TUMBU ndra’o me 1923 ba Hemsworth, sambua banua si so ba Yorkshire, Inggris. So samösa ga’agu ira matua, töinia Bob. Me siwa fakhe ndröfigu, itema mbuku bapagu sanutunö wa no ilimo niha agama faya. Toröi-röi ba dödö bapagu zi no ibaso. Lö omasi ia ba niha sondrönia’ö agama samini tödö. Ba zi hauga fakhe aefa da’ö, möi Bob Atkinson ba nomoma ba ifuta sambua rekaman huhuo dalifusöda Rutherford. Ma’ila wa huhuo da’ö moroi ba ngawawa samazökhi mbuku si no ibaso Bapa. I’andrö satuagu khö dalifusöda Atkinson ena’ö fao ia khöma manga ero bongi ba ibe’e wanema li moroi ba wanofu-nofuma sanandrösa ba Zura Ni’amoni’ö. Ikaoni ndra’aga we’amöi ba gangowuloa ba nomo zi samösa dalifusöda, so hauga kilometer moroi ba nomoma. Ibörögö asese möiga ba gangowuloa, ba tefazökhi sambua mbanua niha Keriso side-ide ba Hemsworth. Lö ara aefa da’ö, asese mörö ba nomoma hamba zona (iada’a lafotöi ia satua samasui) ba asese göi fao khöma manga ndra perintis si so ba mbanua niha Keriso sahatö ba khöma. Tobali ira duma-duma si sökhi khögu.

Me luo da’ö, labörögö sambua bisnis ira ösi nomogu. Hiza’i, imane Bapagu khö ga’agu, ”Na omasi’ö tobali perintis, taduhö bisnis da’a.” Fao dödö Bob, ba me 21 fakhe ndröfinia, iröi nomo tobali ia perintis. Dua fakhe aefa da’ö, me 16 fakhe ndröfigu, tobalido göi perintis. Ba luo satu hegöi migu, fao ndra’o manuriaigö ba niha bö’ö, hiza’i ba ngaluo bö’ö, manuriaigö samösa ndra’o. U’oguna’ö fonograf hegöi kartu kesaksian ya’ia da’ö kartu side-ide si so duria sadogo-dogo moroi ba Zura Ni’amoni’ö. So samösa niha nifaha’ögu ba Zura Ni’amoni’ö salio tedou ba wamati. Ato göi nösi nomonia si tobali Samaduhu’ö. No howu-howu Yehowa da’ö. Ba ndröfi aefa da’ö, latuyu ndra’o hegöi Mary Henshall tobali perintis istimewa. Lafatenge ndra’aga ba Cheshire, mbanua si lö irai muturiaigö.

Sagötö Wasuwöta Gulidanö II, moguna lafalua halöwö ira alawe si möi fotuhini wasuwöta. Börö me lö fao ndra rohaniwan ba wasuwöta, mamane  tödöma wa tola lö fao ndra’aga börö me ya’aga perintis istimewa. Hiza’i, lö fao dödö pengadilan, ba lahukudo 31 hari ba gurunga. Ba ndröfi aefa da’ö, me 19 fakhe ndröfigu, dua kali möido föna pengadilan börö me itegudo tödögu side-ide ba wanuhini fasuwöta. Hiza’i, ba zi dua kali andrö, te’efasi ndra’o. Ba wanaögögu da’ö fefu, u’ila wa eheha ni’amoni’ö zanolo ya’o ba Yehowa zame’e te’aro’ö ba te’abölö’ö ndra’o.​—Yesaya 41:10, 13.

Falukhado khö Arthur Matthews me döfi 1946, lö ara me no aefa ia ba gurunga. Tölu waŵa fa’ara lakuru ia börö me itimbagö wefao ba wasuwöta. Lö ara aefa da’ö, toröi ia ba Hemsworth khö dalifusönia Dennis, samösa perintis istimewa. No ifaha’ö ira amara sanandrösa khö Yehowa i’otarai me ide-ide ira, ba tebayagö ira idanö me awuyu-wuyu ndröfira. Lö ara me no labörögö merintis, lafindrakö Dennis ba Irlandia. Andrö wa lö nawö Arthur merintis. Omasi zatuagu khö Arthur, börö me ya’ia perintis sowölö-ölö ba si sökhi lagu. Andrö wa lakaoni ena’ö toröi ia khöra. Me möido ufaigi ndra satuagu, asese fao ndra’aga Arthur ba wanasa wiga na no awai manga. Ibörögö faoma mafa’ohe’ö zura khö nawöma. Me 1948, lafuli labe’e ba gurunga Arthur, tölu waŵa wa’ara. Mangowalu ndra’aga me baŵa si Sara 1949, ba ma’osambua’ö dödöma wa lö mabato wangai halöwö safönu inötö. Ma’öna-önai’ö wa’aurima, ba ma’oguna’ö ngaluo liburma ba waneteu mbua zinanö ena’ö masöndra gefe. Börö howu-howu Yehowa, lö mamalö tola malau merintis.

