na alua khömö zimane da’ö sofu khöu samösa, ’Hadia i’andrö khögu fo’omogu ena’ö uböhöli wamosumange Yehowa? Na tenga, hadia tola ufalua ni’andrönia?’ Na ö’okhögö lala wangera-ngera satulö, lö oya gabula dödö nitaögömö ba wongambatö.​—Filifi 4:5.

9. Hewisa niha Keriso ba wamaha’öra iraonora ba wamosumange zatuara si tenga si sara lala wamati?

⁹ Abua khömö ba wamaha’ö iraonomö na tenga samosumange Yehowa wo’omomö. Duma-dumania, moguna öfaha’ö ira ba wolo’ö mene-mene Zura Ni’amoni’ö, ”Fosumange namau, awö ninau.” (Efeso 6:1-3) Hiza’i, hadia zinangea öfalua na lö i’o’ö goi-goi Zura Ni’amoni’ö fo’omomö? Tola öbe’e duma-duma si sökhi ba ndraonomö na öfosumange wo’omomö. Angeraigö mbua-bua si sökhi ni’okhögönia ba fatunö khönia wa ö’andrö saohagölö ba ngawalö zi sökhi si no ifalua. Böi wa’ö föna ndraonomö ngawalö zi lö sökhi sanandrösa khö wo’omomö. Hiza’i, tutunö khöra wa fefu niha tola lafili hadia lafosumange Yehowa mazui lö’ö. Na öfaha’ö ndraonomö ba wamosumange zatuara si tenga si sara lala wamati, duma-duma si sökhi nifaluara möi fanolo khö wo’omomö ena’ö ifaha’ö ia sanandrösa khö Yehowa.

10. Hewisa zatua si no tobali niha Keriso wamaha’öra iraonora ba wangomasi’ö Yehowa?

¹⁰ So ösa wo’omo si tenga si sara lala wamati somasi na lafalua gowasa niha baero iraonora mazui na lafaha’ö ira ba wamaha’ö agama faya. So ösa wo’omo  ira matua si lö manehegö khö wo’omonia ira alawe niha Keriso ba wamaha’ö iraonora sanandrösa ba Zura Ni’amoni’ö. Hiza’i, hewa’ae alua da’a, moguna i’alui lala fo’omo ira alawe ba wamaha’ö iraononia ba zindruhu. (Halöwö Zinenge 16:1; II Timoteo 3:14, 15) Duma-dumania, so wo’omo ira matua si tenga si sara lala wamati si lö omasi na ifaha’ö ndraonora fo’omonia ba Zura Ni’amoni’ö mazui ba we’amöi ba gangowuloa. Moguna i’ame’egö tödö gangetula da’ö foʼomonia ira alawe. Hiza’i, ero so ginötö tola itutunö ba ndraononia hadia nifaduhusinia tödö irege lafaha’ö ira sanandrösa khö Yehowa hegöi goi-goinia sanandrösa ba zatulö hegöi si fasala. (Halöwö Zinenge 4:19, 20) Ba gafuriata, iraono zangai angetula hadia lafosumange Yehowa mazui lö’ö. * (Faigi nisura ba gahe zura.)—V Moze 30:19, 20.

11. Hana wa tola lasaisi ita ösi nomoda si tenga samosumange Yehowa?

¹¹ Me awena tabörögö tafaha’ö ita khö ndra Samaduhu’ö Yehowa, te lö i’anemai’ö tafatunö ba nösi nomoda. Hiza’i, me no itugu aro wamatida, aboto ba dödöda wa moguna tafatunö khöra wa omasi ita tafosumange Yehowa. (Mareko 8:38) Te lasaisi ndra’ugö ira ösi nomomö börö wa’alöfaröimö khö Lowalangi. Datatutunö hadia zi tola öfalua ena’ö tola örorogö wa’atulö ba lö faröi ndra’ugö khö Yehowa.