Me no arakhagö döfi aefa da’ö, lafatenge ndra’aga ba Irlandia Utara, si oföna ba Armagh aefa da’ö ba Newry. Niha Katolik zato ba zi dombua banua andrö. Ba mbanua da’ö, asese so wanahö-nahö dödö ba agama, andrö wa mahaogö sibai na manuriaigö ndra’aga. Möiga ba gangowuloa ba nomo dalifusöda si sambua ngambatö, so 16 kilometer moroi ba nomo si toröi ndra’aga. So mato dawalu niha sangondrasi. Itaria ba da’ö malau mörö. Mörö ndra’aga ba zalo, ba sihulö wonginia faoga manga. Omuso dödöma me ma’ila wa ato ndra Samaduhu’ö ba mbanua da’ö iada’a.

Ga’agu ira matua ba fo’omonia, Lottie, tobali ira perintis istimewa ba Irlandia Utara. Me 1952, daöfa ndra’aga ma’ondrasi kebaktian distrik ba Belfast. So samösa dalifusöda sangokhögö fa’ebua dödö sanehegö khöma toröi ba nomonia. Toröi göi ba da’ö dalifusöda Pryce Hughes, hamba cabang ba Inggris. Ba zi sambua inötö ba zi bongi, matutunö sambua mbuku side-ide si bohou, God’s Way Is Love, nifazökhi soguna ba niha Irlandia. Itutunö dalifusöda Hughes wa abua ba wanuriaigö ba niha Katolik ba Republik Irlandia. Lafaso ndra talifusöda ena’ö laröi nahiara, ba lafaso niha bö’ö ira ere ba wolawa ya’ira. Imane Pryce, ”Moguna so ndra talifusöda si no mongambatö sangokhögö moto ba wamalua kampanye si tohude andre ba wame’e mbuku side-ide da’a ba zi sagörö soi.” * (Faigi nisura ba gahe zura.) Ba ginötö da’ö mawa’ö wehede, ”Omasiga!”

 So sambua nahia ba Dublin si tola toröi ndra perintis ero inötö ya’ia da’ö ba nomo Ma Rutland, samösa dalifusöda ira alawe si lö faröi ba wamosumange Yehowa ba zi no hauga fakhe. Toröi ndra’aga ba da’ö ba zi hauga hari, ba mafamawa ösa gama-gamama. Aefa da’ö, ya’aga si daöfa möiga yawa ba hondra Bob si so gandrenga ba möiga ma’alui moto. Masöndra sambua moto si no atua hiza’i baga, ba ma’andrö khö zokhö moto ena’ö ifasao moto andrö ba nahiama börö me fefu ndra’aga lö ma’ila ma’ohe. Tanö owinia, modadao Arthur ba naha wemörönia ba i’osofindrakö kopling moto ia. Sihulö wonginia, me ibe’e baero moto moroi ba garasi, tohare samösa dalifusöda utusan injil sotöi Mildred Willett (sangowalu khö John Barr ba gafuriata). I’ila i’ohe moto! Ifaha’öga wolohe moto, ba aefa da’ö tola sa’ae mofanöga.

Aefa da’ö, moguna göi ma’alui nahiama. Lafatunö khöma ira talifusö ena’ö lö toröi ndra’aga ba karavan, börö me tola latunu da’ö ira niha sanaisi. Andrö, ma’alui nomo si tefaudu, hiza’i lö hadöi. Bongi da’ö, mörö ndra’aga ba moto. Mahemolunia, ha karavan si so warate si dua tingkat nisöndrama. Tobali omoma da’ö. Sahöli-höli dödöma, so danö ni’okhögö niha si sökhi tödö sanehegö khöma ba wondröi karavanma ba da’ö. Manuriaigö ndra’aga 16 irugi 24 kilometer moroi ba nahia karavan. Aefa da’ö, mafindrakö karavanma ba nahia si fabö’ö, ba möiga manuriaigö ba nahia si oföna maröi karavan.

Ma’ondrasi fefu nomo si so ba Republik Irlandia tanö raya gatumbukha, ba lö ato niha sanaisi ya’aga. Töra 20.000 mbuku side-ide nibe’ema, ba mafa’ohe’ö ba gödo ndraha Inggris fefu döi niha sadöni tödö nifalukhaisima. Iada’a, so ngaotu ndra Samaduhu’ö si so ba da’ö. No sambua howu-howu sebua da’a!

Hauga fakhe aefa da’ö, lafindrakö ndra’aga ba London tanö raya. Me no aefa hauga migu, latelefo Arthur ira talifusö moroi ba gödo ndraha Inggris ba la’andrö khönia ena’ö tobali ia satua samasui mahemolunia! Lafaha’öga ba zi samigu, aefa da’ö möiga ba nahia halöwöma ba Skotlandia. Andrö wa lö oya ginötö Arthur ba wama’anö huhuonia, hiza’i edöna ia ba wamalua fefu halöwö nitemania ba wamosumange Lowalangi hewa’ae abua. Möi fangaro’ögu duma-dumania. Owua-wua dödöma ba halöwöma andre. Me no aefa hauga fakhe manuriaigö ndra’aga ba nahia si lö irai muturiaigö, owua-wua dödöma börö me falulu fohalöwö ndra’aga khö ndra talifusöda.