12. Hana wa lasaisi ita ösi nomoda, hiza’i hewisa wangoroma’öda wa ta’ame’egö tödö hadia nirasoira?

¹² Moguna ö’ila hadia nirasoi nösi nomomö si tenga si sara lala wamati. Omuso dödöda börö me no ta’ila zindruhu moroi ba Zura Ni’amoni’ö. Hiza’i, tola manö so ba wangera-ngera nösi nomoda wa no lalimo ita mazui no fao ita ba ngawawa agama si lö sökhi. Te so ba wangera-ngerara wa lö ta’omasi’ö ira börö me lö fao ita khöra ba wamalua gowasa si no to’ölö lafalua. Te ata’u göi ira ma tefakao ita na no mate. Moguna aboto ba dödöda hadia nirasoira ba tahaogö tafondro-ndrongo hadia niwa’öra khöda ena’ö ta’ila hana wa aombö dödöra khöda. (Gamaedola 20:5) Iforege sinenge sotöi Faulo ena’ö aboto ba dödönia ”niha fefu” irege tola ifa’ema khöra duria somuso dödö. Na taforege ena’ö aboto ba dödöda nösi nomoda, möi fanoloda da’ö ena’ö ta’ila lala wamaha’öda ya’ira ba zindruhu.​—I Korindro 9:19-23.

13. Hewisa lagu wahuhuosada ba nösi nomoda si tenga si sara lala wamati?

¹³ Haogö wahuhuosa. Imane Sura Ni’amoni’ö, ”Böi tebulö khömi wangehao fehedemi.” (Kolose 4:6) Lö aoha wamalua da’a. Hiza’i, tola ta’andrö geheha ni’amoni’ö khö Yehowa ba wanolo ya’ita ena’ö so khöda wa’ebolo dödö ba  sökhi laguda khöra. Lö moguna fabu’a-bu’a ita khöra sanandrösa ba nifaduhusira tödö si fasala. Na lawa’ö mazui na lafalua hadia ia zi möi mangafökhöi’ö tödöda, tola ta’o’ö nifalua ndra sinenge. Imane Faulo, ”Latandrawaisi ndra’aga, ba mafahowu’ö ira, lagohi ndra’aga, ba mataha dödöma; laböbögö khöma zi lö sökhi, ba mangandrö ndra’aga.”​—I Korindro 4:12, 13.

14. Hadia mbuania na ta’okhögö gamuata si sökhi?

¹⁴ Rorogö gamuata si sökhi. Hana wa moguna da’a? Na sökhi lagu wahuhuosada, tola möi fanoloda ena’ö tarorogö wa’atulö ba nösi nomoda. So mbua si sökhi tanö bö’ö na ta’okhögö gamuata si sökhi. (Baso I Fetero 3:1, 2, 16.) Moroi ba duma-dumamö, tola la’ila ira ösi nomomö wa ira Samaduhu’ö Yehowa la’okhögö wa’owua-wua dödö ba wongambatö, larorogö ndraonora, lafaudugö wa’aurira ba goi-goi Zura Ni’amoni’ö ba mo’eluaha wa’aurira. Hewa’ae lö irai latema’ö zindruhu ösi nomoda, omuso dödöda börö me ta’ila wa möi fangomusoi’ö dödö Yehowa mbua-bua si sökhi ni’okhögöda.

15. Hadia manö zinangea tatatugöi ena’ö lö fabu’a-bu’a ita ba nösi nomoda?

¹⁵ Tatugöi hadia nifaluamö. Angeraigö hadia manö zalua sanga’asogö fa’afabö’ö mbua gera-era ba gotaluami. Ba tatugöi hadia nifaluamö. (Gamaedola 12:16, 23) Da’a nifalua zi samösa dalifusöda ira alawe si so ba Australia. Fatuwu sibai nama matuania ba zindruhu ba itaria mofönu ia. Andrö, fatua lö möi ira lafalukhaisi, ya’ia hegöi fo’omonia la’andrö wanolo khö Yehowa ena’ö lö mofönu ira ba wame’e fanema li. Lahenaigö latatugöi duho si sökhi sinangea latutunö. Aefa da’ö, ena’ö lö fabu’a-bu’a ira sanandrösa ba agama, latatugöi hawa’oya ginötö ni’oguna’öra ba wamalukhaisi ya’ia.

16. Hewisa ena’ö lö hadöi ba dödömö wa fasala ndra’ugö na lö omuso dödö nösi nomomö khömö?

¹⁶ Tatu manö, hasambalö so wa’afabö’ö mbua gera-eramö ba nösi nomomö si tenga si sara lala wamati. Börö me ö’omasi’ö ira ba omasi’ö ö’omusoi’ö dödöra te so ba dödömö wa fasala ndra’ugö na alua da’ö. Hiza’i, törö tödömö wa moguna abölö aro wa’alöfaröimö khö Yehowa moroi ba wa’omasimö ba nösi nomomö. Na la’ila da’a ösi nomomö, aboto ba dödöra wa moguna sibai wamosumange Yehowa. Tebai öfaso niha ba wanema’ö sindruhu. Hiza’i, tola öforoma’ö khöra hewisa wanolo Yehowa ndra’ugö börö me öfosumange ia. Sindruhunia, ibe’e göi khöra ginötö Yehowa simane nibe’enia khöda tobali samosumange ya’ia.​—Yesaya 48:17, 18.

17, 18. Hadia zanolo ya’ugö na so nösi nomomö sondröi Yehowa?

¹⁷ Afökhö sibai na so nösi nomo ni’efasi ba gangowuloa mazui  sangaröu’ö ya’ia ba mbanua niha Keriso. Fa’afökhönia hulö simane nifahö-fahö wöda. Hewisa ena’ö tola ötaögö da’ö?

¹⁸ Osambua’ö dödömö ba wamosumange Yehowa. Na örasoi wa’afökhö simane da’ö, moguna ö’aro’ö wamatimö. Baso Zura Ni’amoni’ö ero ma’ökhö, fa’anö ba ondrasi gangowuloa, böi aetu manuriaigö, ba angandrö khö Yehowa ena’ö ibe’e khömö wa’abölö ba wanaögö ya’ia. (Yuda 20, 21) Hewisa na lö taya wa’afökhönia hewa’ae no öfalua da’ö fefu? Böi awuwu! Osambua’ö dödömö ba wamosumange Yehowa. Na inötönia, da’a zanolo ya’ugö ba wo’angenanöi hadia ni’era-era hegöi nirasoimö. Da’a zalua khö zanura Zinunö 73. No irai abua khönia ba wo’angenanöi fangera-ngera hegöi nirasoinia. Hiza’i, börö me lö mamalö ifosumange Yehowa, tetolo ia irege tola ifuli i’okhögö lala wangera-ngera satulö. (Zinunö 73:16, 17) Tola göi alua khömö zimane da’ö.

19. Hewisa wangoroma’ömö wa ö’ame’egö tödö lala nifalua Yehowa ba wame’e degu-degu ba nono mbanuania?

¹⁹ Ame’egö tödö degu-degu moroi khö Yehowa. I’ila Lowalangi wa moguna ba niha fefu degu-degu nibe’enia. Duma-dumania, ba niha ni’efasi ba gangowuloa. Hewa’ae afökhö sibai na labe’e degu-degu ba niha ni’omasi’öda, hiza’i da’a zanolo ya’ira ena’ö ifuli mangawuli ira khö Yehowa ba zi so miföna. (Baso Heberai’o 12:11.) Gasa-gasa da’ö, moguna ta’ame’egö tödö wanuturu lala moroi khö Yehowa ena’ö ”böi fabaya” ita ba niha si no mu’efasi ba gangowuloa. (I Korindro 5:11-13) Lö aoha da’a. Hiza’i, böi fahuhuo ita khöra ba HP, SMS, sura, e-mail mazui media sosial.

20. Hadia zi lö aetu tatötöna?

²⁰ Böi taya dötönafömö! Fa’omasi ’ba idöna-döna fefu hadia ia’. Andrö, lö aetu manötöna ita wa tola ifuli mangawuli niha ni’omasi’öda khö Yehowa. (I Korindro 13:7) Na ö’ila wa ibörötaigö ifabö’öni mbua-buania, tola ölau mangandrö salahinia ena’ö te’aro’ö ia ba Zura Ni’amoni’ö ba itema’ö wogaoni Yehowa, ”Fuli’ö khögu.”​—Yesaya 44:22.

21. Hadia zinangea öfalua na lasaisi ndra’ugö ösi nomomö börö me ö’o’ö Yesu?

²¹ Iwa’ö Yesu wa moguna abölö ta’omasi’ö ia moroi ba niha gulidanö. Faduhu dödö Yesu wa so wa’abarani khö ndra nifaha’önia ba wondrorogö wa’alöfaröira khönia hewa’ae na lasaisi ira ösi nomora. Andrö, na so nösi nomomö zanaisi ya’ugö börö me ö’o’ö Yesu, moguna ö’odaligö Yehowa. Andrö wanolo moroi khönia ena’ö tola anau gölömö. (Yesaya 41:10, 13) Tatu omuso dödömö börö me ö’ila wa omuso dödö Yehowa hegöi Yesu khömö, ba lafahowu’ö wa’alöfaröimö.