Me lakaoni Arthur we’amöi ba Sekolah Gilead ba ndröfi 1962, moguna mahalö gangetula sebua. Mufalua zekola andre ba zi fulu waŵa, hiza’i tebai faodo börö me lö mukaoni ndra’odo. Mahalö gangetula wa moguna itema wogaoni da’ö Arthur. Börö me lö hadöi nawögu merintis, ifuli ifatenge ndra’o gödo ndraha ba Hemsworth tobali perintis istimewa. Me mangawuli Arthur döfi aefa da’ö, tobali ia pengawas distrik ba mbanua Skotlandia, Inggris tanö yöu hegöi Irlandia Utara.

Me 1964, labe’e halöwö Arthur tobali hamba cabang ba Republik Irlandia. Ba wamobörö, aombö dödögu we’amöi ba Mbetieli börö me omasido sibai halöwö famasui. Hiza’i, u’andrö sibai saohagölö me utema halöwö si tohude mohalöwö ba Mbetieli. Faduhu dödögu wa na tatema fefu halöwö nibe’e khöda hewa’ae ambö omasi ita, hasambalö ifahowu’ö ita Yehowa. Ba Mbetieli, ufalua halöwö si to’ölö mufalua ba gödo, wama’anö publikasi, mondrino, hegöi ba wangehaogö Mbetieli. No irai göi tobali Arthur pengawas distrik ba tola falukhaga khö ndra talifusöda ba zi sagörö soi andrö. Börö halöwö da’ö hegöi me ma’ila wa’atedou wamati niha nifaha’öma ba Zura Ni’amoni’ö, itugu aro wahuwusama khö ndra talifusöda ba Irlandia. No howu-howu sebua da’a!

Kebaktian internasional si oföna ba Irlandia, lafalua ia me 1965 ba Dublin. * (Faigi nisura ba gahe zura.) Hewa’ae so wanaisi sabölö-bölö, tola mufalua kebaktian sebua andrö. So 3.948 zangondrasi ba 65 nibayagö idanö. So 3.500 ndra talifusöda moroi ba soi bö’ö si toröi ba nomo niha si so ba Dublin. Fefu niha sanehegö khö ndra talifusöda andre toröi ba nomora, latema zura wangandrö saohagölö. Lasuno göi mbua-bua si sökhi ni’okhögö ndra talifusöda. Sindruhu-ndruhu mbua si sökhi da’a ba Irlandia.

Me 1966, gödo ndraha Dublin zamaigi-maigi Irlandia tanö yöu hegöi tanö raya. No aröu faehu da’a ba zalua ba soi da’ö börö me niha si so ba da’ö oi fatuwu ira khö nawöra börö politik hegöi agama. Omuso dödöma börö me ma’ila wa ato niha Katolik hegöi Protestan si fao ba zindruhu hegöi ba wamosumange Yehowa.

Me 2011, tebulö zalua ba wa’aurima me no la’orudugö gödo ndraha Inggris faoma Irlandia, ba labe’e halöwöma ba Mbetieli London. Me luo da’ö, göna Arthur wökhö Parkinson ba ibörötaigö aombö dödögu ba wökhönia andrö. Me 20 mbaŵa si Lima 2015, mate nawögu ba wa’auri si no fao khögu ba zi 66 fakhe fa’ara.

Ba zi hauga fakhe aefa da’ö, lö mamalö urasoi wa’abu dödö ba fa’afawuka wangera-ngera. Ba zilalö, lö irai iröido Arthur. Omasido falukha khönia! Hiza’i, na alua khömö zimane da’a, tola itugu ahatö ndra’ugö khö Yehowa. Omuso dödögu börö me u’ila wa ato ndra talifusöda sangomasi’ö Arthur. Utema zura moroi khö ndra talifusöda ba Irlandia, Inggris hegöi ba Amerika Serikat. Te’aro’ö ndra’odo ba zura andre hegöi ba wondrara dödö moroi khö nakhi Arthur sotöi Dennis ba fo’omonia Mavis, hegöi moroi ba dana nonogu sotöi Ruth ba Judy.

Ayati sanga’aro’ö ya’odo ya’ia da’ö Yesaya 30:18. Imane, ”Ifogasa Yehowa wangebua tödö khömi, andrö wa ahou dödönia wangahakhösi tödö ya’ami. Lowalangi ba wa’atulö sa Yehowa. Ya’ahowu dozi sanötöna khönia.” Terara dödögu börö me u’ila wa ibaloi ginötö si tefaudu Yehowa ba wanga’asiwai fefu gabula dödöda hegöi ba wame’e khöda halöwö si sökhi ba gulidanö si bohou.

Na u’angeraigö wa’aurima ba zilalö, u’ila wa Yehowa zame’e fanuturu lala hegöi samahowu’ö halöwö fanuriaigö nifaluama ba Irlandia! No sambua töi si sökhi khögu fao ba wanuhini halöwö da’a. Atulö wa tefahowu’ö niha samalua somasi Yehowa.